1 Eyı hagòjà tł'axǫǫ̀ Paul kǫ̀ta Athens gots'ǫ kǫ̀ta Corınth ts'ǫ̀ ajà. 2 Ekǫ Israel got'ı̨į̀, Aquıla wìyeh, kǫ̀ta Pontus wegǫ̀hłı̨ı̨ sìı, yeghaetła. K'àowodeè Claudıus, weyatıì k'e Israel got'ı̨į̀ hazǫǫ̀ kǫ̀godeè Rome gots'ǫǫ̀ xàgeedè ha gòhdı. Eyıt'à Aquıla, edets'èkeè Prıscılla xè Italy nèk'e gots'ǫ eyı nègı̨ı̨de. Paul gots'àèhtła. 3 Paul, goxèht'eè nı̨hbàa-ehtsı̨ı̨-dǫǫ̀ elı̨ t'à goxè nàı̨dè eyıts'ǫ goxè eghàlaı̨dà. 4 Nǫ̀htsı̨ Dzęę̀ taàt'eè ełègehdèe-kǫ̀ dǫ ts'ǫ̀ gode, yatı t'à Israel got'ı̨į̀ eyıts'ǫ Greece got'ı̨į̀ goghǫdaehnè ha dahoèhdzà.

5 Sılas eyıts'ǫ Tımothy Macedonıa nèk'e gots'ǫ eyı nègı̨ı̨de ekò Paul dǫ hoghàehtǫǫ zǫ ts'ǫ̀-èlı̨ adììdlà. Israel got'ı̨į̀ ts'ǫ̀ gode, hadı, “Zezì Chrıst hǫt'e,” gòhdı. 6 Hanìkò Israel got'ı̨į̀ Paul k'èch'a gogede. Paul ehkw'ı aget'ı̨-le gık'èezǫ ha nıwǫ t'à edegoht'ǫǫ̀ yèhxo xè hagòhdı, “Naxı̨ edaxàahdè-le nı̨dè naxıt'à ha ne. Hòt'a sı̨ sets'ǫ̀ hoèlı̨ nıìle. Jǫ gots'ǫ ı̨daà dǫ eyıì-le xàɂaa gıts'ǫ̀ ahde ha,” gòhdı.

7 Eyıt'à Paul ełègehdèe-kǫ̀ gots'ǫǫ̀ xàèhtła. Įɂǫ̀ǫ̀ Tıtus-Justus, Nǫ̀htsı̨-ghàtsį̀edıı-dǫǫ̀ wekǫ̀ gòɂǫǫ ts'ǫ̀ ajà. 8 Crıspus, ełègehdèe-kǫ̀ gha k'àowo elı̨, eyıts'ǫ wekǫ̀ nàgedèe sìı hazǫǫ̀ Zezì gıgha ehkw'ı-ahodıì agejà. Eyıts'ǫ kǫ̀ta Corınth gots'ǫ dǫ łǫ gıìkw'oo sìı gıgha ehkw'ı-ahodı t'à gık'ètaìdzǫ.

9 Įłàà, to Paul wenazhıı xègoèht'į̀ t'à gots'ǫ̀ K'àowo yets'ǫ̀ gode, hayèhdı, “Nı̨ı̨jı̨-le, ı̨łaà dǫ gıts'ǫ̀ goı̨de ghǫ naąt'e-le. 10 Nexè aht'ı̨ ne. Sets'ǫ dǫ łǫ jǫ kǫ̀godeè nàgedè ne t'à dǫ wı̨ı̨zìı t'asanele ha nıìle,” yèhdı. 11 Eyıt'à Paul ı̨łè xo-daà-tanı ts'ǫ̀ eyı nàı̨dè. Nǫ̀htsı̨ weyatıì dǫ hoghàehtǫ.

12 Achaıa nèk'e Gallıyo k'àowo elı̨ ekò Israel got'ı̨į̀ ełets'àdageedı t'à Paul wesınìyaetıì agı̨į̀là. 13 Dǫ-sınìyaehtıı-dǫǫ̀ ts'ǫ̀ hagedı, “Dıı dǫ sìı, gonàowoò k'èch'a dǫ hoghàehtǫ. Nàowo eładı̨ı̨ k'ę̀ę̀ Nǫ̀htsı̨ ghàsǫgeedı ha, gòhdı,” gedı.

14 Paul gode ha nìkw'o ekò k'àowo Gallıyo, Israel got'ı̨į̀ ts'ǫ̀ hadı, “Israel got'ı̨į̀, dıı dǫ hoìla hòèhtsı̨ hanì-le-ı̨dè gonàowoò k'eı̨zhì nı̨dè naxeèhkw'ǫ ha ı̨lè. 15 Hanìkò naxınàowoò ghǫ aahdı nı̨dè naxı̨ edexè sıìgoahłe. Sı̨ hanıı nàowo wesınìyahtı ha nıìle,” gòhdı. 16 Nàyaetıı-kǫ̀ gots'ǫ xàgodeèzhì. 17 Eyıt'à dǫ hazǫǫ̀ Sostenes, ełègehdèe-kǫ̀ gha k'àowo elı̨ı̨ sìı, nàyaetıı-kǫ̀ gà dagıachì eyıts'ǫ gıkwǫ̀ǫyaà-gı̨į̀là. Hagòjà kò k'àowo Gallıyo gots'ǫ̀ nıɂà-le.

