1 Ḿpʋ́ɣʋ́ Yesu sɛɛ ɩ ɩfɑlɑɑ kɛ ɩsɔ sɩ: Apɑlʋ toŋ tʋ nɔɣɔlʋ kɑ wɛnnɑ tǝmlɛ tʋ nɔɣɔlʋ wei ɩ niŋ tɑɑ toŋ tʋ ɩnɩ ɩ mǝlǝnɑ ɩ wɛnɑʋ tǝnɑ nɑ ɩ́ tʋ tɔ. Tǝnɑɣɑ yǝlɑɑ polɑɑ nɑ pɑ́ mɑɣɑnɑ toŋ tʋ ɩnɩ nɑ pɑ́ heeli-ɩ sɩ: Nyɑ́ tǝmlɛ tʋ ɩnɩ ɩ wɑkǝlǝɣɩ nyɑ́ wɛnɑʋ kɛ́. 2 Tǝnɑɣɑ toŋ tʋ yɑɑ ɩ tǝmlɛ tʋ nɑ ɩ́ pɔɔsɩ-ɩ sɩ: Nti nti mɑ nɩɩkɩ sɩ n lɑkɩ tɔ, tǝ wɛ tɑmpɑnɑ yɑɑ pɔpɔtʋ? Amɑ mɑɑ lǝsɩ-ŋ mɑ tǝmlɛ tɑɑ. Mpʋ tɔ, kɛɛsɩ-m ɩsǝnɑ nyɑ́ tǝmlɛ yɑɑsi lɑpɑ tɔ nɑ pǝ́cɔ́ ń tɛɛ nyɑ́ nyǝŋkʋ. 3 Ḿpʋ́ɣʋ́ tǝmlɛ tʋ ɩnɩ ɩ cɑɣɑɑ nɑ ɩ́ hʋʋ ɩ tɑɑ sɩ: Tɑcɑɑ lǝsǝɣɩ-m tǝmlɛ tɑɑ tɔ, nteɣelɛ mɑɑ lɑ ɩlɛ? Anɩ mɑ kɑɑ pǝsɩ hɑlǝm. Pǝyele pɑlɑ lɑpʋ nɑ́ wɛ fɛɛlɛ. 4 Ɛɛhɛɛ, mɑ nyǝmɑ́ nti mɑɑ lɑ, nɑ pɑ́ kɔmɑ nɑ pɑ́ tɔɣɔnɩ-m, mɑ́ tɑɑ lɑŋ yǝlɑɑ mpɑ pɑɑ tɔɔkɩ-m tɔ. 5 Tǝnɑɣɑ ɩ yɑɑ mpɑ mpɑ pɑɑ wɛnɑ ɩ cɑɑ kɛ kǝmlɛ tɔɣɔ kʋlʋm kʋlʋm, nɑ ɩ́ pɔɔsɩ kɑncɑɑlɑɣɑ nyǝŋ sɩ: Ɩsǝnɑɣɑ n wɛnɑ tɑ cɑɑ kɛ kǝmlɛ? 6 Ɩ́lɛ́ sɩ, Olifinɑɑ nim tonoonɑɑ nɩɩnʋwɑ (100) kɛ mɑ wɛnɑ-ɩ kǝmlɛ. Tǝnɑɣɑ tǝmlɛ tʋ ɩnɩ ɩ heelɑ-ɩ sɩ: Nn nɑɑ pǝ tɑkǝlɑɣɑ ntɔ, cɑɣɑ lɔŋ nɑ ń ŋmɑɑ sɩ nim tonoonɑɑ nɩɩlɛ nɑ nɑɑnʋwɑ. 7 Ɩ yelɑ ɩ́lɛ́ nɑ ɩ́ ŋmɑɑ lɛlʋ tɔɔ sɩ: Nɑ nyɑ́ se, ɩsǝnɑɣɑ nyɑ́ nyǝntɛ wɛɛ? Ḿpʋ́ɣʋ́ ɩ́lɛ́ ɩ cɔ-ɩ sɩ: Tɔɣɔnɑɣɑ pee sɑɑkǝnɑɑ nɩɩnʋwɑ (100). Ɩlɛnɑ ɩ́ heeli ɩ́lɛ́ sɩ: Nn nɑɑ pǝ tɑkǝlɑɣɑ ntɔ, ŋmɑɑ sɩ tɔɣɔnɑɣɑ pee sɑɑkǝnɑɑ nɩɩnɑɑsɑ. 8 Ḿpʋ́ɣʋ́ toŋ tʋ ɩnɩ ɩ sɑmɑ ɩ tǝmlɛ tʋ ɩsɑɣɑʋ ɩnǝɣɩ ɩ lɑɣɑtʋ tɔɔ. Pǝ tɑɣɑ pʋlʋ, ɑntulinyɑ ɩnɛ ɩ yǝlɑɑ wɛnɑ nyǝm kɛ ɩsǝnɑ pɑ lɑkǝnɑ tǝmɑ tɔɣɔ, nɑ pǝ́ kǝlɩ mpɑ pɑ tɑ kɛ ɑntulinyɑ ɩnɛ ɩ nyǝ́mɑ tɔ.

