1 Ɩ́ nyǝnɩ ɩsǝnɑ mpi Tɑcɑɑ sɔɔlɑ-tʋ tɔ ɩ pɑɑsɑɑ kɛ́ nɑ ɩ́ sɔɔlɩ-tʋ nɑ hɑlɩ pɑ́ yɑɑ-tʋ sɩ ɩ piyɑ, nɑ tǝ tɩɩ kɛ́ ɩ piyɑ nsǝɣɩ. Ɩ́ tɑ́ nɑ́ mpi pǝ tɔɔ ɑntulinyɑ nyǝ́mɑ tɑ nyɩ-tʋ tɔɣɔlɛ. Pɑ tɑɑ nyɩ Ɩsɔ tɔɣɔ pɑ tɑ nyɩ tɑ́. 2 Mɑ tɑɑpɑlɑɑ, kɑɣɑnɑ tǝ kɛ́ Ɩsɔ piyɑ kɛ́, ɩlɛ pǝ tɑ kulitɑ ɩsǝnɑ tɩɩ tɛ nɑ tǝ́ wɛɛ tɔ pǝ tɔɔ tǝkeelee nɑ pǝ́cɔ́. Pɑɑ nɑ mpʋ tǝ nyǝmɑ́ sɩ Kilisiti kɔŋ nɑ ɩ́ lɩɩ tɔ tɩɩ nǝɣǝsǝnɑ-ɩ kɛ́, mpi tɔ tɩɩ nɑ́ ɩ wɛɛtʋ. 3 Yǝlɑɑ tǝnɑ mpɑ pɑ tɛɛlǝɣɩ Kilisiti kɛ mpʋ tɔ pɑ́ tɑɣɑnǝɣɩ pɑ tǝɣɩ nɑ pɑ́ lɑ́ kʋpɑmɑ ɩsɩɩ Yesu Kilisiti kɛʋ kʋpɑŋ tɔ.

4 Yǝlɑɑ tǝnɑ mpɑ pɑ lɑkɩ ɩsɑɣɑtʋ tɔ Ɩsɔ kʋsǝsɩɩtʋ kɛ pɑ kpɛɛsǝɣǝnɑ. Pǝ tɑɣɑ pʋlʋ, ɩsɑɣɑtʋ lɑpʋ kɛnɑ kʋsǝsɩɩtʋ kpɛɛsǝnɑʋ. 5 Nɑ ɩ́ nyǝmɑ́ teu sɩ Yesu Kilisiti kɔmɑɣɑ sɩ ɩ lǝsǝɣɩ yǝlɑɑ ɩsɑɣɑtʋ nɑ ɩ́ lɔ. Ɩ mɑɣɑmɑɣɑ ɩ fɛɩnɑ ɩsɑɣɑtʋ kɛ pɑɑ pǝcɔ. 6 Pǝ tɔɔ kɛ́ ye ɩ nɑ wei pɑ kpɛntɑɑ, pǝ cɛpɑ pʋntʋ nɑ ɩsɑɣɑtʋ lɑpʋ kɛ́. Amɑ ye wei ɩ wɛɛ nɑ ɩ́ tɔŋnɑ ɩsɑɣɑtʋ lɑpʋ, ɩ tɑ nɑ Yesu nɑ ɩ tɑ tɩɩ nyǝmɩ-ɩ.

7 Mɑ piyɑ ɩ́ tɑɑ yele nɑ nɔɣɔlʋ puɣusi-mɛ. Ye wei ɩ tǝŋǝɣɩ tɑmpɑnɑ, pʋntʋ mɑɣɑmɑɣɑ kɛ́ tɑmpɑnɑ tʋ kɛ́ ɩsɩɩ Yesu Kilisiti. 8 Ye wei ɩ wɛɛ nɑ ɩ́ tɔŋnɑ ɩsɑɣɑtʋ lɑpʋ, ɩlɔɣɔʋ tǝnnɑ pʋntʋ. Pǝ tɑɣɑ pʋlʋ ɩlɔɣɔʋ lɑpǝnɑ ɩsɑɣɑtʋ kɛ hɑtuu kɑncɑɑlɑɣɑ. Pǝ mɑɣɑmɑɣɑ pǝ tɔɔ tǝkpem kɛ́ Ɩsɔ Pǝyɑɣɑ kɔmɑ sɩ kɑ wɑkǝlǝɣɩ ɩlɔɣɔʋ tǝmɑ tǝnɑŋnɑŋ.

