Kɑncɑɑlɑɣɑ 9

Nowee nɑ Ɩsɔ pɑ nɔɣɔ pɛɛlʋɣʋ

1 Ḿpʋ́ɣʋ́ Ɩsɔ koolɑ Nowee nɑ ɩ piyɑ kɛ kʋpɑntʋ sɩ: Ɩ́ lʋlɩ nɑ ɩ́ huki nɑ ɩ́ sú tɛtʋ. 2 Mɑ tʋ́ mǝ niŋ tɑɑ kɛ́ wontunɑɑ tǝnɑɣɑ, pɑɑ ɑtɛ nyǝntʋ, nɑ sumɑsɩ, nɑ tiinɑ, nɑ ɑtɛ nyɑmɑnyɑmɑnɑɑ. Pǝ tɔɔ kɛ́ wontu ntɩ tɩɩ wɛɛnɑ mǝ sɔɣɔntʋ kɛ sɔsɔm. 3 Ɩ́ pǝsǝɣɩ nɑ ɩ́ tɔɣɔ wontunɑɑ mpɛ ɩsɩɩ ɩ́ tɔkʋɣʋ kʋnyɔnyɔm tɔ. 4 Amɑ kʋlʋmtʋ kɛ́ sɩ ye ɩ cɑɑ kpǝntɛ kɛ tɔɣɔʋ, ɩ́ lɛntɩ nɑ cɑlǝm lɩɩ nɑ pǝ́cɔ́. Mpi tɔ, cɑlǝm tɑɑ kɛ́ weesuɣu wɛɛ. 5 Ye wei ɩ́ kʋwɑ yʋlʋ, mɑɑ lɛɛtɩ pʋntʋ, pɑɑ yʋlʋ pɑɑ wontuɣu.

6 Ye nɔɣɔlʋ kʋwɑ ɩ tɔɣɔntǝlɛ,

yʋlʋ tɔtɔ kɑ́ kʋnɑ pʋntʋ.

Mpi tɔ, Ɩsɔ ŋmɑ́ yʋlʋ kɛ́ ɩsɩɩ ɩ mɑɣɑmɑɣɑ ɩ wɛɛ tɔ.

7 Mɛ mɩɩ lʋlɩ nɑ ɩ́ huki nɑ ɩ́ yɑ́ tɛtʋ tǝnɑ tɑɑ.

8 Ḿpʋ́ɣʋ́ Ɩsɔ tɑsɑ Nowee nɑ ɩ pǝyɑlɑɑ kɛ heeluɣu sɩ: 9 Mɑ́ nɑ-mɛ tɩɩ pɛɛlɩ nɔɣɔ nɑ kɑ́ wɛɛ mpʋ hɑlǝnɑ mǝ lʋlʋɣʋ nyǝ́mɑ kɛ mǝ wɑɑlɩ. 10 Nɑ pǝ́ kpɛnnɑ wontu tǝnɑ nti tǝ lɩ́ɩ́ ɑtɑkɑɑ pɔɣɔlʋɣʋ tɑɑ tɔ. 11 Mɑ sɩɩkɩ mɑ nɔɣɔ sɩ mɑ kɑɑ tɑsɑ weesuɣu nyǝm kpiisuɣu kɛ tɛtʋ tɔɔ nɑ lʋm. Pǝ́cɔ́ lʋm kʋ́wɑ́ɑ́sǝm mpɩ pǝ kɑɑ tɑsɑ kɔntɛ nɑ pǝ́ wɑkǝlɩ tɛtʋ. 12-13 Ɩlɛnɑ Ɩsɔ tɑsɑ sɩ: Mɑ tʋɣɩ kɑɣɑlʋ nɑ ɩ́ hʋ́lǝ́ɣɩ́ tɑm tɔɔ kɛ́ nɔɣɔ ŋkɑ mɑ́ nɑ-mɛ nɑ weesuɣu nyǝm tǝnɑ nɑ mǝ wɑɑlɩ lʋlʋɣʋ nyǝ́mɑ tǝ pɛɛlɑɑ tɔ. 14 Mɑ́ kɔmɑ nɑ mɑ́ kpeɣelɑ ŋmʋntʋ kɛ ɩsɔtɑɑ, kɑɣɑlʋ kɑ kɑɣɑ kɛ́, 15 ɩlɛnɑ pǝ́ tɔɔsɩ-m nɔɣɔ ŋkɑ mɑ sɩɩ mǝ nɑ weesuɣu nyǝm tǝnɑ sɩ lʋm kʋ́wɑ́ɑ́sǝm mpɩ pǝ kɑɑ tɑsɑ kɔntɛ nɑ pǝ́ kpiisi weesuɣu nyǝm. 16 Ɩsɔtɔnʋɣʋ tɑɑ kɛ́ kɑɣɑlʋ kɑ́ kɑɣɑ, nɑ mɑ́ nyǝnɑ-ɩ ɩlɛ pǝ tɔɔsɩ-m nɔɣɔ ŋkɑ mɑ sɩɩ weesuɣu nyǝm tǝnɑ tɔ. 17 Mpi pǝ hʋlǝɣɩ nɔɣɔ ŋkɑ mɑ sɩɩ-wɩ tɔɣɔlɛ.

