41
Pǝ wɛɛ sɩ Ɩsɛɣɛlɩ nyǝ́mɑ ɩ́ tʋ Tɑcɑɑ kɛ nɑɑni
1 Ḿpʋ́ɣʋ́ Tɑcɑɑ yɔɣɔtɑɑ sɩ:
Tɛtʋ nti lʋm cɔɔnɑɑ tɔ,
nɑ lʋm nɔɣɔ hɔɣɔlǝŋ nyǝ́mɑ.
Ɩ́ su nɑ ɩ́ ke ŋkpɑŋŋ nɑ ɩ́ nɩɩ mɑ tɔm.
Yǝlɑɑ pooluŋ nyǝ́mɑ mɛ, ɩ́ tɔɣɔ ɑpɑlʋtʋ.
Ɩ́ kpǝtǝnɑ nɑ ɩ́ yɔɣɔtɩ.
Tǝ kpɛntɩ nɑ tǝ́ polo hʋʋlɛ.
2 Mɑ́ lǝsǝnɑ ilim tǝlɩɩlɛ tɔɔ kɛ́ wei
ɩ tɔkɩ ɑkɑɩtʋ kɛ pɑɑ timpi ɩ́ puki tɔ.
Mɑ́ tʋnɑ ɩ niŋ tɑɑ kɛ́ piitimnɑɑ,
mɑ́ tisinɑ ɑwulɑɑ tǝfɛ.
Mɑ lɑɣɑtɛ pǝsɑ yǝlɑɑ kɛ mʋsʋɣʋ,
nɑ mɑ nyǝ́mɑ́ nɑ́ɑ́ yɑsɩ-wɛ ɩsɩɩ
heelim kpɑkʋɣʋʋ nyɩɩtʋ tɔ.
3 Mɑ tʋ pɑ wɑɑlɩ,
mɑ fɑɣɑ pɑ hɛkʋ tɑɑ, pʋlʋ tɑ tokinɑ-m.
Mpɑɑʋ ŋku mɑ tɑ tǝŋtɑ tɔɣɔ mɑ kpɑɣɑɑ.
4 Awe lɑpǝnɑ mpʋ ɩnɩ?
Awe yelinɑ nɑ pǝ kɔɔ?
Awe yɑɑnɑ lʋlʋŋ yǝlɑɑ kɛ hɑtoo
kɑncɑɑlɑɣɑ sɩ pɑ́ hiki weesuɣu?
Tɑcɑɑ mɑ́ wei mɑ kɛ́ kɑncɑɑlɑɣɑ tʋ tɔɣɔ.
Pǝ́cɔ́ mɑɑ wɛɛ wɑɑlɩ nyǝ́mɑ wɑɑlɩ tɔtɔ.
5 Tɛtʋ nti lʋm cɔɔnɑɑ tɔ pǝ nyǝ́mɑ nɑ
lʋm nɔɣɔ hɔɣɔlǝŋ nyǝ́mɑ nɑwɑ mpi mɑ lɑpɑ
tɔ nɑ sɔɣɔntʋ kpɑ-wɛ.
Antulinyɑ tǝnɑsɩ nyǝ́mɑ seliɣi.
Pɑ kpǝtǝɣǝnɑ nɑ pɑ́ kɔŋ.
6 Pɑ sǝŋnɑ tǝmɑ,
pɑɑ wei ɩ heeliɣi ɩ tɔɣɔntǝlɛ sɩ: Kɑɑsɩ nyɑ́ tɩ.
7 Tɩɩŋ lutu nɑ́ tɑsǝɣɩ ɑpɑlʋtʋ kɛ wʋlɑnɑɑ pɑɑsǝnlʋ.
Sotulu nɑ́ sǝŋnɑ sǝtɛ tɔɔ mɑtʋ.
Ɩ yɔɣɔtǝɣɩ nyǝɣǝtʋ tɑmsʋɣʋ tɔm
sɩ pǝ kɛ́ tǝmlɛ kʋpɑntɛ kɛ,
nɑ ɩ kɑŋ lɛɛsʋɣʋ nɑ nyǝmɑ́ sɩ kʋ tɑɑ ciɣiti.
Nɔɔnɔɔ tɑɑ lɑ sɔɣɔntʋ
8 Ḿpʋ́ɣʋ́ Tɑcɑɑ yɔɣɔtɑɑ sɩ:
Ye nyɑ́ ɩlɛ mɑ tǝmlɛ tʋ Ɩsɛɣɛlɩ.
Yɑkɔpʋ nyɑ́ wei mɑ lǝsɑ
mɑ tɑɑpɑlʋ Apǝlɑhɑm lʋlʋɣʋ tɑɑ tɔ.
9 Nyɑ́ wei mɑ polɑ tɛtʋ tǝnɑɣɑ tɔɔ nɑ mɑ́ pɛɛkɩ tɔ.
Mɑ yɑɑ-ŋ hɑtoo kɑteŋɑ tǝnɑsɩ tɔɔ.
