1 Mɑ pu, ye nyɑ́ ɩlɛ tɔkɩ pɛɛlɛɛ nnɑ pǝ hʋlɑ-tʋɣʋ tɑ́ nɑ Yesu Kilisiti tɑ́ kpɛntʋɣʋ tɔɔ tɔ nɑ ń nyɔɔ toŋ. 2 Tuu n wɛ mɑ kiŋ nɑ mɑ́ sɛɣɛsǝɣɩ nti nti tɔ n nɩɩ-tɩ, nɑ yǝlɑɑ pɑɣɑlɛ nɑ́ mpʋ. Ɩlɛ kɛlɩ tǝ tǝnɑ nɑ ń hʋ́lɩ́ ɑpɑlɑɑ mpɑ n wɛnɑ nɑɑni nɑ pɑɑ pǝsɩ nɑ pɑ́ tɛlǝsɩ-tǝɣɩ pɑ lɛlɑɑ tɔ.

3 Nyɑɑ tɔɣɔ nyɑ́ kʋnyɔŋ ɩsɩɩ Yesu Kilisiti yoolu kʋpɑŋ. 4 Yʋlʋ wei ɩ wɛ yoou tɑɑ tɔ, kʋ tɔm kɛ ɩ pɑɑsǝɣǝnɑ sɩ ɩ sɔsɔ wei ɩ kpɑɣɑ-ɩ tɔ ɩ lɑŋlɛ ɩ́ hɛɛnɑ-ɩ, ɩ kɑɑ cɑɣɑ nɑ ɩ́ pɑɑsǝɣǝnɑ kpɑɩ nyǝntʋ kɛ yem. 5 Nɑ yʋlʋ lʋtʋ ɩ́ suuwɑ nɑ ɩ́ lʋkɩ nɑ ɩ́ tɑ tǝŋ ɩsǝnɑ mpi pǝ wɛɛ sɩ pɑ́ lʋ tɔ, pɑɑ ɩ huwɑ, nɔɣɔlʋ nɑ́ kɑɑ sɑmɩ-ɩ. 6 Nɑ wei ɩ kontɑ hɑŋɑsɩ kɛ tǝhɑtɛ nɑ ɩ́ lɔ tɔ, ɩnɩ ɩ lɑɑlǝɣǝnɑ ɩ hɑtǝmʋtʋ tǝŋʋɣʋ. 7 Mɑɣɑsǝɣɩ tɔm nti mɑ yɔɣɔtǝɣɩ tɔɣɔ nyɑ́ tɑɑ, Tɑcɑɑ kɑ́ hɑ-ŋ tǝ nyǝm nɑ ń cɛkǝnɑ.

8 Tɔɔsǝɣɩ Tɑfiiti lʋlʋɣʋ tɑɑ tʋ Yesu Kilisiti wei ɩ femɑ sǝtɑɑ tɑɑ tɔ ɩ tɔm. Ntǝɣɩ Lɑɑpɑɑlɩ Kʋpɑŋ wei mɑ kpɑɑlǝɣɩ tɔ ɩ hʋ́lǝ́ɣɩ́. 9 Nɑ Lɑɑpɑɑlɩ Kʋpɑŋ ɩnɩ ɩ kpɑɑlʋɣʋ tɔɔ kɛ́ mɑ tɔkɩ kʋnyɔŋ, hɑlǝnɑ pɑ́ cɑŋ nɑ pɑ́ hɔkɔ-m ɩsɩɩ ɩsɑɣɑlɑtʋ sɔsɔ nɔɣɔlʋ. Pɑɑ nɑ mpʋ tɔ pǝ tɑɣɑ Ɩsɔ Tɔm kɛ pɑ hɔkɑɑ. 10 Pǝ tɔɔ kɛ́ pɑ tʋɣʋ-m kʋnyɔmǝŋ nɑ mɑ́ sumɑ, sɩ pǝ́ wɑɑsɩ mpɑ Ɩsɔ lǝsɑɑ tɔ nɑ pǝ́ yɑ pɑ nyʋɣʋ, nɑ pɑ́ hiki teeli wei ɩɩ tɛŋ tɔɣɔ Yesu Kilisiti kiŋ. 11 Tɔm nti tǝ kɛ́ tɑmpɑnɑ tɔɣɔlɛ sɩ:

