ဖိလေမုန်

ဖိလေမုန်ဆေဟို ပေါလုရဲ့ပေးစာ

နိဒါန်း

ဖိလေမုန်ဆေဟို ပေါလုရဲ့ ပေးစာ ဟ တမန်တော်ပေါလု ရေးသားခဲ့သော စာစောင်ထဲတွင် အတိုဆုံး ပေးစာ ဖြစ်အယ် (၁.၁)။ ပေါလုဟ ၎င်းကို ရေးသားစဉ်တွင် ထောင်ထဲနှိုက် ဆိနေခဲ့ပင်း ရောမမြို့မှ ၎င်းကို ရေးသားခဲ့ခြင်း ဖြစ်နိန်အယ်။ အကယ်ယွေ့ သူဟ ရောမမြို့နှိုက် ဆိနေပါဟ ခရစ်တော် မွေးဖွားပင်း ၆၁ ခုနှစ်ခန့်တွင် ကောလောသဲစာစောင်ဟို ရေးသားမဲ့အချိန်နဲ့ အတူတူပင် ဖြစ်အယ်ဟု ရေးထားအယ်။

ပေါလုဟ ဖိလေမုန်နာမယ်ဆိ အမျိုးသားတယောက်ဆေ ဟေစာဟို ရေးခဲ့အယ်။ ဖိလေမုန်ဟ အသင်းတော်ရဲ့ အဖွဲ့ဝင်တဦး ဖြစ်ပင်း ကျွန်ပိုင်ဆှင်လည်း ဖြစ်အယ်။ သူဟ ဖိလေမုန်ဆေမှ ထွက်ပြေးသော သူရဲ့ ကျွန် သြနေသိမ်ဟို အပစ်မပေးဖို့ တောင်းဆှောက်ရန် စာရေးခဲ့အယ်။ ရောမဥပဒေအရ ဖိလေမုန်ဟ ဩနေသိမ်ဟို သတ်ပိုင်ခွင့် ဆိအယ်။ ပေါလုဟ ဖိလေမုန်အား ခရစ်ယာန်ညီအကို တဦးအဖြစ် လက်ခံရန် ဖိလေမုန်အား တိုက်တွန်းကာ ဩနေသိမ်ဟို ပေါလုအား ကူညီ ဆောင်ရွက်ခွင့်ပြုရန်ပင် အကြံပြုခဲ့အယ် (၁.၁၃–၁၄)။

အကျောန်းအရာ အကျဉ်းချုပ်

၁။ ပေါလုဟ ဖိလေမုန်ဟို နှုတ်ဆက်အယ် (၁–၃)

၂။ အဲပင်းနောက်၊ ပေါလုဟ ဖိလေမုန်အား ခရစ်ယာန်ညီအကိုအဖြစ် လက်ခံဖို့ ဩနေသိမ် ကိုယ်စား တောင်းပန်အယ် (၄–၂၁)

၃။ ပေါလုဟ လာရောက် လည်ပတ်ရန် ဆန္ဒဆိကျောန်း ပြောပြပင်း နှုတ်ခွန်းဆက်စကား ပေးပို့ခြင်းဖြင့် အပီးသတ်ခဲ့အယ် (၂၂–၂၅)

4 ငါဟ ငါရဲ့ ဆုတောင်းချက်များထဲတွင် နင့်ဟိုအမြဲတမ်း သတိရလျက် ငါရဲ့ ဘုရားသခင်ဟို ကျေးဇူးတင်အယ်။ 5 ပစာကို့ သခင်ယေရှုနဲ့ သန့်ဆှင်းသူအပေါင်းလို့ အပေါ်နှိုက် နင်ထားဆိလဲ့ နင့်ရဲ့ ချစ်ခြင်းမေတ္တာနဲ့ ယုံကြည်ခြင်းအကျောန်းဟို ငါလို့ကြားရသောကျောန့် ဖြစ်အယ်။ 6 ခရစ်တော်အတွက် ငါလို့နှိုက်ဆိလဲ့ ကောင်းသော အရာအားလုံးလို့ဟို သိခြင်းအားဖြင့် နင့်ရဲ့ ယုံကြည်ခြင်းနဲ့ဆိုင်သော မိတ်သဟာယ ဖွဲ့ခြင်းဟ ထိရောက်မှုဆိသောအရာ ဖြစ်လာစေရန် ငါဆုတောင်းအယ်။ 7 ငါ့ညီ၊ သန့်ဆှင်းသူလို့ရဲ့ စိတ်နေလုံးဟ နင့်အားဖြင့် ငြိမ်သက်ချမ်းသာမှုဟို ခံစားရပီဖြစ်ယွေ့ နင့်ရဲ့ ချစ်ခြင်းမေတ္တာကျောန့် ကြီးသော ဝမ်းမြောက်ခြင်းနဲ့ တိုက်တွန်းအားပေးခြင်းလို့ဟို ငါခံစားရအယ်။

