1 Ḿpʋ́ɣʋ́ Tɑcɑɑ tɔmɑ Moisi sɩ: Polo Icipiti wulɑʋ kiŋ nɑ ń heeli-ɩ sɩ Hepǝlɑ nyǝ́mɑ Ɩsɔ Tɑcɑɑ mɑ́, mɑ tɔmɑ sɩ yele mɑ yǝlɑɑ nɑ pɑ́ polo pɑ́ lɑ-m tǝmlɛ. 2 Ye n wɛɛ nɑ n kisiɣi nɑ n kɑŋ nyʋɣʋ nɑ ń tɑŋǝɣɩ-wɛɣɛ mpʋ, 3 mɑɑ yele nɑ kʋsǝkʋ ɩsɑɣɑʋ nɑkʋlɩ kʋ kpɑ Icipiti nyǝ́mɑ tɔlɑ, nɑ kʋ́ kʋ kpɑɣɑnǝŋ nɑ kpɑŋɑsɩ nɑ yooyoonɑɑ, nɑ nɑɑŋ, nɑ heeŋ, nɑ pǝ́ŋ. 4 Amɑ Tɑcɑɑ kɑ́ fɑɣɑsɩ Ɩsɛɣɛlɩ nyǝ́mɑ nyǝnɑ nɑ ɑ tɑɑ nɑtǝlɩ nyʋɣʋ kɑɑ holi-tɛ.

5 Pǝlɛ pǝ pɑɑsi ɩlɛnɑ Ɩsɔ Tɑcɑɑ sɩɩ sɩ cele kɛ ɩnɩ ɩ kɑ lɑ kɔkɔlɔ ɩnǝɣɩ Icipiti tɑɑ.

6 Tɛʋ femɑ ɩlɛnɑ Tɑcɑɑ yele nɑ kʋsǝkʋ nɑŋ Icipiti nyǝ́mɑ tɔlɑ tǝnɑɣɑ kʋpɑmpǝlɛ ɩsɩɩ ɩ kɑ yɔɣɔtʋɣʋ tɔ. Amɑ Ɩsɛɣɛlɩ nyǝ́mɑ nyǝnɑ tɑɑ nɑtǝlɩ tǝ nyʋɣʋ tɑ holi-tɛ. 7 Ḿpʋ́ɣʋ́ Icipiti wulɑʋ pɔɔsɑɑ nɑ ɩ́ nɩɩ sɩ Ɩsɛɣɛlɩ nyǝ́mɑ tɔlɑ tɑɑ nɑtǝlɩ tǝ tɑ sɩ́. Pɑɑ nɑ mpʋ pǝlɛ pǝ tɑ lɑpɩ-ɩ pʋlʋ. Ɩ kɑmɑ nyʋɣʋ kɛ ɩ lɑŋkpɩɩsǝŋ tɑɑ nɑ ɩ́ kisi Ɩsɔ yǝlɑɑ kɛ yeluɣu sɩ pɑ́ tɛɛ.

8 Pǝ wɑɑlɩ kɛ Tɑcɑɑ tɑsɑ Moisi nɑ Alɔŋ kɛ heeluɣu tɔtɔ sɩ: Ɩ́ cosi mǝsɑɣɑ tɑɑ tɔlʋmɑ kɛ mǝ ŋkulee tɑɑ. Ɩlɛnɑ ɩ́ polo wulɑʋ tɛ́, nɑ Moisi ŋmɩɩsɩ-yɛɣɛ ɩsɔtɑɑ nɑ Icipiti wulɑʋ nyǝnǝɣɩ. 9 A kɑ́ yɑ́ tɛtʋ tǝnɑ tɑɑ nɑ ɑ́ lʋlɩ yǝlɑɑ nɑ tɔlɑ kɛ mʋlɑ nɑɑlɩ, nɑ ɑ́ pǝsɩ sǝmolɑ.

10 Mpʋɣʋlɛ Moisi nɑ Alɔŋ pɑ cosɑ tɔlʋmɑ, ɩlɛnɑ pɑ́ polo wulɑʋ tɛ nɑ Moisi ŋmɩɩsɩ-yɛɣɛ ɩsɔtɑɑ, nɑ ɑ́ lʋlɩ yǝlɑɑ nɑ tɔlɑ kɛ mʋlɑ nɑ ɑ́ pǝsɩ sǝmolɑ. 11 Mʋlɑ ɑnɩ ɑ kpɛnnɑ Icipiti tʋwɑɑ tɔtɔɣɔ nɑ ɑ́ kpɑ-wɛɣɛ teitei ɩsɩɩ yǝlɑɑ tǝnɑ. Hɑlǝnɑ pɑ kpisi Moisi-wɛɣɛ kpǝtǝnɑʋ. 12 Ḿpʋ́ɣʋ́ Tɑcɑɑ yelɑɑ nɑ Icipiti wulɑʋ sɔɔsɩ nyʋɣʋ kɑm kɛ ɩ lɑŋkpɩɩsǝŋ tɑɑ nɑ ɩ́ kisi Moisi nɑ Alɔŋ kɛ nɩɩnɑʋ kɛ teitei ɩsɩɩ ɩ kɑ heeluɣu Moisi tɔ.

