15
Ɩlifɑsɩ nyǝntʋ tɔtɔ
1 Ḿpʋ́ɣʋ́ Temɑŋ tʋ Ɩlifɑsɩ cɔwɑ Soopu sɩ:
2 Yʋlʋ lǝmɑɣɑsɛɛ tʋ ɩsɩɩ nyɑ́ tɑkɑ,
kɑɑ yɔɣɔtǝɣɩ tɔm kpɑɩ nyǝntʋ,
yɑɑ ɩ́ hɔŋ ɩ tǝɣɩ yem kɛ́ mpʋ.
3 Nyɑ́ kɑlʋɣʋ wɛ kpɛtɛ kɛ́,
pǝ tɑɑ fɛɩ kɑwɑɑɣɑ.
4 Ɩsɔ nyɑmnɑʋ mɑɣɑmɑɣɑ
nɑ ɩ sɛɛʋ kite kɛ n wɑkǝlǝɣɩ yoo!
5 Nyɑ́ ɩsɑɣɑtʋ tɔm kɛ nyɑ́ nɔɣɔ yɔɣɔtǝɣɩ.
Pǝyele ɑcilɑɣɑtʋ nyǝ́mɑ kʋyɔɣɔtʋtʋ kɛ n kpɑɣɑɑ.
6 Nyɑ́ nɔɣɔ hʋlǝɣǝnɑ nyɑ́ ɩsɑɣɑtʋ.
Nyɑ́ ntompee kʋɣʋnɑ nyɑ́ tɔm pǝ tɑɣɑ mɑ́.
7 Nyɑɣɑ pǝ tɑɑlǝnɑ lʋlʋɣʋ nɑ?
Yɑɑ n lɑɑlɑ pulɑsɩ kɛ ilim nɑʋ?
8 N nɩɩwɑ Ɩsɔ lɑɣɑtʋ tɑsʋɣʋ,
nɑ ń hii lɑɣɑtʋ kɛ nyɑ́ tike nɑ?
9 N tɑ tɛɛ-tʋɣʋ nyǝm,
pǝ́cɔ́ n tɑ cɛkǝnɑ pʋlʋ
nɑ pǝ́ wɛ-tʋɣʋ sǝkpɛtʋɣʋ.
10 Tɑ tɑɑ cǝnɛ wɛ nyʋŋhʋlʋmǝŋ nyǝ́mɑ,
nɑ ɑkpɑtǝlɑɑ mpɑ pɑ tɛɛ nyɑ́ cɑɑ kɛ sɔsɔɔntʋ tɔ.
11 N nyǝnǝɣɩ yem kɛ́ Ɩsɔ lɑŋhɛɛsǝlɛ tɔm
nti ɩ tɛlǝsǝɣɩ-ŋ tǝpɑmm nɑ tɑ́ nɔɔsɩ tɔɣɔ?
12 Pepe tɔɔ kɛ́ nyɑ́ pɑ́ɑ́nɑ́ huuki mpʋ,
nɑ ń cɩɩlǝɣɩ-tʋɣʋ ɩsɛ?
13 Ɩsɔ kɛ́ n mʋnɑ pɑ́ɑ́nɑ́,
nɑ ń yɔɣɔtǝɣɩ tɔmnɑɑ mpɛ?
14 Yʋlʋ ɩɩ pǝsǝɣɩ nɑ ɩ́ wɛɛ
tǝnɑŋŋ yɑɑ ɩ́ siɣisɑ teu kɛ Ɩsɔ.
15 Pɑɑ ɩsɔtɑɑ tillɑɑ mɑɣɑmɑɣɑ Ɩsɔ fɛɩnɑ-wɛɣɛ nɑɑni.
Pǝyele ɩsɔtɔnʋɣʋ fɛɩ tǝnɑŋŋ.
16 Kɑcɑŋfɑnɑ yʋlʋ ɩsɑɣɑʋ nɑ ɑcɑɑlʋɣʋ
ŋku kʋ mɑlǝnɑ ɩsɑɣɑtʋ ɩsɩɩ lʋm nyɔɔʋ tɔ?
17 Tɔʋ, Soopu ke ŋkpɑŋŋ nɑ mɑ́ sɛɣɛsɩ-ŋ
nɑ mɑ́ kɛɛsɩ-ŋ nti mɑ nɑwɑ tɔ.
18 Nti lǝmɑɣɑsɛɛ nyǝ́mɑ nɩɩwɑ
pɑ cɑɑnɑɑ kiŋ nɑ pɑ́ hʋ́lɩ́ tɔ.
19 Pɑ tike kɛ Ɩsɔ kɑ hɑwɑ tɛtʋ,
kpɑɩ tʋ nɔɣɔlʋ ɩ tɑ siti pɑ hɛkʋ.
