1 Eyıt'à sèot'ı̨ı̨, Nǫ̀htsı̨ etegoòɂı̨ wek'èts'eezǫ ne t'à dıı haehsı̨į̀ naxıghǫnàdaehtì: Naxızhį̀į̀ hazǫǫ̀ t'à Nǫ̀htsı̨ ghàdeahtè eyıts'ǫ wegha zǫ aahda. Degaı k'ę̀ę̀ aahda welè, Nǫ̀htsı̨ wınì k'ę̀ę̀ hoahtsı̨ welè. Haaht'e nı̨dè Nǫ̀htsı̨ wegha nezı̨į̀ k'ehoahɂa ha hǫt'e. 2 Dıı nèk'e dǫ dànì geedaa sìı gık'ę̀ę̀ k'ehoahɂa-le, hanìkò naxınì eładı̨į̀ adlà k'ę̀ę̀ aahda. Hanì-ı̨dè Nǫ̀htsı̨ ayìı wınì k'ę̀ę̀ ne sìı deghàà wek'èahsǫǫ̀ aahde ha. Nǫ̀htsı̨ ayìı wegha nezı̨ı̨ xè degaı ne sìı, eyıts'ǫ ayìı wegha sìghà ne sìı wek'èahsǫǫ̀ aahde ha.

3 Nǫ̀htsı̨ wesǫnıwǫ seghǫ̀t'ǫ wedahxà naxıts'ǫ̀ dıı haehsı̨: T'asìı deè ats'ı̨ı̨t'e dahwhǫ t'à deɂǫ̀ǫ̀ edeghǫ nànıahdè-le, hanìkò ehkw'ı edeghǫ nànıahdè. Nǫ̀htsı̨ naxınì dànàı̨htsoò ayį̀į̀là k'ę̀ę̀ edeghǫ nànıahdè. 4 Goxı̨ hazǫǫ̀ gozhį̀į̀ ı̨łè zǫ gǫ̀hłı̨ hanìkò wets'ǫ t'asìı łǫ gok'e whela hǫt'e. Eyı t'asìı gok'e whelaa sìı hazǫǫ̀ ełèht'eè eghàlageeda nıìle. 5 Goxı̨ Zezì-Krı wexè ats'ı̨ı̨t'ee sìı goxè hagǫ̀ht'e. Goxı̨ łǫ ts'eet'eè ats'ı̨ı̨t'e kò gozhį̀į̀ ı̨łè zǫ lanì, eyıts'ǫ ełets'ǫ ats'ı̨ı̨t'e. 6 Wesǫnıwǫ ts'ıhɂǫ̀ goxı̨ hazǫǫ̀ t'asìı wet'à-ats'et'ı̨ ha Nǫ̀htsı̨ goghàyı̨ı̨la hǫt'e. Dǫ Yedàyeh Nezı̨ı̨ dahxà xàyahtı ha weghàhòt'ǫ nı̨dè wınì dànàı̨htsoo sìı k'ę̀ę̀ yet'àwet'į̀. 7 Dǫ ts'àdı ha weghàhòt'ǫ nı̨dè yek'ę̀ę̀ eghàlaıdà. Dǫ hoghàehtǫ ha weghàhòt'ǫ nı̨dè yek'ę̀ę̀ eghàlaıdà. 8 Dǫ wınì nàtsoò ayele ha weghàhòt'ǫ nı̨dè, yek'ę̀ę̀ eghàlaıdà. T'asìı t'à dǫ ts'àdı ha weghàhòt'ǫ nı̨dè ededzeè t'à yek'ę̀ę̀ eghàlaıdà. K'àowo elı̨ ha weghàhòt'ǫ nı̨dè yek'ę̀ę̀ hòtł'ò eghàlaıdà. Dǫ ts'ǫ̀ wedzeè eteèɂı̨ ha weghàhòt'ǫ nı̨dè wınà xè yek'ę̀ę̀ eghàlaıdà.

9 Naxıdzeè t'à dǫ ghǫnıahtǫ. Hołı̨ı̨-nàowoò sìı wedzaahwhǫ, hanìkò t'asìı ehkw'ı xè nezı̨ı̨ sìı wedeahchı-le. 10 Ełèot'ı̨ lanì naxıdzeè t'à ełeghǫnıahtǫ. Edenahk'e dǫ eyıì-le gıt'àhoòɂà dahwhǫ ha hǫt'e. 11 Naxınì nàtso-le awede-le, hanìkò gots'ǫ̀ K'àowo wegha hòtł'ò eghàlaahda. 12 Įdaà naxıxè sìghà hòɂǫ ha t'à naxınà welè, naxıgha hoìla nı̨dè wexè ts'èwhı̨į̀ aahda eyıts'ǫ t'aats'ǫǫ̀ yaahtı. 13 Nǫ̀htsı̨ wets'ǫ dǫ etegeèt'ı̨ı̨ sìı t'asìı t'à gıts'àahdı. T'aats'ǫǫ̀ dǫ gha enìxànı̨ı̨tǫ aahwhǫ.

14 Dǫ danaxegį̀ı̨hɂaa sìı gıgha yaahtı; gıts'ǫ̀ hoìla agode ha dahwhǫ-le hanìkò gıts'ǫ̀ nezı̨į̀ aahdı. 15 Dǫ gınà nı̨dè, gıxè naxınà welè. Dǫ ts'ǫǫ̀gı̨ı̨wǫ nı̨dè gıxè ts'ǫǫ̀dahwhǫ. 16 Ts'èwhı̨į̀ ełexè aahda. Xàhoahdì-le. Dǫ t'asìı gı̨ı̨lı̨-le sìı gıxè aaht'ı̨. Gınahk'e ats'ı̨ı̨t'e dahwhǫ-le.

17 Dǫ naxıts'ǫ̀ hojıı eghàlageeda nı̨dè ek'èt'à gıts'ǫ̀ hojıı eghàlaahda-le. Dǫ hazǫǫ̀ gıgha ayìı ehkw'ıı sìı hotıì wek'ę̀ę̀ weghàlaahda. 18 Naxıgha dìì-le nı̨dè, eyıts'ǫ naxıts'ǫ̀ hoèlı̨ nı̨dè dǫ hazǫǫ̀ gıxè ts'èwhı̨į̀ aahda. 19 Seàgı̨ą, ek'èt'à dǫ gıts'ǫ̀ hojıì eghàlaahda-le. Nǫ̀htsı̨ ededı̨ dǫ nàgoehkwa ha wets'ǫ̀ hoèlı̨į̀ aahłe. Dıı hanì dek'eèhtł'è: “Sı̨ sìı dǫ ayìı dàgı̨ı̨laa k'èxa hoìla gıghàhoehɂà ha,” gots'ǫ̀ K'àowo hadı, dek'eèhtł'è. 20 Hanìkò dıı haaht'ı̨ ha hǫt'e: