1 Ɩɩ nɑɑ ɩsǝnɑ ɩsɔtɑɑ Kɑwulɑɣɑ nǝɣǝsǝnɑɑ tɔɣɔlɔ. Sɔsɔ nɔɣɔlʋ ɩ kʋlǝnɑ tɑnɑŋ ɑhulɑ tɛɛ tǝpɑm sɩ ɩ cɑɑ ɑpɑɑ nyǝ́mɑ nɑ ɩ́ tʋ ɩ lɛsɛŋ tɑɑlɛ tɑɑ. 2 Ḿpʋ́ɣʋ́ ɩ tisɑɑ sɩ: Ilim ɩ́ tɛmɑ mɑɑ fɛlɩ-mɛɣɛ liɣitee nyǝɣǝlʋɣʋ kʋlʋmʋɣʋ kʋlʋmʋɣʋ. Ɩlɛnɑ ɩ́ heeli-wɛ sɩ: Ɩ́ tɛɛ nɑ ɩ́ luŋ mɑ tɑɑlɛ tɑɑ. 3 Ilim kɔmɑ nɑ pǝ́ kpɑ pǝcɔ ɩlɛnɑ ɩ́ tɑsɑ lɩɩʋ nɑ ɩ́ mɑɣɑnɑ nɑpǝlɩ, pɛlɛ pɑ cɑɣɑ yem kɛ́ nɔnɔɣɔ tɛɛ. 4 Tǝnɑɣɑ ɩ heelɑ pɛlɛ sɩ: Ɩ́ tɛɛ mɑ lɛsɛŋ tɑɑ, mɑɑ fɛlɩ-mɛɣɛ ɩsǝnɑ pǝ nǝɣǝsǝnɑɑ tɔ. 5 Ɩlɛnɑ pɛlɛ pɑ́ tɛɛ. Ḿpʋ́ɣʋ́ sɔsɔ ɩnɩ ɩ kɔmɑ nɑ ɩ́ tɑsɑ lɩɩʋ kɛ ilim sikuɣu nɑ ɩ́ hiki nɑpǝlǝɣɩ mpʋ tɔtɔ. Pǝ kɔmɑ nɑ pǝ́ tɑlɑ ilim hʋʋʋ ɩlɛnɑ ɩ́ tɑsɑ lɛlɑɑ kɛ hikuɣu nɑ ɩ́ ponɑ ɩ tɑɑlɛ tɑɑ tɔtɔ. 6 Pǝ kɔmɑ tɑɑnɑɣɑ ilim ɩlɛnɑ ɩ́ lɩɩ nɑ ɩ́ mɑɣɑnɑ nɑpǝlɩ, pɛlɛ pɑ cɑɣɑ nɔnɔɣɔ tɛɛ. Ɩlɛnɑ ɩ́ pɔɔsɩ-wɛ sɩ: Pepe tɔɔ kɛ́ ɩ́ cɑɣɑ yem kɛ mpʋ? 7 Ḿpʋ́ɣʋ́ pɛlɛ pɑ cɔ-ɩ sɩ: Tǝ tɑ hiki wei ɩ kɑ́ kpɑɣɑ-tʋɣʋ tǝmlɛ tɔɣɔ. Tǝnɑɣɑ ɩ tɔmɑ sɩ: Ye mpʋ, ɩ́ polo mɑ lɛsɛŋ tɑɑlɛ tɑɑ yɑɑ.

8 Ilim kɔmɑ nɑ pǝ́ tɛ ɩlɛnɑ sɔsɔ ɩnɩ ɩ́ yɑɑ ɩ tǝmlɛ tɔɔ nyǝnllʋ nɑ ɩ́ tɔmɩ-ɩ sɩ: Tɔʋ, yɑɑ ɑpɑɑ nyǝ́mɑ mpɛ nɑ ń fɛlɩ-wɛɣɛ pɑ liɣitee. Cɑɑlǝnɑ mpɑ pɑ tǝkǝnɑ kpɑɣɑʋ tɔ nɑ ń tɛɛsǝnɑ mpɑ pɑ cɑɑlɑ kpɑɣɑʋ tɔ. 9 Ḿpʋ́ɣʋ́ mpɑ ɩ kɑ hikɑ tɑɑnɑɣɑ ilim tɔ pɛlɛ pɑ kɔmɑ nɑ pɑ́ hiki liɣitee nyǝɣǝlʋɣʋ nyǝɣǝlʋɣʋ. 10 Ḿpʋ́ɣʋ́ mpɑ pɑ cɑɑlɑ tǝmlɛ tɑɑ kɛ́ sʋʋʋ tɔ pɑ hʋʋwɑ sɩ mpɛ pɑ nyǝnɑ kɑ́ kǝlɩ pɑnɛ pɑ nyǝnɑ. Amɑ liɣitee nyǝɣǝlʋɣʋ nyǝɣǝlʋɣʋ kɛ́ pɑ cɛlɑ-wɛ. 11 Sɔsɔ ɩnɩ ɩ fɛlʋɣʋ-wɛɣɛ mpʋ tɔ pǝ tɑ mɑɣɑ-wɛ. 12 Ɩlɛnɑ pɑ́ tɔ sɩ: Mpɑ pɑ kɔmɑ nɔɔnɔɔ tɔ kɑlifu kʋlʋm kɛ pɛlɛ pɑ lɑpɑ tǝmlɛ, ɩlɛnɑ ń mǝlɩ nɑ ń kpɛntɩ-tʋɣʋ kʋfɛlʋɣʋ kʋlʋmʋɣʋ nɑ? Pǝyele tɑ́ kɑnɑ nɑ ilim nyɑɣɑ-tʋɣʋ hɑtoo tɑnɑŋ tɛɛ. 13 Tǝnɑɣɑ sɔsɔ ɩnɩ ɩ cɔ pɑ tɑɑ lɛlʋ sɩ: Mɑ tɑɑpɑlʋ, mɑ tɑ muɣuli-ŋ se. Mɑ nɑ-ŋ tɩɩ sɩɩ ḿpʋ́ɣʋ́ sɩ ń lɑpɑ ilim nɑ pǝ tɛm mɑɑ fɛlɩ-ŋ liɣitee nyǝɣǝlʋɣʋ, yɑɑ pǝ tɑɣɑ mpʋ? 14 Mʋ nyɑ́ liɣitee nɑ ń tɛɛ ń fɛɛ-m. Mɑ́ nɔkǝnɑ sɩ mɑ́ cɛlɑ wei pǝ tǝkǝnɑɑ tɔtɔɣɔ teitei ɩsɩɩ mɑ cɛlɑ nyɑ́ tɔ. 15 Mɑ fɛɩnɑ mpɑɑʋ sɩ mɑ́ lɑnɑ mɑ liɣitee kɛ ɩsǝnɑ mɑ sɔɔlɑɑ tɔ? Mɑ lɑpɑ kʋpɑntʋ tɔɣɔ pǝ wɩɩkɩ-ŋ yɑɑ? 16 Tǝnɑɣɑ Yesu tɑsɑɑ sɩ: Wɑɑlɩ nyǝ́mɑ kɑ́ mǝlɩ lɔlɔ, nɑ lɔlɔ nyǝ́mɑ nɑ́ɑ́ mǝlɩ wɑɑlɩ.

