1 Wɑɑtʋ wei Sɑyuli tɔɣɔ kɑwulɑɣɑ tɔ ɩ pɩɩsɩ kɑ wɛ... Pǝyele ɩ kɑ tɛmɑ kɑwulɑɣɑ tɔɣɔʋ kɛ pɩɩsɩ nɑɑlɛɣɛ Ɩsɛɣɛlɩ tɑɑ.ɑpɩɩsɩ: Hepǝlɑ tɑɑ ɩlɛ, lonte tǝnɛ tǝ tɑɑ pɑ tɑ yɔɣɔtɩ pɩɩsɩ tɔm. Amɑ Piipilinɑɑ lɛlɑɑ nɑ́ tʋwɑ sɩ Sɑyuli pɩɩsɩ kɑ wɛ nɩɩlɛ. 2 Ḿpʋ́ɣʋ́ Sɑyuli lǝsɑ yoolɑɑ iyisi toosoɣo (3000) Ɩsɛɣɛlɩ tɑɑ. Ɩlɛnɑ ɩ́ sɩɩ ɩ kiŋ kɛ pɑ tɑɑ yǝlɑɑ iyisi nɑɑlɛɣɛ (2000) Mikimɑsɩ nɑ Petɛɛlɩ pʋɣʋ tɑɑ. Ɩlɛnɑ ɩ́ cɛlɑ yǝlɑɑ iyɑɣɑ (1000) kɛ ɩ pǝyɑlʋ Sonɑtɑŋ kɛ Kipeyɑ kɛ Pɛncɑmɛɛ tɑɑ. Pǝ kɑɑsɑ mpɑ ɩlɛnɑ ɩ́ yɑsɩ pɛlɛ nɑ pɑɑ wei ɩ́ mǝlɩ ɩ tɛ.

3 Ḿpʋ́ɣʋ́ Sonɑtɑŋ yɔkɑ Filiisi yoolɑɑ tǝsikile kɛ Kipeyɑ, ɩlɛnɑ pɛlɛ pɑ́ nɩɩ. Ntɛnɑ Sɑyuli tili nɑ pɑ́ hʋlɩ tutuuŋ kɛ Ɩsɛɣɛlɩ tǝnɑ tɑɑ sɩ Hepǝlɑ nyǝ́mɑ ɩ́ lɩɩ yoou. 4 Ɩsɛɣɛlɩ nyǝ́mɑ tǝnɑ nɩɩwɑ sɩ Sɑyuli yɔkɑ Filiisi yoolɑɑ tǝsikile. Ɩlɛnɑ Filiisi nyǝ́mɑ tɑɑ kpɑɑkǝnɑ-wɛ. Ɩlɛnɑ yǝlɑɑ lɩɩ yoou nɑ pɑ́ koti Sɑyuli kiŋ kɛ Kilikɑɑ. 5 Ḿpʋ́ɣʋ́ Filiisi nyǝ́mɑ kotɑɑ sɩ pɑ yookinɑ Ɩsɛɣɛlɩ nyǝ́mɑ, nɑ pɑ yoou kɛɛkɛnɑɑ kɛ iyisi hiu nɑ nɑɑnʋwɑ (30000) nɑ pɑ kpɑɣɑnǝŋ cɑɣɑlɑɑ kɛ iyisi nɑɑtoso (6000). Pɑ yoolɑɑ kɑ wɛ pɑɣɑlɛ kɛ́ ɩsɩɩ lʋm nɔɣɔ kɑnyǝŋɑ, pɑ fɛɩ kɑlʋɣʋ. Ḿpʋ́ɣʋ́ pɑ polɑɑ nɑ pɑ́ pɩɩlɩ Mikimɑsɩ kɛ Pɛtɩ-Afɛŋ ilim tǝlɩɩlɛ tɔɔ. 6 Ḿpʋ́ɣʋ́ Ɩsɛɣɛlɩ nyǝ́mɑ lɑŋɑ wɑkǝlɑɑ tǝtɔɣɔtɔɣɔ. Mpi tɔ, pɑ kolontunɑɑ tɛɛ-wɛɣɛ pɑɣɑlɛ tǝyɑmyɑm. Ɩlɛnɑ pɑ tɑɑ lɛlɑɑ ŋmɛlɩ kʋkpɑmǝŋ pɔɔŋ tɑɑ, nɑ lɛlɑɑ kɛ lɔkɔnɑɑ tɑɑ, nɑ lɛlɑɑ kɛ pulɑsɩ tɑɑ, nɑ lɛlɑɑ kɛ hɔtʋ tɑɑ. 7 Ɩlɛnɑ lɛlɑɑ nɑ́ɑ́ tɛsɩ Yɑɑtɑnɩ nɑ pɑ́ polo Kɑtɩ nɑ Kɑlɑɑtɩ.

