1 तुमू मा जो पुरानो छे, हाव ओको समान डाहडा आरू मसीह क दुःख क गवा आरू प्रगट होयनेवावी महिमा मा सहभागी हईन तीनुक यो समझाड़ता छे। 2 [a]कि यहोवा–भगवान क उना टुळा क, जो तुमरे वीच मा छे राखवाळी करो; आरू यो कोय क कयनो सी नी बाकुन यहोवा–भगवान की मरजी क लारे खुशी छे, आरू सिर्फ कमाय क करता नी पर मन लागाड़ कर। 3 जो मानसे तुमूक आपी गया छे, उन पर हक नी जितावु, वरना टुळान करता विजुत बने। 4 जव प्रधान राखवायु प्रगट होयछे, तो तुमूक महिमा क मुकुट आपसे तेरी घाटळो रूप खतम नी हुये।

5 इनी प्रकार हे नवयुवको, तुमू भी डाहडा क हको तळे रयो, वरना तुमू सब क सब एक दिसरा की सेवा क करता दीनता छे कमर बांधीन रयो, काहकि “यहोवा–भगवान डाहवाळा क विरोध करता छे, पुन दाहड़ा पर फोकटन दया करता छे। 6 [b]एरकरीन यहोवा–भगवान क बलवन्त हात क नेचो दीनता छे रयो, जिना छे वो तुमू वारू टेहाव पर बढ़ाई।” 7 आपसी सारी चिंता ओको पर नाख देवु, काहकि ओको तुमरो ध्यान छे।

8 सचेत होय, आरू जागता रवु; काहकि तुमरा विरोध शैतान गर्जनेवावो सिंह क समान इनीये हेरने मा रयता छे कि काही क फाड़ीन खावु। 9 विश्वास मा दृढ़ हईन, आरू यो जानीन ओको सामना करू कि तुमरा भाईस जो संसार मा छे ओसो ही दुःख सह रये छे। 10 हिमी यहोवा–भगवान जो सब फोकटन दया क दाता छे, जो तुमू मसीह मा आपसी अमरकाय महिमा क करता बुलाया, तुमरे थुड़ी देर तक दुःख उठाड़ने क बाद आप ही तुमू सिध्द आरू स्थिर आरू बलवन्त करसे। 11 तीनी क साम्राज्य युगानयुग रवे। आमेन।

12 [c]हाव ने सिलवानुस क हात, जिनाक हाव विश्वासयोग्य भाईस समझता छे, संक्षेप मा लिखीन तुमू समझाड्या छे, आरू यो गवा देदी छे कि यहोवा–भगवान क सच्चा फोकटन दया छे, इनी मा स्थिर रयो।

13 [d]जो बेबीलोन मा तुमरे समान त्योन्या होया मानसे छे, वो आरू मारो पोर्‍य मरकुस तुमूक नमस्कार कोवतो छे। 14 मोंग क गोवे लागाड़ ने छे एक दिसरा क नमस्कार करू।

तुमू सब क, जो मसीह मा होय, शांती मिवती रवे।

<- 1 पतरस 4