9 Ḿpʋ́ɣʋ́ Yesu tɑsɑ-wɛɣɛ heeluɣu sɩ: Mɑ́, mɑ heeliɣi-mɛ sɩ ɩ́ kpɑɣɑ wɛnɑʋ ŋku ɩ́ wɛnɑ ɑtɛ cǝnɛ tɔ nɑ ɩ́ lɑnɑ nɑ ɩ́ hiki tɑɑpɑlɑɑ, nɑ pǝ́ kɔmɑ nɑ ɩ́ lɑŋ-wɩ pɑ mʋ-mɛɣɛ ɩcɑtɛ nte tǝ wɛ tɑm tɔɔ tɔ tǝ tɑɑ. 10 Wei ɩ́ te sǝkpetu tɑɑ, mpʋ ɩnɩ tɔtɔɣɔ ɩ te sɔsɔɔntʋ tɑɑ. Nɑ wei ɩ tɑ te sǝkpetu tɑɑ, mpʋ ɩnɩ tɔtɔɣɔ ɩ kɑɑ te sɔsɔɔntʋ tɑɑ. 11 Ye ɩ́ lɑpɑ cɑkǝlɩ cɑkǝlɩ nɑ ɑtɛ cǝnɛ wɛnɑʋ, pɑ kɑɑ nɔkɩ-mɛɣɛ ɩsɔtɑɑ nyǝm kɛ cɛlʋɣʋ. 12 Ye ɩ́ tɑ pǝsɩ lɛlʋ nyǝm tɔkʋɣʋ kɛ teu nɑ tɑmpɑnɑ, leɣe ɩ́ kɑ́ hiki mǝ mɑɣɑmɑɣɑ mǝ niŋ nyǝm.

13 Tǝmlɛ tʋ kɑɑ pǝsɩ nɑ ɩ́ kpɩ yǝlɑɑ nɑɑlɛ nɑ ɩ́ lɑkɩ pɑ tǝmɑ. Ye ɩ kpǝpɑ mpʋ, ɩ lǝmɑɣɑsɛɛ kɔŋ ɑ wɛɛ lɛlʋ tɔɔ kɛ́, nɑ ɩ́ yele lɛlʋ. Yɑɑ ntɑnyɩ, ɩ pɑɑsǝnɑ lɛlʋ nɑ ɩ́ kisi lɛlʋ. Mɛ ɩ kɑɑ pǝsɩ nɑ ɩ́ kpɩ Ɩsɔ nɑ liɣitee nɑ ɩ́ tǝŋ mpʋ.

19 Apɑlʋ toŋ tʋ nɔɣɔlʋ ɩ kɑ wɛnnɑ, nɑ ɩ́ suuki liɣitee wontu tǝnyǝnǝnyǝnɩ kɛ teu. Pɑɑ ɩfemle nte leleŋ tɑɑ kɛ́ ɩ wɛɛ, nɑ ɩ́ tɔkɩ tɔɣɔnɑɣɑ kʋpɑŋkɑ. 20 Pǝ kɑɑsɩ kʋyɔntʋ nɔɣɔlʋ ɩ kɑ wɛɛ tɔtɔ, nɑ pɑ́ yɑɑ-ɩ sɩ Lɑsɑɑ. Ɩ tǝnɑ ɩsǝntɔ tɔ hiŋ kɛ́, nɑ ɩ hǝntɑɣɑ toŋ tʋ ɩnɩ ɩ tǝyɑɣɑ nɔɣɔ. 21 Nɑ ɩ́ tɑŋɑɑ sɩ, ye toŋ tʋ ɩnɩ ɩ kɔmɑ nɑ ɩ tɔkɩ ɩ tɔɣɔnɑɣɑ nɑ cǝɣǝlɑsɩ hoti ɑtɛ, ɩlɛ ɩ tɔɔsɩ nɑ ɩ́ tɔɣɔ. Hɑlǝnɑ hɑsɩ mɑɣɑmɑɣɑ kɔŋɑɣɑ nɑ sɩ niisiɣi kʋnyɔntʋ ɩnɩ ɩ hiŋ tɑɑ. 22 Tǝnɑɣɑ kʋnyɔntʋ ɩnɩ ɩ kɔmɑ nɑ ɩ́ sɩ, nɑ ɩsɔtɑɑ tillɑɑ kpɑɣɑ-ɩ nɑ pɑ́ ponɑ-ɩ Apǝlɑhɑm cɔlɔɣɔ ɑlǝsɑnnɑ tɑɑ. Ḿpʋ́ɣʋ́ toŋ tʋ ɩnɩ ɩ kɔmɑ nɑ ɩ́ sɩ tɔtɔ, nɑ pɑ́ pimi-ɩ. 23 Nɑ ɩ́ sʋʋ wɑhɑlɑ tɑɑ kɛ́ ɑtɛtǝlɛ tɑɑ tǝnɑ. Tǝnɑɣɑ toŋ tʋ tekɑ ɩ ɩsɛ nɑ ɩ́ loosi Apǝlɑhɑm, nɑ Lɑsɑɑ cɑɣɑ ɩ kɔŋkɔŋ tɑɑ. 24 Ɩlɛnɑ ɩ́ wuli nɑ ɩ́ yɑɑ sɩ: Hɑɩ tɑ cɑɑ Apǝlɑhɑm, nyǝnɩ mɑ pǝtɔɔtǝlɛ nɑ ń tili Lɑsɑɑ nɑ ɩ́ lii ɩ mpǝle nɔɣɔ tɑɑ kɛ́ lʋm, nɑ ɩ́ tosi mɑ nsǝmlɛ tɔɔ nɑ pǝ tɩɩ niɣiti-m niɣituɣu mɑɣɑmɑɣɑ. Pǝ tɑɣɑ pʋlʋ tɔɔ, pǝ hɑŋɑ-m kɔkɔ kɑnɛ kɑ tɑɑ kɛ́ pǝ tɩɩ fɛɩ. 25 Tǝnɑɣɑ Apǝlɑhɑm cɔ-ɩ sɩ: Mɑ pǝyɑlʋ, tɔɔsɩ sɩ, n kɑ wɛʋ ɑtɛ tɔ, n tɔɣɔ nyɑ́ leleŋ kɛ teu, nɑ Lɑsɑɑ ɩ́lɛ́ ɩ tɔɣɔ nyɑŋ kɛ́ pǝ tɩɩ fɛɩ. Nɔɔnɔɔ kɛlɛ pǝ tɑlɑ ɩ́lɛ́ ɩ leleŋ sɩ ɩ lɑŋlɛ ɩ́ hɛɛ, nɑ pǝ tɑlɑ nyɑ́ wɑhɑlɑ. 26 Pǝlɛ pǝ pɑɑsi tɑ́ nɑ-mɛ tɑ́ hɛkʋ wɛ pʋ́ʋ́ɣʋ́ kɛ yem tǝlemm, ŋku kʋ lumɑŋ nɑ kʋ wɑlɑsɩ fɛɩ tǝnɑɣɑ tɔ. Mpʋ tɔ, yʋlʋ kɑɑ pǝsɩ nɑ ɩ́ lɩɩ cǝnɛ nɑ ɩ́ polo mǝ kiŋ, nɑ mǝ cɔlɔ tʋ kɑɑ pǝsɩ nɑ ɩ́ lɩɩ nɑ ɩ́ kɔɔ tɑ́ kiŋ cǝnɛ. 27 Ḿpʋ́ɣʋ́ toŋ tʋ ɩnɩ ɩ tɑsɑ-ɩ yɔɣɔtʋɣʋ sɩ: Tɑcɑɑ lɑ suulu nɑ ń tili Lɑsɑɑ kɛ mɑ cɑɑ tǝyɑɣɑ tɑɑ. 28 Mɑ wɛnɑ newɑɑ kɛ kɑkpɑsɩ kɛ tǝnɑ. Ɩ́ polo nɑ ɩ́ kpɑɑlɩ-wɛɣɛ teu, nɑ pɛlɛ pɑ́ tɑɑ kɔɔ pɑ́ tɑsɑ wɑhɑlɑ ɩnɛ ɩ tɑɑ kɛ́ sʋʋʋ tɔtɔ. 29 Ḿpʋ́ɣʋ́ Apǝlɑhɑm cɔ-ɩ sɩ: Ye kpɑɑlʋɣʋ kɛ pɑ cɑɑ, Moisi nɑ Ɩsɔ kʋyɔɣɔtʋtʋ tɛlǝsǝlɑɑ pɑ wɛɛ ɩlɛ, pɑ́ nɩɩnɑ pɛlɛ. 30 Tǝnɑɣɑ toŋ tʋ tɔmɑ sɩ: Aɑɩ hɑɩ, tɑ cɑɑ Apǝlɑhɑm. Ye ɩsɩɩ ɑtɛtʋnɑɑ tɑɑ nɔɣɔlʋ kɑ mǝlǝnɑ nɑ ɩ́ mɑɣɑnɑ-wɛ, pɑɑ lɑɣɑsɑ tɔntɛ. 31 Apǝlɑhɑm tɑsɑ-ɩ heeluɣu sɩ: Ye pɑ kpɛɛsɑ Moisi nɑ Ɩsɔ kʋyɔɣɔtʋtʋ tɛlǝsǝlɑɑ pɑ tɔm, pɑɑ ɑtɛtʋnɑɑ tɑɑ nɔɣɔlʋ kɑ ponɑ, pɑ kɑɑ tʋnɑ.

<- Luku 15Luku 17 ->