Nyɑɣɑ mɑɑ heelɑɑ sɩ n kɛ́ mɑ tǝmlɛ tʋ.
Mɑ́ lǝsǝnɑ-ŋ, mɑ kɑɑ lɔŋ.
10 Sɔɣɔntʋ ɩ́ tɑɑ kpɑ-ŋ, mɑ wɛ nyɑ́ wɑɑlǝɣɩ.
Tɑɑ nǝɣǝsɩ, mɑɣɑlɛ nyɑ́ Ɩsɔ.
Mɑɑ hɑ-ŋ ɑpɑlʋtʋ.
Mɑɑ kɔɔ nɑ mɑ wɑɑsɩ-ŋ.
Mɑɑ te-ŋ nɑ mɑ toŋ sɔsɔɔŋ.
11 Mpɑ pɑ mʋ-ŋ nɑ pɑ́ɑ́nɑ́ tɔ,
pɩɩ liɣiti-wɛ nɑ fɛɛlɛ tɔɣɔ-wɛ.
Pɩɩ pɑsɑ nyɑ́ kolontunɑɑ nɑ pɑ́ pǝsɩ kpɛtɛ.
12 Mpɑ pɑ kʋlɑɣɑ nyɑ́ tɔɔ nɑ pɑ́ pɛɛkǝɣɩ-ŋ nɑ yoou tɔ.
Pɩɩ kpiisi pɑ tǝnɑ nɑ pɑ́ pǝsɩ kpɛtɛ.
N kɑ pɛɛkɩ-wɛ n kɑɑ nɑ-wɛ.
13 Mpi tɔ, mɑɣɑlɛ nyɑ́ Ɩsɔ Tɑcɑɑ.
Mɑ hɑɑkǝnɑ-ŋ toŋ. Mɑ heeliɣi-ŋ sɩ:
Tɑɑ nyɑ́. Mɑɑ kɔɔ mɑ́ wɑɑsɩ-ŋ.
Mɑ kɔŋ nyɑ́ wɑɑsʋɣʋ
14 Yɑkɔpʋ ɑtɑntɑɑliyɑ nyɑ́,
Ɩsɛɣɛliyɑ nyɑ́, tɑɑ nyɑ́.
Mɑɣɑ Tɑcɑɑ Ɩsɔ mɑ yɔɣɔtǝɣǝnɑ.
Mɑ kɛ́ Ɩsɛɣɛlɩ nyǝ́mɑ Nɑŋŋ tʋ.
Mɑɣɑlɛ wei ɩ wɑɑsǝɣɩ-ŋ tɔ.
15 Mɑɑ pǝsɩ-ŋ kpeŋkpeluɣu kʋfɑlʋɣʋ ŋku pɑ
mɑkǝnɑ tɔɣɔnɑɣɑ nɑ kʋ tɔɔ nɑ nyǝmɑ́ tɔ.
N kɑ́ yɔkɩ pɔɔŋ, nɑ ń nɑŋɩ-ɩ.
N kɑ́ pǝsɩ pulɑsɩ ɩsɩɩ lɔɔtʋ.
16 N kɑ́ fɑlɑ-wɛ nɑ heelim kpɑɣɑ,
kɑcuculɑɣɑ kɑ́ yɑsɩ-wɛ.
Ɩlɛnɑ nyɑ́ɑ́ yɔɔlǝnɑ Tɑcɑɑ,
nɑ nyɑ́ɑ́ hiki nyɑ́ teeli kɛ Ɩsɛɣɛlɩ Nɑŋŋ tʋ tɔɔ.
Wʋlɑɣɑ tɛtʋ pǝsǝɣɩ kɑcǝkɑ tɛtʋ
17 Ḿpʋ́ɣʋ́ Tɑcɑɑ tɑsɑɑ sɩ:
Wɑhɑlɑ nyǝ́mɑ, nɑ kʋnyɔntʋnɑɑ,
ɩ́ pɛɛkǝɣɩ lʋm ɩɩ nɑɑkɩ,
ɩlɛnɑ mǝ luuŋ tɛɛ wʋlɩ.
Ɩlɛ mɑɣɑ Tɑcɑɑ mɑɑ cɔ-mɛ.
Mɑɣɑ Ɩsɛɣɛlɩ Ɩsɔ,
mɑ kɑɑ lɔ-mɛ.
18 Mɑɑ yele nɑ pusi sɔsɔɔnsɩ kpe pulɑsɩ tɔɔ.
Mɑɑ tʋlɩ lʋm sɛɛlɑɑ kɛ tɛtɛkɑ tɑɑ.
Mɑɑ pǝsɩ wʋlɑɣɑ tɛtʋ kɛ lɩɩlɛ,
nɑ lʋm kpeŋ tɛtʋ kʋwʋlʋtʋ tɑɑ.
19 Mɑɑ tuu wʋlɑɣɑ tɛtʋ tɑɑ kɛ́,
tɩɩŋ toŋ nyǝŋ wei pɑ yɑɑ sɩ:
Sɛɛtǝlɩ nɑ ɑkɑsiyɑ nɑ miili nɑ olifi tɔ.
