Mɑtiyee 21

Yesu cɑɣɑ kpɑŋɑɣɑ

(Mɑlǝkɩ 11:1-11; Luku 19:28-40; Yohɑɑnɩ 12:12-19)

1 Ḿpʋ́ɣʋ́ pɑ tɑlɑ Petɑfɑsɩ kɛ Olifinɑɑ pʋɣʋ tɔɔ. Wɑɑtʋ ɩnɩ tɔ pɑ fɛɩ pooluŋ nɑ Yosɑlɛm. Tǝnɑɣɑ Yesu tilɑ ɩ ɩfɑlɑɑ nɑɑlɛ sɩ: 2 Ɩ́ polo ɩcɑtɛ nte tǝ wɛ mǝ nɔɣɔ tɔɔ tɔ tǝ tɑɑ. Ye ɩ́ tɑlɑ tǝ tɑɑ kɛ́ kpɑkpɑɑ ɩ́ kɑ́ nɑ́ pɑ tʋ kpɑŋɑɣɑ toto nɔɣɔlʋ nɑ ɩ pile kɛ ɩ kiŋ, ɩ́ hɛtɩ-sɩ nɑ ɩ́ kɔnɑ-m. 3 Ye nɔɣɔlʋ ɩ́ pɔɔsɑ-mɛ sɩ pʋlʋ, ɩ́ cɔ pʋntʋ sɩ Tɑcɑɑ cɑɑkǝnɑ. Ye ɩ́ cɔ mpʋ pɑɑ yele-mɛ nɑ ɩ́ tɛɛnɑ.

4 Pǝ lɑpɑ ḿpʋ́ɣʋ́ sɩ pǝ́ lɑ nti Ɩsɔ kʋyɔɣɔtʋtʋ tɛlǝsʋlʋ kɑ yɔɣɔtɑɑ tɔ sɩ:

5 Ɩ́ heeli Siyɔŋ ɩcɑtɛ nyǝ́mɑ sɩ,

ɩ́ nyǝnɩ, mǝ wulɑʋ kɔŋ mǝ kiŋ,

nɑ ɩ́ cɑɣɑ kpɑŋɑɣɑ toto tɔɔ, nɑ ɩ́ wɛ tǝpɑmm.

Nn nɑ ɩ́ cɑɣɑ kpɑŋɑɣɑ pǝyɑɣɑ tɔɔ.

6 Ḿpʋ́ɣʋ́ Yesu ɩfɑlɑɑ mpɑ ɩ tilɑɑ tɔ pɑ tɛɛwɑ nɑ pɑ́ lɑ́ ɩsɩɩ ɩ́ kɛɛsɑ-wɛ tɔ. 7 Ḿpʋ́ɣʋ́ pɑ kɔnɑ kpɑŋɑɣɑ toto ɩnɩ nɑ ɩ pile, nɑ pɑ́ kpɑɣɑ pɑ wontu nɑ pɑ́ pɔ sɩ tɔɔ, nɑ Yesu kpɑ nɑ ɩ́ cɑɣɑ pǝ tɔɔ. 8 Nɑ yǝlɑɑ pɑɣɑlɛ kɛ sɔsɔm nɑ́ɑ́ pɔ pɑ wontu kɛ mpɑɑʋ tɑɑ. Lɛlɑɑ nɑ́ɑ́ cɛ ɑkɔɔ nɑ pɑ́ pɔ mpɑɑʋ tɑɑ. 9 Sɑmɑɑ wei ɩ kɑ wɛ Yesu nɔɣɔ tɔɔ nɑ wei ɩ kɑ wɛ Yesu wɑɑlɩ tɔ pɛlɛ pɑ tɔŋnɑ yɔɣɔtʋɣʋ nɑ nɔɔsɩ sɔsɔɔnsɩ sɩ: Pɑɑ wei ɩ́ tʋ Tɑfiiti Pǝyɑlʋ kɛ teeli. Ɩsɔ ɩ́ wɛɛ wei ɩ kɔŋnɑ Tɑcɑɑ toŋ tɔ ɩ wɑɑlɩ. Pɑɑ wei ɩ́ tʋ Ɩsɔ kɛ́ teeli kɛ ɩsɔtɑɑ.

