1 Ḿpʋ́ɣʋ́ Moisi tɔmɑ sɩ: Ɩsɛɣɛlɩ nyǝ́mɑ mɛ, ɩ́ ke nkpɑŋŋ. Sɑŋɑ ɩ́ tɛsǝɣɩ Yɑɑtɑnɩ kɛ́ sɩ ɩ́ tɔɣɔnɩ piitimnɑɑ mpɑ pɑ kǝlɑ-mɛɣɛ pɑɣɑlɛ nɑ toŋ tɔ. Ɩlɛnɑ ɩ́ tɔɣɔ pɑ ɑcɑlɛɛ sɔsɔɔnɑ wenɑ ɑ koloosi kɑlǝsǝnɑ ɩsɔtɑɑ tɔ. 2 Tɛtʋ ntɩ tǝ yǝlɑɑ kiiwɑɣɑ nɑ pɑ kɛ́ tookonɑɑ. Mpɛɣɛlɛ Anɑkɩ nyǝ́mɑ mpɑ pɑ pʋɣʋlǝɣɩ sɩ nɔɣɔlʋ tɑ tɑlɑ ɩ́ yoonɑ-wɛ tɔ. 3 Amɑ ɩ́ cɛkǝnɑ teu sɩ mǝ Ɩsɔ Tɑcɑɑ kɑ́ tɛɛnɑ-mɛɣɛ nɔɣɔ kɛ ɩ mɑɣɑmɑɣɑ, ɩsɩɩ kɔkɔ mʋkʋɣʋ nyɩɩʋ tɔ. Nɑ ɩ́ wɑkǝlɩ-wɛ nɑ pɑ́ hʋʋ. Ɩlɛnɑ mɩ́ɩ́ ŋmili pɑ tɔɔ nɑ ɩ́ tɔɣɔnɩ-wɛ nɑ ɩ́ kʋ-wɛɣɛ kpɑkpɑɑ ɩsɩɩ ɩ kɑ heeluɣu-mɛ tɔ.

4 Wɑɑtʋ wei mǝ Ɩsɔ Tɑcɑɑ kɑ́ tɔɣɔnɩ piitimnɑɑ mpɛɣɛ mǝ nɔɣɔ tɔɔ tɔ, ɩ́ tɑɑ mɑɣɑsɩ mǝ tɑɑ sɩ mǝ siɣisuɣu tɔɔ kɛ́ Ɩsɔ hɑɑkɩ-mɛɣɛ tɛtʋ tǝnɛ. Mpi tɔ, piitimnɑɑ mpɛ pɑ ɩsɑɣɑtʋ tɔɔ kɛ́ Ɩsɔ tɔɣɔnǝɣɩ-wɛɣɛ mǝ nɔɣɔ tɔɔ. 5 Pǝ tɑɣɑ mǝ siɣisuɣu nɑ mǝ tɑmpɑnɑ tǝŋʋɣʋ tɔɔ kɛ ɩ́ mʋɣɩ pɑ tɛtʋ. Amɑ piitimnɑɑ mpɛ pɑ ɩsɑɣɑtʋ tɔɔ kɛ́ Tɑcɑɑ tɔɣɔnǝɣɩ-wɛɣɛ mǝ nɔɣɔ tɔɔ. Ɩsɔ lɑpɑ ḿpʋ́ɣʋ́ sɩ pǝ́ lɑ ɩsɩɩ ɩ kɑ heeluɣu nɑ tuunɑʋ kɛ mǝ cɔsɔnɑɑ Apǝlɑhɑm nɑ Ɩsɑɑkɑ nɑ Yɑkɔpʋ tɔ. 6 Ɩ́ nyɩ teu sɩ, pǝ tɑɣɑ mǝ tɑmpɑnɑ tǝŋʋɣʋ tɔɔ kɛ́ ɩ hɑ-mɛɣɛ tɛtʋ kʋpɑntʋ tǝnɛ sɩ tǝ́ pǝsɩ mǝ nyǝntʋ. Mpi tɔ, mǝ mɑɣɑmɑɣɑ ɩ́ wɛ kɑŋkɑnɑ kɛ́.

7 Ɩ́ tɔɔsɩ teu kɛ ɩsǝnɑ ɩ́ kpɑɑsɑ Tɑcɑɑ pɑ́ɑ́nɑ́ kɛ wʋlɑɣɑ tɛtʋ tɑɑ tɔ. Hɑtoo mǝ lɩɩʋ kɛ Icipiti hɑlǝnɑ mǝ tɑtɛ kɛ cǝnɛ tɔ, ɩ́ kʋlǝɣɩ Tɑcɑɑ tɔɔ kɛ́.

