Ləmɑɣɑsɛɛ tʋ 5

1 Tɑɑ hulinɑ yɔɣɔtɑɣɑ kɛ Ɩsɔ ɩsɛntɑɑ nɑ ń tɑ́ hʋʋ nyɑ́ tɑɑ. Pə tɑɣɑ pʋlʋ, Ɩsɔ wɛ ɩsɔtɑɑ kɛ́ nɑ nyɑɑ wɛ ɑtɛ. Mpʋ tɔ, nyɑ́ tɔm ɩ́ tɑɑ kəlɩ pɑɣɑlɛ. 2 Pɔpɔtʋ fɛɩ leleŋ, nəɣəsɛɛ tuutuumɑ kɔŋnɑ toosee kɛ́, nɑ yɔɣɔtɑɣɑ kɑtɑtəlɑɣɑ nɑ́ɑ́ kɔŋnɑ kʋmɛlətɔm. 3 Ye n sɩɩ Ɩsɔ kɛ́ nɔɣɔ, lɑ-kɛ, tɑɑ yele nɑ pə́ leeli. Mpi tɔ, Ɩsɔ lɑŋlɛ ɩɩ hɛɛkənɑ kʋmɛlɛməŋ. Pə tɔɔ kɛ́ pə wɛɛ sɩ ń tɔkɩ nti n sɩɩkɩ tɔ. 4 Pə kəlɑ teu sɩ ń tɑɑ sɩɩ nɔɣɔ, nɑ mpi n kɑ́ sɩɩ nɑ ń kɑɑ lɑ tɔ. 5 Tɑɑ yele nɑ nyɑ́ kʋyɔɣɔtʋtʋ sʋsʋ-ŋ ɩsɑɣɑtʋ tɑɑ. Nɑ pə́ kɔɔ nɑ, pə́ cɑɑlɩ-ŋ sɩ ń heeli kɔtʋlʋ sɩ pə yʋkənɑ-ŋ. Tɔfɔ Ɩsɔ kɑ́ mʋnɑ-ŋ pɑ́ɑ́nɑ́ nɑ ɩ́ wɑkəlɩ nyɑ́ kʋlɑpəm. 6 Toosee kɑtɑtəlɑɣɑ kɛ́ tɔm kpɑɩ nyəntʋ kɛ yem kɛ́. Pə tɔɔ kɛ́ pə wɛɛ sɩ ń nyɑnɑ Ɩsɔ.

Mpəle tɛləsʋɣʋ kɛ sɔsɔɔntʋ tɑɑ

7 Ye timpi yəlɑɑ muɣuliɣi kʋnyɔntʋ nɑ pɑ́ tʋɣɩ-ɩ tɑsəkəlɛ, pə tɑɑ lɑ-ŋ piti. Mpi tɔ, yʋlʋ sɔsɔ kentiɣi sɔsɔ lɛlʋ kɛ́, nɑ pɛlɛ pɑ wɛnɑ pɑ sɔsɔ wei ɩ kəlɑ-wɛ tɔ. 8 Pə kəlɑ teu sɩ tɛtʋ ɩ́ wɛɛnɑ wulɑʋ wei ɩ səŋnɑ tɑwɑ hɑləm tɔm tɑɑ tɔ. Mpi tɔ, tənɑɣɑ pɑ tənɑ pɑ tɔɣɔnɑɣɑ lɩɩkənɑ. [a]

