1-6 Pɛɛsɩ wulɑʋ sɔsɔ Atɑkǝsɛsɛɛ kɑwulɑɣɑ wɑɑtʋ tɑɑ kɛ́ nɔɣɔlʋ wei pɑ yɑɑ sɩ Ɩsǝtǝlɑsɩ tɔ ɩ lɩɩnɑ Pɑpiloni. Ɩ kɑ kɛ́ Selɑyɑ pǝyɑlʋ kɛ́, ɩ lʋlʋɣʋ nyǝ́mɑ ntɛ́ kɔtʋlʋ sɔsɔ Alɔŋ, nɑ Ɩlɑsɑɑ, nɑ Pɛnhɑsɩ, nɑ Apisuwɑ, nɑ Puki, nɑ Usi, nɑ Selɑyɑ, nɑ Melɑyɔtɩ, nɑ Asɑliyɑ, nɑ Amɑlǝyɑ, nɑ Ahitupi, nɑ Sɑtɔkɩ, nɑ Sɑlum, nɑ Hilikiyɑ, nɑ Asɑliyɑ. Ɩsǝtǝlɑsɩ kɑ nyǝmɑ́ tɑkǝlɑsɩ kɑlʋɣʋ kɛ́ nɑ ɩ́ nyǝmɑ́ Ɩsɛɣɛlɩ Ɩsɔ kiiŋ wei ɩ́lɛ́ ɩ kɑ hʋlɑ Moisi tɔ. Tɑcɑɑ kɑ lɑpɑɣɑ nɑ Ɩsǝtǝlɑsɩ nyʋɣʋ kʋlɩ, nɑ ɩ́ sǝlǝmɑ wulɑʋ kɛ mpi ɩ́lɛ́ ɩ lɑ-wɩ. 7 Wɑɑtʋ wei Ɩsɛɣɛlɩ yǝlɑɑ, nɑ kɔtǝlɑɑ, nɑ Lefii nyǝ́mɑ, nɑ yonyoolɑɑ, nɑ Ɩsɔ tǝsɛɛlɛ nɔnɔɔsɩ tɑŋlɑɑ, nɑ pǝ tǝmlɛ nyǝ́mɑ sǝkpemɑ mǝlɑ Yosɑlɛm kɛ Atɑkǝsɛsɛɛ kɑwulɑɣɑ pǝnɑɣɑ nɑɑtosompɔɣɔlɑɣɑ nyǝŋkɑ tɑɑ 8 tɔɣɔ Ɩsǝtǝlɑsɩ tɑlɑ Yosɑlɛm kɛ pɑ kiŋ kɛ ɩsɔtʋ kɑkpɑsɩ nyǝŋ tɑɑ. 9 Ɩsɔtʋ kɑncɑɑlɑɣɑ nyǝŋ kʋyɑkʋ kɑncɑɑlɑɣɑ nyǝŋkʋ kɛ ɩ kɑ sɩɩwɑ sɩ ɩ kɑ́ kʋlɩ Pɑpiloni. Ɩlɛnɑ Ɩsɔ kenti ɩ tɔɔ nɑ ɩ́ tɑlɑ Yosɑlɛm kɛ ɩsɔtʋ kɑkpɑsɩ nyǝŋ kʋyɑkʋ kɑncɑɑlɑɣɑ nyǝŋkʋ. 10 Ɩsǝtǝlɑsɩ kɑ sɛɛsɑ ɩsǝlɛ nɑ Tɑcɑɑ tɔm kɑlʋɣʋ kɛ́, nɑ tǝ tɑɑ welisuɣu, nɑ ɩ́ tɔkɑ-tɩ nɑ ɩ́ sɛɣɛsǝɣɩ Ɩsɛɣɛlɩ nyǝ́mɑ kɛ Ɩsɔ kiiŋ nɑ ɩ kʋsǝsɩɩtʋ.

