1 Ḿpʋ́ɣʋ́ ɑpɑlʋ nɔɣɔlʋ ɩ́lɛ́, pɑ yɑɑ-ɩ sɩ Anɑniyɑsɩ, nɑ ɩ ɑlʋ sɩ Sɑfilɑ. Ɩ pɛɛtɑ pɑ tɛtʋ nɑtǝlɩ nɑ ɩ ɑlʋ wɛnɑ pǝ nyǝm. 2 Ɩ tɛmɑ pɛɛtʋɣʋ, ɩlɛnɑ ɩ́ fɑɣɑ liɣitee tɑɑ nɑ ɩ́ sɩɩ. Ɩlɛnɑ ɩ́ ponɑ wenɑ ɑ kɑɑsɑɑ tɔ, nɑ ɩ́ cɛlɑ tillɑɑ nɑ ɩ ɑlʋ wɛnɑ pǝ tǝnɑɣɑ mpʋ pǝ nyǝm. 3 Tǝnɑɣɑ Piyɛɛ pɔɔsɑ-ɩ sɩ: Anɑniyɑsɩ pepe tɔɔ kɛ́ Sɑtɑnɩ hikɑ-ŋ ḿpʋ́ɣʋ́ kɑtɑtǝlɑɣɑ, nɑ ń kɑɑsɩ nyɑ́ tǝɣɩ tɛtʋ nti n pɛɛtɑɑ tɔ tǝ liɣitee, nɑ ń puɣusi Feesuɣu Nɑŋŋtʋ? 4 N tɑɑ pɛɛtǝtɑ-tɩ tɔ, nyɑ́ tɛtʋ kɛ́ mɛɛ. Nɑ n tɩɩ tɛmɑ-tǝɣɩ pɛɛtʋɣʋ tɔ, ɑwe tɩ liɣitee, pǝ tɑɣɑ nyɑ́? Ɩlɛ ɩsǝnɑɣɑ pǝ lɑpɑ nɑ ń pɑɑsɩ nɑ ń mɑɣɑsɩ nyɑ́ tɑɑ nɑ ń lɑ yɑɑsi ɩsɑɣɑʋ ɩnɛ ɩ tɑkɑ? Ɩsɔ kɛ ń puɣusɑɑ pǝ tɑɣɑ yǝlɑɑ se.

5 Anɑniyɑsɩ nɩɩ tɔm tǝnɛ ɩnɩ, ɩlɛnɑ ɩ́ hoti nɑ ɩ́ sɩ. Ḿpʋ́ɣʋ́ pǝ lɑpɑ pɑ tǝnɑ mpɑ pɑ nɩɩ tɔm tǝnɛ ɩnɩ tɔɣɔ keniŋɑ nɑkǝlɩ pǝ tɩɩ fɛɩ. 6 Ɩlɛnɑ ɩfepiyɑ kʋlɩ nɑ pɑ́ tɑkɩ-ɩ pʋʋɣʋ nɑ pɑ́ ponɑ-ɩ pim.

7 Pǝ lɑpɑ lɑɑsɑɣɑ ɩsɩɩ kɑlǝfunɑɑ tooso, ɩlɛ Anɑniyɑsɩ ɩnɩ ɩ ɑlʋ sʋʋwɑɣɑlɛ. Amɑ ɩ tɑ nɩɩtɑ nti tǝ tɛmɑ lɑpʋ tɔ. 8 Ḿpʋ́ɣʋ́ Piyɛɛ pɔɔsɑ-ɩ sɩ: Ɩ́ pɛɛtɑ mǝ tɛtʋ ntɩ tɔ tǝ liɣitee tǝnɑɣɑlɔ? Heeli-m.

Ɩlɛnɑ Anɑniyɑsɩ ɑlʋ cɔ sɩ: Anǝɣǝlɛ mpʋ.

