1 इनीये कारण जूवे कि हामु उन वात पर जो हामु सोमवी छे, आरू भी मन लागाड़ या ओसो नी होय कि भड़कीन उन छे दूर चाली जाय। 2 काहकि जो वचन सोरगदूतन द्वारा कयो गया हुता। जव वो स्थिर रया आरू हर एक गुणेहगार आरू हुकुम नी माननेन ठीक बदला मिव्या। 3 तो हामु मानसे ओसा मोटा उध्दार छे निश्चन्त रोवीन कोसो वाच सकता छे? जेरो चर्चा पेहल पोरबुन द्वारा होयी, आरू सोमवनेवावान द्वारा हामु ऐरो छाचो हुयो। 4 आरू साथे ही यहोवा–भगवान भी आपसी मरजी क लारे सहलानी, आरू घण मोटो काम, आरू हरेक प्रकारन सामर्थ्यन काम, आरू चुखलो आत्मान वरदान वाटनेन द्वारा ओकी गवा देता रया।
हामरा उध्दारकरता
5 त्यो ओको आवनेवाळा जगत क जेरो चर्चा हामु कर रया छे, सोरगदूतन हको तळे नी कर्या। 6 वरना काही ने कयी यो गवा देदी छे,
“मानुस काय छे कि तु ओकी सुधि लेता छे या
मानुस क पोर्या काय छे कि तु ओकी चिंता करता छे?”
7 तु ने ओको सोरगदूत छे काही कम कर्या;
तु ने ओको पर महिमा आरू विजुत क मुकूट राख्या, आरू त्यो आपने हात क काम पर हक दिदा।
8 तु ने सब काही ओको पायन नेचो कर दिदा,
अतरान करीन जव कि त्यो सब काही ओको हको तळे कर दिदा,
तो त्यो काही भी राख नी छुड़िया जो ओको हको तळे नी होय।
पर हामु हिमी सब काही ओको हको तळे नी देखता। 9 पर हामु ईशु क जो सोरगदूत छे काही ही काम कर्या गया हुता, मरलाक दुःख झेलनेन कारण महिमा आरू विजुत क मुकूट पेहरीन होया देखता छे, ताकि यहोवा–भगवानन फोकटन दया छे वो हर एक मानसोन करता मरला क हवाद चाखे। 10 काहकि ओका करता सब काही छे आरू ओका द्वारा सब काही छे, ओको योही वारलो लागे कि जव वो घोणा छे पोर्य क महिमा मा पुचाड्या, ती उध्दारन करता क दुःख उठावने क द्वारा सिध्द करे।
11 काहकि चुखलो करनेवावा आरू जो चुखलो कर्या जाता छे, सब एक मूल छे; अतरान करीन कारण वो तीनुक भाईस कयनो छे नी लाजवायता। 12 वो कयता छे,
“हाव तारो नाव आपने भाईस्योक सोमवावी;
सभा क विच मा हाव तारो भजन गावीस।”
13 आरू पछु यो, “हाव ओको पर विश्वास राखीस।” आरू पछु यो, “देख हाव उन पोर्य सहित जिनाक यहोवा–भगवान ने मखे आपलो।”
14 एरकरीन जव कि पोर्य मास आरू लुहूय क भागी छे, तो वो आप भी तींदरा समान ओको सहभागी होय गया, ताकि मरला क द्वारा ओको जिनाक मरला पर शक्ति मिवी होती, मतलब शैतानन निकम्मा कर देय। 15 आरू जोतरा मरलान बीक क मारे जीवन भर दासत्व मा फंछे हुता, तीनुक छुड़ा लेय। 16 काहकि वो तो सोरगदूतन नी वरना अब्राहम न वंश क संभावता छे। 17 अतरान करीन कारण ओको क जुवे हुता, कि सब वात मा आपने भाईस्यो क समान बने; जिनासे वो वात मा जो यहोवा–भगवान छे सम्बन्ध राखती छे, एक दयालु आरू विश्वासयोग्य डाहला पुजारा बने ताकि मानसे क पाप क करता प्राश्चाताप करे। 18 काहकि जव त्यो परीक्षा करी दशा मा दुःख झेलीया, तो वो उनकी भी मदत कर सकता छे जिन्दरी परीक्षा होयती छे।
