1 Pǝlɛ pǝ wɑɑlɩ kɛ́ Apǝsɑlɔm hikɑ yoou kɛɛkɛ nɑ kpɑɣɑnǝŋ nɑ tɑŋlɑɑ kɛ nɩɩlɛ nɑ nɑɑnʋwɑ (50). 2 Tɑnɑŋ tɑnɑŋ kɛ Apǝsɑlɔm lɩɩkɑɣɑ lɔŋ nɑ ɩ́ puki ɩcɑtɛ nɔnɔɣɔ sɔsɑɣɑ mpɑɑʋ kpeeŋɑ, ye nɔɣɔlʋ hikɑ tɔm sɩ ɩ puki wulɑʋ tɛɣɛ hʋʋlɛ, ɩlɛ ɩ yɑɑ-ɩ nɑ ɩ́ pɔɔsɩ-ɩ sɩ: Ɩcɑtɛ nteɣe n lɩɩnɑ? Ye ɩ́lɛ́ ɩ cɔ-ɩ sɩ: Mɑ kɛ́ Ɩsɛɣɛlɩ kpekǝle tǝnɛ tǝ tʋ 3 ɩlɛ ɩ tɔmɩ-ɩ sɩ: Nyǝnɩ, n wɛnɑ tɑmpɑnɑ kɛ́. Pǝ́cɔ́ ye n polɑ wulɑʋ tɛ nɔɣɔlʋ kɑɑ pɑɑsǝnɑ-ŋ.

4 Kɑsɑ, ye mɑɑ kɛnɑ hʋʋlʋ ntɔ, mɑ kiŋ ntɛ́ tɔm nyǝ́mɑ kɑ kɔŋɑɣɑ nɑ mɑ tɑɣɑnǝɣɩ pɑ tɔmnɑɑ.

5 Ye yʋlʋ ɩ́ kpǝtǝɣǝnɑ-ɩ sɩ ɩ hǝntǝɣɩ ɑtɛ ɩlɛ ɩ kpipi-ɩ nɑ ɩ́ wɑɣɑlɩ-ɩ.

6 Ḿpʋ́ɣʋ́ Apǝsɑlɔm lɑkɑɣɑ Ɩsɛɣɛlɩ nyǝ́mɑ tǝnɑ mpɑ pɑ pukɑɣɑnɑ tɔmnɑɑ kɛ wulɑʋ tɛ tɔ. Nɑ Ɩsɛɣɛlɩ nyǝ́mɑ lɑŋɑ hɛɛkɑɣɑnɑ-ɩ kɛ́.

7 Pǝnɑɣɑ liɣiti nyǝŋkɑ tɑɑ kɛ́ Apǝsɑlɔm tɔmɑ wulɑʋ sɩ: Tɑcɑɑ, yele nɑ mɑ́ polo Hepǝlɔŋ nɑ mɑ́ lɑ́ kɔtɑɣɑ ŋkɑ mɑɑ sɩɩ Tɑcɑɑ kɛ nɔɣɔ sɩ mɑɑ lɑpɩ-ɩ tɔ. 8 Mpi tɔ, wɑɑtʋ wei mɑɑ wɛ Kesuu tɔɣɔ mɑ sɩɩ Tɑcɑɑ kɛ nɔɣɔ sɩ ye ɩ yelɑɑ nɑ mɑ́ mǝlɩ Yosɑlɛm, ɩnǝɣɩ mɑɑ lɑ tǝmlɛ. 9 Ntɛnɑ wulɑʋ sɩ: Polo.

Ɩlɛnɑ Apǝsɑlɔm kʋlɩ nɑ ɩ́ tɛɛ Hepǝlɔŋ. 10 Mpʋɣʋlɛ Apǝsɑlɔm tilɑ tillɑɑ kɛ mukɑɣɑ kɛ Ɩsɛɣɛlɩ tɛtʋ tǝnɑ tɑɑ sɩ ye pɑ nɩɩ tutuɣu ɩlɛ pɑ yɔɣɔtɩ sɩ: Apǝsɑlɔm kɛlɛ wulɑʋ nɑ ɩ́ wɛ Hepǝlɔŋ. 11 Yosɑlɛm nyǝ́mɑ kɑ sɩɩ-ɩ yǝlɑɑ ŋmʋnʋɣʋ (200) pɛlɛ pɑ nɩɩnɑ-ɩ teu kɛ́, pɑ tɑ cɛkǝnɑ nti ɩ hɔkɑɑ tɔ.

