1 Eyı tł'axǫǫ̀ Zezì kǫ̀ta yàgòlaa gota k'etło. Nǫ̀htsı̨ Wenàowoò wegodıì nezı̨ı̨ t'à dǫ hoghàehtǫ. Wecheekeè hoònǫ-daats'ǫ̀-nàke gıxè at'ı̨. 2 Eyıts'ǫ ts'èko mǫ̀hdaa ı̨nìłı̨ı̨ eyıts'ǫ tàda t'à eyagı̨ı̨lè t'à k'aàt'ıì agejàa sìı goxè aget'ı̨. Ts'èko ı̨łè Mary wìyeh (Madlę̀ sı wìyeh) ı̨nìłı̨ı̨ łǫ̀hdı̨ wets'ǫǫ̀ xàèdee sìı eyı sı goxè at'ı̨. 3 Dǫ Cuza wìyeh, k'àowocho Herod wekǫ̀ gogha k'àowo elı̨, eyı wets'èkeè Joanna eyı sı goxè at'ı̨. Ts'èko Susanna eyıts'ǫ eyıì-le ts'èko łǫ, t'asìı gıts'ǫ sìı t'à Zezì eyıts'ǫ wecheekeè ts'àgı̨ı̨dì.

4 Kǫ̀ta hazǫǫ̀ yàgòlaa gots'ǫ dǫ łǫ Zezì ts'ǫ̀ ełègı̨ı̨de ekò Zezì nànıts'ewoo godıì t'à goxè godo, hadı, 5 “Dǫ ı̨łè wet'à t'asìı dehshee dèè k'e nèyı̨ı̨la. Wet'à t'asìı dehshee dèè k'e ts'ǫ̀ yeehdè ekò mǫ̀hdaa tı̨lı k'e nàı̨tł'ı. Dǫ gık'e k'edè eyıts'ǫ chı̨ą sı gı̨ı̨ɂà. 6 Wet'à t'asìı dehshee mǫ̀hdaa kwe ta nàı̨tł'ı. Xànı̨ı̨shǫ ekò tı whìle t'à whegǫǫ̀ ajà. 7 Mǫ̀hdaa ı̨chį̀ghoò ta nàı̨tł'ı t'à ełexè dèhshǫ; ı̨chį̀ghoò yeɂǫ̀ǫ̀ nànı̨ı̨htso t'à ełaı̨dè. 8 Hanìkò mǫ̀hdaa dèè nezı̨ı̨ k'e nàı̨tł'ı. Nezı̨į̀ dèhshǫ eyıts'ǫ t'aàtłǫ dèè k'e nàı̨tł'ıı sìı ı̨łèakw'eènǫ ts'ǫ̀ deɂǫ̀atłǫ xànı̨ı̨shǫ,” gòhdıì goxè godo.

Eyı tł'axǫǫ̀ Zezì dǫ ts'ǫ̀ hòtł'ò hadı, “Amìı wedzıì gǫ̀hłı̨ı̨ sìı eèhkw'ǫ welì,” gòhdı.

9 Eyı tł'axǫǫ̀ Zezì wecheekeè dageehke, “Eyı godı sìı ayìı awį̀ı̨dı?” gıìhdı. 10 Eyıt'à Zezì gots'ǫ̀ hadı, “Naxı̨ sìı Nǫ̀htsı̨ Wenàowoò k'ę̀ę̀ hòɂǫǫ k'èahsǫ ha naxıghàhòt'ǫ hǫt'e, hanìkò dǫ eyıì-le sìı godı t'à gıxè gohdo.

16 “Dǫ wı̨ı̨zìı tłeèk'ǫ̀ǫ yìhtła gà tǫ tł'a nèyeechı nıìle, hanì-le-ı̨dè daèhte tł'a nèyeechı nıìle, hanìkò ı̨dòo dawheɂǫǫ̀ ayehɂı̨. Hanì-ı̨dè dǫ goyageedèe sìı wet'à gıgha dzęh ha. 17 T'asìı deɂı̨į̀ wheɂǫǫ sìı ts'ǫwheɂǫǫ̀ ade ha eyıts'ǫ dǫ naàhtǫ dàts'et'ı̨ı̨ sìı wègoèt'į̀ ha. 18 Eyıt'à hotıì nezı̨į̀ aàhkw'o. Amìı t'asìı łǫ wets'ǫ sìı eyı weɂǫ̀atłǫ weghàzhe ha. Hanìkò amìı t'asìı wets'ǫ-le sìı t'asìı łǫ-lea wets'ǫ sìı eyı kò weghǫ ìchı ha hǫt'e,” Zezì gòhdı.

