3-8 Yutɑ yoolɑɑ tintiɣile kɑ́ wɛɛnɑ ilim tǝlɩɩlɛ tɔɔ kɛ́ pɑ tuutɑ kite. Mpɑ pɑ mʋnɑ yoou pote tɔ, pɑ sɔsɔ ntɛ́ pɑ kpekǝle nyʋɣʋ tʋ Aminɑtɑpɩ pǝyɑlʋ Nɑsɔŋ. Nɑ ɩ yoolɑɑ kɛ iyisi nɩɩtoso nɑ nɑɑnʋwɑ nɑ liɣiti nɑ nɑsǝtoso (74600). Ɩsɑkɑɑ nyǝ́mɑ yoolɑɑ nyʋɣʋ tʋ ntɛ́ Suwɑɑ pǝyɑlʋ Netɑneyɛlɩ. Ɩ yoolɑɑ wɛ iyisi nɩɩlɛ nɑ nɑɑnʋwɑ nɑ liɣiti nɑ nɑsǝlɛ (54400). Sɑpulɔŋ nyǝ́mɑ yoolɑɑ tintiɣile nyʋɣʋ tʋ ntɛ́ Helɔŋ pǝyɑlʋ Ɩliyɑpɩ. Ɩ yoolɑɑ wɛ iyisi nɩɩlɛ nɑ nɑɑnʋwɑ nɑ nɑɑtosomopɔɣɔlɑɣɑ nɑ nɑsǝlɛ (57400). 9 Yutɑ yoolɑɑ tintiɣile tǝnɑ kpɛntɑ iyisi nɩɩnʋwɑ nɑ nɩɩnɑɑsɑ nɑ nɑɑtoso nɑ nɑsǝlɛ (186400). Ɩsɛɣɛlɩ yoolɑɑ looŋɑ kɑncɑɑlɑɣɑ nyǝŋkɑ ntɛ́.
10-15 Lupɛŋ nyǝ́mɑ yoolɑɑ tintiɣile kɑ́ wɛɛnɑ ilim mpǝtǝŋ tɔɔ kɛ́ pɑ tuutɑ kite. Mpɑ pɑ mʋnɑ yoou pote tɔ, pɑ sɔsɔ ntɛ́ pɑ kpekǝle nyʋɣʋ tʋ Setewu pǝyɑlʋ Ɩlisuu. Ɩ yoolɑɑ wɛ iyisi nɩɩlɛ nɑ nɑɑtoso nɑ nɑsǝlɛ nɑ nɩɩnʋwɑ (46500). Simiyɔŋ nyǝ́mɑ yoolɑɑ tintiɣile nyʋɣʋ tʋ ntɛ́ Sulisɑtɑɩ pǝyɑlʋ Selumǝyɛlɩ. Ɩ yoolɑɑ wɛ iyisi pɔɣɔlɑɣɑfɛɩ nɩɩtoso nɑ ŋmʋnʋɣʋ nɑ nɩɩnʋwɑ (59300). Kɑtɩ nyǝ́mɑ yoolɑɑ tintiɣile nyʋɣʋ tʋ ntɛ́ Teuwɛlɩ pǝyɑlʋ Ɩliyɑsɑfɩ. Ɩ yoolɑɑ wɛ iyisi nɩɩlɛ nɑ kɑkpɑsɩ nɑ nɑsǝtoso nɑ nɩɩlɛ nɑ nɑɑnʋwɑ (45650). 16 Lupɛŋ nyǝ́mɑ yoolɑɑ tintiɣile tǝnɑ kpɛntɑ iyisi nɩɩnʋwɑ nɑ nɩɩlɛ nɑ nɑɑnʋwɑ nɑ kʋlʋm nɑ nɑsǝlɛ nɑ nɩɩlɛ nɑ nɑɑnʋwɑ (151450). Ɩsɛɣɛlɩ yoolɑɑ looŋɑ nɑɑlɛ nyǝŋkɑ ntɛ́.
17 Pǝlɛ pǝ wɑɑlɩ kɛ́ Lefii nyǝ́mɑ nɑ́ tǝŋǝɣǝnɑ Ɩsɔ cokǝle kɛ lɔlɔ loosi nɑɑlɛ, nɑ wɑɑlɩ nyǝnsɩ nɑɑlɛ hɛkʋ tɑɑ. Mpɛ pɑ mɑɣɑmɑɣɑ pɑɑ tɔ nɔɣɔ kʋlʋmɑɣɑ kɛ́. Pɑɑ wei kɛ́ ɩ lonte tɑɑ. Nɑ ɩ́ tǝŋǝɣɩ ɩ lʋlʋɣʋ nyǝ́mɑ tuutɑ.
