Mɑ tɔɣɔ-kɛ, ɩlɛnɑ kɑ́ lɑ mɑ nɔɣɔ tɑɑ kɛ́ leleŋ, ɩsɩɩ tɩɩŋ.

4 Ḿpʋ́ɣʋ́ ɩ tɔmɑ-m sɩ: Polo Ɩsɛɣɛlɩ nyǝ́mɑ kiŋ, nɑ ń heeli-wɛɣɛ mɑ tɔm. 5 Mpi tɔ, pǝ tɑɣɑ yǝlɑɑ mpɑ pɑ kʋyɔɣɔtʋtʋ wɛ sǝkpɛtʋɣʋ. Yɑɑ pɑ yɔɣɔtɑɣɑ nɑ kɑtɛ tɔ, pɑ kiŋ kɛ mɑ tilɑ-ŋ. Amɑ Ɩsɛɣɛlɩ nyǝ́mɑ kiŋ kɛ́. 6 Pǝ tɑɣɑ yǝlɑɑ pɑɣɑlɛ mpɑ pɑ kʋyɔɣɔtʋtʋ wɛ sǝkpɛtʋɣʋ, yɑɑ pɑ yɔɣɔtɑɣɑ wɛ kɑtɛ nɑ nn nɩɩkɩ pɑ tɔm tɔ. Ye ɩsɩɩ yǝlɑɑ ɩsɩɩ mpʋ kiŋ kɛ mɑɑ tilɑ-ŋ, pɑɑ nɩɩnɑ-m. 7 Amɑ Ɩsɛɣɛlɩ nyǝ́mɑ luɣu fɛɩ mɑ nɩɩnɑʋ. Mpi tɔ, pɑ kisɑ-m nɩɩnɑʋ. Ɩsɛɣɛlɩ nyǝ́mɑ tǝnɑ nyɔɔŋ tɑɑ wʋlɑɑ kɛ́, nɑ pɑ nyɑmɑ nɑ kpɩɩsǝŋ. 8 Mɑɑ yele nɑ nyɑ́ ɩsɛntɑɑ nyǝŋ nɑ ń wɛɛnɑ lɑŋkpɩɩsǝŋ ɩsɩɩ mpɛ, nɑ ń yoonɑ-wɛ. 9 Mɑɑ yele nɑ nyɑ́ nyʋɣʋ tɑɑ wʋlɩ ɩsɩɩ liɣitee pǝlɛ tiŋ toŋ nyǝŋ nyǝntɛ. Hɑlǝnɑ tǝ kǝlɩ kʋkpɑmʋɣʋ kɛ toŋ. Pɑɑ pɑ kɛ́ tɔɔ kʋllɑɑ piitim tɔ, sɔɣɔntʋ ɩ́ tɑɑ kpɑ-ŋ, pǝ́cɔ́ tɑɑ nyɑnɑ-wɛ.

10 Ḿpʋ́ɣʋ́ Ɩsɔ tɑsɑ-m sɩ: Ɩsekiyɛɛlɩ nɩɩ tɔmnɑɑ mpɑ pɑ tǝnɑ mɑɑ heeli-ŋ tɔ. Tɔkɩ-tǝɣɩ nyɑ́ lotu tɑɑ. 11 Polo mɑ yǝlɑɑ piyɑ mpɑ pɑ kɛ́ yomɑɑ tɔ pɑ kiŋ. Ye pɑɑ nɩɩnɑ-ŋ, yɑɑ pɑ kɑɑ nɩɩnɑ-ŋ. Heeli-wɛ sɩ Tɑcɑɑ Ɩsɔ yɔɣɔtǝnɑ.

12 Ɩlɛnɑ Feesuɣu kpɑɣɑ-m, nɑ mɑ́ nɩɩ mɑ wɑɑlǝɣɩ kɔkɔtɛ sɔsɔɔlɛ sɩ: Ɩ sɑ Tɑcɑɑ kɛ hɑtoo ɩ tǝcɑɣɑlɛ tɑɑ.

13 Ɩlɛnɑ mɑ́ nɩɩ ɩsǝnɑ wontu keŋ mɑkǝnɑ tǝmɑ tɔ. Pǝ nɑ pɔpɔlɛɛ pǝ kpɛntɑ kɔkɔtɛ sɔsɔɔlɛ. 14 Ḿpʋ́ɣʋ́ Feesuɣu kpɑɣɑ-m nɑ kʋ́ tɛɛnɑ-m. Mɑ lɑŋlɛ kɑ wɑkǝlɑɑ kɛ́ nɑ mɑ́ kpǝɣǝlǝɣɩ. Ɩlɛnɑ Tɑcɑɑ toŋ tii mɑ tɔɔ. 15 Wɑɑtʋ ɩnǝɣɩ mɑ tɑlɑ timpi pɑ yɑɑ sɩ, Tɛlɩ-Apipɩ tɔ. Ɩsɛɣɛlɩ nyǝ́mɑ mpɑ pɑ kuuwɑ nɑ pɑ́ wɛ Kepɑɑ pɔɣɔ nɔɣɔ tɔ pɑ tɛɣɛlɛ. Ɩlɛnɑ mɑ́ cɑɣɑ pɑ kiŋ nɑ sɔɣɔntʋ kɛ kʋyɛɛŋ nɑɑtosompɔɣɔlɑɣɑ.

