1 Italy nèk'e ts'ǫ̀ ts'eeɂè ha gedı t'à, Paul eyıts'ǫ dǫ gıdanìı̨laa mǫ̀hdaa eghǫǫ-dǫǫ̀-gha-k'àowo ı̨łè, Julıyus wìyeh, wetł'aà nègogį̀ı̨wa. Ededı̨ sìı dèe-ts'ǫ̀-k'àowo gha eghǫǫ-dǫǫ̀-gha-k'àowo elı̨. 2 Kǫ̀ta Adramaton gots'ǫ elàcho yìı ts'ı̨ı̨de. Asıa nèk'e tıchobàa kǫ̀ta yàgòlaa sìı ts'ǫ̀ ts'eeɂè ha nìkw'o t'à elàcho tak'è ts'ǫ̀ agı̨į̀là. Dǫ ı̨łè Arıstarchus wìyeh, Macedonıa nèk'e kǫ̀ta Thessalonıca gots'ǫ dǫ goxè ajà.

3 Ek'èdaedzęę̀ k'e kǫ̀ta Sıdon nèts'ı̨ı̨ɂe. Eghǫǫ-dǫǫ̀-gha-k'àowo Paul ts'ǫ̀ dǫ nezı̨ı̨ elı̨. Paul weàgı̨ą nezı̨į̀ gık'èdì ha nıwǫ t'à, edeàgı̨ą gots'àèhtłaà ayį̀į̀là. 4 Whaà-le-t'ıì k'achı̨ elàcho yìı nats'ı̨ı̨de gà nats'eèɂe. Sıì nı̨hts'ı nàtso t'à dı nechàa Cyprus wìyeh weecha ts'eèɂe, ekǫ nı̨hts'ı nàtso-le. 5 Cılıcıa nèk'e eyıts'ǫ Pamphylıa nèk'e gıxa tıdeè te ts'eèɂe, Lycıa nèk'e kǫ̀ta Myra gòyeh dàts'eède. 6 Ekǫ t'aa eghǫǫ-dǫǫ̀-gha-k'àowo elàcho Italy nèk'e ts'ǫ̀ deɂè ha yegòį̀hɂǫ. Eyıt'à eyı elàcho yìı goı̨wa. 7 Sıì nı̨hts'ı nàtso xè gonìhdǫǫ̀ nawhets'ı t'à, łǫ dzęę̀ ts'ǫ̀ tı k'e ı̨whąą̀ ats'ı̨ı̨t'į̀-le. Įkaa-t'a kǫ̀ta Cınıdus ts'ǫ̀ gǫǫwà-lea nèts'ı̨ı̨ɂe whìle. Edı̨į̀ ts'ǫ̀ ats'et'ı̨ ı̨lèe sìı ekǫ ats'ede ha dìì t'à kǫ̀ta Salmone goxa ts'eèɂe, eyıts'ǫ dı nechàa Crete wìyeh weecha ts'eèɂe. 8 Dèè wek'abàa goxè k'etaetı̨ t'à ı̨kaa-t'a ts'aɂò whìle. Kǫ̀ta Faır Havens gòyeh ts'ǫ̀ nèts'ı̨ı̨ɂe, kǫ̀ta Lasea ts'ǫ̀ gǫǫwà-le hǫt'e.

9 Goxè whaà hoòwo eyıts'ǫ xat'ǫ̀ k'e edets'egǫǫ dzęę̀ te hoòwo ne t'à elàcho t'à k'ets'edè ha hoejı̨į̀ agòjà. Eyıt'à Paul dǫ ts'ǫ̀ hadı, 10 “Àgı̨ą, elàcho t'à goxè hoejı̨į̀ agode ha wek'èehsǫ. Elàcho eyıts'ǫ t'asìı hazǫǫ̀ weyìı whelaa sìı wedıhołè ha sǫnı, eyıts'ǫ goxı̨ kò t'asats'ede ha sǫnı,” gòhdı. 11 Hanìkò eghǫǫ-dǫǫ̀-gha-k'àowo yeèhkw'ǫ ha nıwǫ-le, elàcho k'èdìı elı̨ı̨ eyıts'ǫ dǫ elàcho wets'ǫ ne sìı goyatıì k'èı̨t'e. 12 Eyı kǫ̀ta sìı goxè xo hoowı ha nezı̨-le gedı t'à dǫ deɂǫ̀atłǫ ı̨daà nats'ııɂè gedı. Kǫ̀ta Phoenıx ts'ǫ̀ nèts'ııɂè gı̨ı̨wǫ, ekǫ goxè xo hoowı ha gı̨ı̨wǫ. Eyı kǫ̀ta dı Crete wìyeh k'e gòɂǫǫ sìı dą̀ą ts'ǫnèe naɂa.