Ɩlɛnɑ ɑlʋ cɔ-ɩ sɩ: Mɑ cɑɑ sɩ ń tɔ sɩ mɑ pǝyɑlɑɑ pɑnɛ pɑ nɑɑlɛ pɑɑ cɑɣɑ nyɑ́ kiŋ kɛ wɑɑtʋ wei n kɑ́ tɔɣɔ nyɑ́ Kɑwulɑɣɑ tɔ. Lɛlʋ kɛ nyɑ́ ntɔɣɔŋ tɔɔ, lɛlʋ kɛ nyɑ́ mpǝtǝŋ tɔɔ. 22 Ḿpʋ́ɣʋ́ Yesu cɔ-wɛ sɩ: Ɩ́ tɑ́ nyɩ mpi ɩ́ sǝlǝmǝɣɩ tɔ yɛɛ? Ɩ́ pǝsǝɣɩ nɑ ɩ́ tɔɣɔ wɑhɑlɑ sɔsɔ wei mɑɑ tɔɣɔ tɔ? Tǝnɑɣɑ pɑ tɔmɑ sɩ: Tɩɩ pǝsɩ. 23 Ɩlɛnɑ Yesu cɔ-wɛ sɩ: Tɑmpɑnɑ ɩ́ kɑ́ tɔɣɔ wɑhɑlɑ sɔsɔ wei mɑɑ tɔɣɔ tɔ. Amɑ pǝ tɑɣɑ mɑ́ lǝsǝɣǝnɑ mpɑ pɑɑ cɑɣɑ mɑ ntɔɣɔŋ tɔɔ, nɑ mpɑ pɑɑ cɑɣɑ mɑ mpǝtǝŋ tɔɔ tɔ. Mpɑ pɑ tɔɔ mɑ Cɑɑ tɑɣɑnɑ lonɑ ɑnɩ tɔ pɛlɛ pɑ kɛnɑ ɑ nyǝ́mɑ.

24 Yesu ɩfɑlɑɑ nɑɑnʋwɑ wei pǝ kɑɑsɑɑ tɔ pɛlɛ pɑ nɑ́ mpʋ, ɩlɛnɑ pɑ tɑɑ wɩɩnɑ Sepetee pǝyɑlɑɑ mpɛ pɑ nɑɑlɛ. 25 Tǝnɑɣɑ Yesu yɑɑ pɑ tǝnɑ nɑ ɩ́ tɔ-wɛ sɩ: Ɩ́ nyǝmɑ́ sɩ mpɑ pɑ kɛ́ yǝlɑɑ ɑwulɑɑ tɔ, pɛlɛ pɑ tɔkɩ kɑwulɑɣɑ kɛ lɛlɑɑ tɔɔ. Nɑ mpɑ pɛlɛ pɑ kɛ́ kʋfeelɑɑ tɔ, pɛlɛ pɑ ŋmɑkǝlǝɣɩ sǝkpemɑ. 26 Amɑ pǝ fɛɩ sɩ pɩɩ wɛɛ ḿpʋ́ɣʋ́ mǝ kiŋ. Nti tɔɣɔlɛ sɩ, ye mǝ tɑɑ wei ɩ́ cɑɑ ɩ lɑ sɔsɔ kɛ mǝ hɛkʋ, pʋntʋ ɩ́ pǝsɩ mǝ pǝyɑlʋ. 27 Nɑ ye mǝ tɑɑ nɔɣɔlʋ ɩ́ cɑɑ ɩ lɑ mǝ nɔɣɔ tʋ, pʋntʋ ɩ́ pǝsɩ mǝ yom. 28 Mpʋ tɔtɔɣɔ Yʋlʋ Pǝyɑɣɑ mɑ́, mɑ tɑ kɔɔ sɩ mɑ́ tɔɣɔ cɛcɛɛlɛ. Amɑ mɑ kɔmɑɣɑ sɩ mɑ́ pǝsɩ yǝlɑɑ tǝnɑ tǝmlɛ tʋ, nɑ mɑ́ hɑ mɑ weesuɣu nɑ pǝ cɛ yǝlɑɑ pɑɣɑlɛ kɛ pɑ yomle tɑɑ.