1 Wɑɑtʋ wei Sɑmiyɛɛlɩ kpɑtǝlɑɑ, ɩlɛnɑ ɩ́ kpɑ ɩ pǝyɑlɑɑ kɛ Ɩsɛɣɛlɩ pɑɑsǝnlɑɑ. 2 Sɑmiyɛɛlɩ pǝyɑlʋ kɑncɑɑlɑɣɑ nyǝŋ hǝtɛ ntɛ́ Sowɛɛlɩ, nɑ nɑɑlɛ nyǝŋ sɩ Apiyɑ. Pɛɛsepɑ kɛ pɑɑ wɛɛ nɑ pɑ́ lɑkɩ pɑ tǝmlɛ. 3 Pɔɣɔlɑɣɑ ɩsǝlɛ tɑɑ kɛ́ Sɑmiyɛɛlɩ pǝyɑlɑɑ mpɛ pɑ nyǝnɑɣɑ. Pɑ tɑ tǝŋ ɩ ɩkpɑtɛ. Nɑ pɑ́ mʋɣɩ kʋcɔɔŋ nɑ pɑ́ kɛɛkɩ tɑmpɑnɑ. 4 Ḿpʋ́ɣʋ́ Ɩsɛɣɛlɩ nyʋɣʋ nyǝ́mɑ kotɑɑ nɑ pɑ́ polo Sɑmiyɛɛlɩ kiŋ kɛ Lɑmɑ. 5 Nɑ pɑ́ tɔmɩ-ɩ sɩ: Nyǝnɩ, n kpɑtǝlɑɑ. Pǝyele nyɑ́ pǝyɑlɑɑ ɩɩ tǝŋǝɣɩ nyɑ́ ɩkpɑtɛ. Pǝ tɔɔ tɔ, pǝnɛntɑɑ kpɑ-tʋɣʋ wulɑʋ, nɑ ɩ́ hʋʋkɩ tɑ́ tɔm ɩsɩɩ piitimnɑɑ pɑɣɑlɛ wɛnɑ tɔ.

6 Ɩsɩɩ pɑ yɔɣɔtʋɣʋ sɩ: Kpɑ-tʋɣʋ wulɑʋ nɑ ɩ́ hʋʋkɩ tɑ tɔm tɔ, Sɑmiyɛɛlɩ lɑŋlɛ tɑ hɛɛnɑ-tɩ. Ɩlɛnɑ ɩ́ sǝlǝmɩ Tɑcɑɑ. 7 Mpʋɣʋlɛ Tɑcɑɑ cɔ-ɩ sɩ: Nɩɩnɑ yǝlɑɑ kɛ tǝ tǝnɑ nti pɑ yɔɣɔtǝɣɩ tɔ. Mpi tɔ, pǝ tɑɣɑ nyɑɣɑ pɑ lɔɔkɩ. Amɑ mɑɣɑ pɑ lɔɔkɩ sɩ mɑ́ tɑɑ tɔɣɔ pɑ tɔɔ kɛ́ kɑwulɑɣɑ. 8 Ɩsɩɩ pɑ lɑkʋɣʋ-m hɑtoo kʋyɑŋku mɑ lǝsɑ-wɛɣɛ Icipiti nɑ pǝ́ sɩɩnɑ sɑŋɑ tɔ. Ḿpʋ́ɣʋ́ pɑ lɑkɩ nyɑ́ tɔtɔ. Pɑ lɔ-m kɛ́, nɑ pɑ́ lɑɑkɩ tɩɩŋ. 9 Mʋ pɑ kʋsǝlǝmʋtʋ. Amɑ kpɑɑlɩ-wɛɣɛ teu nɑ ń lɑ nɑ pɑ́ cɛkǝnɑ mpi pǝ wɛɛ sɩ pɑɑ lɑ pɑ wulɑʋ nɑ mpi ɩ́lɛ́ ɩ kɑ lɑ-wɛ tɔ.