10 Yesu kɔmɑ nɑ ɩ́ sʋʋ Yosɑlɛm tɑɑ, ɩlɛnɑ ɩcɑtɛ lɑ yuŋ tǝkɛmm, nɑ yǝlɑɑ pɔɔsǝɣɩ sɩ: Aweɣe ye? 11 Ɩlɛnɑ sɑmɑɑ cɔ sɩ: Kɑlilee Nɑsɑlɛtɩ Ɩsɔ kʋyɔɣɔtʋtʋ tɛlǝsʋlʋ Yesu kɛ́.

Yesu kɛ Ɩsɔ tǝsɛɛlɛ tɑɑ

(Mɑlǝkɩ 11:15-19; Luku 19:45-48; Yohɑɑnɩ 2:13-22)

12 Ḿpʋ́ɣʋ́ Yesu sʋʋ Ɩsɔ tǝsɛɛlɛ tɑɑ nɑ ɩ́ tɔɣɔnɩ pɑ tǝnɑ mpɑ pɑ pɛɛtɑɣɑɑ nɑ mpɑ pɑ yɑkɑɣɑ tɔ. Nɑ ɩ́ pǝsɩ liɣitee yɔkǝlɑɑ tɑɑpǝlǝnɑɑ kɛ ɑlele nɑ ɑlukukunɑɑ pɛɛtǝlɑɑ kpelɑsɩ tɔtɔ. 13 Ɩlɛnɑ ɩ́ tɔ-wɛ sɩ: Pɑ ŋmɑɑwɑ Ɩsɔ Tɔm tɑɑ kɛ́ sɩ: Pɑɑ yɑɑ mɑ tǝyɑɣɑ sɩ Ɩsɔ tǝsǝlǝmǝlɛ. Amɑ mǝ pǝsǝnɑ-kɛɣɛ ŋmɩɩlɑɑ tǝyɑɣɑ.

14 Ḿpʋ́ɣʋ́ yʋlʋmɑɑ nɑ sɛkǝllɑɑ pɑ polɑ Yesu kiŋ kɛ Ɩsɔ tǝsɛɛlɛ tɑɑ nɑ ɩ́ lɑ́ nɑ pɑ́ hiki ɑlɑɑfǝyɑ. 15 Ɩsɩɩ Yesu lɑpɑ piti tǝmɑ kɛ mpʋ, nɑ pǝ kɑɑsɩ nɑ piyɑ nɑ́ɑ́ yɔɣɔtǝɣǝnɑ nɔɔsɩ sɔsɔɔnsɩ kɛ Ɩsɔ tǝsɛɛlɛ tɑɑ sɩ: Pɑɑ wei ɩ́ tʋ Tɑfiiti Pǝyɑlʋ kɛ́ teeli tɔ, pǝ tɑ mɑɣɑ kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ ntɛ́. 16 Tǝnɑɣɑ pɑ pɔɔsɑ Yesu sɩ: N nɩɩkɩ nti pɑ yɔɣɔtǝɣɩ tɔ? Ɩlɛnɑ Yesu nɑ́ɑ́ cɔ-wɛ sɩ: Ɛɛ, mɑ nɩɩkɩ. Ḿpʋ́ɣʋ́ ɩ́ pɔɔsɑ-wɛ sɩ: Ɩ́ tɑ kɑlǝtɑ Ɩsɔ Tɔm tɑɑ kɛ́ timpi pɑ ŋmɑɑwɑ sɩ: Piyɑ sǝkpesi nɑ ɑhʋlʋmnɑɑ nɔɔsɩ tɑɑ kɛ́ n yelɑɑ nɑ nyɑ́ sɑm lɩɩnɑ tɔ yɛɛ?

