Yosuwee 5

1 Tɛtʋ nti pɑ yɑɑkɩ sɩ Amolii tɔ, tǝ ɑwulɑɑ tǝnɑ mpɑ pɑ wɛnɑ Yɑɑtɑnɩ ilim tǝtʋlɛ tɔɔ tɔ, nɑ Kɑnɑɑŋ ɑwulɑɑ mpɑ pɑ kpǝtǝnɑ Metitelɑnee teŋku tɔ. Pɑ tǝnɑ pɑ kɔmɑ nɑ pɑ́ nɩɩ sɩ Tɑcɑɑ lɑpɑ nɑ pɔɣɔ nyɔɔ nɑ pɑ́ tɛsɩ. Ɩlɛnɑ pɑ ɑpɑlʋtʋ yɔɔlɩ-wɛ, nɑ Ɩsɛɣɛlɩ nyǝ́mɑ tɔm lɑ-wɛɣɛ sɔɣɔntʋ kɛ kɑtɑtǝlɑɣɑ.

Ɩsɛɣɛlɩ nyǝ́mɑ pɛlʋɣʋ kɛ Kilikɑɑ

2 Mpʋɣʋlɛ Tɑcɑɑ tɔmɑ Yosuwee kɛ wɑɑtʋ ɩnɩ ɩ tɑɑ sɩ: Cɑɑ pɛɛ sɛɛsɩ nɑ ń pɛlɩ Ɩsɛɣɛlɩ piitim kʋfɑm pǝnɛ.

3 Ntɛnɑ Yosuwee pɛlɩ-wɛɣɛ teitei, ɩsɩɩ Tɑcɑɑ kɑ yɔɣɔtʋɣʋ tɔɣɔ pulɑɣɑ ŋkɑ pɑ yɑɑ sɩ: Pɛlʋɣʋ pulɑɣɑ tɔ kɑ tɔɔ. 4-5 Wɑɑtʋ wei Ɩsɛɣɛlɩ nyǝ́mɑ lɩɩwɑ Icipiti tɔ pɑ pɛlɑ ɑpɑlʋpiyɑ tǝnɑ mpɑ pɑ tɑlɑ yoou pote tɔ. Amɑ pɛlɛ pɑ tǝnɑɣɑ mpʋ pɑ sǝpɑ wʋlɑɣɑ tɛtʋ tɑɑ. Pǝlɛ pǝ wɑɑlɩ pɑ tɑsɑ ɑpɑlʋpiyɑ mpɑɣɑ lʋlʋɣʋ tɔ pɑ tɑ pɛlɩ pɛlɛ. Mpi pǝ tɔɔ Yosuwee pɛlɑ-wɛ tɔɣɔlɛ. 6 Mpi tɔ, Ɩsɛɣɛlɩ nyǝ́mɑ kisɑ Ɩsɔ kɛ́ nɩɩnɑʋ kɛ́, ɩlɛnɑ pɑ́ cɔɔ wʋlɑɣɑ tɛtʋ tɑɑ kɛ́ pɩɩsɩ nɩɩlɛ tǝcu, nɑ pɑ tɑɑ ɑpɑlʋpiyɑ mpɑ pɑɑ tɑlɑ yoou pote kɛ pɑ Icipiti lɩɩʋ wɑɑtʋ tɔ pɑ́ sɩ́ pɑ tǝnɑ. Mpʋ ɩnǝɣɩ Tɑcɑɑ kɑ yɔɣɔtǝnɑ tuunɑʋ sɩ pɑ tɑɑ nɔɣɔlʋ kɑɑ keesi tɛtʋ kʋpɑntʋ nti tǝ tɑɑ tɔɣɔnɑɣɑ tɔlɑ yem tǝhɔ tɔ. Tǝnɑɣɑ ɩ kɑ sɩɩwɑ pɑ cɑɑnɑɑ kɛ nɔɣɔ sɩ ɩ kɑ́ hɑ-wɛ. 7 Ɩlɛ pɑ piyɑ kɛ Ɩsɔ lɛɛtɑ pɑ lonte. Pǝ tɔɔ kɛ́ Yosuwee pɛlɑ-wɛ. Mpi tɔ, pɑ tɑɑ pɛlɩ-wɛɣɛ mpɑɑʋ tɑɑ. 8 Pɑ tɛmɑ pɑ looŋɑ tǝnɑɣɑ pɛlʋɣʋ, ɩlɛnɑ pɑ́ cɑɣɑ pɑ tǝcɑɣɑlɛ, hɑlǝnɑ pǝ́ wɑɑ-wɛ. 9 Ntɛnɑ Tɑcɑɑ tɔ Yosuwee sɩ: Sɑŋɑ ntɛ́ mɑ kɛɛlɑ mǝ nyɔɔŋ tɔɔ kɛ́ mǝ Icipiti fɛɛlɛ.