8 Holɛpʋ pʋɣʋ luɣu kɛ ɩ́ kpɑɑsɑ Tɑcɑɑ pɑ́ɑ́nɑ́ nɑ ɩ́lɛ́ ɩ tɑɑ huunɑ-mɛ nɑ ɩ́ mɑɣɑsɩ sɩ ɩ kʋɣɩ-mɛ́. 9 Wɑɑtʋ ɩnǝɣɩ mɑ kpɑ pʋɣʋ tɑɑ sɩ Tɑcɑɑ cɛlǝɣɩ-m pɛɛ kpɑɑtɑnɑɑ mpɑ pɑ tɔɔ ɩ́ ŋmɑɑ nɔɔsɩ nsi mǝ nɑ-ɩ ɩ pɛɛlɑɑ tɔ pǝ tɔm tɔ. Hɑlǝnɑ mɑ́ sɑɑlɩ tǝnɑɣɑ kʋyɛɛŋ nɩɩlɛ tǝcu mɑ tɑ tɔɣɔ mɑ tɑ nyɔɔ. 10 Ḿpʋ́ɣʋ́ Tɑcɑɑ cɛlɑ-m pɛɛ kpɑɑtɑnɑɑ nɑɑlɛ mpɑ pɑ tɔɔ ɩ mɑɣɑmɑɣɑ ɩ kɑ ŋmɑɑwɑ kʋsǝsɩɩtʋ tǝnɑ nti ɩ heelɑ-mɛɣɛ kɔkɔ tɑɑ kɛ́ kʋyɑkʋ ŋku ɩ́ kotɑ pʋɣʋ luɣu tɔ.

11 Kʋyɛɛŋ nɩɩlɛ wɑɑlɩ kɛ́ Tɑcɑɑ cɛlɑ-m nɔɣɔ pɛɛlʋɣʋ pɛɛ kpɑɑtɑnɑɑ mpɛ pɑ nɑɑlɛ. 12 Ɩlɛnɑ ɩ́ tɔ-m sɩ: Kʋlɩ tǝwɑkɑ nɑ ń tii lɔŋ. Mpi tɔ, mɑ yǝlɑɑ mpɑ mɑ lǝsɑ Icipiti tɑɑ tɔ pɑ wɑkǝlɑɑ. Pɑ tɑ tɑɑŋɩ mpɑɑʋ ŋku mɑ hʋlɑ-wɛ tɔ kʋ tɑɑ. Hɑlǝnɑ pɑ lu nyǝɣǝlʋɣʋ kɛ tʋɣʋ nɑ pɑ́ tɔŋnɑ lɑɑʋ. 13 Ḿpʋ́ɣʋ́ Tɑcɑɑ tɑsɑ yɔɣɔtʋɣʋ sɩ: Mɑ nɑɑkɩ sɩ yǝlɑɑ pɑnɛ pɑ kɛ́ kɑŋkɑnɑ nyǝ́mɑ kɛ́. 14 Yele nɑ mɑ́ kʋ-wɛ nɑ mɑ hɩɩsɩ pɑ hǝtɛ kɛ tɛtʋ tɑɑ. Nɑ mɑ́ lɑ́ nɑ ń huki nɑ ń pǝsɩ piitim sɔsɔɔm nɑ ń kǝlɩ-wɛɣɛ pɑɣɑlɛ nɑ toŋ. 15 Ḿpʋ́ɣʋ́ mɑ mǝlɑ tiiu nɑ pʋɣʋ mʋɣɩ kɔkɔ kɛ mpʋ, nɑ nɔɣɔ pɛɛlʋɣʋ kpɑɑtɑnɑɑ mpɛɣɛ mɑ niŋ tɑɑ. 16 Mɑ kʋsɑ ɩsɛ, ɩlɛnɑ mɑ́ nɑ́ sɩ tɑmpɑnɑ ɩ́ pǝntǝnɑ mǝ Ɩsɔ Tɑcɑɑ. Ɩ́ tɑ́ leeli mpɑɑʋ ŋku ɩnɩ mɑ hʋlɑ-mɛ tɔ kʋ tɑɑ. Hɑlǝnɑ ɩ́ lu nyǝɣǝlʋɣʋ kɛ nɑʋle nɑ ɩ́ luŋiɣi. 17 Tǝnɑɣɑ mɑ pɛtɑ pɛɛ kpɑɑtɑnɑɑ mpɛɣɛ ɑtɛ nɑ pɑ́ yɔkɩ mǝ ɩsɛntɑɑ.