Nowee nɑ ɩ pǝyɑlɑɑ pɑ tɔm

18 Nowee nɑ ɩ pǝyɑlɑɑ mpɑ pɑ lɩɩ ɑtɑkɑɑ pɔɣɔlʋɣʋ tɑɑ tɔɣɔlɛ Sem nɑ Kɑm nɑ Yɛfɛtɛ. Kɑm ɩ́lɛ́ ɩ́ lʋlǝnɑ Kɑnɑɑŋ. 19 Nowee piyɑ mpɛ pɑ piitim hukinɑ ɑntulinyɑ tǝnɑ.

20 Ḿpʋ́ɣʋ́ Nowee nikɑ tɛtʋ hɑlǝm nɑ ɩ́ cɑɑlɩ lɛsɛŋnɑɑ sɔʋ. 21 Ɩlɛnɑ ɩ́ nyɔɔ pǝ sʋlʋm nɑ pǝ́ kʋ́-ɩ nɑ ɩ́ wɔɣɔsɩ ɩ wontu nɑ pǝ́ yele-ɩ tɑpɑkpɛtɛ kɛ cokǝle tɑɑ. 22 Mpʋɣʋlɛ Kɑnɑɑŋ cɑɑ Kɑm nɑwɑ ɩ cɑɑ tɑpɑkpɛtɛ, nɑ ɩ́ nyǝnɩ, ɩlɛnɑ ɩ́ polo nɑ ɩ́ tɑɣɑsɩ ɩ tɑɑlʋnɑɑ kɛ ɑwɑlɩ. 23 Ntɛnɑ Sem nɑ Yɛfɛtɛ pɑ́ kpɑɣɑ kpɑɩ nɑ pɑ́ hɔɣɔlɩ-ɩ nɑ pɑ́ tɔnɑ wɑɑlɩ wɑɑlɩ nɑ pɑ́ tɑkɩ pɑ cɑɑ. Ɩlɛ pɑ tɑ nɑ ɩ tɑpɑkpɛtɛ. Mpi tɔ, wɑɑlɩ wɑɑlɩ kɛ́ pɑ tɔmnɑɑ. 24 Nowee sʋlʋm kɔmɑ nɑ pǝ́ cɛ́ ɩ ɩsɛntɔɔ nɑ ɩ́ nɩɩ nti ɩ pǝyɑlʋ sǝkpelu nyǝŋ Kɑm lɑpɑ tɔ. 25 Ɩlɛnɑ ɩ́ tɔ́ sɩ:

Mpusi ɩ́ tǝŋ Kɑm pǝyɑlʋ Kɑnɑɑŋ

nɑ pǝ́ lɑpɩ-ɩ ɩ tɑɑlʋnɑɑ yom tǝkpɑpɑ.

26 Mɑ sɑmɑ Sem Ɩsɔ Tɑcɑɑ.

Pǝ́ lɑ Kɑnɑɑŋ kɛ Sem-wɛ pɑ yom.

27 Ɩsɔ ɩ́ wɑlǝsɩ Yɛfɛtɛ tǝhikile,

nɑ ɩ́ cɑɣɑ Sem tɛ́,

nɑ pǝ́ lɑ́ Kɑnɑɑŋ kɛ pɑ yom.

28 Pɩɩsɩ ŋmʋnʋɣʋ nɑ nɩɩnʋwɑ nɑ nɩɩlɛ nɑ nɑɑnʋwɑ (350) kɛ́ Nowee tɑsɑ tɔɣɔʋ kɛ lʋm wɑɑsʋɣʋ wɑɑlɩ. 29 Ɩ pɩɩsɩ tǝnɑ yoosɑ nɑsǝnɑɑsɑ nɑ nɩɩnʋwɑ nɑ nɩɩlɛ nɑ nɑɑnʋwɑ (950) ɩlɛnɑ ɩ́ sɩ́.

<- Kɑncɑɑlɑɣɑ 8 Kɑncɑɑlɑɣɑ 10 ->