11 Tɑkǝlɑɣɑ ŋkɑ wulɑʋ Atɑkǝsɛsɛɛ ŋmɑɑ kɔtʋlʋ Ɩsǝtǝlɑsɩ wei ɩ kɛ Tɑcɑɑ kiiŋ nɑ ɩ kʋtʋtʋtʋ pǝ tʋ tɔɣɔlɛ sɩ:

12 Mɑɣɑ ɑwulɑɑ wulɑʋ Atɑkǝsɛsɛɛ, mɑ́ ŋmɑɑnɑ tɑkǝlɑɣɑ kɑnɛɣɛ ɩsɔtɑɑ Ɩsɔ kiiŋ nyǝntʋ kɔtʋlʋ Ɩsǝtǝlɑsɩ.

13 Mɑ cɑɑ sɩ pɑ́ yele mɑ tɛtʋ tǝnɑ Ɩsɛɣɛlɩ nyǝ́mɑ mpɑ pɑ sɔɔlɑ Yosɑlɛm pote tɔ nɑ nyɑnɑ-wɛ ɩ́ tɛɛ. Pǝ kpɑɣɑʋ Ɩsɔ tǝmlɛ sǝnlɑɑ nɑ kɔtǝlɑɑ nɑ Lefii nyǝ́mɑ tɔ. 14 Mɑ mɑɣɑmɑɣɑ nɑ mɑ lɑɣɑtʋ tɑsǝlɑɑ nɑɑtosompɔɣɔlɑɣɑ tǝ tiliɣinɑ-ŋ Yosɑlɛm kɛ Yutɑ tɛtʋ tɑɑ nɑ ń nɑ́ ɩsǝnɑ yǝlɑɑ pɑɑsǝɣǝnɑ nyɑ́ Ɩsɔ wei ɩ kiiŋ n tɔkɑ nyɑ́ niŋ tɑɑ tɔ ɩ tɔm tɔ. 15 Pǝyele tɩɩ cɛlɛ-ŋ wʋlɑ nɑ liɣitee nnɑ mɑ́ nɑ mɑ lɑɣɑtʋ tɑsǝlɑɑ tɩɩ hɑ Ɩsɔ wei ɩ tǝsɛɛlɛ wɛ Yosɑlɛm tɑɑ tɔ. 16 Nɑ ń kpɛntǝnɑ tɔtɔɣɔ liɣitee nɑ wʋlɑ wei Pɑpiloni hɔɣɔlʋɣʋ nyǝ́mɑ cɑɑwɑ nɑ nnɑ Ɩsɛɣɛlɩ nyǝ́mɑ nɑ kɔtǝlɑɑ nɑ Ɩsɔ tǝmlɛ sǝnlɑɑ hɑnɑ luɣu kʋlʋmʋɣʋ sɩ pɑ́ tɑɣɑnǝnɑ Ɩsɔ tǝsɛɛlɛ tɔ. 17 Ye n tɑlɑ tǝnɑ n kɑ́ yɑnɑ lɑtǝcɛnɑɑ, nɑ ɩwɑɑŋ yɑɑ ɩwɛɛsɩ, nɑ pǝ tǝnɑ mpi n kɑ lɑnɑ hɑtǝmʋtʋ kɔtɑsɩ nɑ sʋlʋm pǝ nyǝnsɩ kɛ mǝ Ɩsɔ kɔtɑɣɑ tǝlɑtɛ tɔɔ kɛ́ Yosɑlɛm tɔ. 18 Pǝ wɑɑlɩ ɩlɛ nyɑnɑ nyɑ́ tɑɑpɑlɑɑ ɩ́ kɑ́ lɑnɑ liɣitee nɑ wʋlɑ kʋkɑɑsʋ kɛ ɩsǝnɑ Ɩsɔ kɑ́ hʋlɩ-mɛ tɔ. 19 Ɩlɛnɑ ń sɩɩ Ɩsɔ tǝsɛɛlɛ tɑɑ kɛ́ Ɩsɔ nyǝnɑsɩ nsi pɑ cɛlɑ-ŋ tɔ. 20 Ye pǝ wɛɛ sɩ ń tɑsɑ pʋlʋpʋɣʋ yɑpʋ kɛ pǝ tɔm tɑɑ, ɩlɛ kɑwulɑɣɑ kpɑncoou tɑɑ kɛ́ n kɑ́ lǝsɩ nɑ ń yɑnɑ.