14 N tɑ nɑ nti n kɑ́ tɔɔsǝɣɩ-wɛ tɔɣɔlɛ. Heeli-wɛ nɑ ɩsǝlɛ kʋsɛɛmlɛ kɛ Ɩsɔ ɩsɛntɑɑ sɩ pɑ́ yele tɔmnɑɑ tɔɔ yoou kɛ pɑ hɛkʋ. Mpi tɔ yooŋ ɩnɩ ɩɩ wɑɑsǝɣɩ nɔɣɔlʋ. Amɑ wɑkǝlʋɣʋ tike kɛ ɩ kɔŋnɑ mpɑ pɑ cɑɣɑɑ nɑ pɑ́ nɩɩkɩ tɔ. 15 Kɑɑsɩ nyɑ́ tɩ sɩ ń lɑ nɑ Ɩsɔ tike sɑ-ŋ. Lɑ ɩsɩɩ tǝmlɛ lɑtʋ wei ɩ fɛɩ fɛɛlɛ nɑ ɩ tǝmlɛ, nɑ ɩ́ heeliɣi Ɩsɔ tɑmpɑnɑ tɔm kɛ teitei kɛ́ tǝ lonɑ tɑɑ tɔ. 16 Kisiɣi kpɑɩ fɑɑcinɑɑ mpɑ pɑɑ lɑkɩ nɑ yʋlʋ tɛ ɩ tɑɑ nɑ Ɩsɔ tɔ. Pǝ tɑɣɑ pʋlʋ, mpɑ pɑ sɔpɑ nyʋɣʋ nɑ fɑɑcinɑɑ mpɛ tɔ pɑ nɑ Ɩsɔ pɑ tɔŋnɑ hɑtǝlʋɣʋ kɛ́ nɑ pɑ́ puki. 17 Nti nti pɑ sɛɣɛsǝɣɩ tɔ tǝ wɑkǝlǝɣɩ yǝlɑɑ kɛ teitei kɛ́ ɩsɩɩ sʋʋlʋ sʋʋkʋɣʋ sǝmote tɑɑ tɔ. Fɑɑcinɑɑ mpɛ pɑ lɑtɑɑ tɑɑ wɛɣɛlɛ nɑ Himenee nɑ Filɛɛtɩ. 18 Yǝlɑɑ pɑnɛ pɑ lɔɣɔ tɑmpɑnɑ tɔm nɑ lumɑɣɑ wɑɑlɩ kɛ́, hɑlǝnɑ pɑ́ sɛɣɛsǝɣɩ sɩ tɑ́ sǝtɑɑ fem tɔm tɛmɑ tɛɛʋ. Nɑ pɑ sɛɣɛsǝŋ ɩnɛ ɩ tʋsɑ lɛlɑɑ nɑ pɑ́ yele Ɩsɔ sɛɛʋ. 19 Pɑɑ nɑ mpʋ Ɩsɔ sɩɩ kite nte tɔ tǝ sǝŋɑ ḿpʋ́ɣʋ́ tɑm kɛ́ teu kɛ́ tǝcɑ. Nɑ pǝ ŋmɑɑ tǝ tɔɔ sɩ: Tɑcɑɑ nyǝmɑ́ mpɑ pɑ kɛ́ ɩ yǝlɑɑ tɔ. Nɑ tɔtɔ sɩ: Pɑ tǝnɑ mpɑ pɑ yɑɑ pɑ tǝɣɩ Tɑcɑɑ yǝlɑɑ tɔ pǝ wɛɛ sɩ pɑɑ kisi ɩsɑɣɑtʋ lɑpʋ kɛ́.