18 Paul whaà hoògǫ gots'ǫ̀ kǫ̀ta Corınth nàı̨dè. Eyı tł'axǫǫ̀ Nǫ̀htsı̨ wecheekeè gots'ǫǫ̀ naèhtła. Elàcho t'à Syrıa nèk'e ts'ǫ̀ ajà. Prıscılla eyıts'ǫ Aquıla gıxè ajà. Naeɂè kwe kǫ̀ta Cenchrea Nǫ̀htsı̨ ts'ǫ̀ yatı nàtsoo whehtsı̨ ı̨lè t'à, edekwìghà k'ı̨ı̨hwho. 19 Kǫ̀ta Ephesus nègı̨ı̨de ekò Paul, Prıscılla eyıts'ǫ Aquıla ekǫ gots'ǫǫ̀ naèhtła. Ededı̨ t'aa ełègehdèe-kǫ̀ ts'ǫ̀ ajà, ekǫ Israel got'ı̨į̀ ts'ǫ̀ goı̨de. 20 Paul ı̨łaà goxè wheda ha gı̨ı̨wǫ, hanìkò į̀le gòhdı. 21 Paul naetła kwe, hagòhdı, “Nǫ̀htsı̨ hanıwǫ nı̨dè k'achı̨ jǫ ts'ǫ anahde ha,” gòhdı. Eyı tł'axǫǫ̀ elàcho t'à kǫ̀ta Ephesus gots'ǫǫ̀ naèhɂe. 22 Kǫ̀ta Caesarea, ekǫ dàèhtła. Nǫ̀htsı̨ wecheekeè gots'àèhtła xè gots'ǫ̀ goı̨de, eyı tł'axǫǫ̀ kǫ̀ta Antıoch ts'ǫ̀ ajà.

23 Whaà-lea ts'ǫ̀ eyı nàı̨dè. Eyı tł'axǫǫ̀ eyı nèk'e gota k'eeda, Galatıa nèk'e eyıts'ǫ Phrygıa nèk'e hazǫǫ̀ nàhtła. Nǫ̀htsı̨ wecheekeè hazǫǫ̀ gınì nàtsoò agǫ̀ǫ̀là.

24 Ekìıyeè k'e Israel got'ı̨į̀ Apollos wìyeh, Alexandrıa gots'ǫ dǫ, kǫ̀ta Ephesus nììtła. Dǫ t'asìı k'èezǫǫ deè elı̨ eyıts'ǫ Nǫ̀htsı̨ Nı̨htł'è sı deghàà yek'èezǫ. 25 Gots'ǫ̀ K'àowo wegodıì nezı̨ı̨ hoghàweètǫ hǫt'e. Ededzeè t'à sıì dǫ ts'ǫ̀ goı̨de eyıts'ǫ Zezì wegodıì hotıì nezı̨į̀ dǫ hoghàgoèhtǫ. Hanìkò John-Baptıst dànì dǫ hoghàgoehtǫǫ sìı eyı zǫ k'èezǫ. 26 Apollos ełègehdèe-kǫ̀ edèdaedı-le xè dǫ ts'ǫ̀ goı̨de. Prıscılla eyıts'ǫ Aquıla gıìkw'o tł'axǫǫ̀ edekǫ̀ ts'ǫ̀ gok'èehtłaà agı̨į̀là. Nǫ̀htsı̨ wegodıì t'à deghàà gıts'ǫ̀ xàyaı̨htı.

27 Apollos, kǫ̀ta Achaıa ts'ǫ̀ ade ha nıwǫ t'à Nǫ̀htsı̨ wecheekeè gogha sìghà adı. Eyıt'à ekǫ Nǫ̀htsı̨ wecheekeè ts'ǫ̀ wegha egı̨ı̨tł'è, hagedı, “Dıı dǫ naxıxè at'ı̨į̀ aweahłe,” hagedı gı̨ı̨tł'è. Apollos ekǫ nììtła ekò Nǫ̀htsı̨ wesǫnıwǫ t'à gıgha ehkw'ı-ahodıì agejàa sìı hòtł'ò gots'àı̨dì hǫt'e. 28 Israel got'ı̨į̀ ełegeèhdì ekò, Apollos gonı ts'ǫ̀ hòtł'ò xàyaı̨htı. Nǫ̀htsı̨ Nı̨htł'è ghàà Zezì Chrıst hǫt'e hadıì gots'ǫ̀ goı̨de.

<- Zezì Wecheekeèdeè 17Zezì Wecheekeèdeè 19 ->