18-23 Ɩfǝlɑyim yoolɑɑ tintiɣile kɑ́ wɛɛnɑ ilim tǝtʋlɛ tɔɔ kɛ́ pɑ tuutɑ kite. Mpɑ pɑ mʋnɑ yoou pote tɔ pɑ sɔsɔ ntɛ́ pɑ kpekǝle nyʋɣʋ tʋ Amihuti pǝyɑlʋ Ɩlisɑmɑ. Ɩ yoolɑɑ wɛ iyisi nɩɩlɛ nɑ nɑsǝlɛ nɑ nɩɩnʋwɑ (40500). Mɑnɑsee yoolɑɑ tintiɣile nyʋɣʋ tʋ ntɛ́ Petɑsuu pǝyɑlʋ Kɑmliyɛlɩ. Yoolɑɑ wɛ iyisi hiu nɑ nɑɑnʋwɑ nɑ nɑɑlɛ nɑ ŋmʋnʋɣʋ (32200). Pɛncɑmɛɛ yoolɑɑ tintiɣile nyʋɣʋ tʋ ntɛ́ Kitoni pǝyɑlʋ Apitɑŋ. Ɩ yoolɑɑ wɛ iyisi hiu nɑ nɑɑnʋwɑ nɑ kɑkpɑsɩ nɑ nɑsǝlɛ (35400). 24 Ɩfǝlɑyim nyǝ́mɑ yoolɑɑ tintiɣile tǝnɑ kpɛntɑ iyisi pǝlefɛɩ nɩɩnʋwɑ nɑ nɑɑnʋwɑ nɑ yʋlʋpee nɩɩnʋwɑ (108100). Looŋɑ tooso nyǝŋkɑ kɑnɛ kɑɑ tǝŋnɑ ntɛɣɛ Lefii kpekǝle.
25-30 Tɑŋ nyǝ́mɑ yoolɑɑ tintiɣile kɑ́ wɛɛnɑ ilim tǝlɩɩlɛ mpǝtǝŋ tɔɔ kɛ́ pɑ tuutɑ kite. Mpɑ pɑ mʋnɑ yoou pote tɔ, pɑ sɔsɔ ntɛ́ pɑ kpekǝle nyʋɣʋ tʋ Amisɑtɑɩ pǝyɑlʋ Ahiyesɛɛ. Ɩ yoolɑɑ wɛ iyisi nɩɩtoso nɑ nɑɑlɛ nɑ nɑsǝtoso nɑ nɩɩnʋwɑ (62700). Asɛɛ nyǝ́mɑ yoolɑɑ tintiɣile nyʋɣʋ tʋ ntɛ́ Okǝlɑŋ pǝyɑlʋ Pɑkiyɛlɩ. Ɩ yoolɑɑ wɛ iyisi nɩɩlɛ nɑ kʋlʋm nɑ nɑsǝlɛ nɑ nɩɩnʋwɑ (41500). Nɛfǝtɑli nyǝ́mɑ yoolɑɑ tintiɣile nyʋɣʋ tʋ ntɛ́ Ɩnɑŋ pǝyɑlʋ Ahilɑ. Ɩ yoolɑɑ wɛ iyisi nɩɩlɛ nɑ nɑɑnʋwɑ nɑ tooso nɑ nɑsǝlɛ (53400). 31 Tɑŋ nyǝ́mɑ yoolɑɑ tintiɣile tǝnɑ kpɛntɑ iyisi nɩɩnʋwɑ nɑ nɩɩlɛ nɑ nɑɑnʋwɑ nɑ nɑɑtosompɔɣɔlɑɣɑ nɑ nɑsǝtoso (157600). Ɩsɛɣɛlɩ yoolɑɑ looŋɑ kɑntǝkɑɣɑ nyǝŋkɑ ntɛ́. Pɑɑ kpekǝle nte tɩɩ wɛɛ tǝ tuutɑ wɑɑlɩ kɛ́ nɑ tǝ́ tɔŋ.
32 Ɩsɛɣɛlɩ kpekɑ nɑ pɑ yoolɑɑ mpɑ pɑ kɑlɑɑ tɔ, pɑ kpɛntɑ iyisi nɑsǝtoso nɑ tooso nɑ nɑsǝlɛ nɑ nɩɩnʋwɑ nɑ nɩɩlɛ nɑ nɑɑnʋwɑ (603550). 33 Pɑ tɑ kpɛŋnɑ Lefii nyǝ́mɑ nɑ pɑ́ kɑlɑ. Teitei ɩsɩɩ Tɑcɑɑ kɑ heeluɣu Moisi tɔ.
34 Ɩsɛɣɛlɩ nyǝ́mɑ lɑkɑɣɑ teitei kɛ́ ɩsɩɩ Tɑcɑɑ kɑ kɛɛsʋɣʋ Moisi tɔ. Pɑɑ mpɑ pɑ sikɑɣɑ pɑ tuutɑ cɔlɔɣɔ. Nɑ pɑ́ tɔŋ ɩsɩɩ pɑ kɛɛsʋɣʋ pɑ kpekɑ nɑ pɑ lʋlʋŋ tɔ.
<- Kʋkɑlʋɣʋ 1Kʋkɑlʋɣʋ 3 ->