1 Ḿpʋ́ɣʋ́ Tɑcɑɑ yɔɣɔtɑ Moisi kɛ Mowɑpʋ tɛtɛkǝlɛ tɑɑ, kɛ Yɑɑtɑnɩ pɔɣɔ nɔɣɔ kɛ Yeliko ɩsɛntɑɑ sɩ: 2-3 Tʋ Ɩsɛɣɛlɩ nyǝ́mɑ sɩ pɑ́ cɛlɑ Lefii nyǝ́mɑ kɛ ɑcɑlɛɛ nnɑ pɑ lǝsɑ pɑ tɛtʋnɑɑ tɑɑ tɔ, nɑ pǝ nɔnɔkilɑ. Nɑ pɑ́ cɑɣɑ ɑcɑlɛɛ tɑɑ nɑ pɑ́ tiikiɣi pɑ tɔlɑ kɛ hɑlǝmnɑɑ tɑɑ. 4-5 Ɩsǝnɑ ɩ́ kɑ́ mɑɣɑsɩ nɔnɔkilɑ ɑnɩ ɑ wɑŋ tɔɣɔlɔ: Pǝ sɩɩnɑʋ ɩcɑtɛ koloosi nɑ pǝ́ pukinɑ ilim tǝlɩɩlɛ tɔɔ tɔɣɔ mɛɛtǝlǝnɑɑ nɑsǝlɛ nɑ nɩɩnʋwɑ (500), nɑ ilim tǝtʋlɛ tɔɔ kɛ́ mpʋ. Pǝ mpǝtǝŋ nɑ pǝ ntɔɣɔŋ tɔɔ tɔtɔɣɔ mpʋ. Ɩlɛnɑ ɩ́ mɑɣɑsɩ pɑɑ hɔɣɔlʋɣʋ ŋku kʋ tɔɔ kɛ́ mɛɛtǝlǝnɑɑ iyɑɣɑ (1000) ɩyɑɣɑ (1000) kɛ tɔm liɣiti nɑ pǝ́ cɔɔ ɩcɑtɛ nɑ pǝ́ tɑ. 6 Nɑ pɑ́ cɛlɑ Lefii nyǝ́mɑ kɛ ɑcɑlɛɛ nɑɑtoso. A tɑɑ kɛ́ ye pǝ yʋkǝnɑ yʋlʋ nɑ ɩ́ kʋ ɩ tɔɣɔntǝlɛ ɩ kɑ́ tʋ kpʋlʋɣʋ. Nɑ pǝ́ sɔɔsɩ ɑcɑlɛɛ nɩɩlɛ nɑ nɑɑlɛ tɔtɔ. 7 Pǝ kpɛntɑ ɑcɑlɛɛ pǝlefɛɩ nɑɑnʋwɑ nɑ pǝ nɔnɔkilɑ. 8 Pɑɑ kpekǝle nte tɩɩ hɑ Lefii nyǝ́mɑ kɛ́ nɑ pǝ́ kɛɛsǝnɑ tǝ tɛtʋ tɔɔʋ.

9 Ḿpʋ́ɣʋ́ Tɑcɑɑ tɔmɑ Moisi sɩ: 10 Tɛlǝsɩ Ɩsɛɣɛlɩ nyǝ́mɑ sɩ, ye ɩ́ tɛsɑ Yɑɑtɑnɩ nɑ ɩ́ sʋʋ Kɑnɑɑŋ tɛtʋ tɑɑ, 11 ɩlɛ ɩ́ lǝsɩ ɑcɑlɛɛ wenɑ ɩ́ kɑ́ lɑ yʋlʋkʋlɑɑ mpɑ pǝ yʋkǝnɑɑ tɔ pɑ kpʋlʋɣʋ tǝtʋlɛ tɔ. 12 Nɑ pɛlɛ pɑ yǝlɑɑ ɩ tɑɑ lɛɛtɩ-wɛ nɑ pɑ́ tɑ́ hʋʋtɑ pɑ tɔm. 13 Acɑlɛɛ nɑɑtoso kɛ ɩ́ kɑ́ lǝsɩ. 14 Tooso nɑ Yɑɑtɑnɩ ilim tǝlɩɩlɛ tɔɔ, nɑ tooso kɛ Kɑnɑɑŋ tɛtʋ tɑɑ. 15 Ye Ɩsɛɣɛlɩ tʋ yɑɑ cɑɣɑlʋ kɛ pǝ yʋkǝnɑɑ nɑ ɩ́ kʋ́ yʋlʋ, ɩlɛ pʋntʋ se nɑ ɩ́ polo ɑ tɑɑ nɑtǝlɩ tǝ tɑɑ, nɑ ɩ́ tʋ́ kpʋlʋɣʋ.

