Awulɑɑ II 19

Wulɑʋ tilɑ Ɩsɔ kʋyɔɣɔtʋtʋ tɛlǝsʋlʋ kiŋ

(Ɩsɑyii 37:1-7)

1 Ḿpʋ́ɣʋ́ wɑɑtʋ wei Ɩsekiyɑsɩ nɩɩ tɔm ntɩ, ɩlɛnɑ ɩ́ cǝlɩ ɩ wontu tɔtɔ nɑ lɑŋwɑkǝllɛ. Nɑ ɩ́ suu lǝyɑɣɑ nyǝntʋ, ɩsɩɩ fɔlǝtɔnɑɑ tɑkɑ, nɑ ɩ́ polo Ɩsɔ tǝsɛɛlɛ tɑɑ. 2 Tǝnɑɣɑ ɩ kʋsɑ Ɩliyɑkim, nɑ Sepǝnɑ, nɑ kɔtǝlɑɑ tɑɑ sɔsɑɑ sɩ pɑ́ polo Amɔtɩ pǝyɑlʋ Ɩsɔ kʋyɔɣɔtʋtʋ tɛlǝsʋlʋ Ɩsɑyii tɛ, nɑ pɑ lǝyɑɣɑ wontu kɛ mpʋ. 3 Nɑ pɑ́ heeli-ɩ sɩ: Wulɑʋ Ɩsekiyɑsɩ kʋsǝnɑ-tʋ sɩ tǝ́ kɔɔ sɩ, sɑŋɑ pǝ hɔmɑ ɩnɩ ɩ ŋkpɑŋʋɣʋ, nɑ tɑ lɑŋɑ wɑkǝlɩ tǝtɔɣɔtɔɣɔ. Tǝ wɛɛ kɛ ɩsɩɩ lʋlʋɣʋ tɑkʋɣʋ ɑlɑɑ sɩ pɑ lʋlɩ, ɩlɛ tomɑ fɛɩ sɩ pɑ lʋlʋnɑ pɑ piyɑ tɔ. 4 Asilii wulɑʋ kʋsǝnɑ ntɛɣɛ ɩ yoolɑɑ pɑɑsǝnlʋ sɩ ɩ́ kɔɔ nɑ ɩ́ tʋʋ Ɩsɔ weesuɣu tʋ. Hɑɩ, ye Tɑcɑɑ, nyɑ́ Ɩsɔ kɑ́ nɩɩ ɩ kʋtʋɣʋ ŋkʋ, nɑ ɩ́ hɔ ɩ ŋkpɑŋʋɣʋ. Nyɑɑ sǝlǝmɩ-ɩ ɩ yǝlɑɑ mpɑ pɑ kɑɑsɑɑ tɔ pɑ tɔɔ.

5 Wɑɑtʋ wei Ɩsekiyɑsɩ tillɑɑ heelɑ Ɩsɑyii kɛ mpʋ, 6 ɩlɛnɑ Ɩsɑyii cɔ-wɛ sɩ: Ɩ́ polo nɑ ɩ́ heeli mǝ cɑɑ sɩ, Tɑcɑɑ yɔɣɔtɑɑ sɩ nyɑ́ lɑŋlɛ ɩ tɑɑ ŋmɑɑnɑ kʋtʋɣʋ ŋku Asilii wulɑʋ wɑɑlɩ nyǝ́mɑ tʋʋ-m tɔ. 7 Mɑɑ yele nɑ pɑ́ yɑɑ-ɩ nɑ tɔm nɑtǝlɩ, nɑ ɩ́ kpe. Ɩlɛnɑ nɔɣɔlʋ kʋ-ɩ.

Senɑkelipi nyɑɑsʋɣʋ lɛmpɩ

(Ɩsɑyii 37:8-13; Kʋtɔɔsʋtʋ II 32:17)

