1 Manymak, nyani Djakupdji birraldjnyirdjili Labanang walkiriwilingim djin wanginy kiriny nyanngapibi miri djin bininy kiriny, “Warrpam nginmilang gunydjirrgirang girri malany nyani Djakupdji mil-gamban, bubalikiṉing nyani gunydjirrar gatjinmi mala. Miri bukmak ngunuwili maypalpili a djamagiṉpili nyani Djakupdji djiny gatjinmiban, nyani djiny gurrkumi ngunukuwiliny gunydjirrgirangpibi malabi, yarim djani bilang guydjirrgirang, ingki Djakupang.” 2 A wurpi, Djakupdji nyangiṉi miri nyani Labandji inga rum-nguliban, ingkiban nyani inga bir-bulanggitjnyir nyininyir miri ngurrwakngi, bilapilang. 3 Girri nyani Yaway inga bindjin wanginban Djakupgi, “Wiṉiyban nyunguli mutjingili nyibirri nyuni bungtjili, a ngarri inmarr maltjigiban marrga nyirr djagadjigi.”

4 Marrga nyani Djakupdji yan yaniliban marrga biling nyaniwilingim inga bil bir-kiri nguḻi murrurrtmirri nyibirri nyanngang maypalpili djin djarri kirim. 5 A ngunukiṉing inga djin yulgungili, nyani bilingga wangin bilingga bindjin, “Ngarri irr nyangiṉi miri nyumilang gunydjirrgirang djuburr nyani irra wurpidjiniban, miri ngurrwakngi ngunukima yul irra marr-bulanggitjdjini, ban djini'djining bumirli irriny ngurrgimban. Bil marriban, ngunukima ngirrang gunydjirrgirang Miligidjir nyani irriny gunggatjim. 6 Nyum nyim marnggi ngarri inga djamadjny giriny mirrpm wana gunydjirrgirki nyumilang, 7 bil nyani irriny gar-yulgimi bumir-galbi bilidjirri, miri nyanngang murr-randinirbi nyani djambidjambidjimi madjirri a madjirri. Bil nyani God ngandarrk inga djarri Labangi marrga ngunung mari Labanbi irranydji yulgimi. 8 Miri bilapilang gam': ngunubilang nyani irra bindjin wangin, “Bukmak mil-kurrkunyirbi minytjigiṉing maypalpili nyuni djiny galikiban, bilapilangdji ngarri nyirr bumir-wiṉidjingilgi djamagi nyungung,” girri djani maypalpilingir warrpamdji djiny djin buṉḏigiban yarim mil-kurrkunyirbi minytjigiṉing yuwidjingpili. Bil ngunubilang nyani irra wangini irra bindjin, “Ingkiban mil-kurrkunyirbi minytjigiṉpili, bil ḻurrkin-djuḻatjdjuḻatjmiynyakiṉpili nyuni djiny galikiban yarim ngunukuwiliny,” girri warrpam maypalpili djani djiny djin buṉḏigiban yarim ḻurrkin-djuḻatdjuḻatjmiynyakiṉing yuwirdjingpili. 9 Bilapilang djiniwili maypalpili nyani Goddji nyaniny gaypili gunydjirrgiriny nyumilang, a djiny gungiliban ngirraliban.

10 Miri ngurrwakng, ngunukiṉing nyani gurrkiṉing nanikutdji burrili inga baltjny, girri guḏidjny, ngarri mabugi irr nyangiṉiban. Miri mabugimirri irr nyangiṉi galbi gurrkiṉing nanikutpili, djani burrili djina baltjny kiriny miyilkpilingiriny, a ngunuwili gurrkiṉing mala yarim djani warrpam minytjigiṉing - miri ḻurrkin-djuṯatjdjuḻatjmiynyakiṉing, djuḻtjdjuḻtjnyakiṉing, a mil-kurrkunyirbi minytjigiṉing mala, bilapilang. 11 Girri wari ngunupilang irra witjiliban Godang djanguny-ganyakiṉing marri, irr buḻkinyipm, a nyani irra wangin, “Way, Djakup!” “Ngarri djiḻi,” ingarr bindjin.

<- Ngurrununggaḻ bilidjirri 30