2 TIMOTI 2

1 Anĩ nigin, õ, neu kesu, Kristus Jesus nẽ wau ifenẽya bun megeir uno. 2 Musei meleid bun aya wogõ au di, karĩ won anĩ, karĩya biya tamo anidi ufelnẽdiyouf, ago di, idi bagam tunĩ ifelnẽdiya kisi feleyauf. 3 Kristus Jesus nẽ kusĩ tamo biya gen, õ amã geid darau karĩ taul fen, tafarauf. 4 Kusĩ tamo ĩ tamo ege neid tobonuneid to kababal fef, ĩ yogon mudur ado anĩ wau al fouf nigin orof. 5 Age fiya gen, gudu reya tamo ĩ gudu ref, ĩ gudu reya nẽ suma to dõ fouf are, ĩ uyu irouya nẽ teter to yalouf. 6 Kabĩ tamo kabĩ totol yaledig ĩ, ketem kaũ yalouf. 7 Aya orok anĩ kisi wo, Odug enei ganan nigin kisi fokõ fonõf.

8 Jesus Kristus laa bunem kel fã yen ĩ, Dawid nẽ ibor bun tamal anĩ karĩ walauf. Enei are neu biya od, 9 enei nigin aya darau ale fen, mosor tamo gen kokolin difiyan. Ani ere, Negur nẽ od kokolin fiya sã. 10 Anĩ nigin, aya igirnẽdin anidi nigin, ereb ereb ganan bun feseya sã afaredig, are idig isennẽya Kristus Jesus bun ibodok anĩ, fula fiya medeĩya ibodkeleya ado dalouf nigin age afedig.

11 Od enei momoi bagai:

Ada ĩ weim gare taun ouf are,

adag ĩ weim mata tabodõf.

12 Ada feseya sã tafarauf are,

adag ĩ weim lo fiya nẽ mudur tabodõf.

Ada ĩ nigin wa tafouf are,

ĩg ada nigin wa fouf.

13 Ada to dõ tafoufeg,

ĩ de agef dõ fouf,

ere nigin, ĩ yogo nigin wa fiya kisi feleya sã.

Kabĩ Tamo Negurem Ile Fen, De Yen

14 Idi ereb ereb enei nigin toku wedereid fokõ wouf. Negur mala bun, od luwa irouya nigin wedereid urou, are kaũ sã, are karĩ def anidi tadũ difedidig dogol. 15 Õ Negur mala bun, kabĩ tamo ile fen, de youf, are kabĩ tamo ĩ yogon kabĩ nigin to mama fouf, ĩ momoi od tutuk ifelnẽdiya nẽ kabĩ el fe irouwauf anĩ, wõ wouf nigin, kabĩ totol bagai walouf. 16 Negur sã ado kaũ sã nẽ od so wiyẽf, ere nigin, idi anĩ bun dilelef are, fau gai momoiya sã bagai wowã douf. 17 Idi neid ifelnẽya kaisã bagai gedi gen iyokalauf, idi atun are Himeneus Filetus ado, 18 idi momoi nẽ anĩ so difiyẽ diyalelen. Idi dirõdig, mata kel fãya are mogo wõ yen, age de fen, tunĩ neid momoiya daũ difef. 19 Anĩ ere, Negur nẽ gariya totol ifaref, itotoya enei bun megeir fef, “Aib idi yogon are Odug ĩ keleĩ,”[a] ado, “Ganan idi Odug yana kurõ difesif, sesen bun tamal falei douf bagai.”

20 Fõ odug taka bun, safina ereb ereb gariya fire fire nem dinon are dibodok, tunĩ gol ado silwa nem, tunĩ aa nem ado mafer nem dinon, tunĩ kabĩ odug ifenẽya nẽ ado tunĩ kabĩ nanaal ifenẽya nẽ. 21 Tamo taka ĩ, sesen enei bun tamal amuyẽ anĩ kulo felef are, ĩ fau kabĩ biya ifenẽya nẽ wõ youf, ĩ fateulouf, Marau mala bun, kabĩ biya yaleya kisi feleya wõ ye fen, kabĩ biya ganan ifenẽya nẽ wõ youf nigin saika fouf.

22 Oosi nẽ bouwa oroya sane so wiyẽ, ago fen, madur bagai ibodõya, momoiya, wau laa fiya ado, wau inosiya anĩ, aib idi waud karẽtut bun Odug diweignek anidi geid, dõg. 23 Neneya ado wadã keleĩ nẽ luwa irouya anĩ to fedẽ wo, ere nigin, õ keleĩ, are anĩ bunem kiwai wõ yedig. 24 Odug nẽ ferfer to kusĩ youf bagai, age fiya ban, ĩ tamo kayau ganan nigin imatẽya ifelnẽdiyouf, ifelnẽdiya kisi feleyauf, to seye youf bagai. 25 Idi ĩ kiwai difenek anidi molol nem wedereid urouwauf, ago di, Negur idi waud falei fe di, idi momoi nigin keleĩ youf nigin wau iseya adouf. 26 Anĩ bunem, idi wedereid fokõ ye fen, Satan nẽ kor bun tamal, in oroya dõ difouf nigin Satan gei fedin anidi ditor diyawauf.

<- 2 TIMOTI 1 2 TIMOTI 3 ->