12 Wɑɑtʋ wei Apǝsɑlɔm lɑkɑɣɑ kɔtɑsɩ, ɩlɛnɑ ɩ́ tili nɑ pɑ́ yɑɑ Kilo tʋ Ahitofɛlɩ wei ɩ kɑ kɛ́ Tɑfiiti sɔpɑɑpɩ tɔ. Ḿpʋ́ɣʋ́ sɑmɑɑ hukɑ sɔsɔm kɛ ɩ kiŋ nɑ pɑ́ tɔŋnɑ wulɑʋ ɑcɑɣɑ kɛ cɑɣɑʋ.

13 Ḿpʋ́ɣʋ́ nɔɣɔlʋ kɔmɑ nɑ ɩ́ cɩ Tɑfiiti kɛ sǝkpɑlʋɣʋ sɩ: Ɩsɛɣɛlɩ yǝlɑɑ kɛɛsɑ ɩsɛ nɑ Apǝsɑlɔm tɔɔ. 14 Ɩlɛnɑ Tɑfiiti yɔɣɔtɩ ɩ wɑɑlɩ nyǝ́mɑ tǝnɑ mpɑ pɑɑ wɛ ɩ kiŋ kɛ Yosɑlɛm tɔ sɩ: Ɩ́ kʋlɩ nɑ tǝ́ se, tɔfɔ Apǝsɑlɔm ɩɩ yeki-tʋ. Ɩ́ lɑ tǝcɑʋ, ye pǝ tɑɣɑ mpʋ ɩ kɑ́ tuti-tʋ nɑ ɩ́ kʋ ɩcɑtɛ nyǝ́mɑ tǝnɑ. 15 Ntɛnɑ wulɑʋ wɑɑlɩ nyǝ́mɑ tɔ sɩ: Ɛɛ, Tɑcɑɑ tɩɩ lɑ tǝ tǝnɑ nti n heeliɣi-tʋ tɔ.

16 Ḿpʋ́ɣʋ́ wulɑʋ nɑ ɩ tǝyɑɣɑ nyǝ́mɑ tǝnɑ pɑ lɩɩwɑ, nɑ ɩ́ kɑɑsɩ ɑlɑɑ nɑɑnʋwɑ sɩ pɛlɛ pɑ́ tɑŋ tǝyɑɣɑ.

17 Wulɑʋ lɩɩ mpʋ ɩlɛnɑ ɩ yǝlɑɑ tǝnɑ tʋ ɩ wɑɑlɩ nɑ pɑ́ sǝŋ tǝyɑɣɑ kɑntǝkɑɣɑ nyǝŋkɑ kiŋ. 18 Ḿpʋ́ɣʋ́ ɩ tǝmlɛ nyǝ́mɑ tǝnɑ nɑ ɩ tɑŋlɑɑ tǝnɑ tʋ-ɩ hɛkʋ, nɑ Kɑtɩ yoolɑɑ nɑ́ɑ́ kɔɔ yǝlɑɑ nɑsǝtoso (600) nɑ pɑ́ tɛɛ-ɩ nɔɣɔ. 19 Ḿpʋ́ɣʋ́ wulɑʋ pɔɔsɑ Kɑtɩ yoolɑɑ nyʋɣʋ tʋ Ɩtɑyi sɩ: Pepe tɔɔ kɛ́ mǝ kɔmɑ tɑ kiŋ tɔtɔ? Ɩ mǝlɩ Apǝsɑlɔm cɔlɔ. Mpi tɔ, mǝ kɛ́ cɔɔsǝlɑɑ kɛ́ ɩ tɑ kɛ́ tɛtʋ nyǝ́mɑ. 20 Anɩ nɔɔnɔɔ kɛlɛ ɩ tɑpɑ, ɩlɛnɑ mɑ́ɑ́ kpɑkǝɣɩ-mɛɣɛ kpɑkpɑɑ nɑ mɑ́ cɔɔkǝnɑ. Pǝ́cɔ́ mɑ mɑɣɑmɑɣɑ mɑ tɑ nyɩ mɑ tǝpote. Mpʋ tɔ, ɩ́ mǝlɩ. Tɑcɑɑ ɩ́ pɑɑsǝnɑ-mɛ nɑ ɩ́ lɑ-mɛɣɛ kʋpɑntʋ.