13 Sazı̨ gots'ǫ yaazea nawhets'ıì agòjà t'à dǫ gınà, eyıt'à tègozè tekàgıachì gà dı nechàa Crete gòyeh wexa nageèɂe. 14 Eyıgots'ǫ whaà-le-t'ıì nı̨hts'ı deè “chı̨k'è-k'àbatsǫ̀ǫ̀ nı̨hts'ı” wìyeh, dı nechàa gots'ǫ nawhets'ıì agòjà. 15 Elàcho k'eweehts'ı t'à nı̨hts'ı dàà ts'eeɂè ha dìì, ats'ııde whìle t'à elàcho goxè k'eweehts'ıì ats'ı̨į̀là. 16 Dı nechà-lea Cauda wìyeh weecha ts'eèɂe. Elà nechà-lea edexè k'ets'etı̨ı̨ sìı wedıhołè ch'à nezı̨į̀ nèts'etį̀ ha nàhots'eèhdè. 17 Elà nechà-lea elàcho k'e dageèhchı tł'axǫǫ̀, elàcho wetagotł'ì ha-le gı̨ı̨wǫ t'à tł'ı wemoèhdoò agı̨į̀là. Syrtıs nèk'e ekìıyeè tagoǫhwhàà-le t'à elàcho ewaà nììɂà k'e dahtła ha sǫnı gı̨ı̨wǫ. Eyıt'à ts'ımbàa ı̨dè tı yìı gıadlì, hanì elàcho gıxè k'eweehts'ıì agı̨į̀là. 18 Sıì nı̨hts'ı nàtso xè elàcho į̀hnǫǫ̀ k'eweehts'ı t'à ek'èdaedzęę̀ k'e t'asìı nedàa k'egelee sìı tègeèhde. 19 Taı dzęę̀ k'e elàcho wets'ǫ satsǫ̀ nedàa eyı kò tèe geèhde. 20 Edlaàtłǫ dzęę̀ ts'ǫ̀ sadeè eyıts'ǫ whǫ̀ ts'aɂı̨ whìle. Įłaà nı̨hts'ı nàtso t'à edaxàts'eedè ha gogha ı̨ka whìle lagòjà.

21 Whaà bò gıwàhǫǫdì-le tł'axǫǫ̀ Paul gots'ǫ̀ hadı, “Àgı̨ą, dı nechàa Crete gots'ǫǫ̀ ts'ııɂè-le naxèehsı̨ ekò seàhkw'ǫ-le ı̨lè. Sek'èaht'e nı̨dè t'asìı goghǫ wedıhołè ha-le ı̨lè eyıts'ǫ t'asìı tèts'ehdè ha-le ı̨lè. 22 Hanìkò dıì-gogha naxınì nàtsoò aahłe. Dǫ ı̨łàet'ee wı̨ı̨zìı wedıhołè ha nıìle, elàcho zǫ wedıhołè ha. 23 Įdìı toò k'e, Nǫ̀htsı̨ wets'ǫ̀ yahtı eyıts'ǫ wegha eghàlaehdaa sìı weyak'eet'ı̨į̀ segà nàwo ı̨lè, 24 hasèhdı, ‘Nı̨ı̨jı̨-le, Paul. Dèe-ts'ǫ̀-k'àowo Caesar wenadąą̀ nesınìyaetı ha. Nǫ̀htsı̨ etenèeɂı̨ t'à nı̨ eyıts'ǫ dǫ hazǫǫ̀ nexè aget'ı̨ı̨ sìı edaxànaxeehłe ha hǫt'e,’ yak'eet'ı̨į̀ sèhdı. 25 Eyıt'à, seàgı̨ą, naxınì nàtsoò aahłe. Nǫ̀htsı̨ dàgode ha sèhdıı sìı hotıì wek'ę̀ę̀ agode ha segha ehkw'ı hǫt'e. 26 Hanìkò elàcho dıa k'e, ewaà k'e dahtłaà ade ha,” Paul gòhdı.