8 Ḿpʋ́ɣʋ́ Asilii yoolɑɑ pɑɑsǝnlʋ nɩɩwɑ sɩ ɩ cɑɑ kʋlɑ Lɑkisi nɑ ɩ́ polo ɩ́ nyɑlɑ Lipinɑ. Ɩlɛnɑ ɩ́ polo ɩ kiŋ kɛ tǝnɑ. 9 Tǝnɑɣɑ pɑ heelɑ Asilii wulɑʋ sɩ Ɩtiyopii wulɑʋ Tilɑkɑ polɑ-ɩ yoonɑʋ. Ntɛnɑ Asilii wulɑʋ tilinɑ Ɩsekiyɑsɩ kɛ lɛɛtǝlɩ sɩ pɑ́ pɔɔsɩ-ɩ sɩ: 10 N tɑɑkɩ Ɩsɔ sɩ ɩ kɑ́ kɑɣɑtɩ-m Yosɑlɛm tǝlɛɛkǝlɛ yɑɑ? N kɑ́ tʋsɩ nyɑ́ tɩ yoo. 11 Anɩ n nɩɩwɑ teu kɛ ɩsǝnɑ mɑ kpiisɑ tɛtʋnɑɑ tɔ. Ɩlɛnɑ ń hʋʋkɩ sɩ n kɑ́ tʋlɩ-tɩ? 12 Awulɑɑ mpɑ pɑ kɑɑsɑ-m tɔ, wɑɑtʋ wei pɛlɛ pɑ kʋkɑɣɑ Kosɑŋ, nɑ Hɑlɑŋ, nɑ Lesɛfɩ, nɑ Ɩteni nyǝ́mɑ ɩcɑtɛ sɔsɔɔlɛ Telɑsɑɑ tɔ, mpɛ ɩnɩ pɑ tɩɩŋ tɑ pǝsɩ nɑ ɩ́ kenti pɑ ɑcɑlɛɛ. 13 Tɔɔsɩ mpi pǝ mɑɣɑnɑ Hɑmɑtɩ, nɑ Aɑpɑtɩ, nɑ Lɑyii, nɑ Sefɑfɑyim, nɑ Henɑ, nɑ Afɑ ɑwulɑɑ tɔ.

Ɩsekiyɑsɩ Ɩsɔ sǝlǝmʋɣʋ

(Ɩsɑyii 37:14-20)

14 Wɑɑtʋ wei Ɩsekiyɑsɩ tɛmɑ Asilii wulɑʋ lɛɛtǝlɩ ɩnǝɣɩ kɑlʋɣʋ, ɩlɛnɑ ɩ́ ponɑ-ɩ Ɩsɔ tǝsɛɛlɛ tɑɑ, nɑ ɩ́ hʋlɩ-ɩ Tɑcɑɑ. 15 Ɩlɛnɑ ɩ́ sǝlǝmɩ Ɩsɔ sɩ: Hɑɩ, Ɩsɛɣɛlɩ Ɩsɔ Tɑcɑɑ, wei nyɑ́ n cɑɣɑ ɩsɔtɑɑ tɑŋlɑɑ kɛ kpɑɣɑnʋ tɔ, nyɑ́ tike ntɛ́ Ɩsɔ kɛ́ ɑntulinyɑ tǝnɑ tɑɑ. Nyɑ́ lɑpǝnɑ ɩsɔtɑɑ nɑ ɑtɛ. 16 Hɑɩ, Tɑcɑɑ, ke ŋkpɑŋŋ nɑ ń nɩɩ nɑ ń pɑɑsǝnɑ kʋtʋɣʋ ŋku Senɑkelipi tillɑɑ tʋʋ weesuɣu tʋ nyɑ́ tɔ. 17 Tɑmpɑnɑ Asilii ɑwulɑɑ kʋwɑ piitim lɛmpɩ, nɑ pɑ́ kpiisi pɑ tɛtʋ tǝnɑ, 18 nɑ pɑ́ wɔ pɑ tɩɩŋ kɛ kɔkɔ. Mpi tɔ, tɑɑsɩ yɑɑ pɛɛ kɛ yǝlɑɑ kɑ sɑɑkɑ kʋsɑɑkʋ pǝ tɑɣɑ Ɩsɔ nyɑ́. 19 Ɩlɛ hɑɩ, Tɑcɑɑ, tɑ Ɩsɔ wɑɑsɩ-tʋɣʋ Senɑkelipi niŋ tɑɑ. Ɩlɛnɑ ɑntulinyɑ ɑwulɑɑ tǝnɑ nyɩ sɩ nyɑ́ tike ntɛ́ Ɩsɔ.