17 Pǝ wɑɑlɩ kɛ́ ɩ yelɑ-wɛ nɑ ɩ́ lɩɩ nɑ ɩ́ se pɑ ɩcɑtɛ, nɑ ɩ́ polo ɩ́ sʋʋ kʋyɑŋkuɣu Petɑnii.

Fiki tʋɣʋ mpusi tǝŋsʋɣʋ

(Mɑlǝkɩ 11:12-14,20-24)

18 Kʋ femɑ ɩlɛnɑ Yesu kʋlɩ nɑ ɩ́ mǝlǝɣɩ ɩcɑtɛ tɑɑ, ɩlɛnɑ nyɔɣɔsɩ kpɑ-ɩ mpɑɑʋ. 19 Ḿpʋ́ɣʋ́ ɩ loosɑ fiki tʋɣʋ kɛ mpɑɑʋ nɔɣɔ. Ɩlɛnɑ ɩ́ polo nɑ ɩ́ mɑɣɑnɑ hɑtʋ tike. Tǝnɑɣɑ ɩ tɔmɑ fiki tʋɣʋ sɩ: N kɑɑ tɑsɑ pile lʋlʋɣʋ kɛ pɑɑ pǝcɔ.

Ɩlɛnɑ tʋɣʋ ŋkʋ kʋ wʋlɩ tǝnɑɣɑ kpɑkpɑɑ tǝwoŋwoŋ. 20 Yesu ɩfɑlɑɑ nɑ́ mpʋ, ɩlɛnɑ pǝ lɑ-wɛɣɛ sɔɣɔntʋ kɛ sɔsɔm. Ɩlɛnɑ pɑ́ pɔɔsɩ Yesu sɩ: Ɩsǝnɑɣɑ pǝ lɑpɑ nɑ fiki tʋɣʋ ŋkʋ kʋ wʋlɩ kpɑkpɑɑ kɛ mpʋ?

21 Tǝnɑɣɑ Yesu cɔwɑ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, ye ɩ́ tʋ Ɩsɔ kɛ́ nɑɑni nɑ ɩ́ tɑ́ lɑ́ sikɑ, pǝ tɑɣɑ mpi mɑ lɑpɑ fiki tʋɣʋ kʋnɛ tɔ pǝ tike kɛ́ ɩ́ kɑ́ lɑ. Ɩ́ pǝsǝɣɩ nɑ pɑɑ pulɑɣɑ kɑnɛ ɩ́ tɔ-kɛ sɩ kɑ́ kpɛsɩ nɑ kɑ́ hoti teŋku tɑɑ, pǝ lɑkɩ kɛ́. 22 Ye ɩ́ wɛnɑ nɑɑni pǝ tǝnɑ mpi ɩ́ sǝlǝmǝɣɩ sɩ Ɩsɔ ɩ́ lɑ-mɛ tɔ, ɩ lɑkɩ-mɛɣɛ-wǝɣɩ.

Yesu pǝsʋɣʋ tɔm

(Mɑlǝkɩ 11:27-33; Luku 20:1-8)

23 Ḿpʋ́ɣʋ́ Yesu sʋʋ Ɩsɔ tǝsɛɛlɛ tɑɑ nɑ ɩ́ niki sɛɣɛsʋɣʋ. Ɩlɛnɑ kɔtǝlɑɑ sɔsɑɑ nɑ Yutɑ nyǝ́mɑ tɑɑ sɔsɑɑ polo nɑ pɑ́ pɔɔsɩ-ɩ sɩ: Kɑŋkɑntɛ nteɣe n mɑkɩ nyɑ́ tɑɑ nɑ ń lɑkɩ ɩsǝntɔ? Yɑɑ ɑwe tɩɩ hɑ-ŋ pǝ mpɑɑʋ?

24 Tǝnɑɣɑ Yesu cɔwɑ Yutɑ sɔsɑɑ mpɛ sɩ: Tɔʋ, mɑ mɑɣɑmɑɣɑ mɑɑ pɔɔsɩ-mɛɣɛ tɔm kʋlʋmtʋ tǝkoŋ. Ye ɩ́ cɔ-m ɩlɛ, mɑɑ heeli-mɛɣɛ kɑŋkɑntɛ nte mɑ mɑkɩ mɑ tɑɑ nɑ mɑ́ lɑkɩ ɩsǝntɔ tɔ. 25 Ɩsɔ yɑɑ yǝlɑɑ tilinɑ Yohɑɑnɩ sɩ ɩ́ sɔɔkɩ yǝlɑɑ kɛ Ɩsɔ lʋm? Ḿpʋ́ɣʋ́ pɑ mɑɣɑsɑ-tǝɣɩ pɑ tɑɑ pɑ tike.