16-18 Ye nɔɣɔlʋ mɑpɑ ɩ tɔɣɔntǝlɛ kɛ nyǝɣǝlʋɣʋ yɑɑ kpɑ́tʋ́ɣʋ́, yɑɑ ɩ yɑɣɑ-ɩ pǝlɛ nɑ ɩ́ sɩ. Ɩ kɛ́ yʋlʋkʋlʋ kɛ́, pǝ wɛɛ sɩ pɑ́ kʋ-ɩ. 19 Sǝtʋ yʋlʋ siɣisiɣi kɑ́ pɛɛkǝnɑ kʋlʋ nɑ ɩ́ lɛɛtɩ-ɩ. 20-21 Ye kʋlʋ kɑ tɔkǝnɑ-ɩ nɑ nɑtǝlɩ kɛ ɩ tɑɑ, yɑɑ pɑ wɛnɑ tǝmɑ nɑ koluŋɑ, ɩlɛnɑ ɩ́ mɑpɩ-ɩ ŋkumle, yɑɑ ɩ́ tusi-ɩ, yɑɑ ɩ́ yɑɣɑ-ɩ pʋlʋ nɑ ɩ́ sɩ́. Ɩ kɛ́ yʋlʋkʋlʋ kɛ́, pǝ wɛɛ sɩ lɛɛtǝlʋ ɩ́ hikɑ-ɩ ɩ́ kʋ-ɩ.

22-23 Ntɑnyɩ pǝ yʋkǝɣǝnɑ yʋlʋ nɑ ɩ́ tusi lɛlʋ, yɑɑ pǝlɛ, yɑɑ pʋlʋ fiti ɩ niŋ tɑɑ nɑ pǝ́ yɑɣɑ-ɩ. Pǝ́cɔ́ pɑ tɑɑ yoo, yɑɑ ɩ tɔkɑ-ɩ nɑ ɩ tɑɑ. 24 Ɩlɛ hʋʋlɑɑ kɑ tǝŋ pǝ kʋsǝsɩɩtʋ kɛ́, nɑ pɑ́ hʋʋ pɑ tɔm ntɩ. 25 Nɑ pɑ́ kenti kʋlʋ tɔɔ nɑ pɑ́ mǝŋnɑ-ɩ ɩ kpǝlʋɣʋ tǝtʋlɛ, nɑ ɩ́ sɑɑlɩ tǝnɑ.

Hɑlǝnɑ kɔtʋlʋ sɔsɔ wei ɩ lɑkɩ tǝmlɛ kɛ wɑɑtʋ ɩnɩ tɔ ɩ sǝm. 26 Amɑ ye ɩ lɩɩwɑ ɩcɑtɛ ntɛ tǝ tɑɑ nɑ ɩ́ tɛsɩ tǝ toŋɑ 27 nɑ lɛɛtʋlʋ hiki-ɩ, ɩ́ nɔkɑɑ ɩ kʋɣʋ-ɩ kɛ́ nɑ ɩ tɔm tɑ sɩ. 28 Pǝ nyʋɣʋ ntɛ́ sɩ kʋlʋ ɩ cɑɣɑ kpʋlʋɣʋ tǝtʋlɛ tǝnɑ, hɑlǝnɑ kɔtʋlʋ sɔsɔ sǝm. Pǝlɛ pǝ wɑɑlɩ kɛ́ ɩ pǝsǝɣɩ nɑ ɩ́ lɩɩ nɑ ɩ́ mǝlɩ ɩ tɛ.

29 Pɑɑ leɣe ɩ́ wɛɛ, yɑɑsi ɩnǝɣɩ mǝnɑ mǝ piyɑ piyɑ ɩ́ kɑ́ tɔkɩ.

30 Ɩ́ kɑɑ mʋ yʋlʋ kʋlʋm ɑseetɑ nɑ ɩ́ kʋnɑ yʋlʋkʋlʋ tɔm. Pǝ wɛɛ sɩ pɑ́ tɑlɑ nɑɑlɛ. 31 Pǝ fɛɩ sɩ ɩ́ mʋ kʋhɑʋ nɑ ɩ́ yele yʋlʋkʋlʋ kɛ kʋɣʋ. Pǝ wɛɛ sɩ ɩ́ kʋ-ɩ kɛ́. 32 Pǝ fɛɩ tɔtɔ sɩ ɩ́ mʋ kʋhɑʋ nɑ ɩ́ tʋ́ yʋlʋkʋlʋ kɛ kpʋlʋɣʋ tǝtʋlɛ nɑ kɔtʋlʋ sɔsɔ sɩ́, ɩlɛnɑ ɩ́ mǝlǝnɑ-ɩ ɩ tɛ.

33 Yʋlʋkʋlɛ pilisiɣi tɛtʋ kɛ́. Ɩlɛ pǝ fɛɩ sɩ ɩ́ pilisi tɛtʋ nti tǝ tɑɑ ɩ́ wɛɛ tɔ. Ye yʋlʋ kʋwɑ ɩ tɔɣɔntǝlɛ, pǝ wɛɛ sɩ pɑ́ kʋ́ ɩnǝɣɩ nɑ pǝ́cɔ́ pǝ́ kpiisi pǝ ɑsilimɑ. 34 Pǝ fɛɩ sɩ ɩ́ pilisi mǝ tɛtʋ. Mpi tɔ, Tɑcɑɑ mɑ́, mɑ wɛ mǝ hɛkʋ kɛ́.

<- Kʋkɑlʋɣʋ 34Kʋkɑlʋɣʋ 36 ->