Ɩsɑyii tɛlǝsǝɣɩ wulɑʋ kɛ Tɑcɑɑ tɔm

(Ɩsɑyii 37:21-35)

20 Ḿpʋ́ɣʋ́ Ɩsɑyii polɑɑ nɑ ɩ́ tɛlǝsɩ Ɩsekiyɑsɩ sɩ: Ɩsɛɣɛlɩ Ɩsɔ Tɑcɑɑ sɩ, mɑ nɩɩwɑ sǝlǝmʋɣʋ ŋku n sǝlǝmɑ-m Asilii wulɑʋ Senɑkelipi tɔm tɑɑ tɔ. 21 Ɩlɛ tʋ ŋkpɑŋŋ nɑ ń nɩɩ:

Yosɑlɛm ɩcɑtɛ kpɛɛnɑ-ŋ kɛ́,

nɑ tǝ́ pɑɑkǝnɑ-ŋ.

22 Hɑlɩ Ɩsɛɣɛlɩ Ɩsɔ Nɑŋŋtʋ mɑɣɑlɛ

n kpesinɑɑ, nɑ n tʋʋ

nɑ n toosi ɩsɛ nɑ?

23 N tilɑ tillɑɑ

nɑ pɑ́ tʋʋ Tɑcɑɑ mɑ́.

Hɑlɩ n tɔ sɩ nyɑ́ yoou kɛɛkɛnɑɑ

tuutuumɑ tɔɔ kɛ́ n kpɑwɑ Lipɑŋ pʋɣʋ,

nɑ ń sɛtɩ Lipɑŋ tɩɩŋ sɔsɔɔŋ kʋpɑŋ.

Aɑɩyee sɩ, n kɑ́ kpɑ comcom nɔɣɔ tɑɑ

kɛ hɔtʋɣʋ kʋpɑŋkʋ tɑɑ.

24 Nyɑ́ sɩ n hulɑ lɔkɔ, pǝ́cɔ́ n nyɔɔ lɛlɑɑ lʋm.

Nyɑ́ yoolɑɑ kɑ́ fɛlɩ Icipiti tɛtʋ tɔɔ kɛ́

nɔɔhɛɛ nɑ pɑ pusi nyɔɔ.

25 Senɑkelipi, n tɑ nyɩ tɑɑ sɩ

mɑ́ lɑpǝnɑ yɑɑsinɑɑ pɑnɛ nɑ mɑ́ sɩɩ too lɔŋ.

Ɩlɛnɑ mɑ́ tǝŋǝɣɩ nɑ mɑ́ lɑkɩ nɔɔnɔɔ.

Mɑ́ tʋnɑ-ŋ sɩ ń lɑ nɑ koloosi ɑcɑlɛɛ pǝsɩ ncɑɑ.

26 Sɔɣɔntʋ pɩɩ ɑ tɑɑ yǝlɑɑ,

nɑ pɑ́ pǝsɩ ɩsɩɩ ŋkpɑlǝtitilee nyǝ́mɑ.

Pɑ nǝɣǝsǝnɑ kɛ́ ɩsɩɩ tɑwɑ nyɩɩtʋ,

ɩsɩɩ tɛtɛkɑ tɑɑ nyɩɩtʋ kʋlɛkǝlɛkǝtʋ.

Yɑɑ kutuluŋ tɔɔ nyɩɩtʋ nti tǝ wʋlǝɣɩ

nɑ tǝ́ tɑ tɛntɑ nyɔʋ tɔ.

27 Ɩlɛ mɑ nyǝmɑ-ŋ kɛ́ tǝyelele.

Ye n cɑɣɑɑ, yɑɑ n lɩɩkɩ, yɑɑ n sʋʋkɩ, mɑ nyǝmɑ́.

Ye n mʋ-m nɑ pɑ́ɑ́nɑ́ mɑ nyǝmɑɣɑ.

28 N tɩɩ mʋ-m nɑ pɑ́ɑ́nɑ́ ntɔ,

nɑ ń lɑkɩ-m nɑ kɑlɑmpɑɑnɩ.

Pǝ tɔɔ kɛ́ mɑɑ ŋmɑkǝlɩ-ŋ ɩsɩɩ

pɑ tʋkʋɣʋ wontuɣu mɩɩnɑ tɛɛ kɛ́

kukuule, yɑɑ kpɑɣɑnʋkpɑsɩ tɔ.

Mpɑɑʋ ŋku n tǝŋɑɑ nɑ n kɔɔ tɔɣɔ

mɑɑ kpeenɑnɑ-ŋ.