19 Zezì wemǫ eyıts'ǫ wechı gıts'àwhede, hanìkò dǫ łǫ t'à wets'ǫ̀ nıwà-le agede ha dìì. 20 Dǫ ı̨łè Zezì ts'ǫ̀ hadı, “Nemǫ eyıts'ǫ nechı mǫ̀ht'a nàgeèhza, negeɂį̀ ha gı̨ı̨wǫ,” yèhdı.

21 Zezì yets'ǫ̀ hadı, “Amìı Nǫ̀htsı̨ yatıì egıìkw'oo xè gık'ę̀ę̀ edaa sìı semǫ eyıts'ǫ sechı lagı̨ı̨t'e,” yèhdı.

22 Įłàà Zezì edecheekeè ts'ǫ̀ hadı, “Įnǫ̀ǫ̀ nats'ııɂè.” Eyıt'à elà yìı gı̨ı̨de gà nageèɂe. 23 Ekǫ gıaɂò ekò Zezì dètı̨. Hǫtsaa gıxè nı̨hts'ı nàtsoo hoòwo eyıts'ǫ elà yìı tı łǫ ajà, eyıt'à sıì gıxè hoejı̨į̀ agòjà.

24 Zezì wecheekeè ts'ıgį̀ı̨hwho, hagıìhdı, “K'àowo, K'àowo, tı t'à ełaàts'ede ha nìkw'o.”

Zezì nıìtła gà nı̨hts'ı eyıts'ǫ taatı̨į̀ ts'ǫ̀ gode hadı, “Ts'èwhı̨į̀ aahde!” gòhdı. Eyıt'à nı̨hts'ı whìle agòjà eyıts'ǫ tı sı nàeda-le ajà. Hazǫǫ̀ gımǫǫ̀ goòɂàa ts'ǫ̀ ts'èwhı̨į̀ agòjà. 25 “Dànìghǫ Nǫ̀htsı̨ ghǫ naxınì nàtso-le?” Zezì edecheekeè gòhdı.

Gıgha enıìyah xè geèhyeh t'à ełets'ǫ̀ hagedı, “Dıı amìı ne? Nı̨hts'ı eyıts'ǫ taatı̨į̀ kò gık'į̀ı̨t'e,” gedı.

26 Zezì eyıts'ǫ wecheekeè Gerasene nèk'e ts'ǫ̀ geèɂe. Galılee nèk'e gotadà agǫ̀ht'e. 27 Zezì tàèhtła ekò eyı kǫ̀ta gots'ǫ dǫ ı̨nìłı̨ı̨ łǫ wets'ǫ̀-èlı̨ yeghǫ nììtła. Eyı dǫ whaà gots'ǫ goht'ǫ yìı̨dà-le eyıts'ǫ kǫ̀ goyìı nàı̨dè-le, kwe yìı dǫkw'ǫǫ̀ whelaa ta nàdè. 28 Zezì eɂı̨ ekò hòtł'ò whezeh gà yekè gà nàgòı̨hgè, ezeh xè hadı, “Zezì, Nǫ̀htsı̨ wenahk'e gǫ̀hłı̨-le Weza, ayìıha sek'alaąwo. Hoìla ası̨ı̨le-le neghǫnàdaehtì,” yèhdı. 29 Zezì dǫ yìı gots'ǫ ı̨nìłı̨ı̨ xàyeèhɂà t'à adı. Įnę̀ę ı̨nìłı̨ı̨ goı̨tłǫ yek'alaı̨wo. Hat'ı̨ taàt'eè eyı dǫ wılà eyıts'ǫ wekechı̨į̀ satsǫ̀tł'ıì t'à deetł'ı̨į̀ agehɂı̨ ı̨lè. Dǫ gıxoehdı kò satsǫ̀tł'ıì tàyeehdlà gà ı̨nìłı̨ı̨ gowhatsǫǫ̀ gòɂǫǫ ts'ǫ̀ nadeyeezhı.

