2 Ɩ́ sǝlǝmɣɩ Ɩsɔ, ɩ́ tɑɑ yele. Ɩ́ feŋiɣi nɑ ɩ́ sɛɛkɩ-ɩ ɩ́ nɑ tǝmlɛ kɛ mǝ Ɩsɔ sǝlǝmʋɣʋ tɑɑ. 3 Ɩ́ kpɛntǝnɑ tɑ́ nɑ ɩ́ sǝlǝmǝɣǝnɑ Ɩsɔ nɑ ɩ́ hɑ-tʋɣʋ ɩkpɑtɛ nɑ tǝ́ lɑ ɩ wɑɑsʋ nɑ tǝ́ kpɑɑlɩ Kilisiti tɔm kʋŋmɛsǝtʋ. Tɔm kʋŋmɛsǝtʋ tǝnɛ tǝ tɔɔ kɛ́ mɑ wɛ sɑlǝkɑ tɑɑ kɛ́ ɩsǝntɔ. 4 Ɩ́ sǝlǝmɩ Ɩsɔ nɑ mɑ́, ɩlɛnɑ mɑ́ yɑsɩ ɩ tɔm tǝcɛɩcɛɩ nɑ pɑ́ nyǝmɩ-ɩ teu, mpi pǝ tʋ mɑ́ sɩ mɑ́ lɑ tɔɣɔlɛ.

5 Ɩ́ nyɩ mǝ tɔntɛ kɛ mpɑ pɑ tɑ kɛ Ɩsɔ sɛɛlɑɑ tɔ pɑ kiŋ, nɑ ɩ́ tɑɑ yele nɑ ɑlǝsɛkɛ kʋyɛɛŋ fiti-mɛɣɛ yem. 6 Pɑɑ kʋyɑŋku ɩ́ yɔɣɔtǝɣɩ kʋpɑntʋ, nɑ kɑwɑɑɣɑ nyǝntʋ ɩ́ lɩɩkǝnɑ mǝ nɔɔsɩ tɑɑ. Ɩ́ nyɩ ɩsǝnɑ pǝ mʋnɑ ɩ́ cɔ tɔm tɔ nɑ ɩ́ cɔɔkɩ pɑɑ wei.

7 Tɑ́ tɑɑpɑlʋ kʋpɑŋ Tisikɩ kɑ́ heelinɑ-mɛɣɛ mɑ tɔm tǝnɑ tǝpɑɩpɑɩ. Mɑ nɑ-ɩ tǝ lɑkǝnɑ Tɑcɑɑ tǝmlɛ nɑ ɩ kɛ tǝmlɛ lɑtʋ kʋpɑŋ kɛ́. 8 Pǝ mɑɣɑmɑɣɑ pǝ nyʋɣʋ tɔɔ kɛ́ mɑ kʋsɑ-ɩ sɩ ɩ́ polo ɩ́ nɑ-mɛ nɑ ɩ́ heeli-mɛɣɛ tɑ́ ɑlɑɑfǝyɑ tɔm nɑ pǝ́ hɛɛsɩ mǝ lɑŋɑ. 9 Tɑ́ tɑɑpɑlʋ kʋpɑmpɑŋ Honesim wei ɩ kɛ́ mǝ tɑɑ lɛlʋ tɔ ɩ́lɛ́ ɩ sɩɩnɑ-ɩ. Ɩ kɑ́ kɛɛsɩ-mɛɣɛ tǝ tǝnɑ nti tǝ lɑkɩ cǝnɛ tɔ.