Wɑɑtʋ ɩnɩ tɔ nɑ Sɑyuli nɑ́ɑ́ wɛ Kilikɑɑ, nɑ yǝlɑɑ mpɑ pɑɑ wɛ ɩ kiŋ tɔ pɑ seliɣi. 8 Ḿpʋ́ɣʋ́ Sɑyuli tɑŋɑ wɛɛ kɛ nɑɑtosompɔɣɔlɑɣɑ, ɩsɩɩ Sɑmiyɛɛlɩ kɑ heeluɣu-ɩ tɔ. Pɑɑ nɑ mpʋ Sɑmiyɛɛlɩ tɑ kɔɔ lɔŋ. Ɩlɛnɑ yǝlɑɑ sʋʋ yɑʋ. 9 Tǝnɑɣɑlɛ Sɑyuli tɔmɑ sɩ: Ɩ́ kɔnɑ-m kɔtɑɣɑ ŋkɑ kɔkɔ nyɑɣɑ kɑ tǝnɑ tɔ nɑ ciikuɣu nyǝŋkɑ wontu. Ɩlɛnɑ ɩ́ lɑ kɔtɑɣɑ ŋkɑ kɔkɔ nyɑɣɑ kɑ tǝnɑ tɔ. 10 Ɩ kɔmɑ ɩsɩɩ ɩ tɛɛsǝɣɩ, ɩlɛ Sɑmiyɛɛlɩ tɑpɑɣɑlɛ. Nɑ Sɑyuli polo ɩ sǝŋʋɣʋ. 11 Mpʋɣʋlɛ Sɑmiyɛɛlɩ pɔɔsɑ-ɩ sɩ: Pepeɣe n lɑpɑ ye?

Ɩlɛnɑ Sɑyuli cɔ sɩ: Mɑ nɑwɑ sɩ sɑmɑɑ tɔŋɑ yɑʋ. Pǝ́cɔ́ n tɑ kɔɔ ɩsɩɩ n kɑ sɩɩwɑ tɔ. Pǝyele Filiisi nyǝ́mɑ nɑ́ sikɑ Mikimɑsɩ. 12 Kɛlɛnɑ mɑ́ mɑɣɑsɩ mɑ tɑɑ sɩ, Filiisi nyǝ́mɑ kɑ tii mɑ tɔɔ kɛ Kilikɑɑ cǝnɛ, nɑ mɑ́ tɑ sǝlǝmǝtɑ Tɑcɑɑ. Pǝ tɔɔ kɛ́ pǝ cɑɑlɑ-m sɩ mɑ́ lɑ kɔtɑɣɑ ŋkɑ kɔkɔ nyɑɣɑ kɑ tǝnɑ tɔ. 13 Tǝnɑɣɑ Sɑmiyɛɛlɩ tɔmɑ Sɑyuli sɩ: N lɑpɑ kʋmɛlɛntʋ kɛ́. N tɑ tɔkɩ nti Tɑcɑɑ nyɑ́ Ɩsɔ sɩɩ-ŋ tɔ. Tɔfɔ, Tɑcɑɑ kɑ nyǝmɑɣɑ sɩ nyɑ́ kɑwulɑɣɑ kɑ́ wɛɛ tɑm tɔɔ kɛ́ Ɩsɛɣɛlɩ tɑɑ kɛ́. 14 Amɑ pǝnɛntɛ kɑ kɑɑ tɑsɑ leeluɣu. Tɑcɑɑ lǝsɑ ɩ luɣu tɛɛ nyǝŋ nɑ ɩ́ kpɑ-ɩ wulɑʋ kɛ ɩ yǝlɑɑ tɔɔ. Mpi tɔ, n tɑ tɔkɩ mpi ɩ kɑ tʋ-ŋ tɔ.