9 Tǝnɑɣɑ Piyɛɛ yɔɣɔtɑ-ɩ sɩ: Ɩsǝnɑɣɑ mǝ lɑpɑ nɑ ɩ́ kpɛntɩ nɑ ɩ́ pɑɑsɩ nɑ ɩ́ hʋʋ sɩ ɩ́ mɑɣɑsǝɣɩ Tɑcɑɑ Feesuɣu Nɑŋŋtʋ sɩ ɩ́ nɑɑ ɩ wɑɑlɩ? Nyǝnɩ, mpɑ pɑ pimɑ nyɑ́ pɑɑlʋ tɔ pɑ tɛmɑ kɔntɛ, mpɛɣɛlɛ nɔnɔɣɔ tɛɛ. Pɑɑ tɛɛsɩ nyɑɣɑ tɛɛnɑʋ.

10 Tǝnɑɣɑ Anɑniyɑsɩ ɑlʋ ɩnɩ ɩ hotɑ Piyɛɛ nɔɔhɛɛ tɛɛ kɛ́ kpɑkpɑɑ nɑ ɩ́ sɩ́. Ɩfepiyɑ sʋʋwɑ, ɩlɛnɑ pɑ́ mɑɣɑnɑ ɩ sǝpɑ. Ɩlɛnɑ pɛlɛ pɑ́ kpɑɣɑ-ɩ nɑ pɑ́ polo pɑ́ pimi-ɩ ɩ pɑɑlʋ kɔŋkɔŋ tɑɑ. 11 Ḿpʋ́ɣʋ́ tɔm ntɩ tǝ lɑpɑ Yesu sɛɛlɑɑ kpekǝle tǝnɑ nɑ mpɑ pɑ nɩɩ-tɩ tɔ pɑ tǝnɑɣɑ keniŋɑ nɑkǝlɩ pǝ fɛɩnɑ.

12 Tillɑɑ lɑpɑ Ɩsɔ kɔkɔlɔ nyǝm, nɑ piti tǝmɑ pɑɣɑlɛ kɛ yǝlɑɑ hɛkʋ tɑɑ. Ɩsɔ sɛɛlɑɑ tǝnɑ kotɑɣɑ Sɑlʋmɔŋ sɑkɑɣɑ sɔsɑɣɑ tɛɛ. 13 Sɑmɑɑ pʋɣʋlɑɣɑ-wɛɣɛ pǝ tɩɩ fɛɩ, pɑɑ nɑ mpʋ yʋlʋ kpɑɩ tʋ kɛ yem nyɑŋɑɣɑnɑ pɑ tɑɑ sʋʋʋ. 14 Amɑ ɑpɑlɑɑ nɑ ɑlɑɑ sɑmɑɑ mpɑ pɑ mʋkɑɣɑ Tɑcɑɑ tɔm nɑ pɑ́ sɔɔsǝɣɩ ɩsɔ sɛɛlɑɑ kpekǝle tɔɔ tɔ, pɑ nyɔɔŋ tɔŋnɑ hukuɣu kɛ sɔsɔm. 15 Ɩlɛnɑ yǝlɑɑ nɑ́ɑ́ sʋʋ kʋtɔntʋnɑɑ kɛ lɩɩnɑʋ, nɑ pɑ́ hɩɩsɩ-wɛɣɛ kɑtonɑɑ nɑ nyɑɑlǝŋ tɔɔ kɛ́ hɑpɛɛ nɔɔsɩ, sɩ ye Piyɛɛ tɛɛkǝnɑ tǝnɑ, ɩ ɩlɛɛmʋɣʋ mɑɣɑmɑɣɑ tɩɩ tokinɑ kʋtʋkinɑʋ kɛ pɑ tɑɑ lɛlɑɑ. 16 Yǝlɑɑ sɑmɑɑ lɩɩkɑɣɑnɑ Yosɑlɛm cɔlɔ ɑcɑlɛɛ tɑɑ nɑ pɑ́ kɔŋnɑ kʋtɔntʋnɑɑ nɑ mpɑ ɑlɔɣɑɑ cɔɔsɑɣɑ tɔ, nɑ pɑ tǝnɑ pɑ hikiɣi ɑlɑɑfǝyɑ.