13 Ḿpʋ́ɣʋ́ Tɑcɑɑ heelɑ Moisi sɩ: Cele kʋlɩ lɔŋ kɛ tɑnɑŋ kʋpɑŋkʋ tɛɛ nɑ ń mɑɣɑnɑ Icipiti wulɑʋ nɑ ń heeli-ɩ sɩ Hepǝlɑ nyǝ́mɑ Ɩsɔ Tɑcɑɑ mɑ́, mɑ tɔmɑ sɩ: Yele mɑ yǝlɑɑ nɑ pɑ́ polo pɑ lɑ-m tǝmlɛ. 14 Amɑ pǝnɛntɑɑ mɑ tʋ mɑ tɑɑ kɛ́ sɩ mɑɑ lɑ wɑhɑlɑnɑɑ mpɛ pɑ tǝnɑɣɑ nyɑnɑ nyɑ́ tǝmlɛ nyǝ́mɑ nɑ nyɑ́ yǝlɑɑ. Ɩlɛnɑ pǝ́cɔ́ ń nyɩ́ sɩ nɔɣɔlʋ tɑ nǝɣǝsǝnɑ-m ɑntulinyɑ tǝnɑ tɑɑ. 15 Ye mɑɑ sɔɔlɑɑ mɑɑ kʋwɑ nyɑnɑ nyɑ́ yǝlɑɑ nɑ yʋlʋkʋsǝkʋ nɑ ɩ́ sɑɑlɩ yem kɛ́ tɛtʋ tɑɑ. 16 Amɑ mɑ yelɑ-ŋ nɑ nyɑ́ ɩsɛ kɛ ḿpʋ́ɣʋ́ sɩ ń nyɩ́ sɩ mɑ wɛnɑ toŋ. Ɩlɛnɑ mɑ hǝtɛ sɔɔsɩ yɑɑʋ kɛ tɛtʋ tǝnɑ tɑɑ. 17 Pɑɑ nɑ mpʋ, n wɛɛ nɑ ń hɔŋ nyɑ́ tɩ nɑ ń kisiɣi sɩ mɑ yǝlɑɑ ɩ́ tɑɑ tɛɛ. 18 Pǝ tɔɔ kɛ́ cele ɩsǝntɔ wɑɑtʋ, mɑɑ yele nɑ tɔmpɛɛ tɛʋ ŋku too Icipiti tʋ nɔɣɔlʋ tɑ nɑtɑ tɔ kʋ́ nɩɩ. 19 Mpʋ tɔ, kpeɣeli nyɑ́ tɔlɑ nɑ ń cɔɔsɩ-yɛɣɛ tiili. Ye yǝlɑɑ nɑ tɔlɑ pɑ cɑɣɑ tɑɑlɛ kɛ yem nɑ pɑ tɑ cɔɔsɩ, tɔmpɛɛ kɑ́ kʋ-wɛ.

20 Wulɑʋ tǝmlɛ nyǝ́mɑ tɑɑ lɛlɑɑ mʋ Tɑcɑɑ tɔm ntǝɣɩ niŋ nɑɑlɛ, nɑ pɑ́ heeli pɑ tǝmlɛ nyǝ́mɑ sɩ pɑ nɑ tɔlɑ pɑ́ cɔɔsɩ timpi tɔmpɛɛ ɑnɩ ɑ kɑɑ nɑ-wɛ tɔ. 21 Amɑ lɛlɑɑ nɑ́ tɑ́ nyɑnɑ Tɑcɑɑ tɔm ntɩ nɑ pɑ́ yele pɑ tǝmlɛ nyǝ́mɑ nɑ pɑ tɔlɑ kɛ tɑwɑ tɑɑ.

22 Pǝ wɑɑlɩ kɛ́ Tɑcɑɑ heelɑ Moisi sɩ: Hʋ́lɩ́ nyɑ́ kpɑ́tʋ́ɣʋ́ nɑ ɩsɔtɑɑ nɑ tɔmpɩɩŋ hoti Icipiti tɛtʋ yǝlɑɑ nɑ tɔlɑ tɔɔ nɑ pɑ tɑwɑ tɑɑ kʋhɑlǝm tǝnɑ tɑɑ.