20 Ɩsɑɣɑʋ wɛ ɩsǝnyǝŋlɛ tɑɑ kɛ́
ɩ weesuɣu pɩɩsɩ tǝnɑɣɑ, hɑlǝnɑ ɩ sǝm.
Pǝyele pɑ kɑlɑ ŋmɑkǝllʋ pɩɩsɩ tǝnɑɣɑ.
21 Sɔɣɔntʋ tɔm kɛ pɑ nɩɩkɩ.
Pɑ tɩ cɑɣɑnɑʋ wɑɑtʋ tɑɑ kɛ́ wɑkǝllʋ kɑ́ tii pɑ tɔɔ.
22 Ɩ nɑɑkɩ lɑɣɑtɛ cɛŋǝɣɩ-ɩ,
ɩlɛ ɩɩ tɛɛlǝɣɩ sɩ ɩ kɑ́ fiti sǝkpɛtʋɣʋ.
23 Ɩ pɛɛkǝɣɩ tɔɣɔnɑɣɑ,
nɑ ɩ́ nyǝmɑ́ sɩ sǝkpɛtʋɣʋ kʋyɑkʋ tɑŋɑ-ɩ.
24 Lɑŋwɑkǝllɛ nɑ nǝɣǝsɛɛ
pǝ tʋɣɩ-ɩ sɔɣɔntʋ sɔsɔɔntʋ kɛ́.
Pǝ tiiki ɩ tɔɔ kɛ́ ɩsɩɩ wulɑʋ sɔɔlʋ
pɩɩkʋɣʋ sɩ ɩ tɛɛkɩ yoou tɔ.
25 Pǝ tɑɣɑ pʋlʋ, ɩ kʋsɑ niŋ sɩ ɩ mɑkɩ Ɩsɔ.
Ɩ cɑɑkɩ sɩ ɩ kʋlǝɣɩ Tomɑ tǝnɑ tʋ tɔɔ.
26 Hɑlɩ ɩ hikɑ ɑpɑlʋtʋ sɩ ɩ́ kʋlɩ Ɩsɔ tɔɔ,
nɑ ɩ́ kentɑ ɩ tǝɣɩ ɩ kpɑlʋɣʋ
kpɩɩsǝŋ nyǝŋkʋ.
27 Ɩ kiiwɑɣɑ nɑ ɩ́ wɛnɑ ɑlɑɑfǝyɑ.
28 Acɑlɛɛ kʋyɔkɛɛ nɑ tɛɛsɩ nsi sɩ tɑɑ yǝlɑɑ
lɩɩwɑ nɑ sɩ́ cɑɑ yɔkʋɣʋ tɔ, sɩ tɑɑ kɛ́ ɩ kɑ́ cɑɣɑ.
29 Ɩ kɑɑ tɑsɑ wɛnɑʋ hikuɣu nɑ pǝ́ leeli,
pǝ́cɔ́ pǝ kɑɑ tɑsɑ-ɩ lɑpǝnɑʋ kɛ tɛtʋ tɔɔ.
30 Ɩ kɑɑ fiti sǝkpɛtʋɣʋ.
Ɩ wɛ kɛ́ ɩsɩɩ kɔkɔ nyɑkʋɣʋ tʋɣʋ piliŋɑsɩ tɔ,
Ɩsɔ kɑ́ woso-ɩ ɩ heelim nɑ pǝ́ kpiisi-ɩ.
31 Ye kpɛtɛ kɛ ɩ tʋ nɑɑni, ɩ tʋsɑ ɩ tǝɣɩ.
Mpi tɔ, kpɛtɛ ntɛɣɛlɛ ɩ kɑsǝyɑɣɑ.
32 Hɑlɩ pɩɩ lɑ mpʋ nɑ pǝ́cɔ́ pǝ́ tɑlɑ ɩ sǝm.
Teitei ɩsɩɩ piliŋɑ lɑŋʋɣʋ cǝlǝm nɑ kɑ́ sɩ́ tɔ.
33 Ɩ kɑ́ wɛɛ kɛ́ ɩsɩɩ tʋɣʋ ŋku pɑ yɑɑ sɩ, lɛsɛŋ tɔ,
kʋ ɑkɑɑ tɔɔkʋɣʋ nɑ ɑ́ tɑ pɩɩtɑ tɔ.
Yɑɑ ɩsɩɩ ŋku pɑ yɑɑ sɩ, Olifi tɔ kʋ hɛtʋ luluɣu tɔ.
34 Ɩsɑɣɑʋ tǝyɑɣɑ kɑ́ pǝsɩ kɑɑlʋlɑɣɑ,
ɩlɛnɑ kɔkɔ nɑ́ɑ́ nyɑɣɑ muɣullu tǝcɑɣɑlɛ.
35 Ɩsɑɣɑtʋ kɛ ɩ hɑkɩ nɑ ɩ́ lʋlɩ kʋlʋmtʋ ntɩ.