Ɩlɛnɑ Yutɑ sɔsɑɑ mpɛ pɑ́ tɔ sɩ: Ye tǝ tɔmɑ sɩ Ɩsɔ tilinɑ-ɩ, ɩ kɑ́ pɔɔsɩ-tʋ sɩ nɑ pepe tɔɔ kɛ́ tǝ tɑ mʋ ɩ tɔm ɩlɛ? 26 Pǝyele ye tǝ tɔmɑ sɩ yʋlʋ tilinɑ-ɩ kɔlɔ, tǝ wɛnɑ sɑmɑɑ sɔɣɔntʋ. Pǝ tɑɣɑ pʋlʋ tɔɔ, pɑ tǝnɑ pɑ nyǝmɑ́ sɩ Yohɑɑnɩ kɛ́ Ɩsɔ kʋyɔɣɔtʋtʋ tɛlǝsʋlʋ kɛ́.

27 Ḿpʋ́ɣʋ́ Yutɑ sɔsɑɑ mpɛ pɑ pǝsǝnɑ Yesu sɩ: Tǝ tɑ nyɩ. Tǝnɑɣɑ Yesu nɑ́ cɔ-wɛ sɩ: Aŋhɑɑ, mɑ́ kɑɑ heeli-mɛɣɛ kɑŋkɑntɛ nte mɑ mɑkɩ nɑ mɑ́ lɑkɩ ɩsǝntɔ tɔ.

Apɑlʋ nɑ ɩ pǝyɑlɑɑ nɑɑlɛ pɑ tɔm

28 Ḿpʋ́ɣʋ́ Yesu tɑsɑ Yutɑ sɔsɑɑ mpɛ sɩ: Ɩ́ nɑ-weɣe tǝnɛ tǝ tɑɑ? Apɑlʋ nɔɣɔlʋ kɑ wɛnnɑ pǝyɑlɑɑ kɛ nɑɑlɛ. Ɩlɛnɑ ɩ́ heeli lɛlʋ sɩ: Akele polo nɑ ń hɑlɑ mɑ lɛsɛŋ tɑɑlɛ tɑɑ kɛ́ sɑŋɑ. 29 Tǝnɑɣɑ pǝyɑlʋ cɔ-ɩ sɩ: Mɑ kɑɑ polo. Pǝlɛ pǝ wɑɑlɩ ɩlɛnɑ pǝyɑlʋ kɔɔ ɩ́ lɑɣɑsɩ hʋwɛɛ nɑ ɩ́ polo. 30 Ḿpʋ́ɣʋ́ pɑ cɑɑ ɩnɩ ɩ polɑɑ nɑ ɩ́ heeli lɛlʋ kɛ mpʋ tɔtɔ. Ɩ́lɛ́ sɩ: Tɔʋ yɑɑ, pɑɑpɑ. Amɑ ɩ tɑ polo. 31 Pɑ nɑɑlɛ pɑ tɑɑ ɑwe lɑpǝnɑ ntɛɣɛ ɩ cɑɑ luɣu tɛɛ nyǝntʋ? Ḿpʋ́ɣʋ́ Yutɑ sɔsɑɑ cɔ-ɩ sɩ: Kɑncɑɑlɑɣɑ nyǝŋ. Tǝnɑɣɑ Yesu tɔmɑ-wɛ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, lɑmpuu mʋlɑɑ nɑ wɑsɑŋkɑlǝnɑɑ kɑ́ tɛɛ-mɛɣɛ nɔɣɔ kɛ Ɩsɔ Kɑwulɑɣɑ tɑɑ. 32 Pǝ tɑɣɑ pʋlʋ tɔɔ, Yohɑɑnɩ nɑ́ kɔmɑ sɩ ɩ hʋ́lǝ́ɣɩ́-mɛɣɛ mpɑɑʋ kʋpɑŋkʋ nɑ ɩ́ kisi ɩ tɔm mʋɣʋ. Amɑ lɑmpuu mʋlɑɑ nɑ wɑsɑŋkɑlǝnɑɑ nɑ́ mʋ ɩ tɔm. Pɑɑ nɑ mǝ kɔmɑ nɑ ɩ́ nɑ́ ḿpʋ́ɣʋ́ wɑɑlɩ wɑɑlɩ tɔ, ɩ́ tɑ́ tɔ sɩ ɩ́ lɑɣɑsǝɣɩ mǝ tɑɑ hʋwɛɛ nɑ ɩ́ mʋ ɩ tɔm.

