1 Peniya, nikakimwene kitombe Chayune na Mwanalimbelele ajhemite panane jhake, pamonga na jwenio bhakibha bhando laki jhimo na elufo alubaine na ncheche na panane jha ibhonge bhakibha bhajhandikwe liina lya Mwanalimbelele na liina lya Tate mundo. 2 Bhahe, nikajhohine lilobhe kuhumii kunane kwa Chapanga lilobhe likibha ngita mache twe gha palipupuma na ngita nnindimilo nkolongwa gwa mbamba. Lilobhe linyohina likibha ngita lilobhe lya bhando bhubhakina ng'oma kongo bhihona malimba. 3 Bhakibha bhajhembita nhwambo nhyono palonge jha kigoda cha unahota na palonge jha bhala ihumbi ighome ncheche na hela ighogholo. Abhii jhe mundo jwahotwile kukibhola nhwambo gwenio nambo ndi bheniya bhando bhala laki jhimo na elufo alubaine na ncheche bhibhakombolilwe pannema. 4 Bhando bheniya bhakihaka ng'o kwa kuhenga ngongola na akakeghe hilu pandina. Bheniya bhinkengama Mwanalimbelele kokoha kwaijhenda. Bhaghombokwilwe kuhumii kwa bhando bhoha, bhabhehe bhukutumbula kupiwa kwa Chapanga na kwa Mwanalimbelele. 5 Bheniya bhakalongi ng'o uwange na bhakibha jhe na ulemo ghoghoha.

6 Peniya, nikamwene ntumiche jhonge jha kunane kwa Chapanga akibha na Lilobhe lya Mbone lya machiko ghoha ghangapeta lya Chapanga, atangicha kwa bhando bhibhatama pannema, kwa kila kilambo na kila likabila na kila lukolo. 7 Na jwenio akalongii kwa lilobhe likolongwa, “Munnendeme Chapanga na kunnomba! Nhwalo chaa ihikite jha kubhoha luhadabulo lwake. Munyinamile jwenio jwapangine kunane kwa Chapanga na nnema, mbwane na chembwe cha mache.”

8 Ntumiche jhuubhele jwa kunane kwa Chapanga ajhakunkengama jwenio jwalongolile kulonge, “Agwile! Chakaka, Babelone Nkolo agwile! Babelone jwabhatehila bhando bha ilambo yoha bhanyweghe divaye jhake, divaye jhibhabha jhakupala kuhenga ngongola!”

9 Ntumiche jwenio jhuutato abhakengimila bhala bhatato alongila kwa lilobhe likolongwa, “Mundo jhojhoha jwannyinamii kinyama chela na kinyagho chake na kubhekwa huna jhake pakibhonge chake amu panane ya lubhoko lwake, 10 jwenio helahela nanywela divaye jha lilaka lya Chapanga jhitengenichwe changaangalana na mache na kujhitwa mu kibaba cha lilaka lyake Chapanga. Mundo jwenio nalagha nkate jha mwotu gha balute palonge jha akatumiche bha kunane kwa Chapanga na palonge jha Mwanalimbelele. 11 Lyoi lya mwotu ghugwang'aha ujhenda kunane machiko ghoha ghangapeta. Bhando bheniya bhikijhinamii kinyama chela na kinyagho chake na kubhekwa huna jha liina lyake, nabhabhe jhe na lupomolelo loloha kilo na muhe.”

12 Kwa nhwalo gwenio, bhando bha Chapanga bhala bhibhakengama mihilo jha Chapanga na kunhobholela Yecho, bhipalwa bhabhaha na luhimbililo.

13 Peniya, nikajhohine lilobhe kuhumii kunane kwa Chapanga lilonge, “Jhandika naha! Kuhumii ngohe mina mota bhando bhibhawegha ngohe na kujhendelela kongo bhalombine na Bhambo.” Na jwenio Uhuke alonge, “Chakaka! Nabhapomolela kuhumii mu malagho ghabhe, nhwalo itendwa yabhe nabhalongoana nayo.”

14 Peniya, nganolokiya, pakibha na lihunde likele na panane jha lihunde lyenio pakibha jwakibha ngita Mwana gwa Mundo. Akibha awalite hingo jha chaabo pamuto, na kukamula kikwakwa chikitema mu lubhoko lwake. 15 Yene, ntumiche jhonge jwa kunane kwa Chapanga akapitii kuhumii ku nyumba jha Chapanga na kwa lilobhe likolongwa ngannobholila jhola jwakibha atamite panane jha lihunde, “Chonde, tola kikwakwa chino mukahune, nhwalo kipinde cha mahuno pannema kihikite!” 16 Na jwenio jwatamite panane jha lihunde, ajhakutumii kikwakwa chake panane jha nnema na nnema ujhakuhunwa.

17 Bhahe, ntumiche jhonge jwa kunane kwa Chapanga ngapitila kuhumii mu Nyumba jha Chapanga jhikibha kunane kwa Chapanga, na jwenio hele akibha na kikwakwa chikitema.

18 Peniya, ntumiche jhonge jwa kunane kwa Chapanga nnyemelela mwotu, akabhokite pakachangwale na kunkema kwa lilobhe likolongwa jhola ntumiche jwa kunane kwa Chapanga jwabhii na kikwakwa chikitema na kunnobholela, “Tola kikwakwa chino chikitema, mukapochomole ihagho ya michabibo jha nnema, nhwalo chabibo yake ijhelite!” 19 Yene, ntumiche jwenio ajhakutumii kikwakwa chake pannema, ajhakuhuna chabibo ya pannema, ajhakubheka nkate jha chehemo jha kuminyila chabibo pa lilaka likolongwa lya Chapanga. 20 Chabibo jhela ikaminyitwe chehemo jha kuminyila pipabhii panja na muche, miyahe ijhakupita chehemo jhene jha kuminyila ade ikahololii ngalukemba kutale jha kilomita miya itato. Na kujhenda pahe miyahe jhene ikabhandiki mita jhimo na nucho.

<- Uloto 13Uloto 15 ->