23 Moisi kpɑɑsɑ ɩ kpɑ́tʋ́ɣʋ́ nɑ ɩsɔtɑɑ kɛ mpʋ, ɩlɛnɑ Tɑcɑɑ yele nɑ tɛʋ holiɣi nɑ kʋ́ nɑsǝɣɩ kpɑŋŋ kpɑŋŋ. Ɩlɛnɑ tɔmpɩɩŋ lɩɩkǝnɑ ɩsɔ nɑ ɩ́ hotiɣi tɛtʋ tǝnɑ tɔɔ. 24 Hɑtoo pǝ cɑɑlʋɣʋ Icipiti tɛtʋ kɛ sɩɩʋ tɔ nɔɣɔlʋ tɑ nɑtɑ tɔmpɩɩŋ ɩnɩ ɩ tɑkɑ nɑ pǝ tɛʋ nyǝɣǝsʋɣʋ kɛ mpʋ. 25 Ḿpʋ́ɣʋ́ tɔmpɩɩŋ wɑkǝlɑ pǝ tǝnɑ mpi pɩɩ wɛ tɑwɑ tɑɑ tɔ, pɑɑ yǝlɑɑ pɑɑ tɔlɑ. Pǝ kɑɑsɩ nɑ ɑ́ pʋɣʋtɩ kʋhɑlǝm nɑ ɑ́ cɑɑtɩ tɩɩŋ kɛ yem yem. 26 Kʋsɛŋ timpi Ɩsɛɣɛlɩ nyǝ́mɑ wɛɛ tɔ tǝnɑ tike kɛ tɔmpɩɩŋ tɑ cǝtǝlɩ pʋlʋ. 27 Tǝnɑɣɑlɛ Icipiti wulɑʋ yɑ́ɑ́ Moisi nɑ Alɔŋ nɑ ɩ́ heeli-wɛ sɩ: Pǝnɛntɛ mɑ́ lɑpǝnɑ ɩsɑɣɑtʋ. Mɑ́ nɑ mɑ yǝlɑɑ ntɛ́ tɑsǝkǝlɛ nyǝ́mɑ. Ɩsɔ tike ntɛ́ tɑmpɑnɑ tǝŋlʋ. 28 Hɑɩ, ɩ́ wiinɑ Ɩsɔ nɑ tɔmpɛɛ hɛɛsɩ mpʋ. Mɑɑ yele-mɛ nɑ ɩ́ tɛɛ, mɑɑ tɑsǝɣɩ-mɛɣɛ tɑŋʋɣʋ.

29 Tǝnɑɣɑlɛ Moisi nɔɣɔ tǝkpɑʋ sɩ: Ye mɑ lɩɩwɑ ɩcɑtɛ wɑɑlɩ mɑɑ tɛɣɛ Ɩsɔ kɛ́ niŋ nɑ tɛʋ holɑ nɑ kʋ tɔmpɛɛ hɛɛsɩ. Ɩlɛnɑ pǝ́cɔ́ ń cɛkǝnɑ sɩ Tɑcɑɑ tǝnnɑ ɑntulinyɑ tǝnɑ. 30 Pǝnɑ pǝ mpʋ tɔ, mɑ nɑɑ kɛ́ sɩ nyɑnɑ nyɑ́ yǝlɑɑ ɩ́ seeki Ɩsɔ kɛ́ ɑcɛsɑɑcɛsɑɑ sewɑ kɛ́, ɩ́ tɑ́ tɛ́ mǝ tɑɑ.

31 Wɑɑtʋ wei tɔmpɛɛ kɔmɑ mpʋ tɔ ɑ sulinɑ pɑ tɛ́ kpoŋkpontu toŋ nyǝntʋ nti pɑ yɑɑ sɩ lɛŋ tɔ tǝ hɛtʋ tʋɣʋ, nɑ pɑ tɔɣɔnɑɣɑ pee nyǝŋkɑ tʋlʋɣʋ ntɛ́, nɑ ɑ́ wɑkǝlɩ-yɛ. 32 Amɑ pǝ kɑɑsɑ pɑ tɔɣɔnɑsɩ lɛnsǝnɑɑ tɔ pǝ tɑ wɑkǝlɩ sǝlɛ. Mpi tɔ, sǝlɛ sɩ tɑɑ kʋlǝtɑ sɑɑ ɩnɩ.

33 Moisi lɩɩwɑ ɩcɑtɛ wɑɑlɩ ɩlɛnɑ ɩ́ tɛɣɛ Ɩsɔ kɛ́ niŋ nɑ ɩ́ wiinɑ-ɩ tɔmpɛɛ ɑnɩ ɑ tɔm. Ɩlɛnɑ tɛʋ nɑ kʋ holɑ nɑ tɔmpɛɛ pǝ́ tɛ́.

34 Icipiti wulɑʋ pɑɑsǝnɑɑ sɩ pǝ tǝnɑ pǝ hɛɛwɑ ɩlɛnɑ ɩ́ nɑ ɩ tǝmlɛ nyǝ́mɑ pɑ́ mǝlɩ pɑ nyǝŋ ɩnɩ ɩ tɑɑ ɩsɩɩ too ɩlɛ. 35 Ḿpʋ́ɣʋ́ pɑ kisɑɑ tǝsɑɣɑsɑɣɑ sɩ mpɛ pɑ kɑɑ yele Ɩsɛɣɛlɩ nyǝ́mɑ nɑ pɑ́ lɩɩ tɛtʋ tɑɑ kɛ́ teitei ɩsɩɩ Tɑcɑɑ kɑ heeluɣu Moisi tɔ.

<- Lɩɩʋ 8Lɩɩʋ 10 ->