1 Tɑfiiti cɑɣɑ ɩ kɑwulɑɣɑ tɑɑ, ɩlɛnɑ kʋyɑkʋ nɑkʋlɩ ɩ́ tɔ Ɩsɔ kʋyɔɣɔtʋtʋ tɛlǝsʋlʋ Nɑtɑŋ sɩ: Pǝ tɑ mʋnɑ sɩ mɑ́ wɛɛ kutuluɣu ŋku pɑ lɑpǝnɑ kpeŋkpelɑsɩ kʋpɑŋsɩ tɔ kʋ tɑɑ, nɑ Tɑcɑɑ ɑtɑkɑɑ nɑ́ɑ́ wɛ cokǝle nte pɑ lɑpǝnɑ pɔɔŋ tɔ tǝ tɑɑ. 2 Ntɛnɑ Nɑtɑŋ cɔ wulɑʋ sɩ: Polo nɑ ń lɑ́ pǝ tǝnɑ mpi n mɑɣɑsǝɣɩ nyɑ́ tɑɑ tɔ. Mpi tɔ, Tɑcɑɑ wɛ nyɑ́ wɑɑlɩ kɛ́.

3 Ahoo yuwɑ, ɩlɛnɑ Tɑcɑɑ tɔ Nɑtɑŋ sɩ: 4 Polo nɑ ń heeli mɑ pǝyɑlʋ Tɑfiiti sɩ, pǝ tɑɣɑ ɩnɩ ɩ kɑ ŋmɑnɑ-m tǝyɑɣɑ ŋkɑ kɑ tɑɑ mɑɑ cɑɣɑ tɔ. 5 Hɑtoo mɑ lǝsʋɣʋ Ɩsɛɣɛlɩ nyǝ́mɑ kɛ Icipiti tɑɑ, nɑ pǝ́ sɩɩnɑ sɑŋɑ tɔ, mɑ tɑ cɑɣɑtɑ kutuluɣu nɑkʋlɩ kʋ tɑɑ. Cokǝle tɑɑ kɛ́ mɑ wɛɛ nɑ mɑ́ lɑɣɑsǝɣɩ lonɑ. 6 Pǝlɛ pǝ pɑɑsi too mɑ wɛʋ Ɩsɛɣɛlɩ nyǝ́mɑ wɑɑlɩ tɔ, Pɑɑsǝnlɑɑ pɑɣɑlɛ kɛ mɑ tʋ́ mɑ yǝlɑɑ pɑɑsǝnɑʋ. Pǝyele mɑ tɑ kɑlǝnɑ pɑ tɑɑ nɔɣɔlʋ sɩ ɩ tɑ ŋmɑ-m kutuluɣu kʋpɑŋkʋ.

7 Mpʋ tɔ, heeli mɑ tǝmlɛ tʋ Tɑfiiti sɩ: Tomɑ tǝnɑ tʋ Tɑcɑɑ mɑ́, mɑ yɔɣɔtɑɑ sɩ, ntiɣile tɑɑ kɛ́ mɑ kpɑ-ŋ heeŋ wɑɑlɩ sɩ ń lɑ mɑ Ɩsɛɣɛlɩ nyǝ́mɑ wulɑʋ. 8 Nɑ mɑ́ wɛ nyɑ́ wɑɑlɩ kɛ́ nyɑ́ tɔntɛ tǝnɑ tɑɑ, nɑ mɑ́ kpiisi nyɑ́ kolontunɑɑ tǝnɑ nɑ mɑ́ kʋsɩ nyɑ́ nyʋɣʋ ɩsɩɩ ɑtɛ sɔsɑɑ lɛlɑɑ. 