EPHETEA
Veia Pawluha Cayuk
Pyenhlüma
Ephetea vei Pawluha ca yuk hin akcüka “Pamhnama nümnak üng mhnünmceng naküt atänga law lü khankhaw ja mcea veki naküta lua Khritaw cun kyaki” ti üng sängeiki ni (1.10). Jesuh Khritaw üng khyangmjü yümmat lü Pamhnama nümnak üng khyange ami xünsei vaia a jah nghuinaka pi kyaki.
Ephet caupa ma da ta, ca yuki naw Pa Pamhnam naw a khyange a jah xüa tuilam üngkhyüh yümmatnaka mawng cun a mdäm law, Cakpa Jesuh Khritaw naw ihawkba ami mkhyenak üngkhyüh a jah mhlät ja nawnei ja ihawkba Pamhnama dämduhkia khyütam naw Ngmüimkhya Ngcim üngkhyüh ngsingnak a jah pet ti cun ngpüiki. Anghngihnak ta ca khekie cun Khritaw am ami yümmatnak üng ami xüngsei hin ami ngneisak üngpi a ve law vaia phäha ni.
Pamhnama khyange Khritaw am ami yümmatnak cun Msuimcäpnak khawhah sumeiki: Sangcim cun pumsaa mäi law lü Khritaw cun a lu, am ani üng imloa mäi law lü Khritaw cun kittunga lung, am ani üng, nghnumia mäi law lü Khritaw cun kpamia kba a mtumtäng ni. Khritaw üng Pamhnama bäkhäknak naw cayuki kpüi lü akhlüng kunga ngthu am pyenki ni. Anaküt cun Khritawa mhläkphyanak akvai, amät petmsawtnak, mhläteinak, bäkhäknak ja ngcimngcaihnake üng hmu päihki.
Amawng Ktawie
Pyenhlüma (1:1-2)
Khritaw ja Sangcim (1:3—3:21)
Khritaw üng sak kthai (4:1—6:20)
Akpäihnak (6:21-24)

1 Ngs 18:19-21; 19:1Khritawa ngsä vaia Pamhnam naw a xü Pawluh üngkhyüh ni —

*Sitih lü Khritaw Jesuha hnu läkie Epheta veki Pamhnama khyange veia ni.

2 Mi Pa Pamhnam ja Bawi Jesuh Khritaw naw ami bäkhäknak ja dim’yenak ning jah pe se.

Khritaw üng Ngmüimkhya dawkyanak

3 Pamhnam ja Mi Bawi Jesuh Khritawa Pamhnam veia jenak mi mtheh vai u! Khritaw üng mi yüm mata phäh ani naw khankhaw pea ka Ngmüimkhya dawnak naküt mimi üng jah pe lü dawkyanak pi jah peki. 4 Pamhnam naw khawmdek am a mhnünmceng ham üng mimi cun Khritaw üng xüngsei lü ania hmai maa ngcimcaih lü vecawh vaia a jah xü ni.

Isetiakyaküng a mhläkphyanaka phäh ni. 5 Pamhnam† cun naw Jesuh Khritaw üngkhyüh a jah ca vaia a mkhyah päng ni, ahin cun ania xenak ja bünaka kyaki ni. 6 A mhläkphyanaka Cakpa amdanga a jah peta phäh jomahkia a bäkhäknak mi mhlünmtai vai u. 7 Khritawa thia‡ phäh lätnak mi yahki acun cun mi mkhye mhlätnak ni. Pamhnama bäkhäknak hin däm da ve. 8 Acuna bäkhäknak am a mät naw ksingnak ja themnak jah peki. 9 Pamhnam naw i nüm’yanki ti cun pawh lü ngthupki a bü cun Khritaw üngkhyüh kümcei khaia a mkhyah päng cun jah ksingsaki. 10 Ahina bünak cun akcün a pha law üng a küm law käna mce ja khankhawa veki naküt avan Khritaw lua kya lü ania kea jah ta law khai.

11 Anaküt cun Pamhnama nümyan ja a titänga ve lü Pamhnam naw a khyanga kya lü Khritaw am mi yümmat khaia jah xü hin akcük üngkhyüh ania bünak am a mkhyah päng ni. 12 Khritaw mi na äpei makia mimia phäha, Pamhnama hlüngtainak mi mküimto vaia phäha kyaki.

13 Nangmi pi ngthu kcang, Thangkdaw nami ngjak naw küikyannak da ning jah lawpüi lü Pamhnama khyanga nami kyaki. Khritaw nami jumei ja Pamhnam naw a ning jah ka tia msingnak cun a ning jah bekhütnaka Ngmüimkhya Ngcim ning jah peki ni. 14 Pamhnam naw a khyange khyütam a jah peta kba mimi naw Ngmüimkhya Ngcim mi yahkie, acun cun Pamhnam naw a jah kümbekia mhlät cun jah ksingsaki. Pamhnam naw mküinak yah se.

Pawluha ktaiyünak

15 Acunakyase, Bawi Jesuh nami jum ja khyang ngcime nami ja mhlänak ka ngjak üng, 16 nangmia phäha a bäkhäknak anglät se mhlünmtai lü ka ktaiyü üngpi ning jah süm ni. 17 Ka ktaiyünak ta mi Bawipa Jesuh Khritawa Pamhnam, jomahkia Pamhnam naw Ngmüikhya ning jah pe lü acuna Ngmüimkhya naw kthemnak ja amät ksingnak a ning jah pet vaia ni. 18 Akvai nami hmuhnak thei vaia nami mlunga nghmawngnak vai Pamhnama veia ka ktaiyüki. A ning jah khünak üng äpeinak i ti cun nami ksingnak vai ja a khyange üng khyütam a jah pet ihlawka müncam phyakia dawkyanak daki ni, 19 ani mi jumeikia khana a johita khut bi cun ihlawka dämduhki ni. Mi khana khut bikia johit cun ktha mah säihki ni. 20 Acun cun Khritaw thinak üngkhyüh mtho be lü khankhaw pea a khet lama a ngawhsak, 21 Khritaw naw ngvaie, khankhawa anataknake, johite, bawie naküt, hina khawmdek khan däka am kya velaw khaia khana pi jah upkia kyaki ni. 22 Acunüng Pamhnam naw anaküt, ania khaw kea a tak, anaküta khana lua kya khaia sangcim üng a pet, 23 acun cun ania mtisaa kya lü ani üng kümceiki cun anaküt kümceisaki.§

Ephet 2 ->