21 Tǝnɑɣɑlɛ Ɩtɑyi cɔ wulɑʋ sɩ: Mɑ tuunɑ Ɩsɔ nɑ nyɑ́ sɩ: Timpi n kɑ polo tɔ tǝnɑɣɑ tɩɩ polo, pɑɑ sǝm mɑɣɑmɑɣɑ tɩɩ sɩ. 22 Ntɛnɑ wulɑʋ tɔ Ɩtɑyi sɩ: Ye mpʋ tɛɛ nɔɣɔ.

Ɩlɛnɑ Ɩtɑyi nɑ ɩ yǝlɑɑ tǝnɑ nɑ ɩ piyɑ tǝnɑ pɑ́ tɛɛ nɔɣɔ. 23 Ḿpʋ́ɣʋ́ wulɑʋ nɑ ɩ yǝlɑɑ pɑ tʋ mpɑɑʋ nɑ pɑ́ tɛɛkɩ. Ye ɩ tɑlɑ ɩcɑtɛ nte, tǝlɛ tǝ yǝlɑɑ pǝlɩ ɩsǝlʋm nɑ pɑ́ mɑkɩ kɑpusi. Ɩlɛnɑ wulɑʋ nɑ́ɑ́ tɛɛ Setǝlɔŋ lɔɔʋ nɑ ɩ yǝlɑɑ nɑ́ɑ́ tǝŋnɑ wʋlɑɣɑ tɛtʋ tɔɔ tɔɔ. 24 Kɔtʋlʋ Sɑtɔkɩ nɑ Lefii nyǝ́mɑ mpɑ pɑ sǝɣǝlɑɣɑ Ɩsɔ ɑtɑkɑɑ tɔ pɑɑ wɛ tǝnɛ ɩnɩ tɔtɔ. Ḿpʋ́ɣʋ́ pɑ sɩɩ Ɩsɔ ɑtɑkɑɑ nɑ Apiyɑtɑɑ sǝŋɑɑ nɑ yǝlɑɑ tɔŋɑ lɩɩʋ kɛ ɩcɑtɛ tɑɑ. 25 Ɩlɛnɑ wulɑʋ tɔ Sɑtɔkɩ sɩ: Mǝŋnɑ Ɩsɔ ɑtɑkɑɑ kɛ ɩcɑtɛ tɑɑ. Ye Tɑcɑɑ kɑ́ hʋlɩ-m suulu, ɩ kɑ́ mǝlǝnɑ-m nɑ mɑɑ tɑsɑ-ɩ nɑʋ kɛ ɩ lonte tɑɑ. 26 Amɑ ye ɩ kɑ tɔ sɩ: Aɑɩ, mɑɑ cɑɑkɩ-ŋ, ɩlɛ ɩ́ lɑ-m ɩsǝnɑ ɩ cɑɑkɩ tɔ.

27 Ḿpʋ́ɣʋ́ wulɑʋ tɑsɑ Sɑtɔkɩ kɛ heeluɣu sɩ: Nyɑnɑ nyɑ́ pǝyɑlʋ Ahimɑɑsɩ nɑ Apiyɑtɑɑ pǝyɑlʋ Yonɑtɑŋ ɩ́ mǝlǝnɑ lɑŋhʋlʋmlɛ kɛ ɩcɑtɛ tɑɑ nɑ ɩ́ feŋiɣi. 28 Tɩɩ tɑŋ wʋlɑɣɑ tɛtʋ pɔɣɔ tǝtɛsǝlɛnɑɑ, nɑ mɑ́ nɩɩ ɩcɑtɛ ɑlɑɑfǝyɑ tɔm.