10 Mpʋɣʋlɛ Sɑmiyɛɛlɩ lɑpɑ ɩsɩɩ Tɑcɑɑ kɛɛsʋɣʋ-ɩ tɔ. 11 Ḿpʋ́ɣʋ́ Sɑmiyɛɛlɩ heelɑ sɑmɑɑ sɩ: Wulɑʋ ɩnɩ ɩ kɑ lɑ-mɛɣɛ mpi mpi tɔɣɔlɔ. Ɩ kɑ́ kpɑɣɑ mǝ pǝyɑlɑɑ nɑ ɩ́ lɑ-wɛɣɛ ɩ yoolɑɑ, nɑ pɑ́ pɑɑsǝɣǝnɑ ɩ yoou kɛɛkɛnɑɑ. Ɩlɛnɑ lɛlɑɑ kɛ kpɑɣɑnǝŋ cɑɣɑlɑɑ, nɑ lɛlɑɑ kpɑkǝɣɩ ɑsewɑ kɛ ɩ nɔɣɔ tɔɔ kɛ́ wɑɑtʋ wei ɩ lɩɩkɩ tɔ. 12 Ɩ kɑ́ kpɑ lɛlɑɑ kɛ yoolɑɑ iyɑɣɑ (1000) nyʋɣʋ nyǝ́mɑ, nɑ lɛlɑɑ kɛ nɩɩlɛ nɑ nɑɑnʋwɑ nyʋɣʋ nyǝ́mɑ. Lɛlɑɑ kɑ hɑlǝɣɩ ɩ tɑwɑ nɑ pɑ́ kʋŋ, nɑ lɛlɑɑ nɑ́ɑ́ luki yoou wontu nɑ pǝ kɛɛkɛnɑɑ. 13 Ɩ kɑ́ lɑ mǝ pɛɛlɑɑ kɛ mʋtʋ sɑɑlɑɑ, nɑ potopotonɑɑ tʋlɑɑ, nɑ tulɑɑlʋnɑɑ lɑtɑɑ. 14 Ɩ kɑ kpɑɣɑ mǝ tɑwɑ kʋpɑnɑ nɑ ɩ́ cɛlɑ ɩ tǝmlɛ nyǝ́mɑ. 15 Nɑ ɩ́ kpɑɣɑ mǝ kʋhɑlǝm nɑ mǝ lɛsɛŋ tɩɩŋ kʋlʋlʋm hɔɣɔlǝŋ nɑɑnʋwɑ tɑɑ kʋlʋmʋɣʋ, nɑ ɩ́ cɛlɑ ɩ wɑɑlɩ nyǝ́mɑ nɑ ɩ tǝmlɛ nyǝ́mɑ. 16 Ɩ kɑ́ kpɑɣɑ mǝ tǝmlɛ nyǝ́mɑ ɑpɑlʋ nyǝ́mɑ, nɑ ɑlʋ nyǝ́mɑ, nɑ mǝ tɔlɑ wenɑ ɩ́ lɑkǝnɑ tǝmɑ tɔ nɑ ɩ́ lɑkǝnɑ. 17 Ɩnɩ ɩ kɑ kpɑɣɑnɑ mǝ hʋntʋ wontu hɔɣɔlǝŋ nɑɑnʋwɑ tɑɑ kʋlʋmʋɣʋ, nɑ mɩɩ pǝsɩ ɩ yomɑɑ. 18 Wɑɑtʋ ɩnǝɣɩ ɩ́ kɑ́ wiikinɑ Tɑcɑɑ kɛ mǝ wulɑʋ ɩnɩ ɩ tɔm. Amɑ ɩ́lɛ́ ɩ kɑɑ nɩɩ.

19 Ḿpʋ́ɣʋ́ sɑmɑɑ kisɑ Sɑmiyɛɛlɩ tɔm ntɩ nɑ pɑ́ tɔ sɩ: Aɑɩ, pǝ wɛɛ sɩ tǝ́ wɛɛnɑ wulɑʋ kɛ́. 20 Nɑ tǝ́ wɛɛ ɩsɩɩ piitimnɑɑ lɛlɑɑ. Ɩ kɑ hʋʋkɩ tɑ́ tɔm nɑ ɩ́ tɛɛkɩ-tʋɣʋ nɔɣɔ nɑ ɩ́ lɑ tɑ́ yoolɑɑ wulɑʋ.

21 Ɩlɛnɑ Sɑmiyɛɛlɩ tɛlǝsɩ tɔm ntǝɣɩ Tɑcɑɑ. 22 Ntɛnɑ Tɑcɑɑ sɩ: Nɩɩnɑ-wɛ nɑ ń kpɑ-wɛɣɛ wulɑʋ. Pǝlɛ pǝ wɑɑlɩ kɛ́ Sɑmiyɛɛlɩ tɔmɑ Ɩsɛɣɛlɩ nyǝ́mɑ sɩ pɑɑ wei ɩ́ kpe.

<- Sɑmiyɛɛlɩ I 7Sɑmiyɛɛlɩ I 9 ->