17 Tǝnɑɣɑ ɩsǝsɛɛmlɛ kpɑ kɔtʋlʋ sɔsɔ kɛ sɔsɔm kɛ tillɑɑ tɔɔ, nɑ ɩ kiŋ cɑɣɑlɑɑ tǝnɑ mpɑ pɑ kɛ́ Sɑtusee kpekǝle nyǝ́mɑ tɔ. Hɑlǝnɑ pɑ́ hʋʋ sɩ pɑɑ kʋlɩ pɑ tɔɔ. 18 Ḿpʋ́ɣʋ́ pɑ kpɑ tillɑɑ nɑ pɑ́ tǝkɩ-wɛɣɛ timpi pɑ tǝkǝɣɩ sɑmɑɑ tǝnɑ tɔ. 19 Amɑ Tɑcɑɑ ɩsɔtɑɑ tillu nɔɣɔlʋ kɔmɑ ɑhoo tɑɑ nɑ ɩ́ tʋlɩ sɑlǝkɑ nɔnɔɔsɩ, nɑ ɩ́ lǝsɩ tillɑɑ. Ɩlɛnɑ ɩ́ heeli-wɛ sɩ: 20 Ɩ́ polo Ɩsɔ tǝsɛɛlɛ tɑɑ tǝkɑɑ nɑ ɩ́ kɛɛsɩ sɑmɑɑ kɛ lɑɣɑsʋɣʋ mpɑɑʋ kʋnɛ kʋ tɔm.

21 Ḿpʋ́ɣʋ́ tillɑɑ lɑpɑ nti ɩsɔtɑɑ tillu heelɑ-wɛ tɔ. Pɑ kʋlɑ tɑnɑŋ ɑhulɑ tɛɛ nɑ pɑ́ polo Ɩsɔ tǝsɛɛlɛ tɑɑ nɑ pɑ́ niki wɑɑsʋ lɑpʋ.

Tǝnɑɣɑ kɔtʋlʋ sɔsɔ nɑ ɩ kiŋ cɑɣɑlɑɑ tǝnɑ pɑ kotɑ Yutɑ Kotuɣu sɔsɔɔʋ nyǝ́mɑ. Ɩlɛnɑ pɑ́ tili sɩ pɑ́ lǝsɩ tillɑɑ kɛ sɑlǝkɑ tɑɑ nɑ pɑ́ kɔnɑ. 22 Wɑɑtʋ wei filisinɑɑ nɑ́ tɑlɑ sɑlǝkɑ tɑɑ tɔ, pɑ tɑ mɑɣɑnɑ-wɛ. Ɩlɛnɑ pɛlɛ pɑ mǝlɩ kpɑkpɑɑ nɑ pɑ́ heeli hʋʋlɛ sɔsɑɑ mpɛ sɩ: 23 Tǝ tɑlɑɑ nɑ tǝ́ mɑɣɑnɑ sɑlǝkɑ nɔnɔɔsɩ kɑlǝsɑ mpʋ tǝkeŋkeŋ, nɑ tɑŋlɑɑ nɑ́ɑ́ sǝŋɑ pɑ tǝsǝŋlɛnɑɑ kɛ nɔnɔɔsɩ tǝnɑ. Amɑ tǝ tʋlɑ nɔnɔɔsɩ, ɩlɛ nɔɣɔlʋ fɛɩ pǝ tɑɑ.

24 Ɩsɔ tǝsɛɛlɛ tɑŋlɑɑ nyʋɣʋ tʋ nɑ kɔtǝlɑɑ sɔsɑɑ pɑ nɩɩ mpʋ, ɩlɛnɑ tillɑɑ mʋkʋɣʋ mpɩ pǝ tʋ-wɛɣɛ piti kɛ teu. Hɑlǝnɑ pɑ tɑ nyɩ mpi tɔm tǝnɛ tii tɛnɑ tɔ. 25 Tǝnɑɣɑ nɔɣɔlʋ nɑ́ lɩɩ yem nɑ ɩ́ heeli-wɛ sɩ: Ɩ́ nɑwɑɑ, mpɑ ɩnɩ ɩ́ kɑ tʋ sɑlǝkɑ tɔ, pɑ wɛnnɑ ntɛɣɛ Ɩsɔ tǝsɛɛlɛ sɔsɔɔlɛ tɑɑ nɑ pɑ́ lɑkɩ yǝlɑɑ kɛ wɑɑsʋ.