30 Zezì dayeehke, “Dànìyeh?”

Dǫ yets'ǫ̀ hadı, “ ‘Łǫ’ sìyeh!” yèhdı. Įnìłı̨ı̨ łǫ wets'ǫ̀-èlı̨ ts'ıhɂǫ̀ adı. 31 Įnìłı̨ı̨ k'èdaà Zezì ghǫnàdageetì, edı̨į̀ ı̨nìłı̨ı̨ dagı̨ı̨ɂaa sìı ts'ǫ̀ agole ha gı̨ı̨wǫ-le t'à.

32 Ekìıyeè k'e shìhka gogòò łǫ shègezhe ı̨lè. Zezì ı̨nìłı̨ı̨ gogòò yìı agole ha Zezì ghǫnàdageetì. Eyıt'à gogòò yìı gı̨ı̨deè agǫ̀ǫ̀là. 33 Įnìłı̨ı̨ dǫ yìı gots'ǫ xàgı̨ı̨de gà gogòò yìı gı̨ı̨de. Gogòò hazǫǫ̀ shìh dagǫǫwà gots'ǫ ı̨zhıì hodàgoòɂa ts'ǫ̀ łegeèhza t'à tı yìı ełaàgı̨ı̨dè.

34 Dǫ gogòò k'ègedìı sìı hagòjà gıaɂı̨ t'à natı̨mǫgeèhde. Gıxè dàgòjàa sìı kǫ̀ta yàgòlaa hazǫǫ̀ dǫ ts'ǫ̀ hagedı. 35 Dǫ hazǫǫ̀ ekǫ dàgòjàa sìı geɂį̀ ha gı̨ı̨wǫ t'à ekǫ geède. Zezì ghǫnègı̨ı̨de ekò eyı dǫ ı̨nìłı̨ı̨ weyìı gots'ǫ xàèdee sìı Zezì gà wheda gıaɂı̨. Goht'ǫ yìı wheda xè wınì k'aàt'ıì ajà, eyıt'à dǫ hazǫǫ̀ geèhyeh. 36 Dǫ ı̨nìłı̨ı̨ wets'ǫ̀-èlı̨ı̨ sìı dànì dǫ gınadąą̀ k'aàt'ıì ajàa sìı eyı godı t'à dǫ hazǫǫ̀ xè gogıado. 37 Ekǫ Gerasene nèk'e gots'ǫ dǫ hazǫǫ̀ sıì geèhyeh t'à Zezì gots'ǫǫ̀ awede gıìhdı. Eyıt'à Zezì wecheekeè nàgedè, elà yìı nagı̨ı̨de.

38 Dǫ ı̨nìłı̨ı̨ wets'ǫǫ̀ xàèdee sìı Zezì ghǫnàdaetì, hadı, “Nexè awehde,” yèhdı. Hanìkò Zezì ek'èt'à nayeèhɂà, hayèhdı, 39 “Nekǫ̀ ts'ǫ̀ anaąde. Nǫ̀htsı̨ ayìı negha dàyį̀į̀làa sìı eyı hazǫǫ̀ t'à dǫ xè goı̨do,” yèhdı. Eyıt'à eyı dǫ kǫ̀ta ts'ǫ̀ naèhtła, dànì Zezì yets'àı̨dıı sìı yet'à dǫ hazǫǫ̀ xè godo.

40 Zezì tı te nǫǫ̀geèɂe ekò dǫ łǫ gıdanaèhɂı̨ ı̨lè t'à, gınà xè gıts'ǫ̀-ède. 41-42 Dǫ ı̨łè Jaırus wìyeh, ełègehdèe-kǫ̀ gha k'àowo elı̨, Zezì gà nììtła, yekè gà nàgòı̨hgè. Wetì ı̨łàet'ea hoònǫ-daats'ǫ̀-nàke weghoò ełaàdaawı t'à, Zezì yekǫ̀ naetła ha yeghǫnàdaetì.

