निरगमन 34

दगड़ान दुय नवली पट्टिया

1 ओळतेन योहोवा न मुसा सि कोयो, “पेहली तख़्तियो क जसो दोगड़ा क दुयो ओख्यो पट्टिया घोड़ लेरे; तब ज बुल हेनु पेहली तख़्तियो पोर लिख्या हुतो, जेनुक तुन तुड़ नाख्यो, हुयेत बुल मा हेनु तख़्तियो पोर वी लेखिस। 2 सोंदारे तियार रोहजी, आरु भोर क सीनाय बोयड़ा पोर चोहड़ीन ओकी चोटी पोर मारे ओगळ उबो होयजी। 3 तारे पुठी काई नी चोहोड़ पावे, बाखुन बोयड़ा भोर पोर कोय मानुस काहिय देखाइ नी देये; आरु नी गाडरा-बुकड़ा आरु गाय-बुईल वी बोयड़ा क ओगळ चोरने पाये।” 4 तोत्यार मुसा न पेहली तख़्तियो क जसो दुय आरु पट्टिया घोड़्‌या; आरु वेगोत क उठिन आपना हात मा दोगड़ा क हुये दुयो पट्टिया लिन योहोवा क हुकुम क ओनसारे सीनाय बोयड़ा पोर चोहोड़ गोया। 5 तब योहोवा न वादळा मा उतरीन ओक पुठी उबो होईन योहोवा खुदक नाव क पोरचार कोर्‌यो। 6 यहोवा ओक अगळ होईन यो पोरचार हुयो चाल्यो, “योहोवा, ईश्वर दयालु आरु गिनोन, रीस करने मा धीरजवन्त, आरु घण करुणामय आरु खोरो,[a] 7 हजारो पीढ़ीयो लोगुन लोगातार दया करनेवाळा, अधोरोम आरु गुणा आरु पाप सोमा करनेवाळा छे, बाखुन दोष क हुयो काहने भातिन गुनावा नी कोहायसे; हुयो पितरो क अधोरोम क डोन ओक पुर्या बाखुन पोता आरु परपोता क वी आपनेवाळा छे।” 8 तोत्यार मुसा न तोत्यार कळ क भैनी झुकीन वांद्यो। 9 आरु हुयो कोयो, “हे पोरबु, काहमाइन तारी गिन क निगाह मार पोर होय, ती पोरबु हामु मानसो क विच मा होईन चाले; ये मानसे एक होटीया ते छे, ते वी आमरा अधोरोम आरु पाप क सोमा कोर आरु आपना निज वाटो मानीन ग्रहण कोर।”

वाचा को ओळी पछो भन्नो

(निर्गमन 23:14-19; व्यवस्थाविवरण 7:15; 16:1-17)

10 हुयो कोयो, “सोमळ, हांव एक वाचा बाँदो छे। तारा आखा मानसो क अगळ मा ओसा मोटा काम करिस जोसो कळी पोर आरु आखी जाती मा कोदी नी होये; आरु हुये आखा मानसे जेरे विच तु रोहे छे योहोवा क काम क देखसे; काहकी ज हांव तुमु मानसो क लिय करने पोर छे हुयो भयंकर बीकन काम छे। 11 ज हुकुम मे आज तुमुक आपो छे ओक तुमु मानसे मानजु। देखु, हांव तुमरे ओगळ सी एमोरी, कनानी, हित्ती, परिज्जी, हिब्बी, आरु यबुसी मानसो क निकळो छे। 12 एकालिय चोकचोया रोहनो कि जेना देश मा तु जानेवाळो छे उना निवासियो सी वाचा नी बाँदनो; काहिय ओसो नि होये की हुयो तारे लिय फंदो कोहाये। 13 एकालिय ओकी वेदीयो क पाड़ दे नो, ओक खांभा क तुड़ नाखजो, आरु ओकी अशेरा नावोन मुर्तियो क काट नाखजो;[b] 14 काहकी तुमुक काहनी दिसरा क ईश्वर कोरिन वादंने कोरने क हुकुकम नी, काहकी योहोवा जेरो नाव जलनशील छे, हुयो धोपाइन उठनेवाळो परमेश्वर छे, 15 ओसो नी होये कि देशक निवासियो सी वायदु करे। ओसो नी होय कि जव वे आपना देवता क बुंडो काम करे आरु यो वेवविचार क व्यवहार कोरे, आपना देवता क बलि चढ़ावसे आरु कोई तुखे नेवतो करे तव तु ओकान बलीन मांस खासे। 16 आरु तु ओकी पुराय क आपना पुर्या क लिय लावे, आरु ओकी पुराय ज आप आपना देवताओ क पोछोल होयने क वेवविचार कोरे छे, तारा पुर्य सि वी आपना देवताओं क पोछोळ होयने क वेवविचार कोरावे।

17 “तुमु देवताओ क मुर्तिया घोड़ीन झुणी बोनाय लेनो।[c]