26 Ḿpʋ́ɣʋ́ tɑŋlɑɑ nyʋɣʋ tʋ ɩnɩ nɑ ɩ yǝlɑɑ pɑ polɑɑ nɑ pɑ́ kɔnɑ tillɑɑ tǝhɛɛ. Pǝ tɑɣɑ pʋlʋ tɔɔ, pɑɑ wɛnɑ yǝlɑɑ sɔɣɔntʋ sɩ pɑ́ tɑɑ kɔɔ pɑ́ yoo mpɛɣɛ pɛɛ.

27 Tɑŋlɑɑ nyʋɣʋ tʋ tɑnɑ tillɑɑ, ɩlɛnɑ pɑ́ sǝŋsɩ-wɛɣɛ tǝhʋʋlɛ tɑɑ, nɑ kɔtʋlʋ sɔsɔ sʋʋ-wɛɣɛ tɔm pɔɔsʋɣʋ. 28 Tǝnɑɣɑ ɩ tɔmɑ-wɛ sɩ: Ɩsɩɩ tǝ kisinɑ-mɛ tǝsɑɣɑsɑɣɑ sɩ ɩ́ tɑɑ tɑsɑ ɑpɑlʋ ɩnɩ ɩ tɔm kɛ yɔɣɔtʋɣʋ yɑ? Nɑ pepeɣelɛ ɩ́ lɑpɑ ɩsǝntɔ? Ɩ́ yɑsɑ mǝ sɛɣɛsʋɣʋ ntɛ́ Yosɑlɛm ɩcɑtɛ tǝnɑ tǝmɑm, nɑ ɩ́ cɑɑ ɩ́ mǝŋnɑ ɩ sǝm tɔm ntɛ́ tɑ nyɔɔŋ tɑɑ.

29 Ntɛnɑ Piyɛɛ nɑ tillɑɑ lɛlɑɑ pɑ cɔ kɔtʋlʋ sɔsɔ sɩ: Pǝ wɛɛ sɩ Ɩsɔ kɛ́ tǝ se, pǝ tɑɣɑ yǝlɑɑ. 30 Tɑ cɑɑnɑɑ cɑɑnɑɑ Ɩsɔ feesɑ Yesu wei ɩnɩ mǝ kɑmɑ tesikɑ tɔɔ nɑ ɩ́ sɩ́ tɔ. 31 Ɩsɔ kʋsɑ ɩ nyʋɣʋ nɑ ɩ́ cɑɣɑsɩ-ɩ ɩ kɔŋkɔŋ tɑɑ, nɑ ɩ́ lɑpɩ-ɩ wulɑʋ nɑ wɑɑsʋlʋ sɔsɔ, sɩ pǝ́ lɑ nɑ Ɩsɛɣɛlɩ nyǝ́mɑ lɑɣɑsɩ tɔntɛ nɑ Ɩsɔ hɩɩsɩ pɑ ɩsɑɣɑtʋ. 32 Tǝ kɛ́ pǝ tǝnɑ mpi pǝ lɑpɑ mpʋ tɔ pǝ ɑseetɑ nyǝ́mɑ. Pǝ tɑɣɑ tɑ́ tike. Amɑ tɑ́ nɑ Feesuɣu Nɑŋŋtʋ wei Ɩsɔ hɑ mpɑ mpɑ pɑ nɩɩkǝnɑ-ɩ tɔɣɔ.