Zezì ekǫ naetłe ekò wemǫǫ̀ sıì dǫ łǫ t'à k'àhdzǫ ełègį̀ı̨htso-t'e. 43 Ts'èko ı̨łè goxè at'ı̨ı̨ sìı hoònǫ-daats'ǫ̀-nàke xo haı̨wa gots'ǫ edoò weɂǫ̀-at'ı̨ t'à eyaelı̨, hanìkò dǫ wı̨ı̨zìı k'aàt'ıì ayele ha dìì. 44 Zezì chį̀ht'a nììtła xè yeɂeè welǫ daachì. Ekòet'ıì wedoò whìle ajà.

45 Zezì hadı, “Amìı daseachì?” Dǫ gımǫǫ̀ nàgeèhzaa sìı “Danets'aachì-le,” gıìhdı. Peter hayèhdı, “Sets'ǫ̀ K'àowo, dǫ łǫ nemǫǫ̀ nàgeèhza xè nek'e ts'ǫ̀ ełegeehtsı,” yèhdı.

46 Hanìkò Zezì hadı, “Dasets'aachì wek'èehsǫ ne, t'asìı nàtsoo seyìı gots'ǫ xànıwo ne t'à,” yèhdı.

47 Eyı ts'èko ajàa sìı wegòt'à ha yek'èezǫ t'à dejı̨ xè Zezì gà nàgoį̀hgè. Dànìghǫ yeɂeè daachì eyıts'ǫ dànì ekòet'ıì yet'à k'aàt'ıì ajàa sìı dǫ hazǫǫ̀ gıdaà Zezì ts'ǫ̀ hadı. 48 Zezì yets'ǫ̀ hadı, “Ts'èko, negha ehkw'ı-ahodı t'à k'aàt'ıì anejà. Naı̨tłe, nexè sìghà welè,” yèhdı.

49 Įłaà Zezì gode ekò Jaırus ełègehdèe-kǫ̀ gha k'àowo sìı wekǫ̀ gots'ǫ dǫ eyı nììtła. Jaırus ts'ǫ̀ hadı, “Netì ełaı̨wo. Gots'ǫ̀ K'àowo nekǫ̀ nàwetła-le kò,” yèhdı.

50 Zezì dǫ hadıì yıìkw'o ekò Jaırus ts'ǫ̀ hadı, “Nı̨ı̨jı̨-le! Negha ehkw'ı-ahodı zǫ welè, hanì-ı̨dè netì k'aàt'ıì ade ha,” yèhdı.

51 Zezì Jaırus wekǫ̀ nègı̨ı̨de ekò dǫ wı̨ı̨zìı edexè ayį̀į̀là-le; wecheekeè Peter, John, James, eyıts'ǫ t'eekoa wetà eyıts'ǫ wemǫ eyı haàtłǫǫ zǫ yexè goyageèdeè agǫ̀ǫ̀là. 52 Zezì goyaèhtła ekò dǫ łǫ t'eekoa ghǫ hòtł'ò getse. Zezì gots'ǫ̀ hadı, “Aahtse-le! Ełaı̨wo nıìle, ekìı whetı̨ hǫt'e,” gòhdı.

53 T'eekoa hòt'a ełaı̨wo gık'èezǫ t'à dǫ gıghaedlò. 54 Hanìkò Zezì t'eekoa wılà nıìchì gà yets'ǫ̀ hadı, “T'eekoa nıį̀tła!” yèhdı. 55 Eyı t'eekoa edaà anajà, ekòet'ıì nıìtła. Eyı tł'axǫǫ̀ Zezì hadı, “Yeghǫ shètı̨ weghàahdı,” gòhdı. 56 Wetà eyıts'ǫ wemǫ gıgha enıìyah dìì. Hanìkò Zezì gots'ǫ̀ hadı, “Naxıxè dàgòjàa sìı dǫ wı̨ı̨zìı ts'ǫ̀ haahdı-le,” gòhdı.

<- Luke 7Luke 9 ->