1 Ḿpʋ́ɣʋ́ kʋyɑkʋ nɑkʋlɩ wulɑʋ Pɛlǝsɑsɑɑ lɑpɑ ɑcimɑ sɔsɔɔnɑ. Ɩ ɑkewenɑɑ sɔsɑɑ iyɑɣɑ (1000) kɛ ɩ lɑpɑ-yɛ nɑ ɩ́ nɑ-wɛ pɑ́ nyɔɔ sʋlʋm. 2-3 Pǝ kɛɛsɑɑ ɩlɛnɑ sʋlʋm cɔɔ wulɑʋ ɩsɛntɑɑ. Tǝnɑɣɑ ɩ tilɑɑ nɑ pɑ́ kɔnɑ wʋlɑ nɑ liɣitee nyǝɣǝlʋɣʋ poosiyɑnɑɑ. Wontu ntǝɣɩ ɩ cɑɑ Nepukɑnɛsɑɑ kɑ lɛɛkɑ Yosɑlɛm ɩsɔ tǝsɛɛlɛ tɑɑ. Ḿpʋ́ɣʋ́ ɩ́ nɑ ɩ ɑkewenɑɑ sɔsɑɑ nɑ ɩ ɑlɑɑ, nɑ ɩ sɑɑlɑɑ, pɑ nyɔɔnɑ wontu ntǝɣɩ sʋlʋm. 4 Ɩlɛnɑ pɑ́ tɑlǝɣɩ pɑ tɩɩŋ kʋlɑlɑɑŋ. Wʋlɑ nɑ nyǝɣǝlʋɣʋ mɑɣɑmɑɣɑ, nɑ pǝ kʋsɛɛmʋɣʋ kɛ pɑɑ lupɑ tɩɩŋ ɩnɩ. Pɑ sɑɑkɑ lɛlǝŋ kɛ tɑɑsɩ nɑ pɛɛ.

5 Ḿpʋ́ɣʋ́ ntɑntɑkʋ lɩɩwɑ kpɑkpɑɑ. Ɩlɛnɑ kʋ ŋmɑɑkɩ fǝtǝlɑ kiŋ kɛ kɑwulɑɣɑ kutuluɣu koluŋɑ kʋhʋlʋmɑɣɑ tɔɔ. 6 Wulɑʋ nɑ́ mpʋ, ɩlɛnɑ sɔɣɔntʋ kpɑ-ɩ nɑ ɩ́ seliɣi. Hɑlǝnɑ ɩ tʋnɑ mɑkǝnɑ tǝmɑɣɑ kpɑkpɑkpɑ. 7 Ḿpʋ́ɣʋ́ ɩ mɑpɑ kɑpukɑ sɩ pɑ́ kɔnɑ Pɑpiloni ɩsɔtʋlʋŋɑsɩ nyǝntɑɑ, nɑ nyǝntɑɑ nɑ pee nɑlɑɑ. Pɛlɛ pɑ kɔmɑ ɩlɛnɑ ɩ́ tɔ-wɛ sɩ: Ye wei ɩ́ kɑlɑ ŋmɑɑtʋ tǝnɛ nɑ ɩ́ heeli-m tǝ hʋwɛɛ. Pɑɑ suu pʋntʋ kɛ toŋ toko, nɑ pɑ tʋ-ɩ wʋlɑ lɩɩlʋɣʋ. Ɩlɛnɑ pɑ́ sɩɩ-ɩ kɑwulɑɣɑ tǝcɑɣɑlɛ tooso nyɛntɛ tɑɑ.

8 Ɩlɛnɑ pɑ tǝnɑ pɑ́ mɑɣɑsɩ. Amɑ pɑ tɑ pǝsɩ nɑ pɑ́ kɑlɑ ŋmɑɑtʋ ntɩ nɑ pɑ́ heeli wulɑʋ kɛ tǝ hʋwɛɛ. 9 Tǝnɑɣɑ wulɑʋ lɑŋlɛ sɔɔsɑ wɑkǝlʋɣʋ nɑ ɩ ɑkewenɑɑ sɔsɑɑ lɑŋɑ nɑ́ɑ́ cɛ.

