1 Ḿpʋ́ɣʋ́ Tɑcɑɑ tɔmɑ Nowee sɩ: Nyɑnɑ nyɑ́ tǝyɑɣɑ tǝnɑ ɩ́ sʋʋ ɑtɑkɑɑ pɔɣɔlʋɣʋ tɑɑ. Mpi tɔ, nyɑ́ tike kɛ mɑ nɑwɑ wei ɩ nɩɩkǝnɑ-m tɔɣɔ yǝlɑɑ pɑnɛ pɑ hɛkʋ. 2 Lǝsɩ wontu nti pɑ pǝsǝɣɩ pɑ́ lɑ́ kɔtɑɣɑ tɔɣɔ ɑpɑlʋ nɑ ɑlʋ kɛ́ tɔm nɑɑtosompɔɣɔlɑɣɑ. Ɩlɛnɑ ń lǝsɩ nti tǝ fɛɩ kɔtɑɣɑ lɑpǝnɑʋ tɔɣɔ ɑpɑlʋ nɑ ɑlʋ tike. 3 Nɑ ń lǝsɩ sumɑsɩ tɑɑ kɛ́ ɑpɑlʋ nɑ ɑlʋ kɛ́ tɔm nɑɑtosompɔɣɔlɑɣɑ, nɑ ń wɑɑsɩ sɩ piitim nɑ sɩ tɑɑ tɛ tɛtʋ tɔɔ. 4 Pǝ tɑɣɑ pʋlʋ tɔɔ, pǝ kɑɑsɑ wɛɛ nɑɑtosompɔɣɔlɑɣɑ kɛ́ nɑ mɑ́ yele nɑ tɛʋ nɩɩ ilim nɑ ɑhoo kɛ kʋyɛɛŋ nɩɩlɛ tǝcu, nɑ lʋm kpiisi yǝlɑɑ nɑ wontu tǝnɑ. 5 Ɩlɛnɑ Nowee lɑ pǝ tǝnɑ ɩsɩɩ Tɑcɑɑ heelɑ-ɩ tɔ.

6 Pǝnɑɣɑ ŋkɑ lʋm wɑɑsɑ tɛtʋ tɔ Nowee wɛnɑ ɩsɩɩ pɩɩsɩ nɑsǝtoso (600). 7 Ɩlɛnɑ ɩ́ nɑ ɩ ɑlʋ nɑ ɩ pǝyɑlɑɑ nɑ ɩ poolɑɑ pɑ́ sʋʋ ɑtɑkɑɑ pɔɣɔlʋɣʋ tɑɑ nɑ pɑ́ fiti lʋm kʋ́wɑ́ɑ́sǝm mpɩ. 8 Ḿpʋ́ɣʋ́ wontu nti pɑ pǝsǝɣɩ pɑ́ lɑ́ kɔtɑɣɑ tɔ nɑ nti tǝ fɛɩ kɔtɑɣɑ lɑpǝnɑʋ tɔ nɑ sumɑsɩ nɑ ɑtɛ nyɑmɑnyɑmɑnɑɑ tǝnɑ 9 sʋʋ ɑtɑkɑɑ pɔɣɔlʋɣʋ tɑɑ kɛ́ ɑpɑlʋ nɑ ɑlʋ ɩsɩɩ Tɑcɑɑ kɑ heeluɣu Nowee tɔ. 10 Kʋyɛɛŋ nɑɑtosompɔɣɔlɑɣɑ tɛɛwɑ ɩlɛnɑ lʋm wɑtɩ tɛtʋ tǝnɑ.

