47
Ngictaungo tatahau matacde
Yegecgareng yearu. Kora medacfora yeni mitiyegec yofi heigec.
1 Ngiha ngiha sasawa, ngeni mari kpema Anutuac yegec sogac sogaigoc dendzerenggema heimibisia. 2 KEBU Engenatoa ye bibiagoc, ye bangectoa bangec imoac ngictautoa. 3 Ye ngiha ngiha memayunuma nenang bageu faiyunuec. Ye bangec monnunac ngicngac hanininaac bageau faiyunuec.
4 Yeng Yakoboac songo negendeac amma bangec imoc meisinggeu Yakobongo imoc negenu wiac engena anec. Kebungo bangec imoc maridzominggac arennu nemmeec. Selac
5 Anutungo sogac sogaiac arogoc kurumennu enec. KEBUNGO trampet udumengtoagoc kurumennu enec. 6 Ngeni Anutuac oheha mema yegec heima eriendzong memima yegec heimibisia. Ngeni ngictaunina yaiyo kpemima yegec heimima dedengerec yegec heimibisia.
7 Anutu ye bangectoa bangec imocac ngictau. Ngeni yeac yegec heimima ye dengerebisia. 8 Anutu ye ngictau amma bangec monnunac ngicngac areng kucgoc garengyunuma kecde. Ye ngictau tataha kpetiacfu tacde.
9 Ngiha ngiha yeneac ngictauac medacfocngina yeni Abarahanggac Anutu yeac ngicngacfora. Nga yeni hama kpedzucnema tacgecde. Ngicngac bangectoa bangec imocac kaso amma kecandae, yeni Anutuac ngic. Imocac ye afehema afehekecbesonga.
<- MITIYEGEC 46MITIYEGEC 48 ->