1 Nenga ng'ogholwike pakate jha ilongoche bha lilongo lya bhando lilinnyeketii Kilichitu, ndi jhunighawene mang'ahe gha Kilichitu. Nane mbakubhehe pamonga mu ung'alicho ghupala kuyekulilwa. Nimpembekeya hake mangota akailongoche ajhango kubhehe, 2 mulilonde lilongo lya bhando bha Chapanga libhankamwiingine, mililonde chi anda ntei kuchokolekelwa, nambo kwa kupala ngita chapala Chapanga. Nhenga lihengo lyenio kwa kupala kunnepa jhe, nambo kwa mwojho gwino gwoha. 3 Mangalongocha jhe kwa makakala bheniya bhimalongocha mulilongo lino, nambo mma nnandanikiho kwa lilongo lyenio. 4 Na Nnucha Nkolongwa papakuhika, mangota nampokela hupo jhu ung'alicho jhangatundingila.

5 Hele machikangombo mipalwa kuijhokanikiya ighogholo. Mangota mabhoha mipalwa kunhengelana kwa utembekelo, nhwalo Majhandiko gha Chapanga ghilonge, “Chapanga ubhakana bhando bhibhakikweya nambo bhapela bhando umbone bhina utembekelo.” 6 Ntende utembekelo palonge jha Chapanga jhuna makakala, kupala anyinule kipinde chamaha. 7 Mnekele Chapanga malola ghino ghoha, nhwalo jwenio ndi jwantunja muughome gwino ghoha.

8 Mma miho na nkelukiya! Nhwalo likoko lino, Limbembela ilyungalyunga ngitalihimba lilikuluma liyema mundo limmemene. 9 Mukanile Limbembela na kubhehe nganganga mu kihobholelo, mmanyingine kubhehe ajhino bhibhahobholela Kilichitu pannema ghoha bhakongana na mang'ahe ngita gheniya hele. 10 Pighapitii mang'ahe kwa kipinde tu, Chapanga jwabhii lihembuko lya umbone gwoha na jwankemingine nnyingii muung'alicho gwake gwa machiko ghoha ghangapeta kwa kulombona na Kilichitu Yecho, jwenio ndi nakamilicha na kumpeke makakala nnyeme maha mu chinge. 11 Kwa Chapanga kubhaha na ukindendeke kwa machiko ghoha ghangapeta. Amina.

12 Ninyandikiline baluwa jhenje nyipe andangatila Silwano, nnongo jhunimmanya nu kunhobholela. Mbala nikangamalicha mwojho nu kulonge kubhehe kuhenga kongo ndi umbone gwa Chapanga gwa uchakaka. Ntangamane nganganga mu umbone gwenio.

13 Na lilongo lya bhando lilinnyeketii Kilichitu ajhino bha pamba ku Babelone abhahagwii pamo na mangota bhinyambucha. Na Maluku mwanango mu kihobholelo inyambucha. 14 Nnyambuchana kulangii upalo gwa Kilichitu.

Uteeke gwa Kilichitu ubhaha pamonga na mangota bhammii na Kilichitu.

<- 1 Petile 4