10 Mɑ sɑlǝkɑ tɑɑ ɑkpele Alisitɑɑkɩ nɑ Pɑɑnɑpɑsɩ kɔɣɔ pǝyɑɣɑ Mɑlǝkɩ sɩ pɑ́ sɛɛ-mɛ yoo. Pɑ tɛmɑ-mɛɣɛ Mɑlǝkɩ ɩnɩ ɩ tɔm heeluɣu, ɩlɛ ye ɩ tɑlɑ mǝ tɛ ɩ́ tɔkɩ-ɩ teu. 11 Yesu wei pɑ yɑɑ sɩ Yutusi tɔ ɩ sɛɛ-mɛ tɔtɔ. Yǝlɑɑ tooso ɩnɛ ɩ tike ɩ lɩɩnɑ Yutɑ nyǝ́mɑ mpɑ pɑ lɑɣɑsɑɑ tɔ pɑ tɑɑ, nɑ mɑ́ nɑ-wɛ tǝ lɑkǝnɑ Ɩsɔ kɑwulɑɣɑ tǝmlɛ, nɑ pɑ pɑɑsɑɑ kɛ́ nɑ pɑ́ sɔɔsɩ-m ɑpɑlʋtʋ.

12 Ɩpɑfǝlɑsɩ wei ɩ kɛ́ mǝ tɑɑ lɛlʋ tɔ ɩ sɛɛ-mɛ. Ɩ kɛ́ Yesu Kilisiti tǝmlɛ tʋ kɛ́ nɑ ɩ sɛɛsɑ ɩsǝlɛ nɑ Ɩsɔ sǝlǝmʋɣʋ kɛ mǝ tɔɔ kɛ́ teu sɩ ɩ́ sǝŋ tǝcɑ nɑ pʋlʋ ɩ́ tɑɑ ciɣiti-mɛ, nɑ ɩ́ pɩɩ Ɩsɔ nyǝntʋ tɑɑ, nɑ ɩ́ tɑŋɑɑ tǝtɛɣɛtɛɣɛ sɩ ɩ́ lɑ pǝ tǝnɑ mpi Ɩsɔ cɑɑ tɔ. 13 Mɑ lǝsǝɣɩ ɩ nyɩɩlʋɣʋ, ye n nɑ ɩsǝnɑ ɩ kʋɣɩ ɩ tǝɣɩ mǝ nɑ Lɑyotisee nɑ Hiyelɑpolisi nyǝ́mɑ mǝ tɔɔ tɔ pǝ fɛɩ kɛɛsʋɣʋ. 14 Tɑ́ lokotulo kʋpɑŋ Luku nɑ Temɑsɩ sɩ pɑ́ sɛɛ-mɛ.

15 Ɩ́ sɛɛ tɑ́ tɑɑpɑlɑɑ mpɑ pɑ wɛ Lɑyotisee tɔ, nɑ ɩ́ sɛɛ Nɛmfɑ nɑ Yesu sɛɛlɑɑ kpekǝle nte tǝ kotiɣi ɩ tǝyɑɣɑ kɛ Ɩsɔ sɛɛʋ tɔ. 16 Ye mɩɩ tɛmɑ tɑkǝlɑɣɑ kɑnɛɣɛ kɑlʋɣʋ ɩlɛ ɩ́ tɛlǝsɩ Lɑyotisee Yesu sɛɛlɑɑ nɑ pɛlɛ pɑ́ kɑlɑ-kɛ tɔtɔ. Mɛ tɔtɔ mɩɩ mʋ Lɑyotisee nyǝ́mɑ nyǝŋkɑ nɑ ɩ́ kɑlɑ. 17 Ɩ́ heeli Aɑsipi sɩ ɩ́ pɑɑsǝnɑ Tɑcɑɑ tǝmlɛ nte pɑ tʋ-ɩ sɩ ɩ́ lɑ tɔɣɔ teu.

18 Mɑ mɑɣɑmɑɣɑ mɑ niŋ ŋmɑɑtʋ ntɛ́ cǝnɛ. Pɔɔlɩ mɑ́ mɑ sɛɛ-mɛ. Ɩ́ tɑɑ sɔɔ sɩ mɑ wɛ sɑlǝkɑ tɑɑ yoo.

Ɩsɔ ɩ́ hʋ́lɩ́-mɛɣɛ pɛɛlɛɛ.

<- Kolosi 3