1 Ḿpʋ́ɣʋ́ Tɑcɑɑ tɔmɑ Moisi sɩ: 2 Lǝsɩ Ɩsɛɣɛlɩ kpekɑ nyʋɣʋ nyǝ́mɑ tɑɑ kɛ́ yʋlʋ yʋlʋ. Nɑ n tili-wɛ nɑ pɑ́ feŋ Kɑnɑɑŋ tɛtʋ nti mɑ hɑɑkɩ-mɛ tɔ.

3 Ɩlɛnɑ Moisi kʋsɩ Ɩsɛɣɛlɩ nyʋɣʋ nyǝ́mɑ kɛ Pɑlɑŋ wʋlɑɣɑ tɛtʋ tɑɑ, ɩsɩɩ Tɑcɑɑ kɛɛsʋɣʋ-ɩ tɔ. Nɑ pɑ́ polo Kɑnɑɑŋ tɛtʋ feŋuɣu. 4 Feŋlɑɑ mpɛ pɑ kpekɑ nɑ pɑ hǝlɑ ntɔ: Lupɛŋ kpekǝle tɑɑ nyǝŋ ntɛ́ Sɑkuu pǝyɑlʋ Sɑmuwɑ. 5 Simiyɔŋ nyǝntɛ tɑɑ nyǝŋ ntɛ́ Holi pǝyɑlʋ Sɑfɑtɩ. 6 Yutɑ nyǝntɛ tɑɑ nyǝŋ ntɛ́ Yefune pǝyɑlʋ Kɑlɛpʋ. 7 Ɩsɑkɑɑ nyǝntɛ tɑɑ nyǝŋ ntɛ́ Yosɛɛfʋ pǝyɑlʋ Ɩkɑɑlɩ. 8 Ɩfǝlɑyim nyǝntɛ tɑɑ nyǝŋ ntɛ́ Nuŋ pǝyɑlʋ Hosee. 9 Pɛncɑmɛɛ nyǝntɛ tɑɑ nyǝŋ ntɛ́ Lɑfu pǝyɑlʋ Pɑlǝti. 10 Sɑpulɔŋ nyǝntɛ tɑɑ nyǝŋ ntɛ́ Soti pǝyɑlʋ Kɑtǝyɛlɩ. 11 Yosɛɛfʋ pǝyɑlʋ Mɑnɑsee nyǝntɛ tɑɑ nyǝŋ ntɛ́ Susi pǝyɑlʋ Kɑtɩ. 12 Tɑŋ nyǝntɛ tɑɑ nyǝŋ ntɛ́ Kemɑli pǝyɑlʋ Amiyɛlɩ. 13 Asɛɛ nyǝntɛ tɑɑ nyǝŋ ntɛ́ Mikɑyɛɛlɩ pǝyɑlʋ Setuu. 14 Nɛfǝtɑli nyǝntɛ tɑɑ nyǝŋ ntɛ́ Fofǝsi pǝyɑlʋ Nɑpi. 15 Kɑtɩ nyǝntɛ tɑɑ nyǝŋ ntɛ́ Mɑki pǝyɑlʋ Kuwɛlɩ.

16 Mpɑ Moisi tilɑ Kɑnɑɑŋ tɔ pɑ hǝlɑ ntɛ́. Nuŋ pǝyɑlʋ Hosee kɛ Moisi cuɣusɑ hǝtɛ sɩ Yosuwee.

17 Ḿpʋ́ɣʋ́ Moisi kʋsɑ-wɛ nɑ ɩ́ heeli-wɛ sɩ: Ɩ́ kpɑɣɑ ilim ntɔɣɔŋ tɔɔ mpɑɑʋ, nɑ ɩ sʋʋ pulɑsɩ hɔɣɔlʋɣʋ tɑɑ. 18 Nɑ ɩ feŋ tɛtʋ ntɩ nɑ tǝ yǝlɑɑ kɛ teu, nɑ ɩ́ nɑ pɑ pɑɣɑlɛ nɑ pɑ toŋ tǝnɑɣɑ. 19 Nɑ ɩ́ nɑ sɩ pɑ wɛnɑ koloosi ɑcɑlɛɛ yɑɑ pɑ fɛɩnɑ. Nɑ tɛtʋ wɛ mʋsʋŋ yɑɑ tǝ sǝpɑ. Nɑ hɔtʋ wɛɛ yɑɑ tǝ fɛɩ. 20 Ɩ́ ponɑ ɑpɑlʋtʋ nɑ ɩ́ kɔnɑ pɑ tɛtʋ kʋlʋlʋm. Wɑɑtʋ ɩnǝɣɩ tɛtʋ ntɩ tǝ tɩɩŋ wei pɑ yɑɑ sɩ lɛsɛŋnɑɑ tɔ ɩ kɑncɑɑlɑɣɑ nyǝ́mɑ pɩɩkɩ.