10 Ḿpʋ́ɣʋ́ wulɑʋ too nɩɩwɑ ɩ́ nɑ ɩ ɑkewenɑɑ pɑ mɑkɩ kɑpusi kɛ ŋmɑɑtʋ ntɩ tǝ tɔm. Ɩlɛnɑ ɩ́ sʋʋ pɑ kiŋ nɑ ɩ́ sɛɛ ɩ pǝyɑlʋ sɩ: Mǝ nɑ tɛtʋ. Sɔɣɔntʋ ɩ́ tɑɑ kpɑ-ŋ nɑ pǝ́ wɑkǝlɩ nyɑ́ lɑŋlɛ. 11 Apɑlʋ nɔɣɔlʋ ɩ wɛ nyɑ́ kɑwulɑɣɑ tɑɑ, ɩ wɛnɑ Ɩsɔ Nɑŋŋtʋ lǝmɑɣɑsǝlɛ. Hɑlɩ nyɑ́ cɑɑ Nepukɑnɛsɑɑ wɑɑtʋ tɑɑ kɛ́ pɑ nɑ́ yʋlʋ ɩnɩ. Ɩ kɛ́ cɛkǝnlʋ, nɑ lɑɣɑtʋ, pǝyele pǝ hɑ-ɩ nyǝm. Ḿpʋ́ɣʋ́ nyɑ́ cɑɑ kpɑ-ɩ tʋwɑɑ, nɑ ɩsɔtʋlʋŋɑsɩ tɔm nyǝntɑɑ, nɑ nyǝntɑɑ, nɑ pee nɑlɑɑ pɑ nyʋɣʋ tʋ. 12 Ɩ hǝtɛ ntɛ́ Tɑniyɛɛlɩ, ɩlɛnɑ nyɑ́ cɑɑ cuɣusɩ-ɩ sɩ Pɛlǝtɑsɑɑ. Ɩ wɛnɑ lǝmɑɣɑsǝlɛ kɛ́, nɑ pǝ́ kǝlɩ lɛlɑɑ. Ɩ nyǝmɑɣɑ nɑ ɩ́ sɛɣɛsǝɣɩ toosee hʋwɛɛ. Ɩ kpekiɣi ɑsǝsɩɩnɑ, nɑ ɩ́ kuliɣi kʋŋmɛlǝm tɔɔ nɑ ɩ́ heeliɣi. Yɑɑ-ɩ, ɩ kɑ́ kɑlɑ-ŋ ŋmɑɑtʋ ntɩ.

13 Ḿpʋ́ɣʋ́ pɑ kɔnɑ Tɑniyɛɛlɩ kɛ kpɑkpɑɑ, nɑ wulɑʋ pɔɔsɩ-ɩ sɩ: Nyɑɣɑlɛ Tɑniyɛɛlɩ wei mɑ cɑɑ kɔnnɑ Yutɑ tɔ? 14 Pɑ yɔɣɔtɑ nyɑ́ tɔm nɑ mɑ́ nɩɩ sɩ, n wɛnɑ Ɩsɔ lǝmɑɣɑsǝlɛ nɑ nyǝm nɑ n cɛkǝɣǝnɑ nɑ pǝ́ kǝlɩ lɛlɑɑ. 15 Pɑ kɔnɑ-m nyǝntɑɑ nɑ ɩsɔtʋlʋŋɑsɩ nyǝntɑɑ sɩ pɑ́ kɑlɑ ŋmɑɑtʋ tǝnɛ nɑ pɑ́ heeli-m tǝ hʋwɛɛ pɑ tɑ pǝsɩ. 16 Mɑ nɩɩwɑ sɩ n pǝsǝɣɩ nɑ ń cɔ tɔm tǝnɑ. N kuliɣi kʋŋmɛlǝm tɔɔ, nɑ ń heeliɣi. Mpʋ tɔ, ye n kɑlɑ ŋmɑɑtʋ tǝnɛ nɑ ń sɛɣɛsɩ-m tǝ hʋwɛɛ. Pɑɑ suu-ŋ toŋ toko, nɑ pɑ́ tʋ-ŋ wʋlɑ lɩɩlʋɣʋ. Pɑɑ sɩɩ-ŋ kɑwulɑɣɑ tǝcɑɣɑlɛ tooso nyǝntɛ tɑɑ.

