Manjula jurangunto nganaiatimai ja murla Goda ngaianani Ngaperandru ja Kapara Jesu Christungundru! Amen.

Ninkida, mai kamaneli worajai, jura ngantjani jaura ngamalkai jurani talini, ninaia Jesus Christus ja Apostel nunkani ngaianangu tinkari ngankana wonti. Mankianimai ja Godani jurakokaiatinimai, ngangau Nulia bakana jurangu kalumiltjamiltjarini nunkani matja wondrana jaurali nunkanali, jura wata morla mangapunkujeli ja ko ngalpurani ja tintaterinani ngamananto, a‐ai, praitji ja palto ja morlalula ngamalkananto tepia.

Jendrangundruja ngato jurana kurukurubai Johannini dakani jaurali: „Ja karari, kupa waka worajai, Nunkangu ngamanau, ngangau, Nauja tinkari ngankaterinani, ngaiana murlali nganananto ja wata nintali pantjinanto Nunkangu, nunkani wokaranani.“ 1 Joh 2:28.

Naupini jaura jurangu wondrai, worderu jura tepini talku wirarinanto ja madlentjandru ngamalkaterinanto, worderu jura ketjaketjanani murlali nganananto ja narini wata japali nganananto, a‐ai, milki jurani tjenmarianau Nunkangu, Nauja tepi nunkani warupotuni jinkiterina wonti:

Jeruja jiglerali warapanau ja Godani ngatjianau, Nulia Jaola kulikiri ngarani juranani jinkinanto; Nulia jenipara tepia jaura jurangu mildiri ngankala nganai.

Ja ngani Godani ngatjiai, jurani kamaneli marapujeli nunkangupini ngantjani jaurandru tepi ngurali mankamankananto Jesungu Christungu.

Bethesda, November 18, 1895.