20 Toŋtʋ tǝyɑɣɑ wɛʋ mpʋ tɔ, pǝ tɑɣɑ wontu nti pɑ lupǝnɑ wʋlɑ yɑɑ liɣitee nyǝɣǝtʋ tɔ tǝ tike kɛ pɑ lɑkǝnɑ kɑ tɑɑ. Amɑ tʋɣʋ nyǝntʋ nɑ cʋɣʋ nyǝntʋ wɛɛ tɔtɔɣɔ nɑ pɑ́ lɑkǝnɑ pǝ tǝnɑ. Pɑ sɩɩkɩ lɛntɩ kɛ́ nɑ pɑ́ lɑkǝnɑ fɛɛlɛ kʋyɑkʋ kʋyɑkʋ, ɩlɛnɑ pǝ́ kɑɑsɩ nɑ pɑ́ lɑkǝnɑ lɛntɩ kɛ pɑɑ ɩfemle nte. 21 Ḿpʋ́ɣʋ́ pǝ wɛɛ nɑ yʋlʋ, ye n kisɑ ɩsɑɣɑtʋ nti tǝ tɔm mɑ yɔɣɔtɑɑ tɔɣɔ lɑpʋ, n wɛ teitei ɩsɩɩ wontu nti pɑ sɩɩwɑ nɑ pɑ́ lǝsǝɣɩ fɛɛlɛ kʋyɑkʋ tɔɣɔ. Mpi tɔ nyɑ́ cɑɑ tǝnnɑ-ŋ, nɑ n wɑɑsǝɣɩ-ɩ kɛ́. Nɑ n mʋnɑ pɑ lɑnɑ-ŋ pɑɑ tǝmlɛ kʋpɑntɛ nte. 22 Se ɩfeputu kʋnyɩɩlǝŋ ɩsɑɣɑŋ. Lʋkɩ tɑm sɩ ń tǝŋ siɣisuɣu, nɑ ń tɛ Ɩsɔ nɑ nyɑ́ tɑɑ, nɑ ń sɔɔlǝɣɩ nyɑ́ yǝlɑɑ lɛlɑɑ, nɑ nyɑ́ nɑ mpɑ pɑ tǝŋǝɣɩ Tɑcɑɑ nɑ luɣu kʋlʋmʋɣʋ tɔ ɩ́ mɑɣɑ teu, pʋlʋ ɩ́ tɑɑ yɑsɩ-mɛ. 23 Yele hɔm kɛ kʋmɛlǝtɔmnɑɑ nɑ kpɑɩ nyǝntʋ pǝ tɔɔ. Nyɑ́ mɑɣɑmɑɣɑ n nyǝmɑ́ sɩ yoou kɛ tɔm ɩsɩɩ mpʋ tɛɛsǝɣǝnɑ. 24 Pǝyele Tɑcɑɑ tǝmlɛ tʋ nɑ́ wɛɛ tɔ pǝ fɛɩ sɩ ɩ kɑ́ wɛɛ yoolu. Amɑ ɩ kɑ́ wɛɛ wei ɩ tɔm yǝlɑɑ tǝnɑ cɑɑkɩ tɔɣɔ, nɑ ɩ kɑ́ wɛɛ wei ɩ pǝsɑ lɛlɑɑ kɛ sɛɣɛsʋɣʋ nɑ suulu hʋ́lʋ́ɣʋ́ tɔ. 25 Nɑ ɩ kɑ́ sɛɣɛsǝɣɩ mpɑ pɑɑ nɩɩkǝnɑ-ɩ tɔ tǝpɑmm tǝpɑmm. Ntɑnyɩ Ɩsɔ kɑ́ yele nɑ pɑ́ lɑɣɑsɩ nɑ pɑ́ tisi tɑmpɑnɑ. 26 Pǝlɛɣɛ pɑɑ mǝlɩ yɑɑsi kʋpɑŋ tɑɑ, nɑ pɑ́ kpɛɛ pɑ tǝɣɩ Ɩlɔɣɔʋ nyǝpɑ nyǝpǝtʋ nti nɑ ɩ́ kpɑ-wɛ nɑ ɩ́ ŋmɑkǝlǝɣɩ-wɛ nɑ pɑ́ lɑkɩ ɩ luɣu nyǝntʋ tɔ tǝ tɑɑ.

<- Timotee II 1Timotee II 3 ->