9 Ɩlɛnɑ mɑ́ hɑ mɑ Ɩsɛɣɛlɩ nyǝ́mɑ kɛ tǝcɑɣɑlɛ sɩ pɑ́ cɑɣɑ teu nɑ pʋlʋ ɩ́ tɑɑ peɣeli-wɛ, nɑ yǝlɑɑ ɑsɑɣɑɑ ɩ́ tɑɑ tɔɣɔ pɑ ɩsɛ. 10 Ɩsɩɩ sɑɑ wei mɑɑ kpɑ Pɑɑsǝnlɑɑ kɛ mɑ yǝlɑɑ Ɩsɛɣɛlɩ nyǝ́mɑ tɔɔ tɔ. Mɑɑ tisi mǝ kolontunɑɑ tǝnɑ tǝfɛ. Mɑ heeliɣi-ŋ sɩ Ɩsɔ mɑ, mɑɑ yele nɑ ń wɛɛnɑ lʋlʋɣʋ nyǝ́mɑ kɛ nyɑ́ wɑɑlɩ. 11 Ye pǝ tɑlɑ nyɑ́ kʋyɑkʋ nɑ ń sǝpɑ, ɩlɛ mɑɑ lǝsɩ nyɑ́ piyɑ mpɑ n lʋlǝnɑ nyɑ́ tɑpʋɣʋ tɔ pɑ tɑɑ nɔɣɔlʋ, nɑ mɑ́ kpɑ-ɩ wulɑʋ. 12 Ɩnɩ ɩ kɑ ŋmɑnɑ-m tǝyɑɣɑ nɑ mɑ́ yele nɑ ɩ kɑwulɑɣɑ kumte wɛɛ tɑm tɔɔ. 13 Ɩ kɑ́ nyǝnǝɣɩ-m ɩ cɑɑ, nɑ mɑ́ɑ́ nyǝŋǝɣɩ-ɩ mɑ pǝyɑlʋ. Mɑ kɑɑ lɔ-ɩ, ɩsɩɩ mɑ lɔʋ wulɑʋ wei ɩ lɑɑlɑ-ŋ tɔ. 14 Mɑ́ɑ́ kpɑnɑ-ɩ mɑ yǝlɑɑ wulɑʋ kɛ tɑm tɔɔ kɛ́ mɑ tǝyɑɣɑ tɑɑ nɑ mɑ kɑwulɑɣɑ tɑɑ, nɑ ɩ tǝyɑɣɑ kɑwulɑɣɑ toŋ kɑɑ ciɣiti.

15 Nti nti Ɩsɔ heelɑ Tɑfiiti nɑ Nɑtɑŋ nɔɣɔ tɔɣɔlɛ.

16 Mpʋɣʋlɛ wulɑʋ Tɑfiiti polɑ Ɩsɔ cokǝle tɑɑ, nɑ ɩ́ yɔɣɔtǝnɑ Ɩsɔ sɩ: Hɑɩ, Tɑcɑɑ Ɩsɔ mɑ́ nɑ mɑ tǝyɑɣɑ tǝ kɛ́ we nɑ ń kɔŋnɑ-m timpi tɑɑ mɑ wɛ ɩsǝntɔ tɔ? 17 Pǝlɛ pǝ pɑɑsi nɑ ń yɔɣɔtǝɣɩ ɩsǝnɑ mɑ tǝyɑɣɑ kɑ tɛɛsǝnɑ cele tɔ pǝ tɔm? N lɑkɩ-m kɛ́ ɩsɩɩ mɑ kɛ́ yʋlʋ sɔsɔ nɔɣɔlʋ, mɑ Ɩsɔ Tɑcɑɑ. 18 Mɑ fɛɩnɑ kʋyɔɣɔtʋtʋ kɛ teeli wei n tʋ-m tɔ ɩ tɔɔ. Mpi tɔ, mɑ kɛ́ nyɑ́ tǝmlɛ tʋ kɛ́, nɑ ń nyǝmɑ-m. 19 Tɑcɑɑ, n sɔɔlɑ-m tɔɣɔ n lɑpɑ kʋpɑntʋnɑɑ pɑnɛ pɑ tǝnɑ sɩ nyɑ́ sɔsɔɔntʋ tɑm tɔɔ nyǝntʋ ɩ́ nɑ́. 