29 Ḿpʋ́ɣʋ́ Sɑtɔkɩ nɑ Apiyɑtɑɑ pɑ mǝlǝnɑ Ɩsɔ ɑtɑkɑɑ kɛ Yosɑlɛm nɑ pɑ́ cɑɣɑ tǝnɑ.

30 Ḿpʋ́ɣʋ́ Tɑfiiti tɑkɑ ɩ ɩsɛntɔɔ kɛ sɑɑlɑɣɑ nɑ ɩ́ wiiki nɑ ɩ́ kpɑɑkɩ Olifinɑɑ pulɑɣɑ tɔɔ kɛ́ nɔɔhɛɛ kpɛtɛ. Nɑ ɩ wɑɑlɩ nyǝ́mɑ nɑ́ɑ́ tɑkɩ pɛlɛ pɑ ɩsɛntɔɔ nɑ pɑ́ wiiki mpʋ tɔtɔ. 31 Ɩlɛnɑ pɑ́ kɔɔ pɑ́ heeli wulɑʋ sɩ Ahitofɛlɩ tǝŋɑ Apǝsɑlɔm. Ntɛnɑ Tɑfiiti sɩ: Hɑɩ, Tɑcɑɑ, wɑkǝlɩ Ahitofɛlɩ lɑɣɑtʋ.

32 Wɑɑtʋ wei Tɑfiiti tɑlɑ pulɑɣɑ nyʋɣʋ tɑɑ timpi pɑ sɛɛkɩ Ɩsɔ tɔ, ɩlɛ ɩ tɑɑpɑlʋ nɑ ɩ lɑɣɑtʋ tɑsʋlʋ Akii tʋ Husɑyi kɔmɑɣɑlɛ nɑ lɑŋwɑkǝllɛ nɑ ɩ cɑpɑ cǝlɑɑ nɑ ɩ nyʋɣʋ nɑ tɛtʋ. 33 Ntɛnɑ Tɑfiiti sɩ: Ye n tǝŋǝɣɩ-m pǝ kɑɑ wɑɑsɩ-m. 34 Mǝlɩ ɩcɑtɛ tɑɑ nɑ ń heeli Apǝsɑlɔm sɩ n kɑ kɛ́ mɑ tǝmlɛ tʋ kɛ lɔŋ kɛ́, ɩlɛ nɔɔnɔɔ n cɑɑ sɩ ń nyǝnǝɣɩ ɩnǝɣɩ nyɑ́ cɑɑ. Wɑɑtʋ ɩnǝɣɩ n kɑ wɑkǝlɩ lɑɣɑtʋ nti Ahitofɛlɩ tɑsǝɣɩ-ɩ tɔ. 35 Pǝlɛ pǝ pɑɑsi kɔtǝlɑɑ Sɑtɔkɩ nɑ Apiyɑtɑɑ pɑ wɛ tǝnɑɣɑ. Ye n nɩɩ ntiɣi Apǝsɑlɔm pɑ tɔɔ n polo ń heeli-wɛ. 36 Pɑ pǝyɑlɑɑ Ahimɑɑsɩ nɑ Yonɑtɑŋ pɑ wɛ tǝnɑɣɑ, n kɑ tili-wɛ nɑ pɑ́ kɔɔ pɑ heeli-m.

37 Ḿpʋ́ɣʋ́ Tɑfiiti tɑɑpɑlʋ Husɑyi mǝlɑ ɩcɑtɛ tɑɑ kɛ́ wɑɑtʋ wei Apǝsɑlɔm kɔmɑ tɔ.

<- Sɑmiyɛɛlɩ II 14Sɑmiyɛɛlɩ II 16 ->