मीका नी कीताब

मीका नी कीताब
मीका नी कीताब इनी लिखायली कीपात मा मीकान भोगवानो वोगे गोथी ओगवायती वात छे। मीका यहुदान एक सोहोर मोरेसेत 1:1आरुयिर्मयाह 26:18 गोथो हुतो। मीका यहुदान राजा योताम, आहाज आरु हिजकीय्याहन राजोन टेमे भोगवानो वोगे गोथी ओगवायती वात कोरलु। ऐरो मोतलोब छे की हेरी सेवकायीन आंदास 750 ईसुन आवनेन पेहेल आरु 700 ईसुन आवनेन पेहेलुन इचमा मीकान यी भोगवानो वोगे गोथी ओगवाती वात लिखली छे, जी आंदास तेने टेमे छे जोत्यार यसायाह आरु होसेन भोगवानो वोगे गोथी ओगवाती वात होयली होती। यो मालुम नी होय की मीकान यी आखी भोगवानो वोगे गोथी ओगवायती वात लिख्यु की हेरो काहनो चेलो हेरे जुगु लिखलो छे। जी वी वात होय, यो छाचो होये की कीपात 700 ईसुन आवनेन पेहेल आरु 608 ईसुन आवनेन पेहेलुन इचमा लिखायली होती। काहाकी ऐर वाराम यिर्मयाहन कीपात मा वात कोरलो छे।
मीकान भोगवानो वोगे गोथी ओगवायती वात परमेस्वरन नीयाव आरु हेरा छुटकारान इचमा ओगोव पोछोळ होयती रोवे। होयु इसराएल आरु यहुदा पोर गोरब्या पुठी भुन्डो वेवहार कोरने आरु लाल्‌च्‌या होयने कोरीन गुनु लागाड़े। 2:2 होयु हेन्दरा कागळ्या पोर भुंडा पापी होयनेन वी गुनु लागाड़ 2:6। एरकरीन, परमेस्वर हेन्दरा सोहोर काजे नास कोर देसे। 1:6 आरु 3:12। आरु हेनुक इसराएल गोथा छेटा आरु ओळतेन यहुदा गोथा वी बोन्दी बोनावीन मुकली देसे। पुन परमेस्वर आपसा वायदा काजे वी फोम राखसे आरु काहना वीस्वासी काजे पोछु लावसे 4:6। परमेस्वर बेथलेहम गोथु एक नेता, एक मसीहा काजे मुकलनेन वायदु वी कोर्‌यु, जु इसराएल आरु आखी कोळी पोर हुकुम कोरसे 5:4। मीकान कीपात अब्राहम आरु याकुब सी परमेस्वरन वायदाक वायदु फोम कोरवतु जाय्‌न सोर जाय। परमेस्वरन मोंग आरु गीन हेरी रीस सी जादा ताकोत वाळु छे।
रुपरेखा:
1. अध्याय 1 आरु 2 मा नीयाव आरु छुटकारा न पेहलु भाग छे।
2. अध्याय 3 गोथो 5 मा नीयाव आरु छुटकारा न दुसरु भाग छे।
3. अध्याय 6 आरु 7 मा नीयाव आरु छुटकारा न तीसरु आरु चेहलु भाग छे।

1 योहोवान वचन जो यहुदा न राजा योतअम, आहाज आरु हिजकीयाहन राज करनेन टेम मा मोरेसेतवासी मीकान पास पुगीयो, जीनाक त्यो सोमरोन आरु योरुसालेम न वारा

सामरीया नगर आरु योरुसालेम नगर का वीलाप गीत

2 ए देस देस न लोगहन समळो ए धरती तु हेनु आखा न क सात जो तारे मा छे धीयान कर, मालिक योहोवा तारे वीरुद मा आपसा चुखला मन्दीर मार यीन तुमरे पर गावय देसे। 3 काहकी देख, योहोवा आपसा चुखला जागा सी बाहर नी नीकळे, आरु त्यो धरतीन उचाय पर जात रयसे। 4 बयड़ा हेको तळे पीगळी जासे, आरु घाटी असी फाट जासे जसी मुमबत्ती धपीन पीघळे, आरु पानी वाड़ी मायीन उहळे। 5 यो सब याकुबन पाप आरु इसराएलन घोराना न पाप न कारण हुये, याकुबन पाप काय छे काय सामरीया नी हय? आरु यहुदान उचली जागा नी हय? काय योरुसालेम नी हय? 6 पोरबु योहोवा यो कयो, इना कारण हांव सामरीया क खयड़ा मा ढेर बनाय दीस, आरु दाखन वाड़ी बनावीस; आरु दगड़ान क झुळा मा ढवळी दीस 7 हे की सब खुदायली मरती, आरु जो त्यो छीनाळो करीन कमायलो छे त्यो आग्ठा सी धपाड़ दीयो जासे, आरु हेकी सब मुरतीन क चुरा चुरा करदीस; काहकी त्यो हेको छीनाळान कमाय सी एख्टो करलो छे, आरु चिनाळान सारकी कमाय हुयसे।

8 इना कारण सी हांव दु:ख मनावीन वीखु कयीस; उगाड़ो हुयीन आरु वीगुर चाटीया फिरीया करीस हांव कुळायन सारको आयड़ी आयड़ीन कयीस; आरु कोकासीया कुकड़ान सारको रड़ीस। 9 काहकी हेको घाव वारु नी हुये; आरु पीड़ा यहुदा पर आय पड़से, आरु म्हार लोगहन पर पड़ीन योरुसालेम फाटक तक आय गयली छे।

दुस्मन क योरुसालेम भेणी आवनो

10 गत नगरन रयने वाळी हेका वाराम वात मा करो आरु नी ते रड़ो आरु बेताप्रा मे धुलि मे जाकर लोटपोट करो। 11 ए सापीरन रयनेवाळा उगाड़ा हुयीन जात रयो; सानान न रयने वाळा नी नीकळी सके, बेतेसेलन रड़ने ओवाजन कारण हेको वाचनेन जागो तमु ली लेदा। 12 काहकी मारोत न रयने वाळी मदतन वाट जुवळती जुळती हरबड़ी गयी, काहकी योहोवा भेणी रयीन योरुसालेमन फाटक तक वीपत्ती आय पड़ी। 13 ए लाकीसन रयने वाळी आपसी घुड़ा गाड़ी मा ज्युरे चालन इसराएल वाळा घुल्‌लान क जुप थार सी सीयोन परजा[a] न पाप मा सुरु हुयो 14 इना कारण सी तु गतन मोरेसेत क दान दीन दुर कर देसे; अकजीबन घर सी इसराएलन राजा धुको खासे। 15 ए मारेसा न रयने वाळा हांव पछो तारे उपर एक आदीकारी बनावी, आरु इसराएल न वीजुत वाळा लोगहन को अद्दुल्लाम न दरो मा आवनो पड़से। 16 आपसा लाड़ेकला पोर्यान क वाटे आपसो केस वाटीन मुनको बुड़ाव, पुन आपसो पुरो मुनको काकन घारान सारको पूरो बुड़गो कर दे, काहकी त्या बन्दी हुयीन थरा पास सी जात रीया।

मीका 2 ->