20 Tɑcɑɑ nɔɣɔlʋ tɑ nǝɣǝsǝnɑ-ŋ. Ye tǝ kɛɛsǝnɑ nti ɩnɩ tǝ nɩɩnɑ tɑ ŋkpɑŋŋ tɔ, Ɩsɔ nɔɣɔlʋ ɩ fɛɩ ɩsɩɩ nyɑ́. 21 Piitim nɑpǝlɩ pǝ fɛɩ nɑ pǝ́ nǝɣǝsǝnɑ nyɑ́ yǝlɑɑ Ɩsɛɣɛlɩ nyǝ́mɑ mpɑ tɑ́ n kɔmɑ nɑ ń yɑ Icipiti nyǝ́mɑ ŋmɑkǝlʋɣʋ tɑɑ nɑ ń lɑ-tʋɣʋ nyɑ́ yǝlɑɑ tɔ. Lɑkɑsɩ kʋpɑŋsɩ nɑ sɔɣɔntʋ nyǝnsɩ kɛ n tɔɣɔnnɑ piitimnɑɑ kɛ nyɑ́ yǝlɑɑ tɑ́ tɑ nɔɣɔ tɔɔ nɑ nyɑ́ hǝtɛ yɑɑ, nɑ pǝ́ wɑɑsɩ-tʋ. 22 Nɑ tǝ́ pǝsɩ nyɑ́ nyǝ́mɑ kɛ tɑm tɔɔ, nɑ nyɑɑ pǝsɩ tɑ́ Ɩsɔ. 23 Pǝnɛntɛ Tɑcɑɑ lɑ ɩsɩɩ n yɔɣɔtʋɣʋ tɔ. Yoosi nɔɣɔ ŋkɑ n sɩɩ mɑ́ nɑ mɑ tǝyɑɣɑ nyǝ́mɑ tɔɣɔ tɑm. 24 Pǝ́ lɑ teitei, ɩsɩɩ n yɔɣɔtʋɣʋ tɔ. Ɩlɛnɑ nyɑ́ hǝtɛ lɑ sɔsɔɔlɛ kɛ tɑm tɔɔ nɑ yǝlɑɑ yɔɣɔtǝɣɩ sɩ: Tɑcɑɑ Tomɑ tǝnɑ tʋ ntɛ́ Ɩsɛɣɛlɩ nyǝ́mɑ Ɩsɔ. Yele nɑ nyɑ́ tǝmlɛ tʋ mɑ mɑ tǝyɑɣɑ nyɔɔ toŋ. 25 Mpi tɔ, mɑ Ɩsɔ, nyɑ́ hʋlǝnɑ-m sɩ n kɑ́ hɑ-m lʋlʋɣʋ nyǝ́mɑ nɑ pɑ́ lɛɛtɩ kɑwulɑɣɑ tɑɑ. Pǝ tɔɔ kɛ́ mɑ pǝsɑɑ nɑ mɑ́ sǝlǝmǝɣɩ nyɑ́ kiŋ. 26 Hɑɩ, Tɑcɑɑ, nyɑɣɑlɛ Ɩsɔ, nyɑ́ sɩɩnɑ nyɑ́ tǝmlɛ tʋ mɑɣɑ nɔɣɔ kʋpɑŋkɑ ŋkɛ. 27 Nyɑ́ koolinɑ mɑ tǝyɑɣɑ nyǝ́mɑ kɛ kʋpɑntʋ sɩ mɑ lʋlʋɣʋ nyǝ́mɑ kɑ́ tɔkɩ kɑwulɑɣɑ kɛ tɑm kɛ nyɑ́ ɩsɛntɑɑ. Ɩlɛ nyɑ́ koolee ɑnɩ ɑ kɑ tǝŋ-wɛɣɛ tɑm tɔɔ.