Mɑɑ yele nɑ tɩɩŋ toŋ nyǝŋ wei pɑ yɑɑ sɩ:
Sipǝlɛsɩ nɑ pɛŋ nɑ puwi tɔ ɩ́ nyɔ timpi tɛʋ fɛɩ tɔ.
20 Ɩlɛnɑ yǝlɑɑ tǝnɑ nɑ́ nɑ pɑ́ cɛkǝnɑ.
Pɑɑ welisi nɑ pɑ́ nɩɩ pǝ tɑɑ sɩ,
Tɑcɑɑ niŋ lɑpǝnɑ yɑɑsinɑɑ mpɛ.
Ɩsɛɣɛlɩ Ɩsɔ Nɑŋŋ tʋ mɑ́ mɑ́ ŋmɑnɑ-wɛ.
Ɩsɔ kʋlɑ tɩɩŋ tɔɔ
21 Ḿpʋ́ɣʋ́ Ɩsɛɣɛlɩ nyǝ́mɑ wulɑʋ Tɑcɑɑ yɔɣɔtɑɑ sɩ:
Piitimnɑɑ tɩɩŋ mɛ ɩ́ yɑɑ-m nɔnɔɣɔ.
Ɩ́ yɔɣɔtɩ mǝ tɔm.
22 Ɩ́ kɔnɑ-tɩ, ɩ́ heeli-tʋɣʋ mpi pɩɩ tɛ nɑ pǝ́ kɔɔ tɔ.
Hɑtoo tɔ, pepe tɔm kɛ tɩɩŋ mɛ ɩ́ tɛmɑ yɔɣɔtʋɣʋ sɩ pɩɩ kɔɔ?
Ɩ́ heeli-tʋ nɑ tǝ́ feŋ pǝ tɑɑ nɑ tǝ nɑ́ pǝ yoosuɣu.
Yɑɑ ɩ́ heeli-tʋɣʋ mpi pɩɩ tɛ nɑ pǝ́ kɔɔ tɔ.
23 Ɩ́ yɔɣɔtɩ mpi pɩɩ tǝkǝnɑ lɑpʋ tɔ pǝ tɔm.
Ɩlɛnɑ tǝ nyɩ sɩ ɩ́ kɛ́ tɩɩŋ.
Ɩ́ lɑ kʋpɑntʋ yɑɑ ɩsɑɣɑtʋ nɑtǝlɩ.
Ɩlɛnɑ tǝ́ kuli ɩsɛ nɑ tǝ́ kpɛntɩ nɑ tǝ́ nɑ-tɩ.
24 Mǝ wɛ kpɛtɛ kɛ́, nɑ mǝ kʋlɑpǝlɛ kɛ kpɛtɛ.
Ye yʋlʋ ɩ́ lǝsɑ-mɛ pǝ kɛ́ ɑcɑɑlǝtʋ kɛ́.
25 Mɑ lǝsɑ yʋlʋ nɑ ilim ntɔɣɔŋ, ɩ kɔŋnɑ ntɛ.
Pɑ yɑɑ ɩ hǝtɛ nɑ ilim tǝlɩɩlɛ tɔɔ.
Ɩ yɑɑnɑ ntɛɣɛ mɑ hǝtɛ.
Ɩ fɛlǝɣɩ nyʋɣʋ nyǝ́mɑ kɛ́ ɩsɩɩ ɑfǝlɑ.
Yɑɑ ɩsɩɩ tiisi ŋmɑlʋ fɛlʋɣʋ cʋɣʋ tɔ.
26 Awe yɔɣɔtǝnɑ-tǝɣɩ hɑtoo kɑncɑɑlɑɣɑ nɑ tǝ́ nyɩ-tɩ,
nɑ tǝ́ tisi sɩ tɑmpɑnɑ?
Aɑɩ nɔɣɔlʋ tɑ kpɑɑlɩ-tɩ,
nɔɣɔlʋ tɑ yele nɑ tǝ nɩɩ.
Nɔɣɔlʋ tɑ nɩɩ tɔm nti tǝ lɩɩnɑ mǝ kiŋ tɔ.
27 Mɑ́ cɑɑlǝnɑ Siyɔŋ kɛ tɔm heeluɣu.
Ɩɩ nɑɑ-tɩ, ɩɩ nɑɑ-tɩ.
Mɑ tilɑ Yosɑlɛm kɛ tillu.
Wei ɩ kɔnɑ Lɑɑpɑɑlɩ kʋpɑŋ tɔ.
28 Mɑ nyǝnɑ tɩɩŋ ɩnɩ.
Mɑ tɑ nɑ ɩ tɑɑ ŋku kɩɩ kpɑɑlɩ tɔm tɔ.
Yɑɑ ŋku kɩɩ cɔ mɑ kʋpɔɔsʋtʋ tɔ.
29 Pɑ tǝnɑ pɑ wɛ yem kɛ́,
nɑ pɑ tǝmɑ kɛ kpɛtɛ.