17 Ḿpʋ́ɣʋ́ Tɑniyɛɛlɩ cɔ wulɑʋ sɩ: Mɑ sɑmɑ, tɑ cɑɑ. Ɩlɛ sɩɩ nyɑ́ kʋcɔɔŋ, yɑɑ ń hɑ wei n nɔkɑɑ tɔ. Pɑɑ nɑ mpʋ mɑɑ kɑlɑ-ŋ ŋmɑɑtʋ ntɩ nɑ mɑ́ heeli-ŋ tǝ hʋwɛɛ. 18 Ɩsɔtɑɑ Ɩsɔ sɔsɔ kɑ kpɑnɑ nyɑ́ cɑɑ Nepukɑnɛsɑɑ kɛ wulɑʋ sɔsɔ nɑ ɩ́ tʋ-ɩ teeli. 19 Nɑ pǝ́ lɑ nɑ piitimnɑɑ nɑ nsǝmɑ tǝnɑ yǝlɑɑ nyɑŋnɑ-ɩ nɑ pɑ́ seliɣi. Ye ɩ nɔkǝnɑ wei ɩ kʋ ɩ́lɛ́, nɑ ɩ́ sɔɔlɑ wei ɩ yele ɩ́lɛ́. Ɩ kʋsɑɣɑ mpɑ ɩ cɑɑ tɔ pɑ nyɔɔŋ, nɑ ɩ́ tisiɣi mpɑ ɩ luɣu fɛɩ tɔ. 20-21 Amɑ ɩ hɔmɑ ɩ tɩ nɑ ɩ́ lɑ kɑlɑmpɑɑnɩ. Ɩlɛnɑ pǝ tʋ-ɩ wontuɣu lǝmɑɣɑsǝlɛ. Pɑ kʋsɑ-ɩ ɩ kumte tɔɔ nɑ ɩ teeli sɩ́ tǝkpɑtɑɑ. Pɑ tɔɣɔnɑ-ɩ yǝlɑɑ hɛkʋ nɑ ɩ́ nɑ tɑɑlɛ kpɑŋɑsɩ pɑ́ kɑɑ tǝcɑɣɑlɛ. Ɩ tɔɣɔ nyɩɩtʋ ɩsɩɩ nɑɑŋ, nɑ ɑŋkpǝlɛɛ sɔ-ɩ. Hɑlǝnɑ wɑɑtʋ wei ɩ nyǝmɑ́ sɩ, ɩsɔtɑɑ Ɩsɔ sɔsɔ tǝnnɑ yǝlɑɑ kɑwulɑsɩ tǝnɑ, ɩ́ nɔkɑ wei ɩ tʋ-ɩ. 22 Amɑ ɩ pǝyɑlʋ nyɑ́, nyɑ́ nyǝmɑ́ ḿpʋ́ɣʋ́ teu. Pɑɑ nɑ mpʋ n tɑ pɑsɑ nyɑ́ tɩ nɑ ń tʋ Ɩsɔ kɛ́ teeli. 23 N kpɑɑsɑ nyɑ́ tǝɣɩ ɩsɔtɑɑ Ɩsɔ tɔɔ kɛ́. Mpi tɔ, n yelɑɑ nɑ pɑ́ lǝsɩ Ɩsɔ tǝsɛɛlɛ nyǝnɑsɩ. Hɑlǝnɑ nyɑnɑ nyɑ́ ɑkewenɑɑ sɔsɑɑ, nɑ nyɑ́ ɑlɑɑ nɑ nyɑ́ sɑɑlɑɑ, ɩ́ nyɔɔnɑ sʋlʋm. Ɩlɛnɑ ɩ́ tɑlɑ mǝ tɩɩŋ wei pɑ lupǝnɑ liɣitee nyǝɣǝlʋɣʋ nɑ wʋlɑ, nɑ nyǝɣǝlʋɣʋ mɑɣɑmɑɣɑ, nɑ pǝ kʋsɛɛmʋɣʋ tɔ. Pɑɑ mǝ tɩɩŋ wei pɑ sɑɑkɑ tɑɑsɩ, nɑ pɛɛ, nɑ ɩɩ nɑɑkɩ, nɑ ɩɩ nɩɩkɩ, pǝyele ɩ tɑ nyɩ pʋlʋ tɔ. N pɛmɑ Ɩsɔ wei ɩ tɔkɑ nyɑ́ weesuɣu kɛ ɩ niŋ tɑɑ tɔɣɔ teeli. 24 Pǝ tɔɔ kɛ́ ɩ yelɑɑ nɑ ntɑntɑkʋ ŋmɑɑ mpʋ 25 Sɩ: Mene mene tekel u pɑɑsǝn. 26 Tɔm pee ɑnɩ ɑ hʋwɛɛ ntɔ. Mene hʋwɛɛ wɛɛ sɩ, Ɩsɔ kɑlɑ nyɑ́ kɑwulɑɣɑ kʋyɛɛŋ, nɑ ɩ́ sɩɩ kɑ tǝnɑɣɑ. 27 Tekel, hʋwɛɛ wɛɛ sɩ, ɩ mɑɣɑsɑ-ŋ sɑnǝyɑ tɔɔ nɑ ɩ́ nɑ́ sɩ, n fɛɩ yuŋ. 28 Pɑɑsǝn hʋwɛɛ wɛɛ sɩ, ɩ tɑlɑ nyɑ́ kɑwulɑɣɑ nɑ ɩ́ cɛlɑ Mete nyǝ́mɑ nɑ Pɛɛsɩ nyǝ́mɑ.

29 Tǝnɑɣɑlɛ wulɑʋ sɩ, pɑ́ suu Tɑniyɛɛlɩ kɛ toŋ toko nɑ pɑ́ tʋ-ɩ wʋlɑ lɩɩlʋɣʋ. Ɩlɛnɑ pɑ́ kpɑɑlɩ sɩ pɑɑ sɩɩ-ɩ kɑwulɑɣɑ tǝcɑɣɑlɛ tooso nyǝntɛ tɑɑ.

30 Ḿpʋ́ɣʋ́ pɑ kʋ Pɑpiloni wulɑʋ Pɛlǝtɑsɑɑ kɛ ɑhoo ɑnɩ.

<- Tɑniyɛɛlɩ 4Tɑniyɛɛlɩ 6 ->