Ɩlɛnɑ pɑ́ hɑ tǝnɛ ɩnǝɣɩ hǝtɛ sɩ Kilikɑɑ (Pɑkɛɛlɑɑ). Nɑ pɑ́ yɑɑkɩ-tɛɣɛ ḿpʋ́ɣʋ́ hɑlǝnɑ sɑŋɑ.

Tɛɛʋ ɑcimɑ kɑncɑɑlɑɣɑ nyǝnɑ tɔɣɔʋ kɛ Kɑnɑɑŋ

10 Mpʋɣʋlɛ Ɩsɛɣɛlɩ nyǝ́mɑ sikɑ Kilikɑɑ kɛ timpi tɛtʋ wɛ ɩhǝntɑʋ tɔɣɔ Yeliko kiŋ. Ɩlɛnɑ pɑ́ tɔɣɔ Tɛɛʋ ɑcimɑ kɛ tǝnɑɣɑ ɩsɔtʋ kʋyɛɛŋ nɑɑnʋwɑ nɑ liɣiti wule tɑɑnɑɣɑ. 11 Tɛɛʋ ɑcimɑ tɛʋ kʋfemuɣu kɛ pɑ cɑɑlɑ tɛtʋ tɔɣɔnɑɣɑ kɛ tɔɣɔʋ, nɑ potopotonɑɑ mpɑ pɑ tɑɑ kʋkʋsʋm fɛɩ tɔ. Ɩlɛnɑ pɑ́ wɔ tɔɣɔnɑɣɑ pee nɑ pɑ́ sɑlɩ tɔtɔ. 12 Kʋyɑŋkuɣu mɑnnɑ yelɑ hotuɣu pɑ tɑ tɑsɑ-ɩ nɑʋ. Pǝ kpɑɣɑʋ wɑɑtʋ ɩnɩ tɔɣɔ Ɩsɛɣɛlɩ nyǝ́mɑ sʋʋ tɛtʋ tɔɣɔnɑɣɑ kɛ tɔɣɔʋ.

Tɑcɑɑ yoolɑɑ nyʋɣʋ tʋ

13 Kʋyɑkʋ nɑkʋlɩ Yosuwee wɛ Yeliko cɔlɔ, nɑ ɩ́ kʋsɩ ɩsɛ, ɩlɛ ɩ nɑ́ ɑpɑlʋ nɔɣɔlʋɣʋlɛ nɑ ɩ niŋ tɑɑ kɛ́ lɑɣɑtɛ. Ḿpʋ́ɣʋ́ ɩ polɑ ɩ kiŋ nɑ ɩ́ pɔɔsɩ-ɩ sɩ: N kɛ́ tɑ́ nyǝŋ yɑɑ tɑ́ kolontu? 14 Mpʋɣʋlɛ ɑpɑlʋ ɩnɩ ɩ nɔɣɔ tǝkpɑʋ sɩ: Aɑɩ, mɑ kɛ́ Tɑcɑɑ yoolɑɑ nyʋɣʋ tʋ kɛ́, nɔɔnɔɔ kɛ́ mɑ kɔmɑ.

Tǝnɑɣɑlɛ Yosuwee hotɑ ɩ tɛɛ, nɑ ɩ́ sɛɛ-ɩ nɑ ɩ́ pɔɔsɩ-ɩ sɩ: Nɑ wentiɣilɛ n kɔmnɑɑ?

15 Kɛlɛnɑ Tɑcɑɑ yoolɑɑ nyʋɣʋ tʋ tɔ Yosuwee sɩ: Wɔɣɔsɩ nyɑ́ ntɑŋkpɑlɑ. Mpi tɔ, timpi tɑɑ n sǝŋɑ mpʋ tɔ, pǝ wɛ kɑtɛ kɛ́.

Ɩlɛnɑ Yosuwee lɑ mpʋ.

<- Yosuwee 4 Yosuwee 6 ->