21 Ḿpʋ́ɣʋ́ ɑpɑlɑɑ mpɛ pɑ tɛɛwɑ nɑ pɑ́ feŋ tɛtʋ kɛ pǝ kpɑɣɑʋ Siŋ wʋlɑɣɑ tɛtʋ, hɑlǝnɑ Lehopɩ, kɛ Lepo-Hɑmɑtɩ. 22 Ɩlɛnɑ pɑ́ sʋʋ tɛtʋ ntɩ tǝ tɑɑ, nɑ ilim mpǝtǝŋ tɔɔ. Nɑ pɑ́ tɑlɑ Hepǝlɔŋ kɛ Anɑkɩ lʋlʋɣʋ nyǝ́mɑ tookonɑɑ tɛ. Pɑ hǝlɑ ntɛ́, Ahimɑŋ nɑ Sesɑɩ nɑ Tɑlǝmɑyi. Pɑɑ ŋmɑwɑ Hepǝlɔŋ ɩcɑtɛ kɛ́, nɑ pɩɩsɩ nɑɑtosompɔɣɔlɑɣɑ siki, ɩlɛnɑ pɑ́ ŋmɑ́ Sowɑŋ nyǝntɛ kɛ Icipiti tɛtʋ tɑɑ. 23 Pɑ tɑlɑ lɛsɛŋ tɛtɛkǝlɛ tɑɑ, ɩlɛnɑ pɑ́ sɛtɩ pǝ tuku, nɑ piliŋɑ, nɑ pɑ́ hɔɣɔlɩ yǝlɑɑ nɑɑlɛ. Nɑ pɑ́ kooli tɩɩŋ wei pɑ yɑɑ sɩ fiki nɑ kǝlenɑɑtɩ tɔ ɩ pee tɔtɔ. 24 Ḿpʋ́ɣʋ́ pɑ hɑ tǝnɑ ɩnǝɣɩ hǝtɛ sɩ, lɛsɛŋ tɛtɛkǝlɛ kɛ tuku ŋku Ɩsɛɣɛlɩ nyǝ́mɑ kɑ sɛtɑɑ tɔ kʋ tɔɔ.

25 Kʋyɛɛŋ sikɑ nɩɩlɛ, ɩlɛ feŋlɑɑ tɛmɑɣɑlɛ, nɑ pɑ́ mǝlɩ. 26 Moisi nɑ Alɔŋ nɑ Ɩsɛɣɛlɩ sɑmɑɑ kiŋ kɛ pɑ mǝlɑ Kɑtɛɛsɩ kɛ Pɑlɑŋ wʋlɑɣɑ tɛtʋ tɑɑ. Nɑ pɑ́ kɛɛsɩ-wɛɣɛ pǝ tǝnɑ mpi pɑ nɑwɑ tɔ pǝ tɔm. Nɑ pɑ́ hʋlɩ-wɛɣɛ tɛtʋ kʋlʋlʋm nɑ pɑ heeli-wɛ sɩ: 27 Kʋpɑntʋ nɑ tɔɣɔnɑɣɑ tǝnɑ tɔlɑ tǝ tɑɑ kɛ́ tǝhɔ. Hɑlǝnɑ pɑ́ hʋlɩ-wɛɣɛ tǝ kʋlʋlʋm. 28 Amɑ kʋlʋmtʋ kɛ́ sɩ tǝ yǝlɑɑ kɛ́ toŋtʋnɑɑ kɛ́. Nɑ pɑ ŋmɑwɑ koloosi ɑcɑlɛɛ sɔsɔɔnɑ. Hɑlɩ tǝ nɑwɑ tǝ tɑɑ kɛ́ tooko Anɑkɩ lʋlʋɣʋ nyǝ́mɑ. 29 Amɑleke nyǝ́mɑ nɑ́ cɑɣɑnɑ ntɛɣɛ ilim mpǝtǝŋ tɔɔ, nɑ Hiti nyǝ́mɑ nɑ Yepusi nyǝ́mɑ nɑ Amolii nyǝ́mɑ kɛ pulɑsɩ hɔɣɔlʋɣʋ. Nɑ Kɑnɑɑŋ nyǝ́mɑ kɛ Metitelɑnee teŋku nɑ Yɑɑtɑnɩ pɔɣɔ nɔɣɔ.

30 Ɩsɛɣɛlɩ nyǝ́mɑ cɑɑkɑɣɑ Moisi kɛ kʋntǝnɑʋ. Ɩlɛnɑ Kɑlɛpʋ sumsi-wɛ, nɑ ɩ́ yɔɣɔtǝnɑ tomɑ sɩ: Tǝ́ polo tǝ mʋ tɛtʋ ntɩ, tǝ wɛnɑ pǝ tomɑ.

31 Amɑ ɩ tɑɑpɑlɑɑ nɑ́ tɔmɑ sɩ: Tǝ kɑɑ pǝsɩ nɑ tǝ́ kpɑ yǝlɑɑ mpɛ pɑ tɔɔ, pɑ tɛɛ-tʋɣʋ toŋ.

32 Tǝnɑɣɑlɛ pɑ sʋʋ kɛɛsʋɣʋ kɛ mpi pɑ nɑwɑ tɛtʋ ntɩ tǝ tɑɑ nɑ pǝ́ lɑ-wɛɣɛ sɔɣɔntʋ tɔ pǝ tɔm sɩ: Tɛtʋ ntɩ tǝ kɛ́ nti tǝ kʋɣɩ tǝ yǝlɑɑ tɔɣɔ. Tǝ tɑɑ yǝlɑɑ kɛ́ tookonɑɑ kɛ́. 33 Ɩlɛnɑ pǝ́ tɩɩ kǝlǝnɑ Anɑkɩ lʋlʋɣʋ nyǝ́mɑ. Tɑ́ wɛ ɩsɩɩ tɔɔlɑɑ kɛ pɑ kiŋ kɛ́, nɑ pɛlɛ pɑ́ nyǝnǝɣɩ-tʋɣʋ mpʋ.

<- Kʋkɑlʋɣʋ 12Kʋkɑlʋɣʋ 14 ->