1 Ekìıyeè k'e dıı nèk'e dǫ hazǫǫ̀ yatı ı̨łè zǫ t'à gogede ı̨lè, eyıt'à dǫ hazǫǫ̀ ełegıìkw'o ı̨lè. 2 Dǫ sa kàɂàa ts'ǫnèe k'ehogehde ekò dèè wek'e shìh gǫ̀hłı̨-le k'e nègı̨ı̨de. Ekǫ nàgedè agejà.

3 Ełets'ǫ̀ hagedı, “Ehtł'è kwe lade gha kwe-satsǫ̀ yìı hòtł'ò et'è ats'ııle,” gedı. Kwe tàet'aa t'à aget'ı̨-le, hanìkò kwe whet'ee t'à aget'ı̨. Eyıts'ǫ kwedzeè t'à kwe ełexıìht'eè agehɂı̨ t'à t'asìı gehtsı̨. 4 Eyı tł'axǫǫ̀ k'achı̨ ełets'ǫ̀ hagedı, “Edegha kǫ̀godeè gots'ıhtsı̨, eyıts'ǫ yayıhòłèe yat'a xèedìı gots'ıhtsı̨. Hanì-ı̨dè goızì nechàa edegha ts'ehtsı̨ ha, eyıts'ǫ hazǫǫ̀ nèk'e ts'ǫ̀ ehkèts'edè ha-le,” gedı.

5 Hanìkò gots'ǫ̀ K'àowo gots'ǫ̀ ı̨zhıì ajà, kǫ̀godeè gogehtsı̨ı̨ sìı ghàı̨dà, eyıts'ǫ yayıhòłèe sı ghàı̨dà. 6 Gots'ǫ̀ K'àowo hadı, “Dǫ ı̨łè xàɂaa agı̨ı̨t'e xè hazǫǫ̀ yatı ı̨łè zǫ t'à gogede. Eyı hanì eghàlageeda ha dìì-le nı̨dè t'asìı wı̨ı̨zìı gıgha dìì gǫ̀hłı̨ ha nıìle. 7 Gıts'ǫ̀ ats'ııde, gıyatıì eładı̨ı̨ xàɂaa ats'ııle, hanì-ı̨dè ełegıìkw'o ha-le,” hadı.

8 Eyıt'à gots'ǫ̀ K'àowo sìı dıı nèk'e hazǫǫ̀ ts'ǫ̀ dǫ ehkègı̨ı̨deè agǫ̀ǫ̀là, eyıt'à eyı kǫ̀godeè ghǫ nagı̨ı̨t'e-le. 9 Gots'ǫ̀ K'àowo dǫ gıyatıì eładı̨ı̨ xàɂaa ayį̀į̀là t'à eyı kǫ̀godeè sìı Babel gòyeh ajà. Ekǫ gots'ǫ sìı gots'ǫ̀ K'àowo dıı nèk'e hazǫǫ̀ ts'ǫ̀ dǫ ehkègı̨ı̨deè agǫ̀ǫ̀là.

10 Dıı sìı Shem wegodıì hǫt'e:

Tı dèè goteètł'ı gots'ǫ nàke xo k'ehǫǫwo eyıts'ǫ Shem ı̨łèakw'eènǫ weghoò ekò weza Arfakad wegǫ̀hłı̨. 11 Weza Arfakad wegǫ̀hłı̨ tł'axǫǫ̀ Shem sı̨làekw'eènǫ (500) weghoò ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

12 Arfakad taènǫ-daats'ǫ̀-sı̨làı (35) weghoò ekò weza Shelah wegǫ̀hłı̨. 13 Weza Shelah wegǫ̀hłı̨ tł'axǫǫ̀ Arfakad dı̨akw'eènǫ-daats'ǫ̀-taı (403) xo ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

14 Shelah taènǫ weghoò ekò weza Eber wegǫ̀hłı̨. 15 Weza Eber wegǫ̀hłı̨ tł'axǫǫ̀ Shelah dı̨akw'eènǫ-daats'ǫ̀-taı (403) xo ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

