Mɑ sɑŋ Tɑcɑɑ kɛ́.

Mɑ sɑŋ nyɑ́ hətɛ nɑŋŋ nyəntɛ kɛ́ nɑ mɑ lotu tənɑ.

2 Mɑ sɑŋ Tɑcɑɑ kɛ́.

Mɑ kɑɑ sɔɔ nyɑ́ kʋpɑntʋ nɑtəlɩ.

3 Nyɑ́ hɩɩsəɣənɑ mɑ ɩsɑɣɑtʋ tənɑ,

nɑ ń wɑɑkɩ mɑ kʋtɔməŋ tənɑ.

4 Nyɑ́ yɑkənɑ-m pəlɑɑʋ tɑɑ,

nɑ ń hʋlə́ɣɩ́-m suulu nɑ ń lɑkɩ-m kʋpɑntʋ.

5 N kpɑɑsəɣɩ mɑ toŋ kɛ mɑ kpɑtəlɑɣɑ wɑɑtʋ,

nɑ ń mələɣənɑ-m ɩfepile tɑɑ ɩsɩɩ hɛkəlɛ.

6 Tɑcɑɑ nyɑɣɑlɛ tɑmpɑnɑ hɑlʋ.

Nyɑ́ tɑɣɑnəɣənɑ mpɑ pɑ ɩsɛ pɑ tɔkɩ tɔ pɑ tɔm.

7 Nyɑ́ hʋlənɑ Moisi kɛ nyɑ́ mpɑɑŋ,

nɑ ń hʋlɩ́ Ɩsɛɣɛlɩ nyə́mɑ kɛ nyɑ́ kookɑlənɑɑ.

8 Tɑcɑɑ kɛ suulu nɑ pətɔɔtəlɛ tʋ kɛ́,

nyɑ́ kʋpɑntʋ wɛ sɔɣɔntʋ.

Pəyele nn mʋɣɩ pɑ́ɑ́nɑ́ kɛ lɔŋ.

9 Nn kɑləɣɩ kʋtɑmsɑ,

pəyele nn tɔkəɣənɑ yʋlʋ kɛ nyɑ́ tɑɑ kɛ́ tɑm tɔɔ.

10 Nn lɑkɩ-tʋ nɑ n kɛ́ɛ́sə́ɣə́nɑ tɑ́ ɩsɑɣɑtʋ.

Pəyele nn fɛləɣɩ-tʋɣʋ tɑ́ kɑwɑlɑɣɑ.

11 Ɩsɩɩ ɩsɔtɔnʋɣʋ kʋŋkʋlʋməŋ wɛʋ tɔ

ḿpʋɣʋ n lɑkɩ mpɑ pɑ nɩɩkənɑ-ŋ tɔɣɔ kʋpɑntʋ.

12 Ɩsɩɩ ilim təlɩɩlɛ nɑ pə tətʋlɛ hɑtələnɑʋ təmɑ tɔ,

ḿpʋɣʋ n hɑtələɣənɑ-tʋɣʋ tɑ́ kɑwɑlɑsɩ.

13 Ɩsənɑ cɛcɛ wɛnɑ ɩ piyɑ pətɔɔtəlɛ tɔ,

ḿpʋɣʋ Tɑcɑɑ n wɛnɑ mpɑ pɑ nyɑŋnɑ-ŋ tɔ pɑ nyəntɛ.

14 Mpi tɔ, n nyəmɑ́ mpi pə ŋmɑnɑ-tʋ tɔ.

N tɑ sɔɔ sɩ tə kɛ́ mʋsʋɣʋ.

15 Yʋlʋ kʋyɛɛŋ wɛ kɛ́ ɩsɩɩ nyɩɩlʋɣʋ.

Ɩ tʋɣɩ hɛtʋ kɛ́ ɩsɩɩ tɑɑlɛ tɑɑ nyɩɩlʋɣʋ.

16 Wɑɑtʋ wei heelim mɑkɩ-kʋ ɩlɛnɑ kʋ sɑɑlɩ yem,

nɑ pɑ́ wɩɩ kʋ lonte kɛ nyəm.

17 Amɑ Tɑcɑɑ nyɑ́ kʋpɑntʋ leeliɣi tɑm tɔɔ kɛ́

mpɑ pɑ nyɑŋnɑ-ŋ tɔ pɑ kiŋ,

nɑ nyɑ́ tɑmpɑnɑ təŋʋɣʋ pəsəɣɩ pɑ piyɑ piyɑ nyəm.

18 Ye pɑ tɔkɑ nyɑ́ nɔɣɔ pɛɛlʋɣʋ nɑ pɑ́ tɔɔsəɣɩ

nyɑ́ kʋsəsɩɩtʋ tɔɔ nɑ pɑ́ lɑkɩ-tɩ.

19 Ɩsɔtɔnʋɣʋ tɑɑ kɛ́ Tɑcɑɑ n ŋmɑwɑ nyɑ́ kumte

nɑ ń tɔkɩ kɑwulɑɣɑ kɛ pə tənɑ pə tɔɔ.

20 Ɩsɔtɑɑ tillɑɑ mpɑ mɛ ɩ wɛ toŋ sɔsɔɔŋ

nɑ ɩ́ lɑkɩ Ɩsɔ kʋtʋtʋtʋ tɔ, ɩ sɑ Ɩsɔ,

nɑ ɩ́ nɩɩkənɑ ɩ nɔɣɔ tɑɑ tɔm.

21 Tɑcɑɑ sɑmɑɑ mɛ mpɑ mə tənɑ ɩ́ kɛ́ ɩ təmlɛ nyə́mɑ

nɑ ɩ́ lɑkɩ ɩ kʋsɔɔləm tɔ, ɩ́ sɑmɩ-ɩ.

22 Tɑcɑɑ kʋŋmɑŋmɑmɑ mɛ ɩ́ sɑmɩ-ɩ ɩ kɑwulɑɣɑ tənɑ tɑɑ.

Mɑ sɑŋ Tɑcɑɑ.

<- Yontu 102Yontu 104 ->