15 Pǝ wɑɑlɩ kɛ Sɑmiyɛɛlɩ kʋlɑ Kilikɑɑ, nɑ ɩ́ polo Kipeyɑ kɛ Pɛncɑmɛɛ tɛtʋ tɑɑ. Ḿpʋ́ɣʋ́ Sɑyuli kɑlɑ yǝlɑɑ mpɑ pɑɑ wɛ ɩ kiŋ tɔ, nɑ pɑ́ lɩɩ yǝlɑɑ nɑsǝtoso (600). 16 Ɩ nɑ ɩ pǝyɑlʋ Sonɑtɑŋ nɑ pɑ cɔlɔ yǝlɑɑ pɑɑ sikɑ Kepɑ kɛ Pɛncɑmɛɛ tɛtʋ tɑɑ kɛ́. Ɩlɛnɑ Filiisi nyǝ́mɑ nɑ́ɑ́ siki Mikimɑsɩ. 17 Ḿpʋ́ɣʋ́ Filiisi yoolɑɑ mpɑ pɑ wɑkǝlǝɣɩ lɛlɑɑ wontu tɔ, pɑ lɩɩ tintikɑ tooso. Ḿpʋ́ɣʋ́ kɑncɑɑlɑɣɑ nyǝntɛ mǝlǝnɑ Ofǝlɑ tɔɔ kɛ́ Suwɑɑlɩ tɛtʋ tɑɑ. 18 Ɩlɛnɑ nɑɑlɛ nyǝntɛ nɑ́ɑ́ mǝlǝnɑ Pɛtɩ-Holoŋ tɔɔ, nɑ tooso nyǝntɛ nɑ́ɑ́ kpɑɣɑ toŋɑ mpɑɑʋ ŋku kʋ tiiki Sʋnsʋmǝŋ tɛtɛkǝlɛ tɑɑ kɛ wʋlɑɣɑ tɛtʋ tɔɔ tɔ.

19 Wɑɑtʋ ɩnɩ tɔ, koolu fɛɩ Ɩsɛɣɛlɩ nyǝ́mɑ tɛ. Mpi tɔ, Filiisi nyǝ́mɑ tɑɑ tisiɣi sɩ Hepǝlɑ nyǝ́mɑ ɩ́ lu lɑɣɑlɛɛ nɑ ŋmɑntɑɑsɩ. 20 Filiisi nyǝ́mɑ tɛɣɛ pɑ pukɑɣɑ nɑ pɑ́ kpɑlǝɣɩ ɑkuŋ, nɑ pɑ cikɑnɑɑ, nɑ pɑ lɑwɑ, nɑ pɑ tɛtʋ kʋcɑsǝŋ 21 kɛ wɑɑtʋ wei wontunɑɑ mpɛ pɑ lɔŋ sǝkɩ tɔ. Pɑ kpɑlɑɣɑ kɛ́ nɑ pɑ́ fɛlǝɣɩ liɣitee nyǝɣǝlʋɣʋ kʋlʋmʋɣʋ kɛ wontu sǝkpetu tɔɔ, nɑ nyǝɣǝlǝŋ nɑɑlɛɣɛ sɔsɔɔntʋ tɔɔ. 22 Kʋyɑkʋ ŋku yoou tiiwɑ tɔ, Sɑyuli nɑ ɩ pǝyɑlʋ Sonɑtɑŋ pɑ tike pɑɑ wɛnnɑ yoou wontu. Pǝ kɑɑsɑ yǝlɑɑ mpɑ pɑɑ wɛ pɑ kiŋ tɔ, pɛlɛ pɑ tɑɑ nɔɣɔlʋ fɛɩnɑ ŋmɑntɑɑɣɑ yɑɑ lɑɣɑtɛ.

23 Ḿpʋ́ɣʋ́ Filiisi yoolɑɑ polɑɑ sɩ pɑ tɑŋǝɣɩ Mikimɑsɩ mpɑɑʋ.

<- Sɑmiyɛɛlɩ I 12Sɑmiyɛɛlɩ I 14 ->