16 Kʋyɑkʋ nɑɑtosompɔɣɔlɑɣɑ nyǝŋkʋ kɛ Tɑcɑɑ yɔɣɔtǝnɑ Ɩsekiyɛɛlɩ mɑ sɩ: 17 Yʋlʋ nyɑ́ mɑɑ sɩɩ-ŋ Ɩsɛɣɛlɩ nyǝ́mɑ tɑŋlʋ. N kɑ nɩɩ mɑ tɔm nɑ ń polo ń kpɑɑlɩ-wɛ nɑ mɑ nɔɣɔ. 18 Ye ɩsɩɩ mɑ hʋlɑ ɩsɑɣɑʋ sɩ ɩ kɑ́ sɩ, nɑ ń tɑ́ kpɑɑlɩ pʋntʋ ɩnɩ sɩ ɩ́ lɑɣɑsɩ mpɑɑʋ nɑ pǝ́ yɑ ɩ nyʋɣʋ, pʋntʋ kɑ́ sɩ. Ɩlɛ nyɑɣɑ mɑɑ pɔɔsɩ ɩ sǝm tɔm. 19 Amɑ ye ń kpɑɑlɑ ɩsɑɣɑʋ nɑ ɩ́ kisi lɑɣɑsʋɣʋ, nɑ ɩ́ sɩ ɩ ɩsɑɣɑtʋ tɑɑ. Ɩlɛ n yɑpɑ nyɑ tɩ nyʋɣʋ. 20 Ye siɣisilu yelɑ siɣisuɣu, nɑ ɩ́ lɑ ɩsɑɣɑtʋ. Mɑɑ nyǝpɩ-ɩ kɑtɔkɑ nɑ ɩ́ sɩ. Pǝ tɑɣɑ pʋlʋ, n tɑ kpɑɑlɩ-ɩ. Ɩlɛ nɔɣɔlʋ kɑɑ tɑsɑ ɩ siɣisuɣu tɔm yɔɣɔtʋɣʋ. Amɑ nyɑɣɑ mɑɑ pɔɔsɩ ɩ sǝm tɔm. 21 Ye mɑ kpɑɑlɑ siɣisilu sɩ ɩ́ tɑɑ pǝntɩ, nɑ ɩ́ yele pǝntʋɣʋ, ɩlɛ ɩ kɑɑ sɩ. Mpi tɔ, ɩ nɩɩ kpɑɑlʋɣʋ. Ɩlɛnɑ pǝ́ yɑ́ mɑ nyʋɣʋ.

22 Tǝnɑɣɑ Tɑcɑɑ tʋ niŋ kɛ Ɩsekiyɛɛlɩ mɑ́ mɑ tɔɔ tɔtɔ, nɑ ɩ́ tɔ-m sɩ: Kʋlɩ nɑ ń polo tɛtɛkǝlɛ tɑɑ, nɑ mɑ́ yɔɣɔtǝnɑ-ŋ. 23 Ḿpʋ́ɣʋ́ mɑ kʋlɑɑ nɑ mɑ́ polo tɛtɛkǝlɛ tɑɑ. Ɩlɛnɑ Tɑcɑɑ hʋlɩ ɩ teu ɩsɩɩ mɑɑ nɑʋ Kepɑɑ pɔɣɔ nɔɣɔ tɔ. Ɩlɛnɑ mɑ́ hoti mɑ ɩsɛntɔɔ. 24 Tǝnɑɣɑ Tɑcɑɑ Feesuɣu sʋʋ mɑ tɑɑ, nɑ kʋ́ lɑ nɑ mɑ́ sǝŋ mɑ nɔɔhɛɛ tɔɔ. Ntɛnɑ Tɑcɑɑ heeli-m sɩ: Polo nɑ ń tǝkɩ nyɑ́ tǝɣɩ nyɑ́ tɛ. 25 Pɑɑ hɔkɔ-ŋ ŋmɩɩsɩ sɩ ń tɑɑ tɑsɑ pɑ hɛkʋ kɛ lɩɩʋ. 26 Mɑɑ yele nɑ nyɑ́ nsǝmlɛ mɑtǝnɑ nyɑ́ tɑntɑhɑɑʋ. N kɑ́ pǝsɩ kɑmumukɑ, ń kɑɑ pǝsɩ nɑ ń kɑlǝnɑ-wɛ. Mpi tɔ, pɑ kɛ́ tɔɔ kʋllɑɑ kɛ́. 27 Amɑ wɑɑtʋ wei mɑɑ yɔɣɔtǝnɑ-ŋ, ɩlɛnɑ ń kuli nyɑ́ nɔɣɔ nɑ ń heeli-wɛ. Tɑcɑɑ Ɩsɔ yɔɣɔtǝɣɩ sɩ, ye wei ɩ cɑɑ ɩ nɩɩ. Wei ɩɩ cɑɑ, ɩ́ tɑɑ nɩɩ. Mpi tɔ, pɑ kɛ́ tɔɔ kʋllɑɑ kɛ́.

<- Ɩsekiyɛɛlɩ 2Ɩsekiyɛɛlɩ 4 ->