Tǝmlɛ nyǝ́mɑ ɑsɑɣɑɑ tɔm

(Mɑlǝkɩ 12:1-12; Luku 20:9-19)

33 Ḿpʋ́ɣʋ́ Yesu tɑsɑ Yutɑ sɔsɑɑ mpɛɣɛ yɔɣɔtʋɣʋ sɩ: Ɩ́ nɩɩ, mɑ sɛɛkɩ-mɛɣɛ ɩsɔ lɛlʋ. Sɔsɔ nɔɣɔlʋ ɩ kɑ sɔnɑ lɛsɛŋ kɛ tɑɑlɛ tǝcu nɑ ɩ́ ŋmɑ koluŋɑ nɑ ɩ́ cɔɔnɑ. Nɑ ɩ́ lɑ́ timpi ɩ kɑ́ nyɑɑsǝɣɩ pǝ lʋm tɔ. Nɑ ɩ́ ŋmɑ ɑkele tɑŋkɑʋ wei ɩ tɔɔ pɑ sǝŋǝɣɩ nɑ pɑ́ feŋiɣi tɔ. Ɩ tɛmɑ mpʋ ɩlɛnɑ ɩ́ cɑɑ yǝlɑɑ nɑ ɩ́ sɩɩ tǝ tɑɑ, ɩlɛnɑ ɩ́ tɛɛ yɛlɑ. 34 Pǝ kɔmɑ nɑ pǝ́ tɑlɑ tɩɩŋ ɩnɩ ɩ kooluɣu wɑɑtʋ, ɩlɛnɑ ɩ́ kʋsɩ ɩ tillɑɑ nɑpǝlɩ sɩ: Ɩ́ polo mɑ tǝmlɛ nyǝ́mɑ kiŋ nɑ pɑ́ cɛlɛ-m mɑ tete. 35 Tǝnɑɣɑ tǝmlɛ nyǝ́mɑ mpɛ pɑ kpɑ ɩ tillɑɑ mpɛ nɑ pɑ́ mɑ́ lɛlʋ kɛ teu, nɑ pɑ́ kʋ lɛlʋ, nɑ pɑ́ yoo lɛlʋ kɛ pɛɛ. 36 Ḿpʋ́ɣʋ́ sɔsɔ ɩnɩ ɩ tɑɣɑnɑ tillɑɑ lɛlɑɑ kɛ kʋsʋɣʋ kɛ pɑɣɑlɛ nɑ pǝ́ kǝlɩ kɑncɑɑlɑɣɑ nyǝ́mɑ. Ɩlɛnɑ tǝmlɛ nyǝ́mɑ tɑsɑ pɛlɛɣɛ lɑpʋ kɛ teitei ɩsɩɩ pɑɑ lɑpʋ kɑncɑɑlɑɣɑ nyǝ́mɑ tɔ. 37 Tǝnɑɣɑ ɩ tɛɛsɑ ɩ pǝyɑlʋ kɛ tiluɣu, nɑ ɩ́ hʋʋkɩ sɩ pɑɑ nyɑ́ ɩ pǝyɑlʋ ɩsǝlɛ. 38 Amɑ tǝmlɛ nyǝ́mɑ nɑ́ kɔmɑ nɑ pɑ́ loosi ɩ pǝyɑlʋ, ɩlɛnɑ pɑ́ heeli tǝmɑ sɩ: Ɩɩ loosiɣi kpɑncoou tʋ kɔŋnɑ ntɛ? Ɩ́ kɔɔ nɑ tǝ́ kʋ-ɩ nɑ ɩ tɑɑlɛ pǝsɩ tɑ́ nyǝntɛ. 39 Tǝnɑɣɑ pɑ́ kpɑ-ɩ, nɑ pɑ́ lǝsɩ-ɩ tɑɑlɛ nɑ wɑɑlɩ nɑ pɑ́ kʋ-ɩ.