21 Ḿpʋ́ɣʋ́ wulɑʋ sɔsɔ Atɑkǝsɛsɛɛ tɑsɑɑ sɩ: Mɑ tʋɣɩ Ɩfǝlɑtɩ pɔɣɔ ilim tǝtʋlɛ tɔɔ tɛtʋ kpɑncooŋ nyǝ́mɑ tǝnɑ sɩ ye ɩsɔtɑɑ Ɩsɔ kiiŋ nyǝ́ńtʋ́ kɔtʋlʋ Ɩsǝtǝlɑsɩ ɩ́ sǝlǝmɑ mpi pɑ́ lɑpɩ-ɩ-wǝɣɩ teitei. 22 Pɑ́ cɛlɑ-ɩ liɣitee nyǝɣǝtʋ kɛ tɔɔnǝnɑɑ tooso, nɑ tɔɣɔnɑɣɑ kɛ tɔɔnǝnɑɑ iyisi hiu nɑ nɑɑnʋwɑ (30000), nɑ sʋlʋm kɛ liitilinɑɑ iyisi liɣiti (4000), nɑ nim kɛ liitilinɑɑ kɛ iyisi liɣiti (4000) tɔtɔ, nɑ tɔm kɛ ɩsǝnɑ pɑ sɔɔlɑɑ tɔ. 23 Pɑɑ lɑ ɩsɩɩ Ɩsɔ tɑɑ Ɩsɔ kɛɛsʋɣʋ ɩ tǝsɛɛlɛ tɔm tɔɣɔ teitei kɛ́, pǝ́cɔ́ pǝ tɑɑ kɔɔ nɑ Ɩsɔ mʋnɑ mɑ mɑɣɑmɑɣɑ yɑɑ mɑ lʋlʋɣʋ nyǝ́mɑ yɑɑ mɑ tɛtʋ nyǝ́mɑ nɑ pɑ́ɑ́nɑ́. 24 Pǝlɛ pǝ pɑɑsi tǝ kpɑɑlǝɣɩ kpɑncooŋ nyǝ́mɑ tǝnɑ sɩ pǝ fɛɩ sɩ pɑ́ mʋ lɑmpuu kɛ kɔtǝlɑɑ yɑɑ Lefii nyǝ́mɑ yɑɑ yonyoolɑɑ yɑɑ Ɩsɔ tǝsɛɛlɛ nɔnɔɔsɩ tɑŋlɑɑ yɑɑ Ɩsɔ tǝsɛɛlɛ tǝmlɛ nyǝ́mɑ sǝkpemɑ tɑɑ nɔɣɔlʋ.

25 Ɩsǝtǝlɑsɩ nyɑɑ lɑ ɩsɩɩ Ɩsɔ wei ɩ lǝmɑɣɑsɛɛ n wɛnɑ tɔ, nɑ ń kpɑ mpɑ pɑɑ hʋʋkǝnɑ pɔɣɔ ilim tǝtʋlɛ tɔɔ nyǝ́mɑ mpɑ pɑ tǝnɑ pɑ nyǝ́mɑ nyɑ́ Ɩsɔ kiiŋ tɔ, nɑ mpɑ pɛlɛ pɑ tɑ nyǝmɩ-ɩ tɔ, ń hʋlɩ-wɛɣɛ-ɩ. 26 Amɑ ye wei ɩ́ kisɑ Ɩsɔ nɑ wulɑʋ pɑ kiiŋ kɛ tɔkʋɣʋ pɑ hɔ ɩ ŋkpɑŋʋɣʋ ɩsɩɩ pǝ mʋnɑɑ tɔ. Pɑɑ kʋɣʋ, pɑɑ tɔɣɔnʋɣʋ, pɑɑ ɩ wɛnɑʋ lɛɛkʋɣʋ, yɑɑ sɑlǝkɑ tʋɣʋ.

27 Ḿpʋ́ɣʋ́ Ɩsǝtǝlɑsɩ sɛɛwɑ Ɩsɔ sɩ: Mɑ sɛɛ tɑ Sɔsɔ Ɩsɔ Tɑcɑɑ kɛ timpi n tʋwɑ wulɑʋ sɔsɔ tɑɑ sɩ ɩ́ kʋsɩ Yosɑlɛm Ɩsɔ tǝsɛɛlɛ nyʋɣʋ tɔ. 28 Tɑcɑɑ n lɑpɑ-m kʋpɑntʋ kɛ wulɑʋ nɑ ɩ lɑɣɑtʋ tɑsǝlɑɑ nɑ ɩ wɑɑlɩ nyǝ́mɑ sɔsɑɑ pɑ ɩsɛntɑɑ. Ɩlɛnɑ nyɑ́ kentuɣu mpɩ pǝ́ sɔɔsɩ mɑɣɑ ɑpɑlʋtʋ, nɑ mɑ́ kpeɣeli Ɩsɛɣɛlɩ nyʋɣʋ nyǝ́mɑ tǝnɑ, nɑ mɑ́ nɑ-wɛ tǝ́ polo Yosɑlɛm.

<- Ɩsǝtǝlɑsɩ 6Ɩsǝtǝlɑsɩ 8 ->