16 Eber taènǫ-daats'ǫ̀-dı̨ (34) weghoò ekò weza Peleg wegǫ̀hłı̨. 17 Wezaa Peleg wegǫ̀hłı̨ tł'axǫǫ̀ Eber dı̨akw'eènǫ-daats'ǫ̀-taènǫ (430) xo ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

18 Peleg taènǫ weghoò ekò weza Reyu wegǫ̀hłı̨. 19 Weza Reyu wegǫ̀hłı̨ tł'axǫǫ̀ Peleg nàkeakw'eènǫ-daats'ǫ̀-łǫǫ̀tǫ (209) xo ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

20 Reyu taènǫ-daats'ǫ̀-nàke (32) weghoò ekò weza Serug wegǫ̀hłı̨. 21 Weza Serug wegǫ̀hłı̨ tł'axǫǫ̀ Reyu nàkeakw'eènǫ-daats'ǫ̀-łǫ̀hdı̨ (207) weghoò ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

22 Serug taènǫ weghoò ekò weza Nahor wegǫ̀hłı̨. 23 Wezaa Nahor wegǫ̀hłı̨ tł'axǫǫ̀ Serug nàkeakw'eènǫ (200) weghoò ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

24 Nahor naènǫ-daats'ǫ̀-łǫǫ̀tǫ (29) weghoò ekò wezaa Terah wegǫ̀hłı̨. 25 Wezaa Terah wegǫ̀hłı̨ tł'axǫǫ̀ Nahor ı̨łèakw'eènǫ-daats'ǫ̀-hoònǫ-daats'ǫ̀-łǫǫ̀tǫ (119) weghoò ts'ǫ̀ ı̨dà. Weza eyıì-le łǫ gòı̨lè eyıts'ǫ wetì sı łǫ gòı̨lè.

26 Terah łǫ̀hdı̨ènǫ weghoò tł'axǫǫ̀ weza taı gòı̨lè; Abram, Nahor eyıts'ǫ Haran gıgǫ̀hłı̨.

27 Dıı sìı Terah wegodıì hǫt'e:

Terah weza taı gǫ̀hłı̨, Abram, Nahor eyıts'ǫ Haran gìyeh. Haran ededı̨ sìı Lot wetà hǫt'e. 28 Haran wetà Terah ı̨łaà eda et'ıì Haran kǫ̀godeè Ur gòyeh ełaı̨wo. Ekǫ Kaldea got'ı̨į̀ gınèk'e wegǫ̀hłı̨ ı̨lè. 29 Abram eyıts'ǫ Nahor į̀łah hoget'ı̨ ı̨lè. Abram wets'èkeè Sarayı wìyeh, eyıts'ǫ Nahor wets'èkeè Mılkah wìyeh. Eyı ts'èko sìı Haran wetì hǫt'e. Haran sìı Mılkah eyıts'ǫ Iskah gıtà hǫt'e. 30 Sarayı chekoa wets'ǫ ha dìì t'à weza gǫ̀hłı̨-le.

31 Terah edeza Abram, eyıts'ǫ edekwı Lot (Haran weza) eyıts'ǫ weza ts'èkeè Sarayı edexè goòwa. Kanan nèk'e ts'ǫ̀ agede ha gı̨ı̨wǫ t'à Kaldea got'ı̨į̀ gınèk'e kǫ̀godeè Ur gòyeh gots'ǫǫ̀ xàgeède. Hanìkò kǫ̀godeè Haran gòyeh ts'ǫ̀ nègı̨ı̨de ekò ekǫ nàgedè agejà.

32 Terah nàkeakw'eènǫ-daats'ǫ̀-sı̨làı (205) weghoò ts'ǫ̀ ı̨dà, eyı tł'axǫǫ̀ kǫ̀godeè Haran ekǫ ełaı̨wo.

<- Dànì Kèhoį̀wo 10Dànì Kèhoį̀wo 12 ->