1 Tɔm tooso nyǝm ntɛ́ mɑ cɑɑ kɔntɛ kɛ mǝ tɛ tɔ. Aseetɑ nyǝ́mɑ nɑɑlɛ yɑɑ tooso kɑ́ hʋlǝnɑ tɔmnɑɑ tǝnɑ mpɑ pɑ wɛɛ tɔ pɑ tɑmpɑnɑ nɑ pǝ́cɔ́. Pɑ ŋmɑɑ ḿpʋ́ɣʋ́ Ɩsɔ Tɔm tɑɑ kɛ́. 2 Mɑ kpɑɑlǝɣɩ tuu mpɑ pɑɑ lɑpɑ ɩsɑɣɑtʋ tɔ nɑ lɛlɑɑ sɩ ye mɑ kɔmɑ nɑ mɑ́ kɔɔ sɩ mɑ nɑɑ-mɛ, mɑ kɑɑ wii nɔɣɔlʋ pǝtɔɔtǝlɛ. Mɑɑ kɔmɑ tɔm nɑɑlɛ nyǝm tɔ mɑ tɛmɑ-mɛɣɛ kpɑɑlʋɣʋ kɛ mpʋ. Pǝnɛntɛ mɑ fɛɩ mǝ kiŋ ɩlɛ mɑ tɑsǝɣɩ-mɛɣɛ kpɑɑlʋɣʋ. 3 Ntɔŋ ɩ́ cɑɑ ɩ́ nɑ́ sɩ Kilisiti toŋ kɛ mɑ yɔɣɔtǝɣǝnɑ yɑɑ pǝ tɑɣɑ Kilisiti toŋ yɑɑ? Ɩ́ kɑ́ nɑ́ mɛɛ. Kilisiti ɩɩ hʋ́lǝ́ɣɩ́ ɩcɑntʋ nɑtǝlǝɣɩ mǝ tɔm tɑɑ se. Amɑ tomɑ kɛ ɩ hʋ́lǝ́ɣɩ́ mǝ hɛkʋ. 4 Pɑɑ nɑ mpʋ ɩ ɩcɑntʋ tɔɔ kɛ́ pɑ kɑmɑ-ɩ sǝm tesikɑ tɔɔ. Amɑ ɩ wɛnɑ ɩ weesuɣu kɛ Ɩsɔ tomɑ tɑɑ. Tɑ́ nɑ-ɩ tǝ kpɛntɑɑ kɛ́, nɑ tǝ kɛ́ ɑcɑmɑɑ tɔtɔɣɔ. Amɑ yɑɑsi wei tǝ lɑkǝnɑ mǝ kiŋ tɔ pǝ hʋ́lǝ́ɣɩ́ kɛ́ sɩ tɑ́ nɑ-ɩ tǝ wɛnɑ weesuɣu kɛ Ɩsɔ tomɑ tɔɔ.

5 Ɩ́ mɑɣɑsɩ mǝ mɑɣɑmɑɣɑ mǝ tɩ nɑ ɩ́ feŋ mǝ tɩ nɑ ɩ́ nɑ́ sɩ ɩ́ tɔkɑ Ɩsɔsɛɛlɛ mpɑɑʋ yɑɑ ɩ́ tɑ́ tɔkɩ. Ntɔŋ ɩ́ nyǝmɑ́ teu sɩ Kilisiti wɛ mǝ kiŋ nɑ? Tɔʋ, ɩ́ tɛmnɑ Ɩsɔ nɑ mǝ tɑɑ tɔ, ye ɩ́ pǝsɑɑ nɑ ɩ́ hʋ́lɩ́ tɑmpɑnɑ kɛ mpʋ ɩlɛ, mpʋɣʋlɛ. 6 Mɑ hʋʋ sɩ ɩ́ nyǝmɑ́ teu sɩ tɑ́ kiŋ, tǝ pǝsǝɣɩ nɑ tǝ́ hʋ́lɩ́ mpʋ mɛɛ. 7 Ɩsɔ kɛ́ tǝ sǝlǝmǝɣɩ sɩ ɩ́ yele nɑ ɩ́ tɑɑ lɑ kɑwɑlɑɣɑ nɑkǝlɩ. Tɩɩ cɑɑ sɩ tǝ́ hʋ́lɩ́ tǝnɛ tǝ tɑɑ kɛ́ mpi tǝ pǝsǝɣɩ tɔ, pɑɑ pɩɩ lɩɩ sɩ pǝsʋɣʋ kɛ tɩɩ pǝsǝɣɩ, kʋpɑntʋ kɛ tǝ cɑɑ mɩɩ lɑkɩ. 8 Pǝ tɑɣɑ pʋlʋ tɔɔ, tǝ kɑɑ pǝsɩ nɑ tǝ́ lɩɩ Ɩsɔ tɑmpɑnɑ wɑɑlɩ. Ɩsɔ tɑmpɑnɑ ɑnǝɣɩ tɩɩ lɑnɑ. 9 Tɑ́ kɛʋ ɑcɑmɑɑ nɑ mɩɩ kɛ́ toŋtʋnɑɑ tɔ, tɑ́ lɑŋɑ hʋlʋmɑɑ kɛ́. Pǝ tɔɔ tɔtɔɣɔ tǝ sǝlǝmǝɣɩ sɩ ɩ́ lɑ kʋpɑntʋ kɛ teu. 10 Mpi pǝ tɔɔ mɑ wɛ-mɛ nɑ pooluŋ nɑ mɑ ŋmɑɑ-mɛɣɛ tɑkǝlɑɣɑ tɔɣɔlɛ sɩ wɑɑtʋ wei mɑɑ kɔɔ mǝ kiŋ tɔ mɑ tɑɑ lɑnɑ-mɛ nɑ toŋ kɛ tomɑ nnɑ Tɑcɑɑ hɑ-m tɔ. Pǝ hɑ-m tomɑ ɑnǝɣɩ sɩ pǝ́ lɑ nɑ ɩ́ polo lɔlɔ, pǝ tɑ hɑ-m-yɛ sɩ pǝ wɑkǝlɩ-mɛ.

11 Pǝnɛntɛ mɑ tɑɑpɑlɑɑ pǝ lɑpɑ wulee. Ɩ́ lʋ sɩ ɩ́ té teu. Ɩ́ sɔɔsǝɣɩ tǝmɑɣɑ ɑpɑlʋtʋ. Ɩ́ wɛɛ nɔɣɔ kʋlʋmɑɣɑ, nɑ ɩ́ wɛɛ tǝmɑ nɑ leleŋ. Ɩsɔ wei ɩ sɔɔlǝɣɩ nɑ ɩ́ hɑɑ ɑlɑɑfǝyɑ tɔ ɩ́ wɛɛ mǝ kiŋ.

12 Ɩ́ sɛɛ tǝmɑɣɑ teu nɑ ɩ́ lɛlɩ.

Ɩsɔ yǝlɑɑ tǝnɑ sɛɛ-mɛ.

13 Tɑcɑɑ Yesu Kilisiti pɛɛlɛɛ nɑ Ɩsɔ sɔɔlʋɣʋ nɑ kpɛntʋɣʋ ŋku Feesuɣu Nɑŋŋtʋ kɔŋnɑ tɔ pǝ́ wɛɛ mǝ tǝnɑ mǝ kiŋ.

<- Kɔlɛntɩ II 12