3 “कोदाम दुय मानसोन आमी सामी राजी नी हय; ती काय चे एकठा चाल सोकसे?” 4 काय नाहार विगुर सिकार हात कोरे जंगल मा गांगेरसे? काय जुवान नाहार विगुर काहिन धोरे आपसा दोरोम डोखारसे? 5 काय चिल्‌ला विगुर फांदोन फांदे पोड़से? काय चिल्‌ला धोरनीयो विगुर काहिन फान्‌दे पोड़ला फांद काजे धोरती पोर गोथो आपसी जाव काजे एकठो कोरसे? 6 काय काहना सोहरोम मोटला फेपारिया काजे फुकसे ती मानसे थोर-थोर नी कापे? काय योहोवान विगुर मुकले काहना सोहोरोम काहिन पिड़ा पोड़से? 7 इने रिते पोरबु योहोवा आपसा दास कागळीया पोर आपसी सातायली वात उजेन्ती कोरे विगुर काहिन वी नी कोरे। 8 नाहार गांगेरे; कुन नी बीहये? परमेश्वर योहोवा कोयु: कुन ओगवायती वात नी कोरे?

9 ओसदोदोन मोटला किला आरु मिसर देसन राजान किलाम पोरचार कोरीन कोवु: सामरियान बोयड़ा पोर एकठा होयीन देखु कि हेरेम कायत् मोटु हुहड़ु आरु हेन्दरे इचमा कायत् वेला पाड़नेन काम होय रोया छे!

10 योहोवान यो बुल छे, जे मानसे आपसा मोटला घोरोम लोड़ाय आरु ठोगीन लावलो धोन एकठा कोरीन मेक रोया, चे सुतरो काम कोरनो जाने नी। 11 ओतरान कोरीन परमेश्वर योहोवा ओसु कोवे: देसक घेरोवनेवावु वेरी होयसे, आरु हुयो तारा जुर काजे तुड़से, आरु तारा मोटोला किलाक लुट ली जासे।

12 योहोवा ओसु कोवे: जिने रिते गुवायु नाहारोन मुयोम गोथु दुय पाय एने कानटान एक टुकड़ु छुड़ावे, तोसात् इसराएली मानसे, जे सामरिया मा आथरुनोन एक खुना एने सुवावी गादी पोर बोठ्या कोरे, चे वी छुड़ाय लेसे। 13 सेनाओन परमेश्वर, पोरबु यहोवान यो बुल छे, देखु, आरु याकुबोन घोराना विरुद् मा गोवाय देवु। 14 [a] जिने टेमे हांव इसराएल काजे हेरा गुनान डोन आपीस तेने टेमे हांव बेतेलोन बेदीया काजे वी डोन आपीस, आरु बेदीन सिंगड़ा टुटिन धोरती पोर हिट पोड़से। 15 हांव सेव्वान टेमे घोरो काजे आरु तोपोन टेमेन घोरो काजे दुयोक हिट पाड़ीस; हातिन दातो वेर बोनला घोरे वी नास होयसे, आरु मोटला मोटला घोरे वी नास होय जासे।

<- आमोस 2आमोस 4 ->