Ɩsənɑ liɣitee ɩɩ wɑɑsəɣɩ tɔ

9 Liɣitee sɔɔllʋ ɩɩ nyəɣəsəɣɩ-yɛ, nɑ wɛnɑʋ sɔɔllʋ nɑ́ fɛɩnɑ kɑwɑɑɣɑ. Təlɛ tə wɛ piti tɔtɔɣɔ. 10 Ye wɛnɑʋ ɩ́ hukiɣi, kʋ tɔɣɔlɑɑ hukiɣi tɔtɔɣɔ. Wɛɛntɑɑ kɑwɑɑɣɑ ntɛ́ pɑ nɑɑkʋɣʋ pɑ wɛnɑʋ nɑ pɑ ɩsɛ tɔ. 11 Təmlɛ lɑtʋ tooki kɛ́ nɑ ɩ́ nɩɩ leleŋ, pɑɑ ɩ tɔɣɔ pəcɔ yɑɑ sɔsɔm. Amɑ wɛɛntʋ wɛnɑʋ kɑtɑtəlɑɣɑ ɩɩ yeki sɩ ɩ́ too teu. 12 Yɑɑsi ɩsɑɣɑʋ nɔɣɔlʋɣʋ mɑ nɑwɑ tɛtʋ tɔɔ, ɩnəɣəlɛ ɩsənɑ yʋlʋ sɩɩkʋɣʋ liɣitee nɑ ɑ́ tɑɣɑnɩ ɩ mɑɣɑmɑɣɑ kɛ́ wɑkəlʋɣʋ tɔ. 13 Ye ɩ nyʋɣʋ səpɑ nɑ ɩ liɣitee ɑnɩ ɑ́ sɑɑlɩ, ye ɩ lʋlɑ ɑpɑlʋpəyɑɣɑ, niŋ kpɛtɛ kɛ kɛlɛ kɑ kɔŋ. 14 Ɩsɩɩ ɩ too kɑ lʋlʋɣʋ-ɩ kpɛtɛ tɔ, ḿpʋ́ɣʋ́ ɩ kɑ́ sɩ kpɛtɛ tɔtɔ, ɩ kɑɑ tɔkɩ ɩ təmlɛ pʋlʋɣʋ ɩ niŋ tɑɑ. 15 Sɩ yʋlʋ ɩ́ sɩ kpɛtɛ ɩsɩɩ ɩ kɑ́ kɔm tɔ pə kɛ́ lɑŋwɑkəllɛ sɔsɔɔlɛ kɛ́. Ɩ təmlɛ tɔm lɑpɑ kɑtɛ kɛ́, kɑwɑɑɣɑ fɛɩ tə tɑɑ. 16 Səkpɛtʋɣʋ, nɑ lɑŋwɑkəllɛ, nɑ nəɣəsɛɛ tuutuumɑ, nɑ kʋtɔməŋ, nɑ pɑ́ɑ́nɑ́ tɑɑ kɛ́ ɩ wɛɛ, hɑlənɑ ɩ səm.

17 Ḿpʋ́ɣʋ́ ləmɑɣɑsɛɛ tʋ tɔmɑ sɩ: Nti mɑ nɑwɑ tɔɣɔlɛ sɩ yʋlʋ lɑŋlɛ ɩ́ hʋləmənɑ ɩ kʋtɔɣɔʋ, nɑ ɩ kʋnyɔnyɔɔm, nɑ ɩ təmɑ tənɑ nnɑ ɩ lɑkɩ ɑtɛ tɔ, hɑlənɑ ɩ səm. Mpi tɔ, ɩ pɑɑ tete ntɛ́ tənɑ. 18 Mpɑ pɑ tənɑ Ɩsɔ hɑɑkɩ toŋ nɑ wɛnɑʋ sɩ pə kɛ́ pɑ nyəm nɑ ɩ yeki-wɛ sɩ pɑ́ tɔɣɔ nɑ pɑ́ yɔɔlənɑ pɑ təmlɛ tɔ. Mpʋ ɩnɩ pə kɛ́ Ɩsɔ kʋcɔɔʋ kɛ́. 19 Mpi pə tɔɔ tɔ, sɑɑ wei Ɩsɔ tʋɣɩ yʋlʋ tɑɑ kɛ́ lɑŋhʋlʋmlɛ tɔ, ɩɩ pɑɑsəɣənɑ teu sɩ ɩ weesuɣu topilɑɑ.

<- Ləmɑɣɑsɛɛ tʋ 4 Ləmɑɣɑsɛɛ tʋ 6 ->