11-12 Nowee lʋlʋɣʋ pǝnɑɣɑ nɑsǝtoso nyǝŋkɑ ɩsɔtʋ nɑɑlɛ nyǝŋ kʋyɛɛŋ nɑɑnʋwɑ nɑ nɑɑtosompɔɣɔlɑɣɑ nyǝŋkʋ wule kɛ tɛʋ ɑnɑɑm nɔɣɔlʋ ɩ́ pǝlɑ ilim nɑ ɑhoo, hɑlǝnɑ kʋyɛɛŋ nɩɩlɛ tǝcu. Pǝ cɑɣɑ kɛ́ ɩsɩɩ ɩsɔtɔnʋɣʋ yɑwɑ nɑ ɑtɛ sɛɛlɑɑ nɑ́ɑ́ tʋlɩ ɩsɩɩ pɔɔŋ sɔsɔɔŋ. 13 Kʋyɑkʋ ŋkʋ kʋ mɑɣɑmɑɣɑ kɛ Nowee nɑ ɩ ɑlʋ nɑ ɩ pǝyɑlɑɑ Sem nɑ Kɑm nɑ Yɛfɛtɛ nɑ ɩ poolɑɑ tooso pɑ sʋʋ ɑtɑkɑɑ pɔɣɔlʋɣʋ. 14 Pɑ́ nɑ wontu tǝnɑɣɑ piitim piitim. Pǝ kpɑɣɑʋ tɔlɑ, nɑ tɑɑlɛ wontu, nɑ sumɑsɩ, nɑ ɑtɛ nyɑmɑnyɑmɑnɑɑ tǝnɑ. 15-16 Ḿpʋ́ɣʋ́ wontu tǝnɑ sʋ́ʋ́ ɑtɑkɑɑ pɔɣɔlʋɣʋ tɑɑ kɛ́ ɑpɑlʋ nɑ ɑlʋ ɩsɩɩ Ɩsɔ kɑ heeluɣu Nowee tɔ. Ɩlɛnɑ Tɑcɑɑ tǝkɩ pɑ tɔɔ.

17 Kʋyɛɛŋ nɩɩlɛ tǝcu kɛ́ tɛʋ nɩɩwɑ, ɩlɛnɑ lʋm kpɑ nɑ pǝ́ kɛlɩ ɑtɑkɑɑ pɔɣɔlʋɣʋ, nɑ pǝ́ kpɑɑsɩ-kʋɣʋ ɩsɔtɑɑ. 18 Lʋm tɔɔwɑ sɔsɔm nɑ pǝ́ sú tɛtʋ tɔɔ nɑ ɑtɑkɑɑ pɔɣɔlʋɣʋ nɑ́ɑ́ wɛ pǝ tɔɔ tǝhʋŋlɛɛ. 19 Pǝ tɔŋnɑ suɣu nɑ pǝ́ puki hɑlǝnɑ pǝ́ wɑɑsɩ pɔɔŋ sɔsɔɔŋ ɩnɩ ɩ tǝnɑ kɛ ɑntulinyɑ tǝnɑ tɑɑ. 20 Lʋm kpɑwɑ nɑ pǝ́ tɛɛ pɔɔŋ kɛ kʋŋkʋlʋmǝŋ kɛ mɛɛtǝlǝnɑɑ kɑkpɑsɩ. 21-22 Antulinyɑ tɑɑ weesuɣu nyǝm tǝnɑ sǝpǝnɑ, pǝ kpɑɣɑʋ yǝlɑɑ nɑ wontunɑɑ tɔ. 23 Ḿpʋ́ɣʋ́ Tɑcɑɑ kpiisɑ weesuɣu nyǝm tǝnɑɣɑ tɛtʋ tɔɔ. Nowee nɑ ɩ nyǝ́mɑ mpɑ pɑɑ wɛ ɑtɑkɑɑ pɔɣɔlʋɣʋ tɑɑ tɔ pɑ tike kɛ pǝ yelɑɑ.

24 Ḿpʋ́ɣʋ́ lʋm suwɑ tɛtʋ tɔɔ kɛ́ kʋyɛɛŋ nɩɩnʋwɑ nɑ nɩɩlɛ nɑ nɑɑnʋwɑ (150) tǝcu.

<- Kɑncɑɑlɑɣɑ 6Kɑncɑɑlɑɣɑ 8 ->