6 Ḿpʋ́ɣʋ́ Tɑcɑɑ lɑŋlɛ wɑkǝlɑɑ nɑ pǝ́ wɩɩ-ɩ sɔsɔm kɛ mpi pǝ tɔɔ ɩ ŋmɑ́ yʋlʋ tɔ. 7 Ntɛnɑ ɩ́ tɔ́ sɩ: Ɩsɩɩ mɑ kpiisɑ yǝlɑɑ mpɑ mɑ ŋmɑwɑ tɔɣɔ tɛtʋ tǝnɑ tɔɔ, pǝ kpɑɣɑʋ yʋlʋ nɑ pǝ́ polo tɔtɛ tɔ, nɑ sumɑsɩ, nɑ ɑtɛ nyɑmɑnyɑmɑnɑɑ tǝnɑ tɔ. Mɑ lɑŋlɛ wɑkǝlǝnɑ pɑ ŋmɑʋ kɛ́. 8 Amɑ Nowee tike kɛ Tɑcɑɑ lɑŋlɛ hɛɛnɑɑ.
11 Yǝlɑɑ kɑ wɑkǝlɑɑ kɛ́, nɑ pɑ́ lɑkɩ tǝmɑɣɑ mʋsʋŋ kɛ Ɩsɔ ɩsɛntɑɑ. 12 Ɩsɔ nyǝnɑ tɛtʋ ɩlɛnɑ ɩ́ nɑ́ sɩ yǝlɑɑ tǝnɑ wɑkǝlɑɑ kɛ́. 13 Mpʋɣʋlɛ Tɑcɑɑ heelɑ Nowee sɩ: Mɑ tʋ́ mɑ tɑɑ sɩ mɑɑ wɑkǝlɩ yǝlɑɑ tǝnɑ, mpɛ pɑ suulinɑ ɩsɑɣɑtʋ kɛ ɑntulinyɑ tɑɑ. Pǝ tɔɔ tɔ mɑɑ kpiisi pɑ tǝnɑɣɑ tɛtʋ tɔɔ. 14 Cɑɑ tʋɣʋ kʋpɑŋkʋ nɑkʋlɩ nɑ ń sɑɑkɩ nyɑ́ tǝɣɩ ɑtɑkɑɑ pɔɣɔlʋɣʋ sɔsɔɔʋ[a] nɑ ń tɑlɑ kʋ tɑɑ kɛ́ nɑŋsi nɑŋsi, nɑ ń tɑɑ-kʋɣʋ tʋɣʋ cǝlǝm kɛ kʋ tɑɑ nɑ kʋ wɑɑlɩ. 15 Ɩsǝnɑ n kɑ́ lɑ-kʋ tɔɣɔlɔ, kʋ tɑɣɑlǝŋ kɑ́ wɛɛ mɛɛtǝlǝnɑɑ nɩɩnʋwɑ nɑ nɩɩlɛ nɑ nɑɑnʋwɑ (150) nɑ kʋ wɑŋ kɛ mɛɛtǝlǝnɑɑ hiu nɑ kɑkpɑsɩ nɑ kʋ kʋŋkʋlʋmǝŋ kɛ mɛɛtǝlǝnɑɑ nɑɑnʋwɑ nɑ kɑkpɑsɩ. 16 Nɑ ń tʋlɩ-kʋɣʋ pǝtote kɛ mpiiŋ nɑɑlɛ kɛ lɔpʋtʋ luɣu tɛɛ nɑ nɔnɔɣɔ kɛ kʋ kɔŋkɔŋ tɑɑ. Nɑ ń lɑ-kʋɣʋ ɑtɛ nɑ ɩsɔ kutuluŋ kɛ tooso. 17 Ɩlɛnɑ mɑ́ɑ́ yele nɑ lʋm sɔsɔɔm wɑtɩ tɛtʋ tɔɔ, nɑ mɑ́ kʋ́ pǝ tǝnɑ mpi pǝ feesiɣi tɔ. Tɛtʋ tɔɔ nyǝm tǝnɑ kɑ́ sǝnɑ. 18 Amɑ mɑ́ nɑ nyɑ́ tɩɩ pɛɛlɩ nɔɣɔ sɩ mɑɑ wɑɑsɩ-ŋ. Nɑ nyɑnɑ nyɑ́ ɑlʋ nɑ nyɑ́ pǝyɑlɑɑ nɑ nyɑ́ poolɑɑ ɩ́ kɑ́ sʋʋ kʋ tɑɑ. 19-20 Nɑ ń lǝsɩ wontu tǝnɑ tɑɑ kɛ́ ɑpɑlʋ nɑ ɑlʋ, nɑ sumɑsɩ tɑɑ kɛ́ mpʋ nɑ ɑtɛ nyɑmɑnyɑmɑnɑɑ tɑɑ kɛ́ mpʋ tɔtɔ, nɑ tǝ́ sʋʋ nyɑ́ kiŋ kɛ ɑtɑkɑɑ pɔɣɔlʋɣʋ tɑɑ nɑ pǝ́ yɑ tǝ piitim. 21 Kpɑɣɑ tɔɣɔnɑsɩ nsi nsi mǝ nɑ wontunɑɑ mpɛ ɩ́ kɑ́ tɔkɩ tɔ. 22 Mpʋ ɩnǝɣɩ Nowee tǝŋɑɑ nɑ ɩ́ lɑ́ pǝ tǝnɑ mpi Ɩsɔ tʋ́-ɩ tɔ.
<- Kɑncɑɑlɑɣɑ 5Kɑncɑɑlɑɣɑ 7 ->- a ɑtɑkɑɑ pɔɣɔlʋɣʋ sɔsɔɔʋ: Tǝ tɑ cɑɑ sɩ tǝ tɛlǝsɩ sɩ kpɩɩlʋɣʋ mpi tɔ, pǝ tɑɣɑ Nowee cɑɑ sɩ ɩ́ nɑ ɩ sɑmɑɑ pɑ́ sʋʋ nɑ pɑ́ tɛsɩ lʋm.