ဧဖက်
ဧဖက် ယုံကြည်သူများဟို ပေါလုရဲ့ပေးစာ
နိဒါန်း
ဧဖက် ယုံကြည်သူများဟို ပေါလုရဲ့ပေးစာဟ ခရစ်တော် မွေးဖွားပင်းနောက် ၆၀ ခုနှစ်ဝန်းကျင်တွင် ကောလောသဲမြို့သားလို့ဆေ ရေးသောစာနဲ့ တချိန်တည်းတွင် ရေးသားခဲ့အယ်။ စာရေးဆရာဟ သူ့တတ်တိုင်း တမန်တော်ပေါလုဟု သတ်မှတ်အယ် (၁.၁)။ ကောလောသဲမြို့တွင် တွေ့ရသည့် ပုဂ္ဂိုလ်ရေး နှုတ်ခွန်းဆက်စကားများ မပါဆိသော်လည်း ပေါလုဟ ဧဖက်မြို့နှိုက် ရေးသားခဲ့တာဟို ပညာဆှင်အများစုဟ သဘောတူကြအယ်။ အေးအကျောန်းကျောန့်၊ ၎င်းကို ပြည်နယ်ဆိ ဘုရားကျောင်းများစွာတွင် ဖြန့်ဝေရန် ရည်ရွယ်ထားခြင်း ဖြစ်အယ်။ ပေါလုဟ သူရေးသော ဟေစာတွင် ထောင်ကျနေကျောန်းကိုလည်း ဖော်ပြအယ် (၃.၁; ၄.၁; နဲ့ ၆.၂၀)။ ပေါလုဟ ဧဖက်မြို့ဆိ ဘုရားကျောင်းဟို သွားရောက်လည်ပတ်သော တုခိတ်ဟို သူနဲ့အတူ ဟေစာတစောင် ပေးပို့ခဲ့အယ် (၆.၂၁–၂၂)။
ဧဖက်မြို့ဟ ရမ်းဆာ့ကြီးမားသောမြို့ ဖြစ်ပင်း အာရှပြေနယ်အတွက် ရောမမြို့တော် ဖြစ်အယ်။ ဧဖက်မြို့ဟ ဟေလသနတ်ဘုရားမ အာတေမိအား ရည်စူးထားသော ဘုရားကျောင်းအတွက် ကျော်ကြားအယ် (တ ၁၉.၂၃–၃၁)။ ဧဖက်အသင်းတော်ဟ တက်ကြွစွာ စတင်ခဲ့ပေမဲ့လည်း နောက်ပိုင်းတွင် သွေးအေးသွားခဲ့အယ် (ဗျာ ၂.၁–၇)။
ပေါလုဟ ဟေစာရဲ့ ပထမပိုင်း တဝက်တွင် ဘုရားသခင်ဟ သူရဲ့လူများကို စလိုမျိုး ရွေးချယ်ပင်း ယေရှုခရစ်အားဖြင့် သူလို့ရဲ့ အပစ်များမှ ကယ်တင်ကျောန်း ဆှင်းပြထားအယ်။ သူဟ အသင်းတော်ကို ဦးခေါင်းအဖြစ် ခရစ်တော်နဲ့ တကိုယ်လုံးနဲ့ နှိုင်းယှဉ်အယ်၊ အားပင်း ခရစ်တော်နဲ့ တည်ဆောက်သော အဓိကအုတ်မြစ်အဖြစ် ခိုင်းနှိုင်းထားအယ်။ ပအုပ်ရဲ့ ဒုတိယပိုင်း တဝက်နှိုက် ပေါလုဟ ခရစ်ယာန် အသက်တာအတွက် လမ်းညွှန်ချက် ပေးထားအယ်။
အကျောန်းအရာ အကျဉ်းချုပ်
၁။ အခန်း ၁ တွင်၊ ပေါလုဟ သူ့ကိုယ်သူ မိတ်ဆက်ပင်း ဧဖက်မြို့သားများကို နှုတ်ဆက်အယ် (၁.၁–၂)
၂။ အဲနောက်၊ သူဟ ခရစ်တော်နဲ့ အသင်းတော်ရဲ့ ဆက်ဆံရေးကို ဆှင်းပြအယ် (၁.၃—၃.၂၁)
၃။ အဲနောက်၊ ပေါလုဟ ခရစ်ယာန်များ နေထိန်သင့်လဲ့ ပုံစံဟို ရေးသားခဲ့အယ် (၄.၁—၆.၂၀)
၄။ နောက်ဆုံးတွင်၊ ပေါလုဟ နိဂုံးချုပ်မှတ်ချက် အချို့ဟို ပေးအယ် (၆.၂၁–၂၄)

1 [a]ပေါလုဟ ဘုရားသခင်ရဲ့ အလိုတော်အားဖြင့် ခရစ်တော် ယေရှုရဲ့ တမန်တော် ဖြစ်အယ်။

ခရစ်တော် ယေရှုနှိုက် သစ္စာဆိယွေ့ ဧဖက်မြို့နှိုက်ဆိသော[b] ဘုရားသခင်ရဲ့ သန့်ဆှင်းသော လူလို့အား စာရေးလိုက်ပါအယ်။