9 Wei ɩ kɛ́ Ɩsɔ pǝyɑɣɑ tɔ pǝ cɛpɑ-ɩ nɑ ɩsɑɣɑtʋ lɑpʋ kɛ́. Pǝ tɑɣɑ pʋlʋ, ɩ tɑ kɛ sǝtʋ tɔtɔ, ɩ tɛmɑ weesuɣu tʋ kɛ pǝsʋɣʋ kɛ́. Nɑ Ɩsɔ kɛlɛ ɩ Cɑɑ, ɩlɛ ɩ kɑɑ pǝsɩ nɑ ɩ́ tɔŋnɑ ɩsɑɣɑtʋ lɑpʋ. 10 Ɩɩ nɑɑ mpi pǝ yeki nɑ pɑ́ nyǝŋ Ɩsɔ piyɑ nɑ ɩlɔɣɔʋ nyǝnsɩ tɔɣɔlɔ. Wei ɩɩ tǝŋǝɣɩ tɑmpɑnɑ yɑɑ ɩɩ sɔɔlǝɣɩ ɩ yʋlʋɣɔɣɔntǝlɛ tɔ ɩ tɑ kɛ Ɩsɔ pǝyɑɣɑ.

11 Nti ɩ́ nɩɩwɑ hɑtuu kɑncɑɑlɑɣɑ tɔɣɔlɛ sɩ tǝ́ sɔɔlǝɣɩ tɑ́ tǝmɑ. 12 Pǝ fɛɩ sɩ tǝ́ lɑ ɩsɩɩ Kɑyini kɑ lɑpʋ tɔ, ɩ kɑ kɛ́ Ɩsɑɣɑʋ nyǝŋ kɛ́ nɑ ɩ́ kʋ́ ɩ neu. Nɑ pepe tɔɔ kɛ́ ɩ tɩɩ kʋ-ɩ tɔ? Ɩ neu lɑkɑɣɑ kʋsiɣisim nɑ ɩnɩ ɩ lɑkɑɣɑ ɩsɑɣɑm tɔ pǝ tɔɔ kɛ́.