18 “अखमीरी रुटी क पर्व मानजु। हेरेम मारी हुकुम क ओनसारे आबीब मोहना क नियत टेमे पोर सात दाहड़ा लोगुन अखमीरी रुटा खाया कोरजु; काहकी तु मिसर सी आबीब मोहना मा निकळ आया।[d] 19 हर एक पहिलौठा मारो छे; आरु काय बछड़ो, काय मेम्ना, तारा ढुरो मा सी ज नर पहिलोठो होये हुयो सब मारोत छे।[e] 20 गदड़ा क पेहला खुळ्या क बोदले मेम्नो आपिन ओक छुड़ावजो, कदाम तु ओक छुड़ावने नी चाहे ती ओक गोळो तुड़ देजी। बाखुन आपना आखा पहिलोठो पुर्या क बदलो आपिन छुड़ावनो। मेसे काई ठाहरले हाते आपनो मुय नी देखाड़े।[f]

21 “छव दाहड़ा ते काम कोरजु, बाखुन सातवे दाहड़े आराम कोरजु; बाखुन हळ जुपने आरु काटाई क टेमे वी आराम कोरजु।[g] 22 आरु तु सापता क पर्व मानजु ज पेहला लवे हुया गोहोव क पर्व कोहाये छे, आरु साल क आखरी मा एकठो क वी पर्व मानजु।[h] 23 साल मा तिन वार तारा आखा मानसे इस्राएल क परमेश्वर पोरबु योहोवा क आपनो मुख देखाड़े। 24 काहकी हांव दिसरी जाति क तारे अगळ सी निकाळीन तारि सिमाओ क विदाड़िस; आरु जब तु आपना परमेश्वर योहोवा क आपनो मुख देखाड़ने क लिय साल मा तिन वार आया कोरे, ती काई तारी भुमी क लालच नी कोरसे।

25 “मारा बलिदान क लुहुय क खमीर भेळ नी चोड़ावनो, आरु नी फसह क पर्व क बलिदान मासी काइन सोंदारे लोगुन रोहने देजो।[i] 26 आपनी भुमी क पेहली उपज क पेहलो वाटो आपना परमेश्वर योहोवा क भवन मा ली आवनो। बुकड़ा क गिदल्या क ओकी आईस क दुध मा नी पाकाड़नो।”[j]

27 तोत्यार योहोवा न मुसा सी कोयो, यो बुल लिख लेये; काहकी एना बुलो क ओनसारे हांव न तारे आरु इस्राएल क पुठी वाचा बादलो छे। 28 मुसा होया योहोवा क पुठी चालिस दाहड़ा आरु रात रोयो; आरु तोत्यार लोगुन नी ते हुयो रुटा खादा आरु नी पानी पिदो। आरु हुयो हेनु तख़्तियो पोर वाचा क बुल यानी दोस हुकुम लिख देदो।

मुसा को चमेकनीयो चेहरो

29 जोत्यार मुसा गोवा क दुयो पाटिया हातो मा लिय सीनाय बोयड़ा सी उतर रोयो हुतो तोत्यार योहोवा क सात वात कोरने क कारण उना चेहरा सी तेज निकळी रोय होती, बाखुन हुयो यो नी जानतो हुतो की ओक चेहरा तेज निकळ रोय छे। 30 जब हारुन आरु सब इसराएलीयो न मुसा क देख्या की उना मुख सि किरण निकळ रोय छे, ती हुये ओक पास जाने सी बिह गोया। 31 तोत्यार मुसा न ओक बुलायो; आरु हारुन मण्डळी क आखा डाहला भेळ उना पास आया, आरु मुसा हेनुसी वात कोरने लाग्या। 32 ओक वाद आखी इसराएली पास आया, आरु जोतरा हुकुम योहोवा न सीनाय बोयड़ा पोर उना सात वात कोरने क टेम आप्यो हुतो, हुयो सब हुयो ओक बताड्यो। 33 जोत्यार लोगुन मुसा हेनुसी वात नी कोर चुक्या तोत्यार लोगुन मुसा हेनुसी वात नी कोर चुक्यो तोत्यार लोगु आपसा मुख पोर फोटको पाँगरीन रोयो; 34 बाखुन जोत्यार जोत्यार मुसा धोड़े योहोवा सी वात कोरने क ओक ओगळ जाय, तोत्यार तोत्यार हुयो हेनु पांगरुन क निकळते टेमे लोगुन उतारे हुये रोहतो हुतो; ओळतेन खोयड़े आविन ज ज हुकुम ओक मिळे हेनुक इसराएलीयो सी कोय देतो हुतो। 35 इसराएली मुसा क मुख देखतो हुतो की हेरेसी किरणे निकळे छे; आरु जोत्यार लोगुन हुयो योहोवा सी वात कोरने क धोड़े नी जाता तोत्यार लोगुन त्यो फोटको पाँगरीन रोहता हुतो।

<- निरगमन 33 निरगमन 35 ->