1 पतरस आरू यहुन्ना तीसरे पहर पर विनता क टेहाव मा मंदिर मा जाय रया हुता। 2 आरू लोगहन एक पैदा वार सी लेंगड़ा भिखारी क लाई रया हुता, जिनाक त्या दाहड़ीन मंदिरन एक झोपला पर जो सुन्दर नाव ना कहवायतो होतो, बठाड़ देता हुता, कि चो मंदिर मा जाने वाळा सी भीख मांगे। 3 जव त्यो पतरस आरू यहुन्ना क मंदिर मा जातला देखियो, ती ओका सी भीख मांगीयो। 4 पतरस यहुन्ना साते उका भेणी धियान सी भाळीयो आरू कयो, “हामरे भुणी भाळ!” 5 आरू त्यो हेका सी काहय मांगनेन आस सी हेनुक देखने लागियो। 6 तव पतरस कयो, “सोनो आरू चाँदी ते मारे पास नी होय; पर जो मार पास सी, त्यो हाव तुखे आपो; ईशु मसीह नासरी न नाव सी चाल पछु।” 7 आरू ओको उका जेवड़ा हात धरिन उको उठाड़ियो; आरू तत्यार मा ओको पायो मा आरू घुटना मा ताकत आय गय। 8 आरू चो उछळीन उबो हय गयो, आरू चालने पुगनेन लागियो; आरू चालतो, आरू कुदतो जाईन आरू यहोवा–भगवानन बढ़ाई करतो जाईन ओको साते मंदिर मा गयो। 9 आखा लोगहन हेको चालतो पुगतो जाईन यहोवा–भगवानन गुण गान करतो देखीन, 10 हेको उळखी लेदा की यो चो सी जो मंदिरन सुन्दर नावन झपला पर बठीन भीख मांगीया करतो होतो; आरू तीनी घटना सी जो हेको सात हय चे घना घाबराय गया।

11 जव त्यो पतरस आरू यहुन्ना क धरी रयो होतो, ती आखा लोगहन घोणा घाबरायता जाईन तिना ओसारा मा जो सुलैमानन कहवायतो सी, ओको पास दोवड़ीन आश। 12 यो देखीन पतरस लोगहन सी कयो, ए इस्त्राएली मानसो, तुमु इना मानुस क देखीन काँ घाबराय रया, आरू हामरे भुणी ओसा काँ देखी रया, ओसा कि हामु हामरी ताकत न शक्ति सी इनाक चालतो पुगतो करिया? 13 अब्राहम आरू इसहाक आरू याकूबन यहोवा–भगवान, हानरा डाहडा न यहोवा–भगवान हेरा ईशुन महिमा करियो, जिनाक तुमु धराय दिया, तव तुमु हेके सामने ईशुन विजोत नीहि करियो। जिनाक तुमूक नि मान्या आरू पिलातुस न हात मा आपी दिदा, जब कि पिलातुस तिनुक छुड़नेन ठराय लेदु। 14 [a]तुमू तिना न्यायी आरू चुखलान क नीहि मानिया, आरू तुमूक यो वारू लागियो कि तुमरे जुगु एक हत्या करने वाळा क छुड़ दियो जाय। 15 आरू तुमु जीवन आपनिया क मार नाखिया, जिनाक यहोवा–भगवान मरेला माईन जीवतो करियो; आरू इनी वात न हामु गवाह सी। 16 आरू हेको नाव ते, तिना विश्वासन लारे जो हेका नाव पर सी, इना मानुस क जिनाक तुमु देखता सी आरू हेको जानू भी त्यो ताकत आपलो सी; आरू पाको सी यो विश्वास ईशुन लारे सी, हेनाक आखा सामने छाछलो वारू आरगो कर दियो।

17 “आरू हीमि ए भाईस्यो, हाव तुमूक जानो कि यो काम तुमू विन ओकल मा करिया, आरू ओसात् तुमरा मास्तरिया भी करिया। 18 पर जिनी वात क यहोवा–भगवान आखा कागळिया न मुय सी पेहलेत देखड़्यो हुता, कि हेरो ईशु मसीह दुःख हाकलसी; त्यो ओको इने रीति सी पूरो करियो। 19 अतरानकरीन मन फिरावो आरू पोछा आवती रवो कि तुमरा पापे मिटाड़्या जाय, जिना सी पोरबुन सामने आरामोन दाहड़ा आवे। 20 आरू त्यो तिना ईशु क मुकले जो तुमरे जुगु पेहेल गथो मसीह ठहरायो गयो सी। 21 पाको सी कि सोरग मा तिने टेहाव तक रहवे जव तक कि त्यो आखी वातन सुधार नी कर लेय जेरी वात विचार पेहला जमाना सी यहोवा–भगवान आपसा कागळीयान मुय सी करलो सी। 22 जोसो की मूसु कहवलु, ‘पोरबु यहोवा–भगवान तुमरे भाईस्यो मा सी तुमरे जुगु म्हार सारको एक कागळीयो क नेवाड़सी, जो काय त्यो तुमरे सी कहवसे हेकी समळजो।’ 23 पर आखा मानसी जो तीना कागळीयान नी समवसे, लोगहन मा सी तिनक मार नाखसी। 24 आरू शमूएल सी लागाड़ ़ीन हेके ओलतेन वाला जोतरा कागळिया वात कयो त्या आखा इनु दाहड़ान खबर आपला सी। 25 तुमु कागळीयान ओवलियाद आरू तिनी बांधायली वातन साजलिया सी, जो तुमरा डाहडा सी बांधलो, जव त्यो अब्राहम सी कयो, तारी औवलियादन लारे धरती पर आखा लोगहन बरकत लेसे। 26 यहोवा–भगवान हेका चाकरीयो क नेवाड़ीन पेहेल तुमरे जुवे मुकल्यो, कि तुमरे मा सी आखा क हेकी बुराय सी फिरवीन बरकत आपे।”

<- प्रेरित 2प्रेरित 4 ->