29 Ɩsekiyɑsɩ, mɑɑ heeli nyɑɣɑ mpi mɑɑ lɑ tɔ. Tɔɣɔnɑɣɑ pee ɑlɛɛlɑ kɛ ɩ́ kɑ́ tɔɣɔ pǝntɔ nɑ pǝnte. Amɑ pǝnɑɣɑ tooso nyǝŋkɑ tɑɑ kɛ́ ɩ́ kɑ́ pǝsɩ nɑ ɩ́ tuu tɔɣɔnɑɣɑ nɑ ɩ́ kʋ́-kɛ́. Nɑ ɩ́ hɑlɑ mǝ lɛsɛŋnɑɑ, nɑ ɩ́ kooli-wɛ. 30 Pɩɩ kɑɑsɩ mpɑ nɑ pɑ ɩsɛ kɛ Yutɑ tɑɑ tɔ, pɛlɛ pɑɑ wɛɛ kɛ́ ɩsɩɩ tʋɣʋ kɑŋʋɣʋ kʋ lilɑ kɛ tɛtʋ tɑɑ nɑ kʋ́ lʋlǝɣɩ teu tɔ. 31 Pɔpɔtʋ fɛɩ leleŋ, pɩɩ kɑɑsɩ Yosɑlɛm tɑɑ kɛ́ ɩsɛ nyǝ́mɑ.

Ḿpʋ́ɣʋ́ Ɩsɑyii tɑsɑɑ sɩ: Ɩsǝnɑ Tɑcɑɑ kɑ́ lɑnɑ ɩ sɔɔlʋɣʋ sɔsɔɔŋkʋ tɔɣɔlɛ. 32 Tɑcɑɑ sɩ, Asilii wulɑʋ kɑɑ pǝsɩ nɑ ɩ́ lo hɑpǝlɛ, nɑ ɩ́ sǝŋ tǝ tɔɔ nɑ ɩ́ kenti ɩ kpɑlʋɣʋ, nɑ ɩ́ tɔ́ nyǝ́mɑ́ kɛ ɩcɑtɛ tɑɑ, nɑ ɩ́ sʋʋ tǝ tɑɑ. 33 Tɑcɑɑ mɑ́, mɑ yɔɣɔtǝɣǝnɑ sɩ ye ɩ tǝŋɑ mpɑɑʋ ŋku nɑ ɩ kɔɔ cǝnɛ, ŋkʋɣʋ ɩ kɑ tǝŋ nɑ ɩ́ kpe, ɩ kɑɑ sʋʋ cǝnɛ. 34 Mɑɑ kenti Yosɑlɛm tɔɔ, nɑ mɑ́ wɑɑsɩ-ɩ mɑ tǝmlɛ tʋ Tɑfiiti tɔɔ, nɑ pǝ́ kʋsɩ mɑ nyʋɣʋ.

Asilii yoolɑɑ sewɑ, Senɑkelipi sǝm

(Ɩsɑyii 37:36-38; Kʋtɔɔsʋtʋ II 32:21-22)

35 Ahoo yuwɑ, ɩlɛnɑ Ɩsɔ ɩsɔtɑɑ tillu tii Asilii yoolɑɑ tǝsikile, nɑ ɩ́ kʋ́ yoolɑɑ iyisi nɩɩnʋwɑ nɑ nɩɩnɑɑsɑ nɑ kɑkpɑsɩ (185000). Tɛʋ femɑ, ɩlɛnɑ ɩsɛ nyǝ́mɑ mɑɣɑnɑ sǝtɑɑ sɛlǝtɑɑ. 36 Ḿpʋ́ɣʋ́ Senɑkelipi kpɛsɑ tǝsikile, nɑ ɩ́ polo ɩcɑtɛ sɔsɔɔlɛ Ninifi tɑɑ, nɑ ɩ́ cɑɣɑ tǝnɑ. 37 Ɩlɛnɑ kʋyɑkʋ nɑkʋlɩ, ɩ́ sʋʋ ɩ tʋɣʋ Nisǝlɔkɩ kutuluɣu tɑɑ kɛ lɑɑtʋ, nɑ ɩ pǝyɑlɑɑ tɑɑ nɑɑlɛ, Atǝlɑmelɛkɩ nɑ Sɑlǝsɛɛ pɑ kʋ-ɩ. Ɩlɛnɑ pɑ́ se nɑ pɑ polo Alɑlɑɑ tɛtʋ tɑɑ. Ɩlɛnɑ ɩ piyɑ tɑɑ lɛŋkɑ Asɑhɑtɔŋ lɛɛtɩ ɩ lonte.

<- Awulɑɑ II 18 Awulɑɑ II 20 ->