18 Ḿpʋ́ɣʋ́ mɑ hotɑ Tɑcɑɑ tɛɛ nɑ mɑ́ sɑɑlɩ tǝnɑɣɑ kʋyɛɛŋ nɩɩlɛ. Mɑ tɑ tɔɣɔ mɑ tɑ nyɔɔ, kɛ ɩsɑɣɑtʋ tǝnɑ nti Ɩsɛɣɛlɩ nyǝ́mɑ lɑpɑ Ɩsɔ nɑ pǝ́ kpɑɑsɩ ɩ pɑ́ɑ́nɑ́ tɔ tǝ tɔɔ. 19 Pǝ tɑɣɑ pʋlʋ, wɑɑtʋ wei mɑ́ nɑwɑ Tɑcɑɑ pɑɑnɑ huu mǝ tɔɔ, hɑlǝnɑ mɑ́ mɑɣɑsɩ sɩ mɑ kʋɣɩ-mɛ tɔ sɔɣɔntʋ kpɑ-m. Amɑ Tɑcɑɑ nɩɩ mɑ kʋsǝlǝmʋtʋ tɔtɔ nɑ ɩ́ lɑ́ ɩsɩɩ mɑ sǝlǝmɑɑ tɔ. 20 Tɑcɑɑ mʋ Alɔŋ nɑ pɑ́ɑ́nɑ́ tɔtɔɣɔ, hɑlɩ ɩ cɑɑkɑɣɑ ɩ kʋ-ɩ. Ɩlɛnɑ mɑ́ wiinɑ-ɩ ɩ́lɛ́ ɩ tɔɔ. 21 Ḿpʋ́ɣʋ́ mɑ pɛtɑ mǝ ɩsɑɣɑtʋ kʋlʋlʋm nɑʋle ntɛɣɛ kɔkɔ tɑɑ, nɑ mɑ́ nɑŋ-tɛ nɑ mɑ́ pǝlɩ tǝ mʋlʋm kɛ lɔɔʋ ŋku kʋ kpeŋ pʋɣʋ tɑɑ tɔ kʋ tɑɑ.

22 Mpʋ tɔtɔɣɔ ɩ́ kɑ kpɑɑsɑ Tɑcɑɑ pɑ́ɑ́nɑ́ kɛ Tɑpeelɑ nɑ Mɑsɑ nɑ Kipǝloti-Tɑɑfɑ. 23 Pǝ kɔmɑ nɑ ɩ́ kʋsɩ-mɛ sɩ ɩ́ polo Kɑtɛɛsɩ-Pɑɑneyɑ nɑ ɩ́ tɔɣɔ tɛtʋ nti ɩ hɑ-mɛ tɔ. Ɩlɛnɑ ɩ́ kʋlɩ ɩ tɔɔ nɑ ɩ́ kisi ɩ nɔɣɔ kɛ nɩɩʋ. Pǝ́cɔ́ ɩ́ tɑ́ tʋ-ɩ nɑɑni. 24 Hɑtoo sɑɑ wei mɑ nyǝmɑ-mɛ tɔ, ɩ́ kʋlǝɣɩ Tɑcɑɑ tɔɔ kɛ́, ɩɩ nɩɩkǝnɑ-ɩ.

25 Tɑcɑɑ cɑɑkɑɣɑ-mɛɣɛ kpiisuɣu, ɩlɛnɑ mɑ́ hoti ɩ nɔɔhɛɛ tɛɛ kɛ́ kpɑkpɑɑ kɛ kʋyɛɛŋ nɩɩlɛ tǝcu. 26 Nɑ mɑ́ wiinɑ-ɩ sɩ: Hɑɩ Tɑcɑɑ Ɩsɔ, tɑɑ kʋ-wɛ. Pɑ kɛ́ nyɑ́ yǝlɑɑ mpɑ n yɑpǝnɑ nyɑ́ toŋ sɔsɔɔŋ nɑ ń lǝsɩ-wɛɣɛ Icipiti tɑɑ nɑ nyɑ́ niŋ tɔɣɔ. 27 Tɔɔsɩ nyɑ́ tǝmlɛ nyǝ́mɑ Apǝlɑhɑm nɑ Ɩsɑɑkɑ nɑ Yɑkɔpʋ pɑ tɔɔ. Tɑɑ nyǝnɩ yǝlɑɑ pɑnɛ pɑ kɑɑnɩɩtʋ nɑ pɑ nyɑŋ nɑ pɑ ɩsɑɣɑtʋ. 28 Pǝ́cɔ́ pǝ tɑɑ kɔɔ nɑ Icipiti nyǝ́mɑ tɔ́ sɩ: Tɑcɑɑ ɩɩ pǝsǝɣɩ sɩ ɩ́ tɑnɑ-wɛɣɛ tɛtʋ nti ɩ kɑ sɩ́ɩ́ ɩ nɔɣɔ sɩ ɩ kɑ́ hɑ-wɛ tɔ tǝ tɑɑ. Yɑɑ ɩ tɑɑ cɑɑkɩ-wɛ tɔɣɔ ɩ lǝsɑ-wɛ sɩ ɩ pukinɑ wʋlɑɣɑ tɛtʋ tɑɑ nɑ ɩ́ kʋ́. 29 Pǝ́cɔ́ pɑ kɛ́ nyɑ́ yǝlɑɑ mpɑ n lǝsɑ Icipiti tɛtʋ tɑɑ nɑ nyɑ́ toŋ sɔsɔɔŋ tɔɣɔ.

<- Kʋsǝsɩɩtʋ Lɛlʋɣʋ 8Kʋsǝsɩɩtʋ Lɛlʋɣʋ 10 ->