2 ငါလို့အဖ ဘုရားသခင်နဲ့ သခင် ယေရှုခရစ်ဟ နင်လို့အား ကျေးဇူးတော်နဲ့ ငြိမ်သက်ခြင်း ပေးသနားပါစေသော။

ခရစ်တော်နှိုက် ဝိညာဉ်ရေးရာ ကောင်းချီးများ

3 ခရစ်တော်နှိုက် ဝိညာဉ်ရေးရာ ကောင်းချီးမင်္ဂလာ ဆိသမျှဖြင့် ခေါန်းခင်ဘုံနှိုက် ငါလို့ဟို ကောင်းချီးပေးသော ငါလို့ သခင် ယေရှု ခရစ်ရဲ့ ခမည်းတော် ဘုရားသခင်အား ချီးမွမ်းကြလော့။ 4 အကျောန်းမှာ ကိုယ်တော်ဟ မျက်မှောက်တော်နှိုက် သန့်ဆှင်းယွေ့ အပစ်ကင်းစင်ခြင်းငှာ ဟေလောကဟို မဖန်ဆင်းမီဟပင် ငါလို့ဟို ရွေးကောက်အယ်။

ပစာကို့ သူရဲ့ချစ်ခြင်းကျောန့် ဖြစ်ပင်း 5 ဘုရားသခင်ဟ[c] ယေရှု ခရစ်အားဖြင့် ငါလို့ဟို သူရဲ့ လူပဲ့သငယ်များ ဖြစ်စေရန် ဆုံးဖြတ်ထားပင်း၊ အေးစာဟ သူရဲ့အလိုတော်နဲ့ ရည်ရွယ်ချက် ဖြစ်အယ်။ 6 သူဟ ချစ်လှစွာသော သားတော်ဟို ငါလို့အား ပေးသော အခမဲ့လက်ဆောင်နဲ့ ဘုန်းကြီးသော ကျေးဇူးတော်ကျောန့် ဘုရားသခင်ဟို ချီးမွမ်းကြစို့။ 7 [d]အကျောန်းမှာ ခရစ်တော်ရဲ့ အသွေးတော်အားဖြင့်[e] ငါလို့ဟ လွတ်မြောက်ခြင်းသို့ ရောက်ကြပီ။ ဆိုလိုတာဟ ငါလို့ရဲ့ အပစ်များဟို ခွင့်လွတ်ခြင်း ခံရအယ်။ ဘုရားသခင်ရဲ့ ကျေးဇူးတော်ဟ စလောက်ကြီးမားသလဲ။ 8 ဟေမျှလောက်ကြီးသော ပမာဏကို ငါလို့အား ပေးအယ်။

သူရဲ့ ဉာဏ်ပညာနဲ့ ထိုးထွင်း သိမြင်သမျှအားဖြင့်၊ 9 ဘုရားသခင်ဟ သူရည်ရွယ်ထားလဲ့အတိုင်း လုပ်ဆောင်ခဲ့ပင်း ခရစ်တော်အားဖြင့် ပီးမြောက်ရန် သူဆုံးဖြတ်ထားပီးသော လျှို့ဝှက်အစီအစဉ်ဟို ငါလို့အား အသိပေးခဲ့အယ်။ 10 အချိန်တန်သောအခါ ဘုရားသခင် ပီးမြောက်စေမဲ့ ဟေအစီအစဉ်ဟ ခေါန်းခင်နဲ့ မြေကြီးပေါ်ဆိ ဖန်ဆင်းထားသော အရာအားလုံးကို ခရစ်တော်အောက်နှိုက် ပေါင်းစည်းရန် ဖြစ်အယ်။

11 အရာခပ်သိမ်းဟ ဘုရားသခင်ရဲ့ အကြံအစည်တော်နဲ့ ဆုံးဖြတ်ချက်အတိုင်း ပီးမြောက်ပင်း ဘုရားသခင်ဟ ငါလို့အား သူရဲ့ ကိုယ်ပိုင်ရည်ရွယ်ချက်ကျောန့် ခရစ်တော်နဲ့ တလုံးတဝတည်းဖြစ်ရန် ငါလို့ဟို ရွေးချယ်ခဲ့အယ်။ အစကတည်းဟ သူဆုံးဖြတ်ခဲ့တာကို အခြေခံတယ်။ 12 အဲကျောန့် ခရစ်တော်ဟို ဆေ့ဦးစွာ မျော်လင့်သော ငါလို့ဟ ဘုရားသခင်ရဲ့ ဘုန်းတော်ကို ချီးမွမ်းကြပါစို့။