8 အဲလိုမို့ ငါဟ နင်လုပ်သင့်လဲ့ အရာဟိုလုပ်ရန် ခရစ်တော်အားဖြင့် အမိန့်ပေးနိန်တာဟု ယုံကြည်စိတ်ချမှု အပြေ့အဝဆိသော်လည်း၊ 9 ချစ်ခြင်းမေတ္တာအားဖြင့် နင့်အား တောင်းပန်ခြင်းအမှုဟိုသာ လုပ်အယ်။ အေးလို့ လူအိုဖြစ်ပင်း အခုဟ ခရစ်တော် ယေရှုနဲ့ ဆိုင်သော အကျဉ်းသားလည်းဖြစ်လဲ့[b] ငါပေါလုဟ၊ 10 [c]အကျဉ်းကျခံနေခါ ငါ့သားဖြစ်သော ဩနေသိမ်အတွက် နင့်ဟို တောင်းပန်အယ်။ 11 သူသည် မခင်ဟ နင့်အတွက် အသုံးမဝင်သူဖြစ်ခဲ့ပေမဲ့လည်း အခုမှာ နင့်အတွက်ရော ငါ့အတွက်ပါ အသုံးဝင်သူ[d]ဖြစ်လာအယ်။

12 သူ့ဟို နင်ဆေ ငါပြန်ပို့လိုက်အယ်။ သူဟ ငါ့ရဲ့အသည်းနေလုံး ဖြစ်အယ်။ 13 ငါဟ သတင်းကောင်းအတွက် တုတ်ချေခံရခါ နင့်ကိုယ်စား ငါ့ဟို ကူညီဆောင်ရွက်ပေးနိန်ရန် သူ့ဟို ငါဆေနှိုက် ခေါ်ထားလိုအယ်။ 14 အဲလိုလဲ နင်လုပ်လဲ့ ကောင်းမှုဟ မလွဲဆှောင်သာယွေ့ လုပ်ရခြင်းမျိုး မဟုတ်ဘဲ မိမိဆန္ဒအလျောက် ဖြစ်စေရန် နင့်ရဲ့ သဘောတူညီချက် မပါရင် စလိုအရာဟိုမှ ငါမလုပ်လိုပါ။

15 သူဟ နင်နဲ့ခဏ ကွဲကွာခဲ့ခြင်းမှာ သူဟ နင့်ဆေ အမြဲနေထိန်နိန်ရန်အတွက် ဖြစ်လိမ့်မယ်။ 16 အဲလို့ပြောရာနှိုက် ကျွန်တဦးလိုမျိုး မဟုတ်တော့ဘဲ ကျွန်ထက် ပိုပင်း မြတ်လဲ့ချစ်သော ညီအကိုအဖြစ် ရဆိခြင်းဟို ဆိုလိုအယ်။ အထူးသဖြင့် ငါ့အတွက် အေးလိုပင် ဖြစ်လေပီ။ နင့်အတွက်ဟ သွေးသားနှိုက် လည်းကောင်း၊ သခင်ဘုရားနှိုက် လည်းကောင်း စလောက်ပိုယွေ့ အေးလိုမျိုးဖြစ်လိမ့်မလုန်း။

17 အဲလို့မို့ နင်ဟ ငါ့ဟို လုပ်ဖော်ကိုင်ဖက်အဖြစ် မှတ်ယူရင် ငါ့ဟိုလက်ခံသလိုမျိုး သူ့ဟို လက်ခံလော့။ 18 တကယ်လို့ သူဟ နင့်အပေါ်နှိုက် ပစ်မားခြင်း၊ အငန်းတင်ခြင်း တစုံတခုဆိရင် အေးအရာဟို ငါ့တာဝန် ထားလော့။ 19 ငါ ပေါလုဟ ပြန်ဆပ်ပေးမယ်ဟု ငါလက်ဖြင့် ရေးလိုက်ပါအယ်။ နင်တတ်တိုင်းလည်း ငါ့အား ငန်းတင်နေကျောန်းဟို ငါမပြောလိုပါ။ 20 အဲလိုမို့ ငါ့ညီ၊ ငါဟ သခင်ဘုရားနှိုက် နင့်ဆေမှ အကျိုးကျေးဇူးဟို ရဆိလိုအယ်။ ခရစ်တော်အားဖြင့် ငါ့ရဲ့စိတ်နေလုံးဟို ငြိမ်သက်ချမ်းသာစေပါလော့။

21 နင်ရဲ့ နားထောင်ခြင်းဟို ယုံကြည်စိတ်ချယွေ့ ငါပြောသောအရာထက်ပင် နင်ပိုယွေ့ လုပ်မယ်ဟို သိလျက် နင့်ဆေဟို ငါစာရေးလိုက်အယ်။ 22 တချိန်တည်းမှာ ငါ့အတွက် တည်းခိုလဲ့နေရာဟိုလည်း ပြင်ဆင်ထားလော့။ အကျောန်းမှာ နင်လို့ရဲ့ ဆုတောင်းခြင်းအားဖြင့် နင်လို့ဆေဟို ရောက်ဆိရသော အခွင့်ဟို ပေးလိမ့်မယ်ဟု ငါမျော်လင့်နေအယ်။

23 [e]ခရစ်တော် ယေရှုနှိုက် ငါနဲ့အတူ အကျဉ်းခံရသူ ဧပဖြမှစယွေ့၊ 24 [f]ငါ့ရဲ့ လုပ်ဖော်ဆောင်ဖက်များဖြစ်လဲ့ မာကု၊ အာရိတ္တာခု၊ ဒေမနဲ့ လုကာလို့ဟို နှုတ်ဆက်ကြအယ်။

25 သခင် ယေရှု ခရစ်တော်ရဲ့ ကျေးဇူးတော်ဟ နင်လို့ရဲ့ စိတ်ဝိညာဉ်နဲ့အတူ ဆိစေမန့်။