27 Hoònǫ-daats'ǫ̀-dı̨ to tıcho Adrıatıc wìyeh wete ts'ǫ̀ k'egohts'ı. Totanı ekìıyeè dǫ elàcho k'ègedìı sìı dèè ts'ǫ̀ gǫǫwà-lea ats'ejà lagı̨ı̨wǫ. 28 Dàtagǫǫhwha gha tı k'ageèhtǫ t'à ı̨łèakw'eènǫ-daats'ǫ̀-naènǫ gokè haàtagǫǫhwha gıgòhɂǫ. K'achı̨ tı k'ageèhtǫ ekò łǫǫ̀tǫènǫ gokè haàtagǫǫhwhaà agòjà. 29 Kwe k'e ats'ede ha sǫnı gı̨ı̨wǫ t'à elàchotł'à gots'ǫ tègozè dı̨ tègı̨ı̨hde tł'axǫǫ̀ goxè dzęę̀ agode gha yats'ı̨ı̨htı. 30 Elàcho k'ègedìı sìı elàcho ch'à kwı̨geehdè ha gı̨ı̨wǫ t'à elà nechà-lea ı̨zhıì tı ts'ǫ̀ agį̀į̀là. Ekìı-hò elàchokwì gots'ǫ tègozè tègehdè ha laget'ı̨. 31 Eyıt'à Paul eghǫǫ-dǫǫ̀-gha-k'àowo ts'ǫ̀ hadı, “Eyı dǫ elàcho yìı geèhkw'e lenǫsıı edaxàahdè ha nıìle,” yèhdı. 32 Eyıt'à elà nechà-lea tł'ı t'à daetł'ı̨ı̨ sìı eghǫǫ-dǫǫ̀ gık'eı̨t'a gà elà tèe ts'ǫ̀ geèhde.

33 Dzęh agode kwe dǫ hazǫǫ̀ shègezhe ha, Paul gòhdı, eyıts'ǫ gots'ǫ̀ hadı, “Hoònǫ-daats'ǫ̀-dı̨ dzęę̀ naxıxè gots'eèdı t'à t'asìı wı̨ı̨zìı naxıwàhǫǫdì-le. 34 Eyıt'à dıì t'asìı naxıwàhodı ha, wet'à aahda ha. Dǫ wı̨ı̨zìı t'asade ha nıìle,” gòhdı. 35 Paul hadı tł'axǫǫ̀ dǫ hazǫǫ̀ godaà łèt'è nıìchì gà Nǫ̀htsı̨ ts'ǫ̀ masì dı. Łèt'è tàı̨zhì gà yı̨ı̨ɂà. 36 Dǫ hazǫǫ̀ gınì nàtsoò ajà eyıts'ǫ ededı̨ sı shègıazhe. 37 Hazǫǫ̀ t'à dǫ nàkeakw'eènǫ-daats'ǫ̀-łǫ̀hdı̨ènǫ-daats'ǫ̀-ek'ètaı (276) elàcho yìı dèhkw'e. 38 Dǫ hazǫǫ̀ nezı̨į̀ shègıazhe tł'axǫǫ̀ elàcho nedà gı̨ı̨wǫ t'à tł'olà ɂǫhchì elàcho yìı whelaa sìı tègeèhde.

39 K'omǫǫ̀dǫǫ̀ dzęh agòjà ekò dèè gògaat'ı̨ hanìkò edı̨į̀ agǫ̀ht'ee sìı nàgeèhzhį̀-le, tł'àà tabàa ewaà zǫ gıaɂı̨. Ekǫ elàcho ewaà k'e dahtłaà ats'ııle, gedı. 40 Tègozè wetł'ıì k'egı̨ı̨hwho gà tèe aìlaà agį̀į̀là. Eyıts'ǫ elàcho wetł'aht'oò tł'ı t'à daetł'ı̨ı̨ sìı ehjıgı̨ı̨ge. Eyı tł'axǫǫ̀ elàchokwì k'e ts'ımbàa ı̨dòo agı̨į̀là, hanì t'aa tabàa ts'ǫ̀ geèɂe. 41 Tàgeehɂè kwe elàcho ewaà k'e dahtła. Elàchokwì ewaà yìı ajà t'à nàeda-le ajà, eyıts'ǫ taatı̨į̀ nàtsoo wetł'à k'e at'ı̨ t'à wetaı̨tǫ̀.

42 Eghǫǫ-dǫǫ̀, dǫ danìı̨laa k'ègedìı sìı tèe ts'ǫ̀ kwı̨geehdè ha sǫnı gı̨ı̨wǫ t'à, ełaàgogìhde ha gı̨ı̨wǫ ı̨lè. 43 Hanìkò eghǫǫ-dǫǫ̀-gha-k'àowo Paul ełaàwı ha yı̨ı̨hwhǫ-le t'à t'asagogele ha-le, gòhdı. Dǫ k'egebe ha dìì-le sìı tèahka, tabàa ts'ǫ̀ naahmį̀, gòhdı. 44 Dǫ k'ebe ha dìì sìı dechı̨kàà hanì-le-ı̨dè elàcho wetaı̨tǫ̀ǫ daelee sìı yàahtǫ̀, gòhdı. Hanì t'aa dǫ hazǫǫ̀ tekàgı̨ı̨de, dǫ wı̨ı̨zìı tı t'à t'asajà-le.

<- Zezì Wecheekeèdeè 26Zezì Wecheekeèdeè 28 ->