13 မန်သောစကားဟို ကြားသောအခါ နင်လို့ဟ ဘုရားသခင်ရဲ့ လူများဖြစ်လာကြပင်း အဲသတင်းကောင်းဟ ကယ်တင်ခြင်းဟို ပို့ဆောင်ပေးအယ်။ နင်ဟ ခရစ်တော်ကို ယုံကြည်ယွေ့ ဘုရားသခင်ဟ ကတိပြုထားသော သန့်ဆှင်းသော ဝိညာဉ်တော်ဟို နင့်အား ပေးဆောင်ခြင်းဖြင့် သူရဲ့ ပိုင်ဆိုင်ခွင့် တံဆိပ်ခတ်ခြင်းဟို နင့်အပေါ် ထားခဲ့အယ်။ 14 ဝိညာဉ်တော်ဟ မိမိလူလို့ဟို ဘုရားသခင် ကတိပြုထားလဲ့အတိုင်း ငါလို့ ခံစားရမယ် ဖြစ်ပင်း ဘုရားသခင်ဟ မိမိပိုင်သောသူလို့အား လုံးလုံးလျားလျား လွတ်မြောက်ခြင်း ခွင့်ပေးမယ် ဖြစ်ကျောန်း ငါလို့အား အာမခံအယ်။ ဘုရားသခင်ရဲ့ ဘုန်းတော်ဟို ငါလို့ ချီးမွန်းကြပါစို့။

ပေါလုရဲ့ ဆုတောင်းခြင်း

15 အေးအကျောန်းကျောန့် သခင် ယေရှုဟို နင်လို့ရဲ့ ယုံကြည်ခြင်းနဲ့ ဘုရားသခင်ရဲ့ လူအပေါင်းလို့အပေါ် နင်လို့ရဲ့ ချစ်ခြင်းမေတ္တာကို ငါကြားသိရတာမှ စယွေ့၊ 16 နင့်အတွက် အစဉ်မပြတ် ဘုရားသခင်ရဲ့ ကျေးဇူးတော်ဟို ချီးမွန်းလျက် ငါ့ဆုတောင်းထဲမှာ နင့်ဟို သတိရအယ်။ 17 ငါလို့ သခင် ယေရှု ခရစ်တော်ရဲ့ ဘုရားသခင်တည်းဟူသော ဘုန်းအသရေနဲ့ ပြေ့စုံလဲ့ ခမည်းတော်ဟ မိမိဟို သိဆိစေရန် ဉာဏ်ပညာနဲ့ ဗျာဒိတ်တော်ဆိုင်ရာ ဝိညာဉ်တော်ဟို နင်လို့အား ပေးမဲ့အကျောန်းနဲ့ 18 သူ့အလင်းဟို မျော်ဖို့ နင့်ရဲ့စိတ်နေလုံး မျက်စေ့ဟို ပွင့်စေယွေ့ ခေါ်သောသူနဲ့ဆိုင်သော မျော်လင့်ခြင်းဟ ပစာဆိုလဲဆိုတာဟို လည်းကောင်း၊ သူရဲ့သန့်ဆှင်းသော လူများဟို ကတိပေးသော အံ့ဩဖွယ်ကောင်းချီးများ စလောက် ကြွယ်ဝတာဟို လည်းကောင်း၊ 19 ကိုယ်တော်ရဲ့ အစွမ်းသတ္တိနဲ့ပြေ့စုံသော တန်ခိုးအရှိန်အဝါရဲ့ လုပ်ဆောင်မှုအားဖြင့် ယုံကြည်သော ငါလို့အပေါ်သက်ရောက်လဲ့ ကိုယ်တော်ရဲ့ တန်ခိုးဟ စလောက် ထူးကဲကြီးမားတာဟို လည်းကောင်း နင်လို့အား သိဆိစေမဲ့အကျောန်း တောင်းဆှောက်အယ်။ ငါလို့အထဲနှိုက် လုပ်ဆောင်လျက်ဆိသော တန်ခိုးတော်ဟ 20 ခရစ်တော်ဟို သေခြင်းမှ ထမြောက်စေယွေ့ ခေါန်းခင်ဘုံတွင် လက်ယာတော်ဘက်နှိုက် ထိန်နေသောအခါဟ သူအသုံးပြုခဲ့လဲ့ တန်ခိုးတော်ပင် ဖြစ်အယ်။ 21 အုပ်စိုးမှု၊ အခွင့်အာဏာ၊ တန်ခိုးနဲ့ အစိုးရခြင်း၊ အခုကာလနှိုက် သာမက နောင်လာမဲ့ ကာလနှိုက် ခေါ်ဆိုအပ်သော နာမအားလုံးလို့ထက် သာလွန်အယ်။ 22 [f]အရာခပ်သိမ်းလို့ဟိုလည်း ခရစ်တော်ရဲ့ ခြေထောက်အောက်နှိုက် ချထားယွေ့ ကိုယ်တော်ဟို အရာခပ်သိမ်းလို့အပေါ် ဦးခေါင်းဖြစ်စေပင်း အသင်းတော်အား ပေးအယ်။ 23 အသင်းတော်ဟ အလုံးစုံလို့ဟို ပြေ့ဝ စုံလင်စေသော ပြေ့ဝစုံလင်ခြင်းတည်းဟူသော[g] ခရစ်တော်ရဲ့ ကိုယ်ခန္ဓာဖြစ်အယ်။

ဧဖက် 2 ->