1 Mndewa Mulungu kamulongela Musa, 2 “Walagilize Waisilaili wamulave kunze ya lago chila munhu yeli na utamu wa mbende, chila munhu yolawigwa na ufila na chila munhu yambule mwiko kwa kudalisa mtufi. 3 Walaveni kunze ya lago wanhu wawo wose, wawe walume hebu wanaake, muladi sekewaditende lago jangu donikala hagati yawo jambule mwiko.”

4 Waisilaili watenda ivo, wawalava kunze ya lago. Watenda fana Mndewa Mulungu viyamulagilize Musa.

5 Mndewa Mulungu kamulongela Musa, 6 “Walongele Waisilaili, ‘One munhu yoyose, mulume hebu muke yahamuhasanya miyage kwa vovose na ivo kuleka kuwa mwaminika kwa Mndewa Mulungu, munhu iyo kabananga, 7 baho kolondeka yalonge kwa mulomo uhasanyi wake uyatendile. Kolondeka yalihe kwa ubananzi wake kwa kongeza hanhu ha tano na kumwing'ha ija yamuhasanye. 8 Mbali one munhu yahasanyigwe kadanganika na kabule ndugu wa habehi yoyodaha kuhokela chinhu icho, basi maliho kwa ubananzi yezalavigwa kwa Mndewa Mulungu kwa ichimu cha wakulu wa nhambiko. Maliho yayo yezalavigwa hamwe na bebelu da ng'hondolo da kuilumba dondadisang'haniligwe kutendeligwa kuilumba kwa ichimu cha uhasanyi wake. 9 Chila nhosa ya vinhu velile va Waisilaili vowomulavila mkulu wa nhambiko, vizakuwa va mkulu wa nhambiko iyo, 10 na chila chinhu chelile cha kugaligwa kwa mkulu wa nhambiko, chizakuwa chake.’ ”

11 Mndewa Mulungu kamulongela Musa, 12 “Walongele Waisilaili, ‘One muke wa munhu yoyose yahaga na kuleka kwaminika kwa mulumake, 13 kwa kugona na mulume imwenga bila mulumake kuvimanya, kambula mwiko hata one habule munhu yawonile chiyatendile kwaviya hagwiligwe ugoni. 14 Mulumake yahengiligwa na migongo na kumuwonela migongo muke wake yambule mwiko, hebu one yahamuwonela migongo muke wake hata one muke iyo hambule mwiko, 15 baho mulume kezamgala muke wake kwa mkulu wa nhambiko, na kulava nhosa yoilondeka, chilo imwe ya usage wa shayili, mbali bila kuguma mavuta na ubani, kwaviya ni nhosa ya usage ya migongo, nhosa yoilavigwa kwa kulagusa ubananzi.

16 “ ‘Mkulu wa nhambiko kezamgala imwanamke habehi na kumwimiza haulongozi wa Mndewa Mulungu. 17 Mkulu wa nhambiko kezasola mazi yelile muna ichia cha ulongo, maabaho kezasola timbwisi dili hasi ya hema da Mulungu na kudiguma muna yamazi yayo. 18 Maabaho mkulu wa nhambiko kezamwika mwanamke iyo haulongozi wa Mndewa Mulungu na kumgubula nyele zake na kumwing'ha nhosa iyo yoilavigwa kwa kulagusa ubananzi ili nhosa ya usage ya migongo. Mkulu wa nhambiko mwenyewo kezakwamhilila chia chiya chili na mazi yeli usungu yoyogala duwilo. 19 Maabaho mkulu wa nhambiko kezamulahiza mwanamke iyo na kumulongela “One hugonile na mulume imwenga na kuitenda wambule mwiko kuno kuna mulumako, hwizapatigwa na duwilo dodigaligwa na mazi yano yeli usungu. 20 Mbali fana kwaga kugona na mulume imwenga na kwambula mwiko kwa kugona na mulume imwenga yeli siyo mulumako, 21 Mndewa Mulungu yakutende uwe duwilo chilaho kwa wanhu wako, sekeulele na munda wako umeme. 22 Mazi yano yoyogala uduwilo yengile mmunda wako na kukutenda sekeulele na munda wako umeme.” Mwanamke iyo kezakwidikila, “Ivo.”

23 “ ‘Maabaho mkulu wa nhambiko kezakwandika maduwilo yano muna ichibende na kuyasunha muna yamazi yeli usungu, 24 nayo kezamng'wiza mwanamke iyo mazi yayo yeli usungu yoyogala duwilo, nayo yezakwingila mgati yake na kumgalila mawine makulu ng'hani. 25 Maabaho mkulu wa nhambiko kezasola nhosa ija ya usage ya migongo muna yamakono ya mwanamke ija na kwinula uchanyha kwa kumulavila Mndewa Mulungu, na kuigala hana ulupango. 26 Maabaho kezasola ganza dimwe da nhosa ya mhule kwa lukumbuso lwa kuitimbula hana ulupango. Kezamng'wiza mwanamke mazi yayo. 27 Yahakomeleza kung'wa mazi, one yahambula mwiko na kuleka kwaminika kwa mulumake, mazi yayo yoyogala duwilo yezamgalila mawine makulu ng'hani, munda wawe wizamema na hezalela. Mwanamke iyo kezakuwa duwilo mwa wanhu wake. 28 Mbali one hambule mwiko kwa kugonile na mulume imwenga na kela, basi kailegeha na kezadaha kupata wana.

29 “ ‘Ino iyo ndagilizi kusonhela migongo ihawa mwanamke, ingawa kolangulizigwa na mulumake, kezakwaga na kuitenda yambule mwiko, 30 hebu mulume yahengiligwa na migongo na kumuwonela migongo muke wake, kezamwika muke iyo haulongozi wa Mndewa Mulungu, na mkulu wa nhambiko kezatenda fana viili ndagilizi iyo. 31 Mulumake kezakuwa kabule ubananzi wowose, mbali mwanamke kezatagusigwa kwa ubananzi wake.’ ”

<- Peta 4Peta 6 ->