13 Apɑlɑɑ mɛ, ye ɑntulinyɑ yǝlɑɑ tɑɑ kpɑɑnɑ-mɛ, tǝlɛ tǝ tɑɑ lɑ-mɛɣɛ piti. 14 Tǝ nyǝmɑ́ sɩ tǝ lɩɩ tǝsǝtɛ kɛ́ nɑ tǝ́ sʋʋ weesuɣu tǝhikile. Tǝ sɔɔlɑ tɑ yʋlʋtɔɣɔntǝlɛnɑɑ tɔɣɔ tǝ nyǝmɑ́ mpʋ. Wei ɩɩ sɔɔlǝɣɩ ɩ lɛlʋ tɔ ɩ wɛ sǝm tɑɑ kɛ́, ɩ tɑ lɩɩtɑ. 15 Yʋlʋ wei ɩ tɑɑ kpɑɑnɑ ɩ yʋlʋtɔɣɔntǝlɛ tɔ ɩ kɛ́ yʋlʋkʋlʋ kɛ́, nɑ mǝ nyǝmɑ́ sɩ yʋlʋkʋlʋ fɛɩnɑ weesuɣu ŋku kɩɩ tɛŋ tɔ. 16 Tɑ́ tɔɔ kɛ́ Yesu Kilisiti lɔ ɩ weesuɣu. Mpi tɑ́ nyǝmɑ́ sɩ yʋlʋ sɔɔlɑ ɩ lɛlʋ tɔɣɔlɛ. Ye mpʋ pǝ wɛɛ kɛ́ sɩ tɑɑ lɔ tɑ́ weesiŋ kɛ tɑ tɔɣɔntǝlɛnɑɑ tɔɔ. 17 Ye yʋlʋ wɛnɑ kɛlɛ, ɩlɛnɑ ɩ́ nɑ́ pǝ cɑɑlɑ ɩ yʋlʋtɔɣɔntǝlɛ nɑ ɩ́ tɑ toosi ɩ tɔm sɩ pʋlʋ, wɛɛntʋ ɩnɩ ɩ pǝsǝɣɩ nɑ ɩ́ tɔ sɩ ɩ sɔɔlɑ Ɩsɔ kɛlɛ? 18 Mɑ piyɑ tǝ tɑɑ mɑkɩ nɔɔsɩ tɑɑ kɛ́ yem kɛ́ tɑ́ tǝmɑ sɔɔlʋɣʋ tɔm. Amɑ tɑ́ lɑkɑsɩ ɩ́ hʋ́lǝ́ɣɩ́ tɔtɔ sɩ tǝ sɔɔlɑ tǝmɑ nɑ tɑmpɑnɑ.

19 Mpi pɩɩ yele nɑ tǝ́ nyɩ sɩ tɑmpɑnɑ kɛ tǝ tǝŋǝɣɩ tɔɣɔlɛ. Pɩɩ yele nɑ tǝ́ wɛɛnɑ nɑɑni kɛ́ Ɩsɔ ɩsɛntɑɑ. 20 Ye pǝ heeliɣi-tʋɣʋ hɑtuu tɑ́ lotu tɑɑ sɩ tǝ fɛɩ teu, tǝ nyǝmɑ́ sɩ Ɩsɔ kǝlɑ tɑ́ lotu tɑɑ nyǝntʋ tǝnɑɣɑ tɔɔʋ nɑ ɩ nyǝmɑ́ pǝ tǝnɑ tǝpɑɩ. 21 Mɑ tɑɑpɑlɑɑ pǝ tɔɔ kɛ́ ye pǝ tɑ heeli-tʋɣʋ nɑtǝlǝɣɩ hɑtuu tɑ́ lotu tɑɑ, tǝ kɑɑ nyɑ Ɩsɔ ɩsɛntɑɑ kɛlɛ pɑɑ pǝcɔ. 22 Tǝ tǝŋǝɣɩ ɩ kʋheelitu nɑ tǝ́ lɑkɩ mpi ɩ cɑɑ tɔ pǝ tɔɔ kɛ́ ɩ hɑ-tʋɣʋ pǝ tǝnɑ mpi tǝ sǝlǝmǝɣɩ-ɩ tɔ. 23 Nti ɩ tʋ-tʋ tɔɣɔlɛ ɩ Pǝyɑɣɑ Yesu Kilisiti tɔm mʋɣʋ nɑ sɩ tǝ́ sɔɔlǝɣɩ tɑ tǝmɑ ɩsɩɩ Kilisiti tʋ-tʋ sɩ tǝ́ lɑkɩ tɔ. 24 Ye wei ɩ tǝŋǝɣɩ Ɩsɔ kʋsǝsɩɩtʋ pʋntʋ kpɛntǝnɑ Ɩsɔ kɛ́ nɑ Ɩsɔ wɛ pʋntʋ wɑɑlɩ. Ɩsɔ hɑ-tʋɣʋ ɩ Feesuɣu tɔɣɔ tǝ nyǝmɑ́ sɩ Ɩsɔ wɛ tɑ́ wɑɑlɩ.

<- Yohɑɑnɩ I 2Yohɑɑnɩ I 4 ->