33 Kotuɣu sɔsɔɔʋ kotilɑɑ mpɛ pɑ nɩɩ mpʋ, ɩlɛnɑ pɑ pɑ́ɑ́nɑ́ huu sɔsɔm, hɑlǝnɑ pɑ cɑɑkɑɣɑ pɑ kʋ tillɑɑ sɔsɑɑ. 34 Amɑ pɑ tɑɑ kɑ wɛ Fɑlisɑ nɔɣɔlʋ wei pɑ yɑɑ sɩ Kɑmɑliyɛɛ tɔ, ɩ kɛ́ pɑ Ɩsɔ Tɔm sɛɣɛsǝlʋ sɔsɔ, nɑ yǝlɑɑ seekɑɣɑ-ɩ. Ḿpʋ́ɣʋ́ ɩ kʋlɑɑ nɑ ɩ́ sǝŋ hʋʋlɛ tɑɑ, nɑ ɩ́ tɔ sɩ pɑ́ lǝsɩ tillɑɑ nɑ ɑwɑlɩ tɔɔ nɑ pǝ́cɔ́. 35 Ɩlɛnɑ ɩ́ heeli kotilɑɑ sɩ: Ɩsɛɣɛlɩ nyǝ́mɑ mɛ, ɩ́ lɑ lɑɑkɑlɩ nɑ mpi ɩ́ cɑɑ ɩ́ lɑ yǝlɑɑ pɑnɛ tɔ. 36 Mɑtɔŋ wulenɑɑ tɑɑ kɛ́ Teutɑsɩ kʋlɑɑ nɑ ɩ́ nyǝnɩ ɩ tɩ ɩsɩɩ yʋlʋ nɔɣɔlʋ, nɑ yǝlɑɑ ɩsɩɩ nɑsǝlɛ (400) tǝŋ ɩ wɑɑlɩ. Ḿpʋ́ɣʋ́ pɑ kʋ-ɩ, nɑ mpɑ pɛlɛ pɑ tǝŋɑɣɑ ɩ wɑɑlɩ tɔ pɑ́ yɑ ŋkɑŋkɑ, nɑ pǝ tǝnɑ pǝ sɑɑlɩ yem. 37 Ɩ́lɛ́ ɩ wɑɑlɩ kɛ́ Kɑlilee tʋ Yutɑɑsɩ nɑ́ kʋlɑ kʋkɑlʋɣʋ wɑɑtʋ, nɑ ɩ́ tǝŋsɩ yǝlɑɑ kʋpiŋ kɛ ɩ wɑɑlɩ. Amɑ pɑ kʋ ɩ́lɛ́ tɔtɔ, nɑ pǝ́ yɑsɩ pɑ tǝnɑ mpɑ pɑ tǝŋɑɣɑ-ɩ tɔ. 38 Pǝ tɔɔ kɛ́ pǝnɛntɛ mɑ heeliɣi-mɛ sɩ, ɩ́ tɑɑ pɑɑsǝnɑ yǝlɑɑ pɑnɛ ɩnɩ pɑ tɔm tɔtɔ. Ɩ́ yele-wɛ nɑ pɑ́ tɛɛ. Pǝ tɑɣɑ pʋlʋ tɔɔ, ye yǝlɑɑ kiŋ kɛ pɑ kookɑlɩ nɑ pɑ tǝmɑ lɩɩnɑɑ, pɩɩ sɑɑlɩ kɛ́. 39 Amɑ ye tɑmpɑnɑ Ɩsɔ kiŋ kɛ pǝ lɩɩnɑɑ, ɩ́ kɑɑ pǝsɩ nɑ ɩ́ lɑ-wɛɣɛ pʋlʋ. Ɩ́ lɑ lɑɑkɑlɩ, pǝ́ tɑɑ kɔɔ nɑ ɩ́ yoonɑ Ɩsɔ.

Ḿpʋ́ɣʋ́ kotilɑɑ mʋ Kɑmɑliyɛɛ tɔm. 40 Ɩlɛnɑ pɑ́ yɑɑ tillɑɑ nɑ pɑ́ hɔɔkɩ-wɛ, nɑ pɑ́ heeli-wɛ sɩ: Yesu tɔm ɩ́ tɑɑ tɑsɑ mǝ nɔɔsɩ tɑɑ kɛ́ lɩɩʋ. Ɩlɛnɑ pɑ́ yele-wɛ sɩ pɑ́ tɛɛ. 41 Ḿpʋ́ɣʋ́ tillɑɑ lɩɩ kotuɣu tɑɑ nɑ lɑŋhʋlʋmlɛ kʋɣʋ-wɛ ɩsɩɩ Ɩsɔ tʋnɑ-wɛ nɑ ɩ́ yele nɑ pɑ́ nɑ́ kʋnyɔŋ kɛ Yesu tɔɔ tɔ. 42 Pɑɑ ɩfemle nte, pɑ tɑ hɛɛsɩ Yesu wei ɩ kɛ́ Mesii tɔ ɩ Lɑɑpɑɑlɩ Kʋpɑŋ heeluɣu, nɑ wɑɑsʋ lɑpʋ kɛ tɛɛsɩ tɑɑ nɑ Ɩsɔ tǝsɛɛlɛ tɑɑ.

<- Tillɑɑ Tǝmlɛ 4Tillɑɑ Tǝmlɛ 6 ->