40 Tǝnɑɣɑ Yesu pɔɔsɑ Yutɑ sɔsɑɑ mpɛ sɩ: Tɑɑlɛ tʋ ɩ́ kɔmɑ nɑ ɩ́ kɔɔ, ɩsǝnɑɣɑ ɩ kɑ́ lɑ tǝmlɛ nyǝ́mɑ pɑnɛ?

41 Ḿpʋ́ɣʋ́ Yutɑ sɔsɑɑ cɔ Yesu sɩ: Ɩ kɑɑ nyǝnɩ yǝlɑɑ ɑsɑɣɑɑ pɑnɛ pɑ pǝtɔɔtǝlɛ. Amɑ ɩ kʋɣɩ-wɛɣɛ, nɑ ɩ́ kpɑɣɑ tɑɑlɛ nɑ ɩ́ cɛlɑ lɛlɑɑ mpɑ pǝ́ tɑlɑ pǝ wɑɑtʋ pɑɑ cɛlɛ-ɩ ɩ tete tɔ.

42 Tǝnɑɣɑ Yesu pɔɔsɑ Yutɑ sɔsɑɑ sɩ: Ɩ́ tɑ́ kɑlǝtɑ nti pɑ ŋmɑɑ Ɩsɔ Tɔm tɑɑ tɔ yɛɛ? Pɑ ŋmɑɑwɑɣɑ sɩ:

Pǝlɛ nte tɛtʋ ŋmɑlɑɑ ŋmɑɑkɑɣɑ nɑ pɑ́ lɔ tɔ,

ńtɛ́ tǝ tɔɔ kɔlɔ ŋmɑtʋ tǝnɑ mǝlɑɑ nɑ tǝ́ sǝŋ.

Mpi Tɑcɑɑ lɑpɑ nɑ tǝ́ nyǝnǝɣɩ nɑ pǝ́ wɛ-tʋɣʋ piti tɔɣɔlɛ.

43 Ḿpʋ́ɣʋ́ Yesu tɑsɑ-wɛ sɩ: Pǝ tɔɔ kɛ́ mɑ heeliɣi-mɛ sɩ pɑɑ lɛɛkɩ-mɛɣɛ Ɩsɔ Kɑwulɑɣɑ nɑ pɑ́ cɛlɑ-kɛɣɛ yǝlɑɑ mpɑ pɑ mʋnɑ kɑ tǝmlɛ tɔ. [ 44 Ye pǝ cǝpɑ wei nɑ ɩ́ hoti pǝlɛ ntɛ́ tǝ tɔɔ, tǝ pʋtǝtǝɣɩ-ɩ kɛ́, ɩ kɑɑ wɛɛ hiiu. Yɑɑ pǝ cǝpɑ yʋlʋ nɔɣɔlʋ nɑ pǝlɛ ńtɛ́ tǝ nyǝkɩ-ɩ, tǝ tɑɑlǝɣɩ-ɩ nɑ ɑtɛɣɛ.]

45 Kɔtǝlɑɑ sɔsɑɑ nɑ Fɑlisɑnɑɑ pɑ nɩɩ mpʋ, ɩlɛnɑ pɑ́ nyɩ sɩ mpɛɣɛ Yesu sɛɛnɑ ɩsɔ ɩnɩ. 46 Tǝnɑɣɑ pɑ sʋʋ mpɑɑʋ pɛɛkʋɣʋ sɩ pɑ́ kpɑ-ɩ. Amɑ pɑ nyɑmnɑ sɑmɑɑ. Pǝ tɑɣɑ pʋlʋ tɔɔ, pɛlɛ pɑ́ nyǝnɑɣɑ Yesu kɛ́ Ɩsɔ kʋyɔɣɔtʋtʋ tɛlǝsʋlʋ kɛ́.

<- Mɑtiyee 20 Mɑtiyee 22 ->